لخبطه و كعبله و حاجات كتير

بقالي اكتر من سنه مكتبتش يمكن لان الكتابه ملهاش لازمه واحد بيكتب في فراغ للهوا و محدش بيقرا اللي بيكتبه دلوقت انا بقيت علي مشارف ال 39 و زي ما انا

من اكتر من 10 سنين عملت البلوج ده و كنت ساعته في اواخر العشرينات متخرج بقالي بتاع 4 او 5 سنين و كنت ايامها كل اللي شايفه انه يا عيني قربت علي ال 30 و لسه مش عارف اتجوز و كده

دلوقت بقي انا فعليا بقيت علي وش ال 40 و انا زي ما انا و انا و لا حاجه 

و الله يا جماعه في خلال ال 10 سنين اللي فاتوا دي ما اتغير في حياتي غير ان ودعت عدد من اقربائي و احبائي بسبب وفاتهم و اقسي سنه فيهم كانت السنه الي فاتت اللي توفي فيها عدد 6 افراد من الاسره ما بين اخوات للام و اخوات الاب و 2 من اولاد عم الاب

انا الايام دي بجني ثمار الفشل و الوحده و الحزن فعليا شبابي انتهي و شعري  بدء يبقي ابيض حتي في شعر الذقن و الشنب و الجسم

بقيت افتكر المواقف لو حد فكرني بحاجه الاقيها من 7 سنين فاتوا 6 سنين فاتوا  لدرجه ان الذكريات بتاعه الفيس بوك بلقيها بتفكرني بحاجه انا فاكر انها كانت قريب الاقيها من 9 سنين  او 7 او 8 

فعليا عمري اتسرق الايام جرت و عدت و انا زي ما انا

لا بيت لا اسره لا حبيبه و لا متعه في الحياه 

انا بالظبط عامل زي اللي حطوه في تلاجه و طلعوه بعد 10 سنين اكتشف انه بقي 40 سنه 

محستش و لا عيشت و لا اسفدت فيهم و بصيت لقيت نفسي راجل كهل عندي 40 سنه 

اه كل الناس هيجي يوم و هيبقي عندها 40 سنه ده صحيح بس الحال اللي انت فيه وقتها يفرق كتير

لو عندك بيت و اسره و اولاد حتي لو كانوا صغيرين لان معظم الناس بتتجوز في العشرينات و اول الثلاثين فهتلاقي نفسك شبه الباقي

لكن لو زيي هتلاقي نفسك و لا حاجه هتلاقي نفسك بتقاوم السن ده بتكره تسمع انك بقيت في السن ده

لانك بتحس بفشلك و تأخرك

انا ساعات بقول لنفسي ما انا السبب ما كنت اتهببت اتجوزت اي حد و خلاص و هو كل الستات شبه بعض في الاعضاء التناسليه و الجسد و لو علي الوش متبصلهاش يا عم او اشغل نفسك عنها في اي حاجه

و كانت اي ست هتجبلك العيال و هتعملك الاسره دي و اهو علي الاقل كان بقي في اسره ميبقاش لا اسره و ترقي و ارتفاء في الشغل

ساعات بسأل نفسي علي كل اختيار اختارته هو انا غلطت لما قولت بلاش و لا لما قولت دي مش عجباني او دي مش مناسبه ليا مع اقتناعي التام وقتها اني مكنتش هبقي مبسوط مع البني ادم اللي لا عاجبني شكلا و مضمونا و لا في حاجه حتي مخليه في جاذبيه بيني و بينه بس اهو كنت هبقي زي بقيه الناس

من يومين شوفت واحد صاحبي متجوز واحده لولا الحجاب تحس ملامحها راجل و ده اتجوز من 3 سنين و هو في سن ال 35 يعني متأخر بس دلوقت عنده بيت و عنده طفل و عنده حياه اه برضه وضعه زيي و مزدش في الشغل و مترقاش و مبقاش حاجه رغم انه بيتعب و بيشقي و اشطر من ناس كتير بس علي الاقل خد نص العمي

خصوصا في وقت الوباء اللي احنا فيه ده الواحد حس بالوحده جدا بالنسبه لي انا كل صحابي المقربين سافروا بره مصر و مفضلش حد منهم هنا

و اللي موجود يعتبر اصدقاء الدرجه التانيه يعني مش مقربين و دول بقي متجوزين و مشغولين بحياتهم كنت بقعد ازن و الح عليهم علشان نخرج كل اسبوع و لا 10 ايام مره اهو الواحد يقضي شويه وقت و يغير جو و طبعا دلوقت الموضوع ده مبقاش نافع بسبب الكورونا

لما نتكلم بالتليفون و اسألهم بيعملوا ايه يقولوا بنلعب مع الاولاد او قاعدين مع الجماعه بنتكلم حتي هما وقتها حسوا بنعمه الجواز اللي كانوا عمالين يشتموا فيه

انك تلاقي بيت و اسره و حضن حتي لو مش راضي عنه بس في وقت زي ده بتعرف قيمته جدا

لما تلاقي حد معندهوش حاجه و انت عندك

من اكتر الحاجات اللي بتأثر فيا صور الاطفال اللي بتلعب مع ابوها او امها و الفيديوهات بتحسسني فعلا اني مش بني ادم و مش عايش و بحس بحزن قاتل جوايا علي حالا و ساعات كتير بعيط

انا الفتره الاخيره دي بقيت بعيط كتير جدا رغم اني في الطبيعي شخص صلب و دمعتي عزيزه بس صعبان عليا نفسي و حالي

صعبان عليا ان عمري راح و عجزت و لسه مبقتش عايش حياه طبيعيه لا زوجه و اطفال و لا بيت

انا مره و انا ببص علي شقتي قعدت ابص لها و اسأل نفسي يا تري هسكن فيها يا تري هيبقي فيها صوت و حياه و اسره و لا هتفضل مهجوره كده متشبطه و مستنيه الزمن

ببص لصحابي بلاقي ولادهم ما شاء الله الي بقي عنده 12 سنه و اللي بقي 8 و اللي بقي 10 و انا لسه مبدأتش اصلا

انا بصراحه مبقتش عارف اعمل ايه و مبقتش حاسس بحياتي  و حاسس اني مجرد كم مهمل

في ناس تقولك ما تصاحب و لا ترافق  اولا انا صعب عليا جدا اعمل الغلط ده و لو عملت عمري ما هوصل اني انام مع واحده  ممكن لو اتجرأت هبوسها همسكها  هحضنها لكن امارس معاها الجنس مستحيل 

حتي اللي بيتخيل انه لو ماشي غلط هيبقي بيعوض شويه احب اقوله ان الغلط برضه مش بيديك حاجه

و الست اللي بتمشي معاها بتديك اللي علي مزاجها و حتي لو نامت معاك بيبقي علشان هي عايزه كده و ليها رغبه و ناقصها حاجات من جوزها  و في الاخر برضه هيجي وقت و هتفوق انها بتعمل غلط و هتسيبك و تلاقي نفسك انك ضيعت برضه وقتك معاها

فالحل هو الصح لان الصح هو اللي ربنا راضي عنه و مقبول اجتماعيا و اخلاقيا و هو الاكثر استمراريه

المشكله الكبيره اني الايام دي بقيت فعلا بحس اني انا اللي عملت في نفسي كده و كنت المفروض اتجوز و خلاص و اجيب عيل زي بقيه الناس و العروسه عجباني و راضي بيها او لا مش هتفرق

و للعلم انا مكنتش بدور علي الحب بس انا كنت بدور علي حد ابقي حاسس انه عاجبني شاددني حاسس اني عايز اتجوزه مش اشوفه شكله او اتكلم معاه ابقي مش عايز ابصله او حاسس اني و انا باصص له مش مرتاح 

مكنتش متخيل اني هوصل العمر ده و انا زي ما انا مكنتش متخيل اني هبقي قرب ال 40 و لسه زي مفتحتش بيت مكنتش متخيل اني لو ربنا كاتبلي هبدء حياتي و انا راجل كهل عجوز و يبقي عيالي في ابتدائي و انا عندي 50 سنه

انا ساعات بقعد افكر طيب هو انا لما اطلع معاش هقدر اكمل صرف علي تعليم عيالي دي ازاي بالمعاشات التعبانه بتاعه مصر

و هفتح بيتي ازاي

انا تعبت و حاسس بقهر و حسره محدش متخيلها و علاقتي بربنا بقت اقل كتير من زمان

يا ريت يا جماعه اي حد يقرأ البوست ده يدعيلي ربنا يحسن احوالي و يهديلي نفسي و يقربني منه و يفرج كربي و يرزقني من عنده بالسكينه و الهدوء و يعفني بالحلال و يرزقني بالزوجه الصالحه

السابعه و الثلاثون

السلام عليكم  بقالي مده مكتبتش كالعاده يمكن علشان الكلام ملهوش لازمه او يمكن علشان زهقت من اني افضل اكرر في كلام زي ما هو من 10 سنين لدرجه الاملال
من اسبوع تقريبا قفلت ال 37 و بدأت رحلتي نحو ال 38
بدون تغيير و بدون تجديد
احباط علي مستوي العمل و علي مستوي الحياه 
احساس رهيب بالعجز و بالثبات و ان الدنيا واقفه عندي و بس
عايش ليه معرفش طيب منتظر ايه من الحياه برضه معرفش
حاله تامه من الضباب و انعدام الرؤيه لمستقبلي في الحياه و في الشغل و في كل حاجه
مفيش اي مؤشرات للتحسن للافضل و يمكن كمان مفيش امل
اكتر من 7 سنين في رحله البحث عن زوجه و مفيش توفيق 
ثبات في العمل رغم بذل مجهود كبير جدا و القيام بانجازات و حاجات كبيره بشهاده كل الي حواليا بس لا في تقدير و لا في معامله كويسه و لا في فرصه للترقيه
كل ده انعكس علي علاقتي بربنا  و خلاها اسوء للاسف
كل ده هز من الثوابت اللي جوايا كتير 
انا كنت زمان فاكر اني لما امشي مستقيم و اجتهد و اعمل الصح في كل حاجه هلاقي كل حاجه حلوه لكن العكس هو اللي حاصل
و في المقابل كل اللي ماشيين غلط حياتهم تمام التمام و ممكن بدات علاقتهم بربنا تتحسن لما بدؤا يفقوا لنعمه ربنا عليهم اللي هما ميستهلوهاش علشان هما بيغضبوه و مش بيعموا اللي يرضيه
للاسف انا في وضع لا احسد عليه
احساس كده بالفراغ و اني مش عايز اعيش
خايف من كل حاجه
خايف من بكره اللي ممكن ياخد ابويا  و امي و هما دول الحاجه الوحيده الي في حياتي لأن لا شغل عاد نافع و لا في اسره خاصه بيا و بيت و اولاد
طيب هعمل ايه من غيرهم
طيب هيبقي ليا مين و انا راجل مقرب علي ال 40 و معنديش اي حاجه الا شويه فلوس يادوب حوشتهم علي مدي اكتر من 12 سنه شغل علشان اتجوز بيهم و كل يوم قيمتهم عماله تنزل مع الغلاء اللي بيحصل لدرجه اني ممكن اجي في يوم معرفش اتجوز نتجيه ان قيمتهم بقت صغيره جدا و ارجع لنفس مشكلتي اللي بدأت بيها حكايتي من 10 سنين
طيب اروح اتجوز اي حد لا عاجبني لا شكل و لا مضمون
طيب تصدقوا ان اللي عايزه موجود بس مش هينفع اتجوزها علشان متجوزه و عندها عيال
يعني كان ربنا بيعاقبني و بيقولي اللي نفسك فيه متوافر انت مش بتحلم بحاجه خرافيه بس يا حبيبي مش ليك انت تعرف انه موجود و بس لكن في حد غيرك خده
طيب اخرتها ايه يعني في حالي ده المفروض اعمل ايه 
انا نفسيا مدمر جدا  و حاسس كده بحزن قاتل اي حد بيشوفني بيحسه  و بيقولي باين عليك متضايق جدا
طبعا متضايق جدا لأني و الله ما استاهل اني حالي يبقي كده
انا و الله انسان بذرته كويسه لكن الاختبار بقي تقيل اوي عليا
اني اشوف الناس من حواليا كده بتتحرك و بتعلي و بتكبر و بتعمل بيوت و بتربي عيالها و بتفرح بيهم و انا قاعد كده زي ما انا ده شئ يقهر
اني كل شويه استحمل سخافه حد يقولي انت مش هتتجوز بقي ولا يقولي هو انت ملكش في الستات و لا ايه و لا تلاقيك مش طبيعي و ليك ميول تانيه و يتلموا مع بعض و يعملوا قعده علي قفايا بقي شئ مش قادر استحمله
انا مقتول يا جماعه و حاسس ان في حاجه في حياتي غلط  وفي نصيبي و مش عارف سببها ايه
انا خايف من اني مبقتش قادر ابقي نفس الانسان الكويس بتاع زمان و كل يوم بيعدي بيخليني افقد ثوابتي و مبادئي  و حاجات كتير كنت شايف انها صح و بترضي ربنا
انا تعبان جدا و مش لاقي حد ياخد بأيدي و لا يسمعني
و عمري ضاع و لسه بيضيع و انا مستني الفرج الي مش بيجي مع اني و الله سعيت و عملت كل اللي عليا
انا تعبان اوي و مش عارف اعمل ايه

و ضاع العمر يا ولدي

تقريبا بقالي 8 شهور مكتبتش حاجه جديده لان مفيش حاجه جديده
كلها 3 شهور و هيبقي عمري 37 سنه و علي وشك اني ابقي 40 سنه
و انا محققتش اي حاجه في حياتي لا بيت و لا اسره و لا اولاد ولا حتي حبيبه اعرف اخدها في حضني
و لا حتي حسيت كراجل بأحساس انك تبقي مع ست علي الاقل تحضنها تبوسها تلمسها  لو مقولناش ان المفروض اني ابقي علمت علاقه جسديه طبيعيه زي كل البشر 
الموضوع بقي متعب جدا الحرمان الجنسي وحش خصوصا لما تبقي ماشي  مستقيم و بيأثر علي النفسيه و علي رأي الراجل اللي كان بيديني كورس من سنتين و هو اصلا طبيب و تخصص في البيزنس و ساب الطب اللي مش بيمارس الجنس فهو انسان مش طبيعي و عنده اعتلال لأته عنده حاج من الحاجات الاساسيه مش بيلبيها فبالتالي مش  هيبقي سليم نفسيا علي الاقل
علي مستوي ا لشغل فانا مش محقق اي حاجه برضه مرمي في صندوق زباله و كل اللي في نفس المستوي الوظيفي بتاعي الفرق في السن بينا من 5 الي 7 سنين و كلهم ما شاء الله عندهم بيوت و اولاد و عايشين حياه طبيعيه ربنا يكرمهم و يزيدهم
انا مش بحقد علي حد علي فكره بس احساس النقص عن الواحد بقي كبير جدا
الواحد حاسس انه انسان ناقص مش طبيعي من كلامهم من نظراتهم من تلميحاتهم اللي ممكن تطلع بدون قصد بس تضايق جدا
ناس بتتكلم في تطوير حياتها اللي بدأتها يغيروا شقه و يدوروا علي مدرسه احسن لعيالهم يجيبوا عربيه جديده و ا نا لسه معملتش اي حياه
ناس بتتريق عليك و تقولك انت عايش ازاي كده من غير ست انت اكيد ملكش في الستات
و يجي واحد فيهم يقولك متجوزتش ليه كده غلط انت في سنك ده هتضطر تروح لسكه غلط علشان عندك احتياجات عايز تلبيها
و لا انت ملكش في الاحتياجات دي
الناس دي بتزود هم الواحد اكتر ما هو مهموم مش كفايه لما تبقي الوحيد اللي في السن ده  و مش متجوز  و بتحس بالنقص لوحدك لا لتلاقي كمان اللي يكئبك زياده و ينفخك زياده بتعليقاته و كلامه
باجي ابص علي حياتي الاقي مفيهاش حاجه حلوه يعني لو موت بكره مش هزعل
لا محقق حاجه في شغلي تخليني اقول اهو ربنا معوضني عن عدم وجود بيت و اولاد و لا عندي بيت علشان اعيش حياه طبيعيه
و للأسف مفيش في ايدي اي حاجه غير الانتظار و الالم و التعب 
قربي علي ال 40 محسسني اني انتهيت خلاص قبل ما اعيش
انا و الله ما عشت و ا لله ما لحقت اعمل حاجه و الله ما فرحت و الله ما لعبت و فجأه الاقي نفسي شعري بيشيب و بعجز و عندي 40 سنه يعني خلاص شبابي انتهي و انا مستفدتش بيه 
مكنش عندي ست استمتع بيها و تستمع بيا و نتجنن مع بعض و انا في عز شبابي و صحتي 
مع بدايه ال 40 تبدء امراض الذكورع تظهر و بدايات الضعف الجنسي و قله الرغبه و كده
تخيل انك يجيل ضعف من قبل ما اصلا تجرب و تتجوز ايام ما كان في قوه و فحوله
طيب ليه كده هو انا مش بني ادم زي ملايين البني ادمين
من حقي الاقي حد يعجبني و اعمل معاه حياه
و لا لازم احتار حه مش عجباني و لا تفنعني و اعيش مش مبسوط علشان يبقي عندي بيت بالشكل بس
انا تعبت جدا و الله و في حاجات مش قادر اقولها و لا اكتبها حاصله في حياتي من شهور
انا بدأت غصب عني افكر في الغلط لأني تعبت من الانتظار تبعت من اني استني السكه الصح بدون فايده
انا بقت تيجيلي خاجات غريبه معظمها ناتج من التعب النفسي 
انا مش عارف اعمل ايه و لا مين يساعدني و لا ارتاح ازاي
و الله نفسي اموت وارتاح بس الواحد خايف من الحساب برضه
من 9 سنين لما عملت المدونه دي متخيلتش اني هقعد كل ده بكتب في نفس الكلام و الحال ميتغيرش
10 سنين بحالهم عدوا و انا زي ما انا
احلي سنين عمري راحت علي الفاضي
يا ريت الواحد يموت و يرتاح
و اةةةةة يا افه

ليه المزز مش من حقنا

زي اي انسان قفا سالت نفسي ليه المزز مش من حقنا ليه غالبا لما بيجبولك عروسه و ترضي بيك غالبا بتبقي بجمال متواضع و ممكن تبقي وحشه كمان و ممكن مترضاش اصلا و يبقي ليها طلبات غريبه و عايزه شقه في المكان الفلاني و مهر مش عارف كام وكده
بس من الاخر المزز بمعني المزز اللي بنشوفهم مع شباب و رجاله زينا و نبقي هنتهبل عليهم و نريل عمرهم ما بيجوا في سكتك و لا في الجامعه كأصدقاء و لا صحاب من اي حاجه تانيه و لا حتي كمرشحات للزواج
في استثناء انك ممكن تلاقي مزه جامده مصاحبه عيل شبهي و شبهك قفا معفن بس دي غالبا بقي شايفه فيه حاجه عجباها و غالبا دمه خفيف او بتنبسط و هي قاعده معاه
لاحظت من معظم اللي اعرفهم و ليهم ارتباط بمزه ان كلهم بينهم قاسم مشترك الا و هو الفلوس
تلاقي الواحد من دول يا اما كان ابن ناس و داخل الكليه بعربيه و و لبس بقي براندات و نظارات شمس و مش عارف ايه بينما معظم الشباب في المتوسط اللي ابوه بيده مصروف علي قده و بيجي بالمواصلات العامه و اللي ساكن قريب شويه بيجي في تاكسي
ده غالبا بيبقي عنده ثقه انه لما هيتعرف علي زميله ليه و يكلمها حتي لو بغرض صداقه امش ارتباط امكانيه انها تصده او ترفض ده قليله جدا
و ده الواقع معظم المزز كان شلتهم من الولاد من النوعيه دي او اقل شويه بيجي بعربيه بابا و لا ماما الكليه و بياخد مصروف حلو يعزمها بيه علي حاجه ظريفه ( مش هي هدف البنت) بس الولد بيبقي شكله نضيف بينما المعظم شكله علي قد حاله
البنات دي انت اخرك تشوفهم من بعيد و ممكن تتكلم معاهم مره و لا مرتين في حياتك و تلاقي نفسك مش عارف تتعامل معاهم و تحول الموضوع من كلام بسبب في سكشن مثلا ولا  محاضره لكلام عام و صداقه لأنك ثقتك بنفسك قليله ان بنت زي دي ممكن تتعامل معك
و تعدي السنين و يخرج الشاب النضيف ابن الناس و تجيله عرايس مزز لأنه جاهز و سنه صغير و بابا جايب له كل حاجه يعني العربيه موجوده من زمان الشغل في مكان بمرتب كبير الاب ظبط ابنه فيه و الشقه مش مشكله بابا هيجيبها في مكان محدش يقدر يقول عليه لا
الشاب المتوسط بقي ممكن بالحظ او واسطه كويسه يدخل برضه في شغل بمرت بكبير و ينضم لقافله ولاد الناس و هنا برضه ممكن يعتر له علي مزه تتناسي انه مش ابن ناس اساسا و تتعامل مع الوضع الجديد اللي بقي فيه
نيجي بقي للمعظم من الشباب الي بيتمرمط علي ما يلاقي شغله تخليه يلبس كويس و يخرج في اماكن كويسه بس ده غالبا مبيقدرش يجاري ولاد الناس في شقه في مكان راقي و عربيه فخمه  و كده
لما تبص علي الشخص ده تلاقيه غالبا متجوز بنت مقبوله الشكل علي الاكثر لان ده المزز مش بتعدي عليه ده اولا لأنه ميقدرش يوفر طلبتها
ثانيا معظم المزز الا المعوايج او اللي بتقولك انا انسانه مستقله قويه  بتتجوز بدري قبل ما يكون الشاب ده اصلا عرف يبقي جاهز للجواز و لما بيوصل لمستوي انه يقدر يرتبط بيهم بيبقي بينهم و بينهم 12 ولا 13 سنه فرق سنه فيمنفعش يتجوزها اصلا
في رحله بحثي عن عروسه ناس نصحتيني كتير شوف زوجات صحابك عاملين ازاي علشان متقعدش تقول العرايس الي يشوفها وحشه و متعجبش و فعلا لما شوفت لقيت فعلا انهم من نفس العينه اللي بشوفها
بيبقي واصح جدا ان الشاب عرف انه ملهوش  نصيب الا انه ياخد من المجموعه المضروبه لأنه مش من الناس اللي تقدر علي طلبات البنات المزز
من كام يوم شوفت شاب في سني او اصغر سنه و راكب عربيه فخمه جدا و جنبه بنت مزه جدا و وراه في اولاد شكلهم يجنن
سألت نفسي ساعتها هو مش من حقي اعيش الحياه دي
ولو من حقي هعيشها امتي و انا عندي 36 سنه و مش عارف ابقي في 1 علي 100 من حياته
مفحوت شغل ليل و نهار و في الاخر عمري ما هتشابه مع الشخص ده  في حاجه لا في عربيته و لا بيته و لا مراته ولا عياله
ليه مكتوب علي اللي زيي ان كل حاجه في حياته تبقي درجه ثالثه او ثانيه علي احسن الظروف
الواحد حاسس ان اللي زيي حتي لما بيتجوز و بيعمل بيت ده لو عمل بيبقي الموضوع تحصيل حاصل مفيهوش اي انبساط بالحاجه اللي عملتها الا لمجرد انك عملتها
شئ محبط و محزن
و اه يا افه

عن الجنس نتحدث

اولا اسف علي غيابي الفتره الطويله دي حتي لوفي حد بيتابعني و بيقرا اللي بكتبه
بس للأسف انا نفسيا و معنويا من سيئ لأسوء
العمر بيجري بالواحد و  مش عارف امسكه و اوقفه او اهدي سرعته
كلها شهرين او بقي 36 سنه و ابقي علي بعد خطوات من الكهوله و اني ابقي 40 سنه
في الفتره الي فاتت بقت الرغبه الجنسيه مسيطره عليا جدا لدرجه اني بقيت عايز اتجوز علشان اشبع غريزتي مهما كان
مبقاش فارق الولاد  و الاسره و الاستقرار بس بقيت مش قادر استحمل الضغط النفسي الرهيب للأحتياج للجنس
دلوقت بدأت احس بالناس اللي الواحد بيشوفها بتجري ورا الستات و كنت بعيب عليها
دلوقت عرفت احساسهم و المهم
بحثت في الموضوع زياده و لقيت ان ممكن نلاقي رجاله متجوزه و ستات كمان في سني و محتاجين للجنس جدا رغم انهم متزوجين
كلنا نفكتر من فتره موضوع مدرب الكاراتيه اللي كان يعرف كذا ست متجوزه و بينام معاهم مع انه متجوز
اي واحد شاف الافلام دي كان يسشوف اد ايه الستات كانت مستمتعه جدا بالجنس و مبسوطه بيه بل  بالعكس هي اللي رايحه له برجيلها
مكنش في مقاومه مكنش في اجبار كان بمزاجهم رغم انهم متزوجات
واضح ان عندنا خلل في العلاقات الجنسيه الزوجيه و ده اللي خلي ستات متجوزه رايحه لراجل زي ده
و واضح ان راجل زي ده مش عارف يشبع من مراته فعرف عليها فوق ال 35 واحده
الغريب برضه في موضوع ان رغبتي الجنسيه قويه جدا هو انجذابي لستات متزوجه
يعني تلاقي واحده جسمها بايظ من الجمل و الولاده بس تلاقيها لما تعدي قدامي تسبب ليا اثاره قويه جدا مش بتسسبها بنت انسه  لابسه مايوه مش عارف ده خلل نفسي ولا  ايه
و لا ده علشان المفروض اني في الست ده هبقي متجوز فالمفوض هيبقي شكل مراني كده فالمفروض الشكل ده هو اللي بقي بيثيرني
طيب نرجع تاني لموضوع الرغبه الجنسيه انا بقيت بلاحظ ان في ستات كتير لما تتكلم معاها و انت في مصلحه حكوميه او مكان بتعمل فيه اوراق  تحسها مش علي بعضها
معظمهم فوق ال 35 بس بتحس من كلامها كده انها تعبانه او انها بتتكلم بطريقه مايعه تخليك مش علي بعضك
كدبت نفسي كذا مره و قلت يمكن علشان انا بقي الرغبه عندي قويه بيتهيألي ان ده بيحصل
بس سمعت كتير عن نفس الموقف من زملاء و اصحاب و هما برضه حاسين ان في ستات كتير كده و الصحاب دول متجوزين
الكوميديا بقي اني رغم اني بقيت  تعبان كده و هموت و اتجوز علشان الجنس فانا متهيألي اني ممكن الاقي نفسي بقي عندي مشكله نتيجه اني كبرت في العمر و معرفش استمتع زي ما كنت مثلا اتجوزت و انا في العشرينات
ان بقيت متضايق اني بتحول لكائن شهوني و رغبته بتحتل جزء كبير من تفكيره و بتدفعني اني كتير من الاحيان ابص علي ستات كتير
و احاول المح حاجه من مفاتنها و ابقي مركز قوي
انا مكنتش كده و مش حابب اني كده بس تقريبا ده جسمي بدء يزعق و يقول ان ناقصه حاجه و انا هاملها تماما
انا بلغت من حوالي 22 سنه و جسمي محتاج من السن ده للجنس ممكن يكون ده السبب في اللي انا فيه
طيب انا مليش في الحرام علشان خايف من ربنا و الحلال ربنا مكعبل سكته قدامي اعمل ايه علشان ارتاح
و اةةةةةةة يـــــــــــــا افه

عازب في سن ال 35

بقالي مده مكتبتش يمكن لأن الكتابه في نفسها بقت بتمثل حمل كبير و لم تعد الفضفضه عن طريق الكتابه مريحه و لا بتخفف عن الام الواحد
قد يكون البوست متأخر عن ميعاده السنوي اللي بدء من قرابه 7 سنين و فيه كل سنه بزود الرقم و اقول انا خلاص بكبر و مش عارف اتجوز و فرصي في اختيار عروسه كويسه بتقل لكن يا جماعه للأسف انا وصلت لمرحله اني مبقاش بشوف عرايس خالص
بقالي اكتر من سنه و نص مشفتش و لا عروسه و كل اللي بيترشح ليا بقي بينحصر في بنات صغيره اوي مبفكرش اشوفهم لأني متأكد ان فرق السن ده كبير و ان موافقتهم بيه من غير ما يشفوني فمعناه ان البنت اهلها حاسين ان فرصها في الجواز ضعيفه او ان هما فاكرين ان واحد في سني هيجي يدفع بقي مبالغ و يشيل العروسه بما انه لازم يعوض فرق السن الكبير ده بحاجه
كل واحد يسمع سني يحسسني اني خلاص قربت اموت و ان انا اللي اتسببت لنفسي في اني عازب لحد دلوقت
للأسف حالي النفسي بقي سئ جدا ما بين الرغبه في تكوين اسره و بيت و استقرار و وجود هدف في الحياه و ما بين الرغبه الجسديه اللي ربنا زرعها في الواحد  و اللي بدأت تضغط علي الواحد بقوه في الفتره الاخيره
انا حضرت كورس من فتره كان اللي بيشرح فيه دكتور بشري ساب الطب و تخصص في التسويق كان بيذكر ان الانسان الغير متزوج او الذي لا يشبع رغبته الجنسيه انسان مصاب غير سوي نفسيا غصب عنه  لما قال الكلمتين دول حسيت ان كل الزملاء الحاضرين بيبصوا عليا حسيت اني انسان ناقص مش كامل
انا دلوقت العرايس اللي بتتعرض عليا قد تكون معدومه او غير موجوده و زي ما ذكرت قبل كده انا دلوقت انسان كبير و علي حافه الكهوله كلها كام سنه و ابقي 40 مش هتلاقي بنت ناس حلوه و محترمه و صغيره اهلها يرضوا يجوزها ليا علشان انا راجل لقطه
بالعكس انا مبقتش لقطه خالص انا بقيت عمو عزيز
من سنين طويله شوفت مسلسل اسمه اهل الغرام كان في حلقه عن شاب بيحب بنت زميلته عمرهم 20 سنه في الكليه بس طبعا للظروف مش بيتجوزها و بيجي شاب عايش بره البلد بيطلبها و يتجوزها و يقولها انا عندي 35 سنه ضيعتهم في اني اكون نفسي و محتاج اني رتبط ببنت شابه نعيش مع بعض حياه سعيده
و بينتهي الحلقه علي جواز البنت بالراجل ده و اكتئاب الشاب اللي كان بيحبها
يوم ما شفت الحلقه دي بصيت للراجل اللي جه اتجوز البنت و خدها من حبيبها نظره انه حقير نظره انه انسان عايز ياخد زمنه و زمن غيره  و انه اتسبب بتحطيم قصه حب بين شابين و قولت في بالي اكيد البنت اتجوزته بس عمرها ما هتحبه و هتبقي دايما بتفكر في جوزها التاني و هتبقي علاقتها معاه سواء الشخصيه او الجسديه زي اللي مشتري جاريه لانها اتجوزته بسبب انه جاهز
دلوقت انا في نفس سن الشاب اللي جه من بره و عايز يتجوز يا تري لو اتجوزت هبقي بوظت علاقه البنت اللي اتجوزتها بواحد بتحبه و عايزه تتجوزه و يبقي ابو عيالها
يا تري اصلا في يوم هيبقي ليا زوجه و اولاد زي ناس كتير و الله بدأت اشك ان ده ممكن يحصل
في الصوره اللي انا حاططها هتلاقي انها بتقول ان اللي سنه 35 و لسه عازب في 25% منه عايز يتجوز و 27% عايز يفضل عازب و 26% منه عايز يبقي راهب و 22% منه رغبه في انه يبقي اب الصوره دي واقعيه جدا الواحد ممزق ما بين كل هذه الحالات عايز يتجوز و شايف ان القطر فاته نفسه في ولاد بس خايف ميبقاش عن نفس لتربيتهم بما انه عجز
انا انتهيت نفسيا يا جماعه كل يوم بشوف شباب اصغر مني بكتير داخلين بيوتهم و انا عمال اتفرج عليهم ساعات بحس ان شكلي شاذ وسط الناس و اني فيا حاجه غلط 
يوم ما بدات المدونه دي متخيلتش اني هقعد قرب ال 8 و لسه حالي متصلحش بالعكس دي بيبقي اسوء 
الواحد وصل لمرحله انه ممكن يعجب ببنت يلاقيها في الكليه لسه و ممكن تقوله يا عمومتخيل انك ممكن تلاقي اللي نفسك فيها بس سنك يمنعك من انك تجوزها في اي ذل و مهانه اكتر من كده
ساعات بقول ايه اللي الواحد ممكن يخسره لو مات دلوقت لما بحسبها مش بلاقي حاجه انا عايش زي الحمار بشتغل و بنام لا عندي متعه و لا انبساط في الحياه 
لو ربنا كاتب عليا افضل علي الحال ده فيارب ميكنش عمري طويل و اخلص بدري بدري ما هي الحياه مفيهاش حاجه تستحق اني افضل فيها
و اةةةةةةةةةةةةةةةةةةةةةة يا افه

انا و الاستاذ مجدي

الاستاذ مجدي او المهندس مجدي كان بيتنادي باللقبين بدايه معرفتي ليه كانت بعد استلامي العمل بسنه او اكثر هو راجل كبير و شاطر جده في تخصصه الهندسي اللي تصادف انه نفس تخصصي و كان عمره وقتها 55 او 56
في يوم و انا قاعد مع احد الاشخاص العاملين عندنا و هو عباره عن عامل بس عجوز كان قاعد يقول الاستاذ مجدي ده ممتاز و راجل اخلاق و كل حاجه بس فيه سر غريب محدش يعرف متجوزش ليه لحد دلوقت او متجوزش ليه اصلا قام واحد من الي قاعدين ضحك و قال تلاقيه ملهوش في الستات او تلاقيه عدم المؤاخذه خ.... و قال لفظ قبيح
ساعتها كان عمري 26 سنه يمكن مش هكدب عليكم سمعت الكلام و الناس بتسخر و بتضحك و كنت مش زعلان علي الراجل و يمكن اكون ابتسمت من التعليق السافل للعامل التاني
بعدها بشويه كان كل ما حد يشوفني لأول مره يقولي انت فيك شبه كبير من المهندس مجدي هو انت قريبه كنت بقول لا 
تقوم الناس تقولي لا ليه هو تهمه انك قريبه و لا علشان مشكوك فيه ويقوموا ضحكين و مش هكدب عليكم كنت انا كمان بضحك
كان الاستاذ مجدي راجل تحسه كده مكبر دماغه ينزل مرتبه  اتأخر او متأخرش مش فارقه
و مره واحد من الناس قالك انا مش فاهم الراجل ده مش راكب مرسيدس ليه ده علي قلبه فلوس قد كده ما هو مش متجوز
الايام عدت و المهندس مجدي طلع معاش 
و انا كبرت في السن و متجوزتش و بقت الناس تقولي شكلك هتبقي شبه الاستاذ مجدي في كل حاجه
بس لحد دلوقت انا شايفين انك مش عايز تتجوز مش ملكش في الستات زيه
من يومين واحد قالي الحق نفسك قبل ما تبقي زي مجدي و محدش يرضي بيك
انا الايام دي يا جماعه بدأت احس بشعور مجدي
من كلام الناس و الهمز و اللمز اللي عليه من نظرتهم ليه انه كائن ناقص لمجرد انه كبير و مش متجوز
و ياريتها فضلت عن كده دي وصلت لأتهامه بأنه ملهوش في الستات ( يعني ضعيف جنسيا) او بتاع رجاله ( شاذ) كل ده ليه علشان مش متجوز
طب انا يا تري الناس بقت تقول عليا زيه 
محدش من الناس عارف الحقيقه محدش من الناس حاسس بشعور الشخص اللي في  ظروف مجدي اللي ظروفي بقت شبابها
مين قال ان مجدي مكنش عايز يتجوز ولا شاذ و لا ضعيف جنسيا
ما يمكن حاله كان زي حالي نفسه يتجوز و مش عارف او مش لاقي عروسه  و العمر جري بيه لحد ما وصل لسن الجواز فيه مبقاش له معني و مبقاش مناسب انك تجيب عيال او حتي تشبع رغباتك الجسديه اللي بتاكيد بقت ضعيفه جدا في السن الكبير ده
مين قال ان الاستاذ مجدي مبسوط انه عايش لوحده بعد ما ابوه  امه ماتوا  و لما بيمرض او بيتعب بيبقي زي الراجل اللي ي الصوره دي و لما هيموت هيموت كده محدش حواليه و ممكن جثته تتعفن و تتحلل عقبال ما حد يكتشف انه مات
مين قال ان الاستاذ مجدي مبيبقاش ححزين و بيتقطع من جوه لما بيشوف اسره مكتمله من اب و ام و اطفال و بيحس انه انسان مش طبيعي و ناقصه اهم حاجه
مين قال ان الاستاذ مجدي مش بيحس انه عاش عمره بلاه هدف و اونطه عاش و ا شتغل و بكره مات و هو معملش حاجه لنفسه
مش مقصود ماديا بس معملش لنفسه حياه  و مكنش عايش زي باقي البني ادمين 
مين قال ان الاستاذ مجدي مكنش حاسس زي ما انا جاسس دلوقت ان عمري اتسرب مني و بيجري و بزعل علي كل يوم دلوقت بيعدي و انا مطلعتش خطوه قدام او ارتبطت او بقي ليا عيله او اسره
انا يا جماعه خايف ابقي مجدي التاني خايف ابقي زيه مدبوح من حياتي و ظروفي و مدبوح من كلام الناس اللي بيفسر كل حاجه علي انها خلل في رجوله الراجل او انعدمها
انا نفسي يبقي ليا زوجه و اطفال  و بيت و حياه 
انا تعبت من حالي اللي كل يوم بيقرب من اني اكون مجدي رقم 2
و اه يا افه