عازب في سن ال 35

بقالي مده مكتبتش يمكن لأن الكتابه في نفسها بقت بتمثل حمل كبير و لم تعد الفضفضه عن طريق الكتابه مريحه و لا بتخفف عن الام الواحد
قد يكون البوست متأخر عن ميعاده السنوي اللي بدء من قرابه 7 سنين و فيه كل سنه بزود الرقم و اقول انا خلاص بكبر و مش عارف اتجوز و فرصي في اختيار عروسه كويسه بتقل لكن يا جماعه للأسف انا وصلت لمرحله اني مبقاش بشوف عرايس خالص
بقالي اكتر من سنه و نص مشفتش و لا عروسه و كل اللي بيترشح ليا بقي بينحصر في بنات صغيره اوي مبفكرش اشوفهم لأني متأكد ان فرق السن ده كبير و ان موافقتهم بيه من غير ما يشفوني فمعناه ان البنت اهلها حاسين ان فرصها في الجواز ضعيفه او ان هما فاكرين ان واحد في سني هيجي يدفع بقي مبالغ و يشيل العروسه بما انه لازم يعوض فرق السن الكبير ده بحاجه
كل واحد يسمع سني يحسسني اني خلاص قربت اموت و ان انا اللي اتسببت لنفسي في اني عازب لحد دلوقت
للأسف حالي النفسي بقي سئ جدا ما بين الرغبه في تكوين اسره و بيت و استقرار و وجود هدف في الحياه و ما بين الرغبه الجسديه اللي ربنا زرعها في الواحد  و اللي بدأت تضغط علي الواحد بقوه في الفتره الاخيره
انا حضرت كورس من فتره كان اللي بيشرح فيه دكتور بشري ساب الطب و تخصص في التسويق كان بيذكر ان الانسان الغير متزوج او الذي لا يشبع رغبته الجنسيه انسان مصاب غير سوي نفسيا غصب عنه  لما قال الكلمتين دول حسيت ان كل الزملاء الحاضرين بيبصوا عليا حسيت اني انسان ناقص مش كامل
انا دلوقت العرايس اللي بتتعرض عليا قد تكون معدومه او غير موجوده و زي ما ذكرت قبل كده انا دلوقت انسان كبير و علي حافه الكهوله كلها كام سنه و ابقي 40 مش هتلاقي بنت ناس حلوه و محترمه و صغيره اهلها يرضوا يجوزها ليا علشان انا راجل لقطه
بالعكس انا مبقتش لقطه خالص انا بقيت عمو عزيز
من سنين طويله شوفت مسلسل اسمه اهل الغرام كان في حلقه عن شاب بيحب بنت زميلته عمرهم 20 سنه في الكليه بس طبعا للظروف مش بيتجوزها و بيجي شاب عايش بره البلد بيطلبها و يتجوزها و يقولها انا عندي 35 سنه ضيعتهم في اني اكون نفسي و محتاج اني رتبط ببنت شابه نعيش مع بعض حياه سعيده
و بينتهي الحلقه علي جواز البنت بالراجل ده و اكتئاب الشاب اللي كان بيحبها
يوم ما شفت الحلقه دي بصيت للراجل اللي جه اتجوز البنت و خدها من حبيبها نظره انه حقير نظره انه انسان عايز ياخد زمنه و زمن غيره  و انه اتسبب بتحطيم قصه حب بين شابين و قولت في بالي اكيد البنت اتجوزته بس عمرها ما هتحبه و هتبقي دايما بتفكر في جوزها التاني و هتبقي علاقتها معاه سواء الشخصيه او الجسديه زي اللي مشتري جاريه لانها اتجوزته بسبب انه جاهز
دلوقت انا في نفس سن الشاب اللي جه من بره و عايز يتجوز يا تري لو اتجوزت هبقي بوظت علاقه البنت اللي اتجوزتها بواحد بتحبه و عايزه تتجوزه و يبقي ابو عيالها
يا تري اصلا في يوم هيبقي ليا زوجه و اولاد زي ناس كتير و الله بدأت اشك ان ده ممكن يحصل
في الصوره اللي انا حاططها هتلاقي انها بتقول ان اللي سنه 35 و لسه عازب في 25% منه عايز يتجوز و 27% عايز يفضل عازب و 26% منه عايز يبقي راهب و 22% منه رغبه في انه يبقي اب الصوره دي واقعيه جدا الواحد ممزق ما بين كل هذه الحالات عايز يتجوز و شايف ان القطر فاته نفسه في ولاد بس خايف ميبقاش عن نفس لتربيتهم بما انه عجز
انا انتهيت نفسيا يا جماعه كل يوم بشوف شباب اصغر مني بكتير داخلين بيوتهم و انا عمال اتفرج عليهم ساعات بحس ان شكلي شاذ وسط الناس و اني فيا حاجه غلط 
يوم ما بدات المدونه دي متخيلتش اني هقعد قرب ال 8 و لسه حالي متصلحش بالعكس دي بيبقي اسوء 
الواحد وصل لمرحله انه ممكن يعجب ببنت يلاقيها في الكليه لسه و ممكن تقوله يا عمومتخيل انك ممكن تلاقي اللي نفسك فيها بس سنك يمنعك من انك تجوزها في اي ذل و مهانه اكتر من كده
ساعات بقول ايه اللي الواحد ممكن يخسره لو مات دلوقت لما بحسبها مش بلاقي حاجه انا عايش زي الحمار بشتغل و بنام لا عندي متعه و لا انبساط في الحياه 
لو ربنا كاتب عليا افضل علي الحال ده فيارب ميكنش عمري طويل و اخلص بدري بدري ما هي الحياه مفيهاش حاجه تستحق اني افضل فيها
و اةةةةةةةةةةةةةةةةةةةةةة يا افه

انا و الاستاذ مجدي

الاستاذ مجدي او المهندس مجدي كان بيتنادي باللقبين بدايه معرفتي ليه كانت بعد استلامي العمل بسنه او اكثر هو راجل كبير و شاطر جده في تخصصه الهندسي اللي تصادف انه نفس تخصصي و كان عمره وقتها 55 او 56
في يوم و انا قاعد مع احد الاشخاص العاملين عندنا و هو عباره عن عامل بس عجوز كان قاعد يقول الاستاذ مجدي ده ممتاز و راجل اخلاق و كل حاجه بس فيه سر غريب محدش يعرف متجوزش ليه لحد دلوقت او متجوزش ليه اصلا قام واحد من الي قاعدين ضحك و قال تلاقيه ملهوش في الستات او تلاقيه عدم المؤاخذه خ.... و قال لفظ قبيح
ساعتها كان عمري 26 سنه يمكن مش هكدب عليكم سمعت الكلام و الناس بتسخر و بتضحك و كنت مش زعلان علي الراجل و يمكن اكون ابتسمت من التعليق السافل للعامل التاني
بعدها بشويه كان كل ما حد يشوفني لأول مره يقولي انت فيك شبه كبير من المهندس مجدي هو انت قريبه كنت بقول لا 
تقوم الناس تقولي لا ليه هو تهمه انك قريبه و لا علشان مشكوك فيه ويقوموا ضحكين و مش هكدب عليكم كنت انا كمان بضحك
كان الاستاذ مجدي راجل تحسه كده مكبر دماغه ينزل مرتبه  اتأخر او متأخرش مش فارقه
و مره واحد من الناس قالك انا مش فاهم الراجل ده مش راكب مرسيدس ليه ده علي قلبه فلوس قد كده ما هو مش متجوز
الايام عدت و المهندس مجدي طلع معاش 
و انا كبرت في السن و متجوزتش و بقت الناس تقولي شكلك هتبقي شبه الاستاذ مجدي في كل حاجه
بس لحد دلوقت انا شايفين انك مش عايز تتجوز مش ملكش في الستات زيه
من يومين واحد قالي الحق نفسك قبل ما تبقي زي مجدي و محدش يرضي بيك
انا الايام دي يا جماعه بدأت احس بشعور مجدي
من كلام الناس و الهمز و اللمز اللي عليه من نظرتهم ليه انه كائن ناقص لمجرد انه كبير و مش متجوز
و ياريتها فضلت عن كده دي وصلت لأتهامه بأنه ملهوش في الستات ( يعني ضعيف جنسيا) او بتاع رجاله ( شاذ) كل ده ليه علشان مش متجوز
طب انا يا تري الناس بقت تقول عليا زيه 
محدش من الناس عارف الحقيقه محدش من الناس حاسس بشعور الشخص اللي في  ظروف مجدي اللي ظروفي بقت شبابها
مين قال ان مجدي مكنش عايز يتجوز ولا شاذ و لا ضعيف جنسيا
ما يمكن حاله كان زي حالي نفسه يتجوز و مش عارف او مش لاقي عروسه  و العمر جري بيه لحد ما وصل لسن الجواز فيه مبقاش له معني و مبقاش مناسب انك تجيب عيال او حتي تشبع رغباتك الجسديه اللي بتاكيد بقت ضعيفه جدا في السن الكبير ده
مين قال ان الاستاذ مجدي مبسوط انه عايش لوحده بعد ما ابوه  امه ماتوا  و لما بيمرض او بيتعب بيبقي زي الراجل اللي ي الصوره دي و لما هيموت هيموت كده محدش حواليه و ممكن جثته تتعفن و تتحلل عقبال ما حد يكتشف انه مات
مين قال ان الاستاذ مجدي مبيبقاش ححزين و بيتقطع من جوه لما بيشوف اسره مكتمله من اب و ام و اطفال و بيحس انه انسان مش طبيعي و ناقصه اهم حاجه
مين قال ان الاستاذ مجدي مش بيحس انه عاش عمره بلاه هدف و اونطه عاش و ا شتغل و بكره مات و هو معملش حاجه لنفسه
مش مقصود ماديا بس معملش لنفسه حياه  و مكنش عايش زي باقي البني ادمين 
مين قال ان الاستاذ مجدي مكنش حاسس زي ما انا جاسس دلوقت ان عمري اتسرب مني و بيجري و بزعل علي كل يوم دلوقت بيعدي و انا مطلعتش خطوه قدام او ارتبطت او بقي ليا عيله او اسره
انا يا جماعه خايف ابقي مجدي التاني خايف ابقي زيه مدبوح من حياتي و ظروفي و مدبوح من كلام الناس اللي بيفسر كل حاجه علي انها خلل في رجوله الراجل او انعدمها
انا نفسي يبقي ليا زوجه و اطفال  و بيت و حياه 
انا تعبت من حالي اللي كل يوم بيقرب من اني اكون مجدي رقم 2
و اه يا افه

البنك المتنقل للتسليف

 

السلام عليكم بقالي مده مكتبتش رغم ان عندي كلام كتير اقوله بس للأٍسف احساسي ان مفيش حد بيقرا اللي بكتبه 

النهارده حصل موقف استفزني جدا لقيت مجموعه من صحابي المتجوزين بيكلموني يالا نخرج مع بعض  و بتاع و بما اني شاب عازب و معنديش حد اخرج معاه و محدش بيعربني الا فين و فين قمت وافقت علي طول و نزلت قابلتهم

بعد الحكاوي الفارغه و السلامات بدأت الشكاوي من ارتفاع المصاريف و ان هما مفلسين و مش عارف ايه

و ان الجواز ده خراب بيوت و افلاس مستمر و يا ريت متتجوزش و خليك زي ما انت

و انا قاعد عادي بسمع و ساكت

لكن الخطه كان مجهزه مسبقا بدء الكلام يتحول  من اثنين منهم للرغبه في ان حد يسلفهم

و انا برضه سامع عادي قام الكلام اتطور هتسلفنا و لا ايه

صراحه انا اتصدمت من الكلمه دي

اولا هما طالبين مبالغ مش صغيره و هيستلفوها لمده مش اقل من 6 شهور

ثانيا بقوا انتوا نازلين معايا علشان كده

ثالثا :- هو العازب بالنسبه ليكم البنك المركزي المستباحه فلوسه ( اتقال في وسط القاعده من واحد منهم سمج شويه يا عم ما فلوسك قاعده في البنك انت بتعمل بيها ايه خليك متتجوزش احسن و تفضل فلوسك معاك بدل ما تبقي مفلس زينا)

اتصدمت اد ايه الناس بتبص ليك علي انك مبسو\ط و سعيد بوحدتك و انت في السن العجوز ده ( انا عديت ال 35 بشهرين) و انك  لا عندك اسره و لا عيال و معملتش حاجه لنفسك في الحياه

اتصدمت اد ايه محدش شايف هو في ايده ايه و حامد ربنا و محدش حاسس بيك و بالوضع اللي انت فيه

اتصدمت ان الناس تطلب مبالغ زي دي علي سبيل السلفه علي اساس ان انت مش بتصرف الفلوس دي علي حد ( معندكش بيت و اسره و اطفال) 

و اةةةةةة يا افه