زي ما ذكرت قبل كده اني وصلت لمرحله اني كاره نفسي و كاره شكلي و كاره تفكيري
الموضوع ده زاد جدا اخر كام شهر خصوصا لما بقت حياتي مفيهاش اي حاجه حلوه و مبقاش فيها امل و مبقاش بكره حاجه انا بستناها
بالعكس بقيت خايف منه لانه مع الوقت بيدمر الوضع الحالي اللي الواحد اصلا مش مبسوط منه و لا مرتاح و بيخليه اسوء و اسوء
فقد عزيز او اصابه بمرض او مشاكل في البيت اللي عايش فيه محتاج تحلها ترميمات و غيره بقيت شايل هم بكره و اللي بيجيبه بكره
افتكرت ايام ما كنت في اخر سنه قبل التخرج و انا كلي امل و متخيل ان حجم التعب و الجهد اللي عملته في الصيف بتاع الدراسه اللي زمايلي كانوا بيخرجوا و يتفسحوا فيه هيخليني راجل تتهافت عليه الشركات و ان التعب ده هلاقي له في الاخر فايده و احصد ما زرعته و طبعا مش ده اللي حصل
في الوقت ده كنت شاب محترم جدا متطلعش العيبه مني كنت بتمني اني اموت شهيد كنت بتمني اني افتح الاندلس تاني كنت بتمني اني ابقي حاجه مهمه و حاجه عظيمه
كنت متوقع اني هتجوز بنت جميله و كان في الوقت ده في مسلسلات تاريخيه سوريه هبت علينا منها الممثله الجميله نسرين طافش
لو شوفتوا براءه وجه نسرين وقتها كنتوا هتعرفوا قد ايه احلامي بريئه لو لو شوفتها دلوقت هتعرفوا اد ايه اتحولت الاحلام دي لحاجه تانيه خالص
تقريبا الفرق ده عباره عن 18 سنه الا شهور بسيطه في السنين دي تحولت من انسان سوي ملتزم ليه قضيه لانسان شهواني
كل نفسه و هدفه في الحياه انه عايز ست يتجوزها علشان ينام معاها و يشبع رغباته اللي محروم منها كل ما يشوف واحده مع جوزها يحسده عليها و علي انه بينام مع المزه دي بالليل و يقول يا ريتني كنت انا
تحولت من شخص عفيف اللسان لشخص كل يوم لازم يطلع منه شويه الفاظ نابيه يتملي منهم صندوق
تحولت من شخص شكله كويس لشخص شبه برميل الزيت الكبير مبعجر و معتقدش في ست ترضي بيه ده غير انحسار الشعر عن راسي و ان شعري بقي في ابيض بشكل ملحوظ حتي شعر دقني برضه بقي فيه ابيض كتير
هل يا تري قعدتي في البيت سنتين بعد التخرج لحد ما لقيت شغلانه كانت المفروض تفهمني درس اني مش هحقق اللي نفسي فيه
اني مش هبقي انسان طبيعي يبقي عنده بيت و اولاد و زوجه و اسره
هل كان المفروض افهم وقتها اني لازم احلامي اللي كانت طالعه دي وهم و خيال و اني هنزل و انا علي جدور رقبتي و هقرب من عمر ال 41 سنه و انا مش محقق اي حاجه
هل كنت المفروض اعرف اني هبقي في نظر نفسي اني كلب جربان او انسان بقت كل افكاره ملوثه بخيالات جنسيه
لدرجه ان واحد عندي في الفيس بوك كان بيبارك لمراته علي حاجه و حاطط صورتها قعدت اقول اهي دي الجوازه جسمها حلو و وشها حلوه مش زي اللي بنشوفهم ما الواحد ليه نفس ان يبقي الوش اللي يبوسه حلو مش الجسم بس
و اقول اشمعني هو و انا لا
هل كنت اتخيل ان ابقي عايز اموت لاني مش شايف لحياتي معني او هدف و لا فيها اي نوع من المتعه و لا الراحه
هل كنت اتخيل اني ابقي اضحوكه لما حد يجيله مزاج او لما يتزنق في كلامه معايا يقوله انت متتكلمش علشان انت متجوزتش و مشكوك فيك و في ميولك
هل كنت اتخيل اني لما اتناقش مع شويه زملاء في العملاء سواء اصغر و لا اكبر الاقي كلمه من نوع و ان تعرف منين انت لا متجوز و لا عندك مسؤليات انت فرداني مع نفسك
هل كنت اتخيل اني ابقي من ال Left overs البقايا بالبلدي اللي فضلوا كده و مبقوش شبه الناس
اللي حياتهم وقفت في مرحله معينه و معدتهاش و فضلوا عندها سنين طويله و لسه مكملين كده
طيب ايه الحل الامثل لحياتي
اقطع تعلقي الضعيف بالامل ان الظروف هتتحسن و ابدء اشوف هعمل ايه في حياتي الحاليه مع توقع ان الدنيا هتبقي اسوء في المستقبل و مش هلاقي اهلي جنبي في يوم من الايام و هموت و انا كده
هل هي لعنه صابتني انا و اختي الوحيده اننا نفضل كده لحد ما نموت معندناش حد و اللي هيموت فينا الاول هيدفن التاني و اللي هيكمل بعده مش هيلاقي حد يدفنه
هل احنا اسره محرم عليها الفرحه و السعاده و انها تبقي شبه الناس التانيه
طيب ايه الذنب او الجريره اللي عملناها علشان كل ده
و اللي هيقولي اصل اكيد ربنا ليه حكمه
هي يعني كل الناس اللي حياتها عاديه دي مفيهاش حكمه و لا الحكمه جت لحد عندنا و بقت ان حياتنا تبقي كده
انا حياتي متوقفه تماما
و الله متوقفه تماما انا مش عارف اعمل اي حاجه
و لا اخطط
يعني مش بدور علي شغل تاني لان مفيش ما يدعو اني احتاج مرتب اكبر
مش بدور علي هجره لاني معنديش حد اهاجر علشانه اولاد مثلا و لاني هسيب اهلي و اختي لمين و هروح هناك اعيش لوحدي و يبقي وضع اسوء من اللي انا فيه
انا كل ما يجي شهر رمضان عليا تجيلي مشاعر كتير ما بين احباط ان حالي متغيرش ما بين شعور بالذنب من الشخص اللي بقيت عليه ما بين اني بقصر في العبادات و انا عارف اني مقصر بس معنديش طاقه ولا نفس للاجتهاد في العباده
و للاسف كل سنه بكبر عن السنه اللي قبلها و يفضل الوضع كده لحد ما هوصل في يوم ابقي فعلا مش قادر اجتهد في العباده
انا بصلي تراويح اه و بقرأ قرأن اه بس مش راضي عن اللي بعمله جنب اللي بشوف ان كل الناس بتعمله
و فعليا مش بيبقي عندي طوله بال و لا صبر و لا صحه
و الله خلقي ضاق جدا و جهدي و طاقتي مستنفذين جدا
انا حاسس بالضياع حاسس اني بتمني اني مكنتش اتولدت من اساسه
انا تعبت و الله تعبت
