حد سمع عن نظريه الواحد الصحيح
اعتقد كلنا سمعنا عنها بصوره اوي باخري
النظريه باختصار بتعتمد علي مبدء تقسيم الارزاق
يعني الاهل و الاقارب و الاصحاب بيسوقوا النظريه دي لينا لما يبقي حالنا مش كويس او ظروفنا صعبه
النظريه بتعتمد علي تفسير بيقولوا انه ديني ان مفيش حد بياخد كل حاجه و انك يعني لو معاك فلوس كتير فده معناه ان نصيبك من الصحه و السعاده و الهناء و راحه البال قليل و لو معاك فلوس قليل فنصيبك من الحاجات الاسابقه كتير اوي
و ان لو معاك فلوس كتير فانت يا عيني مش هتنام الليل من خوفك عليهم يتسرقوا و لا يضيعوا لكن لو فقير فأنت يا سلام هتنام و ترتاح و تاكل رز مع الملايكه لأنك مفيش حاجه تخاف عليها
لو معاك فلوس كتير فانت الشيطان مخليك ناسي ربنا و علي طول في الكباريهات و بتعط مع النسوان و بتعمل كل حاجه غلط و بتشرب خمرا و هتدخل النار
لو ممعكش في انت مش بتسيب السجاده و راجل بتاع ربنا و هتدخل الجنه
لو انت تعبان و شقيان علشان تكون نفسك و تعمل اسره و عمرك كبر و انت كده فأنت هتعيش مبسوط و عيالك هيبقوا حلويين و باريين بيك لو انت مرتاح و عملت كل اللي نفسك فيه من غير تعب و لقيت واسطه للشغل و فلوس من اهلك علشان تعمل بيت و اسره فدول هيضيعوا
دي النظريه بأختصار اللي بتتوعد كل واحد ربنا موسع عليه بالمرض و الصياعه و النار و كل واحد غلبان و مطحون و فقير بالجنه و الحياه الرغده و العوض
من الاخر لو بصيت حواليك و فكرت شويه هتلاقيها نظريه فاشله و كلها كدب و خداع
في ناس غنيه و عارفه ربنا كويس و بتستخدم الفلوس في الخير و في تعليم عيالهم كويس و عمرهم ما يغضبوا ربنا
علي العكس بقي تماما ممكن تلاقي واحد ظروفه صعبه بعد عن ربنا بسبب الظروف دي و مش في طريق المحرمات لأن الحلال صعب عليه يعني يسرق علشان يجيب اللي نفسه فيه يزني علشان يلبي حاجاته الجسديه
معظم الافلام المنتشره علي النت للشباب اللي مع بنات شغالين في الدعاره هتلاقي بيوت الشباب ي فقيره جدا و و يا دوب فيها اساسيات
يعني الفقر معلمهمش العفه ولا طاعه ربنا و لا الفلوس علمت الغني الفجر و الفسق
غرض النظريه يا جماعه انها تهون علي الغلبان لأنه مش عارف ليه ربنا قتر عليه رزقه و ووسع علي غيره
مش عارف ليه صاحبه حياته افضل و اسهل و كل حاجه عايزها بتتحقق بسهوله و هو طالع عينه و مش عارف يحقق اي حاجه
مش عارف ليه قاعد في بيتهم لحد ما بقي عنده 28 سنه زي واحد اعرفه و في ناس من زمايله اشتغلوا و اتجوزوا و بقي عندهم عيال
و ممكن منهم يبقي واحد ميعرفش ربنا و ممكن منهم ناس تعرف ربنا
من الاخر كده حسبه الرزق احنا منعرفهاش و منفهماش
دي ربنا اللي بيقسمها و بيعملها يبقي مينفعش احنا نطلع و نقول حاجات ممكن اثبات انها غلط بسهوله و في الاخر تبقي طعن في صدق الدين بتاعنا
الرزق يا جماعه سر من الاسرار الالهيه و بيعتمد علي مشئيه و رغبه ربنا في انه يرزق عبد من عدمه
يعني ممكن تلاقي عبد متفاني في العبادات و رغم ذلك حياته كرب و واحد ميعرفش ان في حاجه اسمها صلاه و تلاقيه عايش تمام و فلوسه في زياده
و ممكن تلاقي واحد يعرف ربنا و غني و واحد ميعرفش ربنا و فقير
بس الملاحظ ان الفقرا كتير منهم فقرهم و احتياجهم بيبعدهم عن ربنا و بيخليهم يعملوا محرمات كتير لأنهم مش عارفين يعملوها في الحلال
عامه الموضوع كبير و اتمني لو حد قرا الموضوع ده يرد عليا و يناقشني
و اه يــــــا افـــــه
السؤال اشمعني 10 سنين الجواب هو لأن عدي تقريبا اكثر من 10 سنين بشويه من وقت تخرجي لدلوقت زي الوقت ده من 10 سنين كنت خدت الاعفاء من الجيش و قاعد بدور علي شغل و عندي امل كبير انه هشتغل بسرعه ( كنت قفا طبعا و محصلش )
طيب ايه اللي فكرك بالكلام ده ما ايه الجديد ما المدونه حكت الموضوع ده 100 مره
اللي فكرني هو حضوري لفرح احد اصدقائي من الدفعه و رؤيتي لبعض زملائي و زميلاتي في الفرح ده (زميلاتي دول شوفتهم لأنهم اتجوزوا من دفعتنا فكانوا جايين مع ازواجهم) لحد كده و الدنيا عادي و بيس بس اللي مش عادي و بيس هو انهم فعلا حسسوني اني عجزت
تبص للزميلات متقدرش تقنع نفسك انهم هما هما بتوع زمان عجزوا فعلا و بقوا من ربات البيوت و ما يتطلبه ذلك من زياده في الوزن و مش عارف ايه تحس ان قدامك حد شبه والدتك مش بنت عندها 32 سنه و تلاقيها جره عيالها كده و واضح علي وشها التعب و الشقا
و تبص للزملاء تحس انهم بقي شبه كلمه بابا اللي الواحد كان في فتره من الفترات شايف انه صعب يتقاله يا بابا علشان شكله صغير
شويه شعر ابيض و تجعايد بسيطه في الوجه و وتحس في وجوهم بالارهاق و التعب
من الاخر عجزوا مش هما دول الشباب اللي كان بيهزر و يضحك و مبتسم و متقائل بالحياه بقوا ناس مطحونين و طالع عينهم و شقاييين
لحد كده و جميل و هلاقي اللي يقولي احمد ربنا علي حالك و افرح بقي بدل ما انت مكتئب انك مش متجوز زي ما عمال تكتب
ارد و اقول اني بصيت في المرايه لقيت نفسي شبه زمايلي في الدفعه و قعدت اطلع صوري معاهم و لقيت نفس التغيير حصل ليا زي ما حصل ليهم لكن بنسبه اقل
الشخصيه بقت مختلفه و زادت عليها مسحه كأبه الشكل بقي في شويه عجز و الي ذلك
لكن الفرق بيني و بينهم انهم مشوا في المسار الطبيعي يعني هما عايشين ما يوازي سنهم بيربوا عيال في في عمر 5 او 6 سنين و يعتبروا اباء و امهات صغار اما انا فشكلي اتغير بس لكن حياتي زي ما هي
الموضوع مش اني عامل مناحه علي الجواز و العيال الموضوع اني في ال 10 سنين دول معملتش المفروض اعمله فالمفروض ابقي زيهم كده بعد 10 سنين كمان يعني لما ابقي في نص الاربعينات اللي ساعتها لا في صحه و لا في نفس و لا في روح انك يبقي عندك عيل عمال يوقع ليك حاجات علي الارض و تقوله عيب و كخ و كده
و مفيش قدره انك تجري و تلعب معاه و تلاعبه علشان بقيت راجل عجوز و دماغك غير دماغه
من الصدف برضه ان حضرت احد الزميلات اللي كانت من مزز الدفعه بس محدش فكر فيها علشان اسلوب اللبس و كده ايام الدراسه و لسه برضه لابسه المفتوخ و العريان و طبعا عامله عمايل في نفسها علشان تبين انها لسه شباب و ان عدم جوازها حافظ علي جمالها و رشاقتها انوثتها و حاطه بقي عطور و مكياج علشان تداري فعل السنين لكن لو بصيت ليها عن قرب تلاقيها مكسوره و حاسه انها ناقصه حاجه و هي شايفه زميلاتها عمالين يسلموا عليها و يفرجوها علي عيالهم
الاغرب و الاعجب ان القاعده كان دمها تقيل و ان الناس اللي واحد كان بيستمتع بكل ثانيه من قعدته معاهم مبقاش قادر يقعد معاهم دقيقتين ازاي معرفش اعز اصدقاء و اصحاب الشباب و الكليه اللي مكنتش عارف تبعد عنهم مبقتش قاعد مبسوط معاهم ده بالعكس بتبقي قاعد منفوخ و مفيش اي كلام مشترك او اهتمام مشترك بالعكس حاسس انك قاعد وسط ناس خنقه و نفخ و عايز اليوم يخلص
ده عرفني قد ايه ال 10 سنين دول غيرونا من ناس حالمه و ظريفه لناس واقعيه و كئيبه
عرفوني ليه كانوا يقولوا لنا ايام الدراسه احلي ايام في العمر و لما تكبر هتزعل للأسف ده حصل فعلا
و اللي يزعل اكثر انك متغيرتش زيهم يعني هما كلهم اتغيروا بنفس الشكل و بقوا قعدتهم مع بعض مش نفخ لكن انت اللي متغيرتش
عموما انا بدعوا كل واحد بيقرا الكلام ده انه يستمتع بحياته و هو صغير و ميفوتش فرصه انه يعيشها صح و لو قدر في يوم يرتبط بحد و هو في سن اصغر يبقي خير و بركه لأن الوحده وحشه خصوصا لما تبدء تكبر و تفقد والد و والدتك و قرايبك
و اه يا افــــــــــــــــــه
من كام اسبوع لقيت كده بتاع 500 واحد مره واحده دخلوا المدونه و كلهم من موقع واحد دخلت اشوف الحوار في الموقع ده اللي اسمه Nilemotors اتفاجأ بقي بكميه شتيمه عليا غريبه و اللي يقولك فاشل و اللي يقولك مش عارف ايه
الحقيقه اتغظت
و بعد فتره من التردد قررت ادخل و اكتب ليهم رد بسيط
و كانت النتيجه كوميديه جدا
تقريبا 50% من الناس اللي ردوا علي البوست كانتوا متعاطفين او كنا لطفاء علي الاقل
لكن في ناس تانيه تقولك ا نت جاي تجيب زباين لمدونتك المهجوره و انت جاي تصدعنا و انت قارفنا ليه مصدعنا و عامل دوشه علي الجواز و كلام من هذا القبيل
طيب يا عم اللي قرفان مني دخلت ليه و قريت و تعبت نفسك و عرفت ليه اني عايز اتجوز و مكتئب و قرفان و زهقان مكنت ريحت دماغك و خدتها من اخره
و مادام انا معجبتكش رديت عليا ليه رديت علشان تقولي يا سخيف و يا اللي مزهقنا يا ابو مدونه مهجوره
ده اللي ربنا قدرك عليه
جتك خيبه
الرسول قالك فلتقل خيرا او لتصمت ده اولا ثانيا واحد انت حسيت ان ظروفه مهبهه او كان في حياته قرف كتير بدل ما تهون عليه تقعد تشتم فيه
استقدت ايه من كده غير انك انسان مش طبيعي و مش سوي لأن في حاجه اسمها الرحمه و التراحم انت متسمعش عنها
من الطبيعي ان اي انسان مهموم بيبقي محتاج كلامه مواساه مش تريقه و تقطيم
ام ال 50% التانيين اللي منهم اللطفاء و المتعاطفين و المشاركين فطبيعي تلاقي كلامهم حلو
علشان حاسين بيك
و اللي مش حاسس و لطيف بيقول كلام مهذب و ذوق و ميجرحكش
بس دي مصر و المنتديات تشبه حال البلد
كل واحد فاكر نفسه عدل و تمام و هو جواه غلطات كتير بس بينكرها و بيهاجم اللي بيفكره بيها
ربنا يتوب علينا و عليهم
و اةةةةةةةةةةةة يا افه
لم
ا شوفت الصوره دي حسيت انها بتصورني
شاب من بره و عجوز و من جوه
طيب هو انا عجزت بمزاجي لا طبعا حياتي هي اللي مشتني في الطريق ده سنتين مش لاقي شغل و لما الاقي يكون بمرتب ضعيف و لما اغيره بشركه بمرتب اعلي افضل سنين علشان اقدر افكر اني اتجوز
و لما احب اتجوز ملاقيش حد يرضي بيه
و لما ابص حواليا الاقي كل صحابي بقي عندهم عيال و اسر و محدش منهم فاضيلي
فأحس اني وحيد
اقول عندي ابويا و امي ابويا يمرض مرض كان هيروح فيه و افتكر ساعتها انهم مش هيفضلوا معايا طول العمر
كل ده طبيعي يخيلني حاسس اني عجوز
العجز بيخيلك عجوز لأن اللي في ايدك بتعمله بس برضه مفيش حاجه بتتغير
الواحد بيحزن علي العمر اللي بيجري من غير ما يحقق اي حاجه
من كام يوم قابلت واحد صاحبي صدفه بيودي ابنه المدرسه تخيل انت ان اللي من سنك عيالهم دخلوا المدرسه و انت لسه اصلا مخدتش اي خطوه في اتجاه الارتباط و الزواج
تخيل لو اتجوت بكره و خلفت علي طول هيبقي الفرق بيني و بين ابني 34 سنه
يعني ممكن اطلع معاش و هو لسه متخرجش و لو ليه اخوات ممكن يبقوا لسه في المدرسه
تخيل انك تبقي قاعد في البيت لوحدك لأن صحابك اختفوا من حواليك و مفيش مجال تعمل صحاب جديده
تخيل ان يجي العيد عليك متلاقيش حد تخرج معاه و لا تتفسح معاه
هتبقي عجوز ولا لأ
قدام الناس بترسم ابتسامه و ضحكه علشان محدش يحس باللي جواك و علشان متبنش ضعيف و حزين
لكن اللي جواك بيقتلك احلي سنين العمر جرت علي الفاضي لا عدت شاب صغير و لا بقيت في الاطار اللي الناس اللي في سنك بقوا فيه دور الاب و الزوج
طيب الحل ايه
انك تفضل راسم الابتسامه لحد ما تعجز و تبقي شبه الراجل ده و برضه تفضل مبتسم
انت تسمع تريقه الناس عليك و انك كبرت و معملتش حاجه في حياتك و تبص ليهم بأٍستهزاء و لا مبالاه رغم ان كلامهم بيقطعك من جوه
انك تخرج تمشي مع حالك تدخل سينما مع حالك تقعد في كافيه مع حالك
الحل انك تصاحب نفسك و تنسي الناس
بس للأٍسف الناس مش هتنساك و تسيبك في حالك
و اةةةةةةةةةةةةة يـــــــــــــــا أفـــــــه
اهلا بيكم النهارده حبيت اتكلم علي موقف افتكرته فجأه هو سخيف بس حبيت احكيه و اتكلم عن شعوري بسببه
الموضوع باختصار او مش باختصار مش هتفرق يعني اني مره جابولي عروسه من الاشكال النص لبه
العروسه كانت دكتوره صيدليه المهم رحت شوفتها لقيت البنت شكلها وحش و مناخيرها عامله زي المنقار كده و كلامها تحس انه عبيط بس حسيت انها طيبه
قررت بيني و بين نفسي اني ا رفض لما ارجع و بعدين صليت استخاره و كده و خدت3 ايام علي ارد فيهم
طبعا الحاجه شايفه ان 3 ايام دول كتير جدا مش عارف ليه رغم ان في بنات بتقعد اسبوع و اسبوعين تفكر بعد المقابله الاولي يتقابلوا تاني و لا لأ
طبعا كان التفكير نقفل الموضوع و لا نتقابل كمان مره و نتعرف اكثر
الحاجه بقت عقدت تزن و ناس طيبه و ناس محترمه و البنت شكلها بيضا و مش دايره و خام و مش عارف ايه
قمت قولتليها و ماله نقابلها تاني مع انها مكنتش عجباني بس مكنتش كمان رافضها تماما
المهم الحاجه جرت و كلمت ام العروسه لققت ام العروسه ايه بتقولها البنت لسه بتفكر و انا سايبها براحتها
اشمعني يعني من حقها تفكر و تاخد وقتها و احنا لازم نرد علي طول
الست وعدت انها هترد بعد يومين كمان يعني مجمل 5 ايام اتصلت و قالت كل شئ نصيب
بصراحه انا اتنزفذت لأني عصرت علي نفسي لمونه و قولت ماشي و هي قالت لا يعني انا اصلا مكنتش عايزها و رضيت بالعافيه اشوفها تاني و تقول هي لا A7A
المهم مش دي القضيه الحاجه بقي عملتها مناحه و يا خساره انا زعلانه عليهم كانوا ناس طيبين و انا هفضل اكلم الست علشان عجباني و هصاحبها قولتلها براحتك
مفيش اسبوع و البنت اتقرت فتحتها
هنا بقي انا ولعت و اتغظت جدا
لأنه من الواضح ان البنت شافتني و شافت غيري في نفس الوقت و قارنت بينا و اختارته
مش ا لقضيه انها اختارته بس القضيه انها شافتنا في نفس الوقت
ده انا كنت رافض المبدأ ده اصلا و كنت بقول اشوف عروسه عروسه و بعد ما اخلص واحده اشوف غيرها
و لما مره حبيت اشوف 2 عرايس سوا مخلصتش من كلام الناس و ازاي تلعب بمشاعر البنات و مش عارف ايه و برضه منفذتهاش و شوفت واحده واحده
القصد ان الوليه اللي امي فاكرها طيبه طلعت قراري و كنت معلقاني لحد ما تشوف الواد التاني و تختار الاحسن
بتختار الاحلي من فوستانين و لا كلوتين بنت المره
الموضوع ده كان غايظني و كنت عايز افش غلي
و اةةةةةةةة يــــــــــــــــــا افه
سلام عليكم لو حد بيقرأ مع اني متاكد تماما ان مفيش حد بيقرأ اللي بكتبه بس بالرغم من ذكك هكتب يمكن في يوم من الايام حد يقرأ الكلام ده و يلاقيه مفيد او يلاقيه مريح ليه انه مش لوحده اللي حاسس بالاحاسيس دي
تقريبا من 5 سنين حسين بالضياع كنت قربت علي عمر ال 28 سنه ( ايام الشباب بتخلص) و قربت من الثلاثين و ساعتها كان دافعي للكتابته و الكأبه هو اني خلصت اول 5 سنين من عمري بعد التخرج و معملتش فيهم اي حاجه و دول المفروض الناس علي اخرهم بتبقي اتجوزت او خطبت او علي وش جواز و بقت جاهزه للجواز علي اسوء الظروف زائد ان البعض منهم كمان بيبقي بدء يبقي مهم في شغله و بدء يترقي و يبقي ليه وزن و قيمه عند رؤسائه ايامها انا مكنتش حاجه من دي و حسيت ان العمر راح و ال 5 سنين راحوا اونطه بالنسبه لي بينما بالنسبه لي بينما بالنسبه لصحابي زي عبد ه العبقري اتجوزوا و بقي عندهم اسر و بدؤا مرحله جديده في حياتهم و ده يرجع في الاساس الي مساعده الاهل في شراء الشقه و المهر و الذي منه او اي العمل مبكرا في شركه من اللي مرتباتها كبيره فبالتالي الشاب قدر يجهز نفسه
المهم ساعتها تمنيت اني في ال 5 سنين اللي بعدهم ان اللي المفروض كنت احققه في اول خمس سنين احققه في ال 5 اللي بعديهم
و ده للأسف برضه محصلش و فضل حالي زي ما هو و اديني داخل علي ال 33 سنه و علي ال 5 كلاكيت ثالث مره بعد التخرج
في ال 10 سنين اللي فاتوا ناس اتجوزوا و خلفوا و ناس عيالهم دخلوا المدارس و ناس بقوا مهمين و ليهم قيمه في الحياه و انا زي ما انا اللي فرق اني عجزت بمعني الكلمه بقيت مش لاقي حد في حالي و هو في نفس السن يا اما في الاكبر اللي هو امتنع عن الجواز و فضل كده او الاصغر اللي هو لسه شاب و بيدور و الواحد لا عارف ينضم لدول و لا لدول
و طبعا مع الوقت تحولت من عريس ممكن يكون ليه ميزه لعريس ملهوش اي ميزه كبير في السن و امكانياته مش عاليه يعني مش مليونير و لا بيلعب بالفلوس و لا له منصب كبير يعوض سنه
يعني من الاخر لو رحت اتجوز واحده عندها 25 سنه و اتقدم ليها واحد برضه في نفس السن هو كمان 25 سنه هو لازم هيغلبني اكيد لاني مش مميز في حاجه تستاهل انها تضحي و تتجوزي
علي المستوي الانساني اللي حصل اني ايقنت اني ابويا و امي مش هيعيشوا ليا كتير السنه اللي فاتت ابويا كان هيموت و ربنا ستر و المرض كان هيخليني اعيش من غيره
يومها عرفت انه حتي الحياه اللي عندي اللي انا عايشها مبقتش مضمونه انها تفضل زي ما هي و اني هصحي في يوم من الايام لا الاقي ابويا و لا امي و ابقي وحيد و مقطوع من شجره في الدنيا
في اخر 3 سنين من ال 5 سنين دول شفت حوالي 10 عرايس و محصلش نصيب و ده اكد لي اني برضه من الناس اللي حياتهم لازم تمشي بصعوبه و يبقي اخر اللسته في كل حاجه في الدنيا
شعوري النهارده الصراحه احسن بكتير من ايام ما بدات المدونه رغم اني ظروفي بقت اسوء بس يمكن علشان الواحد اتعود علي القرف او الواحد خلاص عرف ان مفيش فايده فبالتالي الصراع اللي جواه بقي شئ اليف و مستأنس و الواحد عايش معاه
برضه في ال 5 سنين اللي فاتوا فضلوا صحابي يقلوا شويه شويه لحد ما ممبقاش عندي صحاب خالص
بقي صحابي هما زمايلي في الشغل و دول برضه مشوا في سكه الجواز و بقوا بيقلوا واحد ورا التاني و مبقاش فيهم حد فاضيلي
برضه في خلال الخمس سنين دي محدش عبر المدونه دي و اللي بيدخولها مش بيتكلموا و لا بيعلقوا و بيطنشوا و بيتجاهلوا كلامي و ده احباط اضاف لأحباطي تلال من الحزن
بيكون شعور جميل انك تلاقي حد يواسيك و يسمعك و يرد عليك لكن الواحد طلع بيكلم نفسه
عموما انا ناوي اكتب حته حلوه حلوه كده اسمها ال 30 بقوا 33 بعد ما عدي 3 سنين هلخص فيها شويه حاجات حصلت في ال 3 سنين الاخيره
و اةةةةةةةةةةةةةةةةةةةة يــــــــــــــــــــــــا أفــــــــــــــــــــــه
للرفض تأثير عجيب علي النفس لبشريه فالرفض يجعل النفس تشعر بنوع من المذله او الانكسار و يجعلنا نشعر في بعض الاحيان بالدونيه و نتسأل عن ما هو الخطأ فينا الذي جعلنا من المرفوضين
و لكن لنبدء فلابد ان نعرف ما هو الرفض
الرفض هو ان يقال لك لا او تمنع من الاستمرار في اداء نشاط معين تريد ان تفعله
مثلا يمكن ان يرفض طلبك للالتحاق بمدرسه معينه بنادي معين او وظيفه معينه او ترفض عن تقدمك لعروسه ما
نقلب بقي كلام عامي
اسوء شعور للأنسان هو شعوره انه مرفوض
يعني لما تكون مقدم في وظيفه معينه و بعد الانترفيو محدش يكلمك او يطنشوك او لو شركه محترمه تبعتلك rejection letter ساعتها بتحس بقمه الدونيه ليه سابوني ليه اختاروا غيري ايه عيبي ايه مشكلتي اشمعني الناس التانيه اختاروهم و انا لا
و لكن هذا الشعور لا يقارن ابدا بشعور الرفض في العلاقات البشريه يعني لما تتقدم لواحده عايز تتجوزها و ترفضك
بتبقي قمه القرف
لو في حد بيقرا الكلام ده و بيقرا المدونه هيعرف اني من زمان مش عارف اتجوز نتيجه الظروف الماديه بس تقريبا من سنه و نص اقدر اتجوز يعني اقدر اوفر الاساسيات المطلوبه للزواج في وضع متوسط لا هو عالي اوي و لا واطي اوي
المهم بدأت ابحث عن عروسه علي طريقه زواج الصالونات و ده انا هكتب عليه لوحده بقرفه و زهقه و زبالته
المهم في المجمل شفت حوالي 8 عرايس اترفضت من 6 و 2 كانوا لسه عايزين يتعرفوا عليا اكثر قبل ما يخدوا قرارهم و الاثنين دول مكنوش عجبني دول اللي انا شفتهم في رفضوني قبل ما يشوفوني بمجرد انهم عرفوا اني مش هجيب ليهم القصر المطلوب و لا الفيلا الكبيره رغم انهم من طبقه اجتماعيه متوسطه و عاديه بس عايزين واحد يجيب ليهم قصور و فيلات
يعني انا مرفوض بنسبه 75 %
الموضوع في الاول مكنش بيضايقني و لا كان بيشغلني لكن لما العمليه زادت حسيت بالحزن اقعد افكر هو السبب ان عندي 32 سنه و نص و لا السبب في شكلي
و لا السبب ان الي بقدمه للبنت من امكانيات بيوازي اللي بيقدمه شباب اصغر من ب 7 سنين عن طريق مساعده اهاليهم فبالتالي البنت بترفض تقولك ما اخد اصغر بنفس المواصفات مادام الاكبر معندهوش ميزه عنهم
طب هو ذنبي ان دي ظروفي و انا ابويا مقدرش يساعدني فأضطريت اعتمد علي نفسي هو الاعتماد علي الذات بقي عيب و دلوعه بابا بقي هو الحلو
بالنسبه لشكلي فانا بني ادم عادي لا وحش و لا حلو و ممكن يكون فيا بعد الوسامه كمان
بالنسبه لتعليمي فأنا راجل مهندس و بالنسبه لأخلاقياتي فانا راجل ملتزم دينيا و مش بتاع بنات و مش بصاحب بنات و بدور علي الحلال
طب يبقي ايه الغلط فيا
ممكن واحد يقولك اصل ده نصيب جميل انا متفق انه نصيب بس انت مش شايف ان نسبه 75% رفض دي مش كتير ده لو اعتبرنا ان 25 % دول وافقوا عليا و ده محصلش زي ما وضحت قبل كده
كلها 5 شهور هو هيبقي عندي 33 وابقي بشوف زمايلي اللي عيالهم قربوا يدخلوا 2 و 3 ابتدائي و انا لسه بدور علي عروسه ترضي بيا
شايف الاحساس انك تدور علي حد يرضي بيك
من انك تدور علي حد يبقي عجبك و تختاره شايف الفرق بين انك تختار و انك تتمني ان حد يختارك بغض النظر عن احساسك ايه ناحيته
اني بقي قربت من الاحساس ده انا دلوقت حاسس اني لازم ادور علي حتي لو قرد بس يكون راضي بيا و مش مهم احساسي نحيته ايه عاجبني و لا مرتاح ليه و لا المهم هو عايز ايه
الوقت جري من الواحد و مش عارف ايه مشكلته و اللي يضحك ان من ضمن الناس اللي رفضتني بنات معفنه اه و الله اسف اني بشتمهم بس بنات شكلها يادوب يعتبر مقبول و يمكن اقل من المقبول يعني من الاخر العرسان مش بتجري وراهم و لا هما ملكات جمال الميزه اليتيمه اللي فيهم و اللي مفيش تأكيد عليها غير كلام الشخص اللي مرشحهم ليا انهم ذوات دين و محترمات و مش بيعملوا علاقات و بنات مستقيمات
و ده كلنا عارفين انه ممكن يطلع مش صح
تخيل انك بترفض من ناس زي دول طب لو كنت بقي دورت علي حد يملي عيني و يعجبني كان عمل فيا ايه كان تف علي وشي في يوم المقابله و سابني و مشي
و الله انا مستغرب و بسأل نفسي هو ايه الغلط الي فيا و بسأل نفسي اخرتها ايه
كان دايما يقولوا انا لراجل مش بيتأُر بالرفض لكن البنت لما تترفض بتنكسر
انا بقي ضد الكلام ده الرفض المستمر بيأُثر في الراجل و بيخليه حاسس انه ولا حاجه
بيخليه حاسس ان الدنيا دي كلها مفيهاش دي يرضي بيه و يحب ان يرتبط بيه و يبقي نصه التاني متخيل انا في بلد فيها 85 مليون يبقي ده وضعك
و تخيل بقي اذا كان البنات الي شكلها مقبول بالعافيه و لازم تعصر علي نفسك لمونه علشان تقبله مش راضيين بيك يبقي اللي هترضي بيك هيبقي شكلها عامل ازاي
علي احسن الظروف هتبقي عائشه الكيلاني ولا فوزيه اللي كانت بتضرب بالروسيه في الافلام يعني من الاخر واحده بنعتبرها ست علشان عندها اعضاء الانثي الجنسيه فقط لا غير اه و الله
الرفض طول عمره بيلاحقني بعد اعدادي اترفض اني التحق بمدرسه المتفوقين في ثانوي في مدينتي علشان انا من بره الاداره التعليميه و لاو عايز التحق يبقي لازم ابقي جايب 25 درجه زياده عن المجموع اللي بتخده المدرسه من ابناء نفس الادراه التعليميه التابع ليها مدرسه المتفوقين
لما اتخرجت قعدت سنتين اترفض من شركات و مكاتب و حيت ناس بتركب دش مرضتش تشغلني لحد ما ربنا اكرم و لقيت شغل
و دلوقت برضه بترفض كعريس حتي قبل ما اكون انا خدت قرار بترفض من اول نظره
الرفض بيتحول لحاجز صخري بتتكسر علي احلامي و بتضيع علي نتوءاته سنين عمري و بالتالي الاقي نفسي في اخر اللسته في كل حاجه
اشتغل متأخر و اتجوز متأخر و اخلف متأخر ده إن اتجوزت و خلفت
هبقي راجل عجوز و عيالي لسه عندها 12 و 13 سنه
انا هكتفي بالكلام كده و ان شاء الله هكتب عن الجواز النيله المسمي بزواج الصالونات
و اه يــــــــــــــــــــــــــا افــــــــــــــه
