اخر ايام السنه

 

النهارده اخر يوم في 2022 و من بكره هيبدء عام جديد  من سنين بطلت ابص لليوم ده علي انه بدايه جديده او انه مصدر للأمل ان السنه الجايه هتجيب معاها اخبار حلوه و تحقيق لاحلام و امال كتير بالعكس بقي اليوم ده بيمثل ليا خطوه زياده نحو اني بعجز اكتر و بيبقي صعب اكتر احقق احلامي

من اخر الثلاثينات و انا بدأت احس ان الانسان احلامه ليها تاريخ صلاحيه بعدها بيبقي صعب يحققها لانه الوقت فات خلاص

و لو حققها في الوقت المتأخر ده فهو مش بيفرح بالعكس بيبدء يشيل هم مشاكل كتير هتحصل له نتيجه التأخير ده

خد عندك لو خلفت مثلا في الاربيعينات اول هم هيجي علي بالك هو انا لما اطلع معاش هكمل دوري مع ولادي ازاي كتعليم و اكل و شرب لحد ما يتخرجوا ما الواحد لما بيطلع معاش بياخد بالكتير 2000 جنيه

او لو اتجوزت و جبت العيال دي في الاربيعينات هيبقي في بالك يا تري هقدر و يبقي فيا طاقه اربيهم ولا خلاص راحت عليا بما ان معظم اللي حواليك في الاربيعينات دي بيكون عيالهم في الجامعه او علي وشك دخولها

ساعات اسأل نفسي ليه الاهل دايما بيدونا امل في بكره و ليه مش بيعرفونا الواقع و ان مش كل اللي عايزينه بيحصل او يتحقق هل خوفا من اننا من الاول منحاولش او ممكن نفكر نموت نفسنا مثلا

محدش بيعرفنا حقيقه الحياه و ان مش كل حاجه المفروض ان الناس بتعملها زي الجواز و الخلفه مثلا هتحصل لنا بالعكس في احتماليه كبيره متحصلش

ساعات بسأل نفسي كمان يا تري كنت اتوقع ان ده شعور كل واحد شوفته متجوزش او بنت شوفتها متجوزتش او اتجوزت و مخلفتش

لما كنت بسأل نفسي ليها متجوزوش و لا اسمع الناس بتتكلم عنهم بالغلط ان في حاجه مش مظبوطه هي سبب عدم جوازه

برضه بسأل نفسي هو ليه العلاقه الجنسيه ارتبطت بالزواج يعني لو انا مش مكتوب ليا جواز افضل متعذب و محروم منها و لا اروح للحرام علي مبقاش موت و انا مجربتش الشعور ده

علي رأي الشباب في فيلم ثفافي لما قالوا هو احنا ممكن نموت قبل ما نتجوز و نبوس

هي من العدل ان الواحد ميعيش شعور انه يشوف مفاتن واحده و هي لابسه ليه قميص نوم و نايمه في خضنه و يملسها و يعيش اللحظات دي معها لمجرد ان نصيبه انه ميتجوزش

زي ما بقولت قبل كده ان في احد الكورسات اللي كان بيدرسها دكتور لينا قال ان الطب دلوقت بعتبر الغير متزوج مريض لانه محروم من حاجه فده بيؤدي الي نقص و مشاعر عنده سلبيه فبالتالي يعتبر من ذوي العاهات

يا تري زي ما ربنا خلق واحد اعمي او اطرش او ابكم او مجموع من دول يكون ربنا خلقني بالعاهه دي اللي عدم الزواج

و لا هيعيزيني و يعزي اللي زيي ان تكون الحكمه في كده اننا نبقي عبره للناس اللي عندها الزوجه و الولد فيعرفوا قيمه نعمه ربنا عليهم

لما يشوفوا المحروم منها

طيب هي خالتي اللي ربنا حرمها من الخلفه و زوجها توفي و عايشه لوحدها محرومه من الاولاد و دخلتهم عليها و انهم يملوا عليه البيت فرحانه انها ربنا اختارها عبره للي خلفوا يبصوا عليها و يحمدوا ربنا انهم مش زيها

طيب لما بتلاقي شيخ كاتبلك ان الزواج رزق و الاولاد رزق و الكلام ده و كله مكتوب في صحيفتك قبل ان تولد بترتاح

و لا مع الوقت بتحس زي انه كلام مسكن علشان يقنعك انك متندمش علي جوازه معفنه رفضتها و بعدها معرفتش تلاقي حد تاني علشان  تتجوزه و تنقع نفسك انه كان مش من نصيبك الجوازه دي

طيب انا من شهرين ربنا رزقني و رحت عمره و لما شوفت الكعبه فرحت اه بس محستش باللي الناس عماله توصفه هل انا كده كافر و وحش و لا الناس هي اللي بتبالغ و بتطلع منك بالعافيه كلام لازم تقوله علشان متبقاش وحش و متعرفش ربنا

زي اللي يقولك اكيد دموعك نزلت لما شوفت الكعبه او اللي يقولك تلاقيك حسيت بسكينه رهيبه و حسيت بخشوع قوي و اترجيت من جوه و طبعا لا تملك الا ان تقول اه صح و تزايد علي كلامهم  و علي الشعور اللي بيوصفوه بشعورك الللامتناهي

طبعا الصلاه هناك جميله و انك ترضي ربنا اجمل  و انك تدعوه تحت عشره رائع لكن المشاعر الغريبه اللي الناس بتوصفها دي مش بحسها

زي بالظبط لما بصلي التراويح و الاقي ناس عماله تسح دموع و عياط و اهئ اهئ و انا مش فاهم ليه لدرجه اني بحس اني فيا حاجه غلط

طيب يا تري اخره اللي الواحد فيه ايه و هل هيبقي نصيبه هو سبب انه ميبقاش من اهل الجنه لانه مش راضي بيه و شايف انه كان يستاهل يبقي عنده بيت و اسره زي اي بني ادم

طيب لما يجي واحد صاحبك يكلمك في مصاريف هبله هيدفها في مدرسه  و لا قرار هيخليه يفلس هيعلمه لمراته او عيل من عياله و تقوله يا بني ده مش منطقي يقوم قايلك اصل انت مش متجوز او اصل انت معندكش عيال و مش عارف و كأن انك تسأل عن رأي منطقي يستلزم كونك متجوز و مخلف

عامه ربنا يهدينا جميعا اني نفسي بس ربنا يهديني و يصلح حالي و يساعدني اتذكر اللي كنت حفظه من كتابه و اتقيه في بقيه عمري علشان متبقاش بايظه دنيا و اخره

انا فعلا حرماني من الزوجه دي مسبب افات كتير في حياتي و خايف اضيع بسببها و ابقي باظت مني الدنيا و الاخره

ادعولي بالثبات يا جماعه

تخاريف و هرطقات

 

بقي لي تقريبا 3 شهور مكتبتش يمكن من بعد ما وصلت ال 41 و حسيت اني خلاص فعليا حياتي انتهت و بقيت راجل في نهايه حياته بيزحف نحو نهايه العمر

في خلال الشهور دي طلعت مصيف مع الوالد و الوالده زي كل سنه و خلال ال 4 ايام بتوع الرحله كنت قاعد حاسس اني حاجه شاذه و مكسوف من نفسي جدا

كل اللي حواليا في سني متجوزين و  معاهم عيال كبار ما شاء الله و اللي اصغر برضه متجوز و عنده عيال و انا كده ماشي عامل زي الكائن الغريب

كلهم ناس معرفهمش طبعا بس موجودين في نفس المكان اللي كنت بصيف فيه بما انه قريه سياحيه و كده

ابص لشعر دقني اللي بقي معظمه ابيض و شعر صدري اللي ظهر فيه كتير ابيض و شعر راسي اللي بدء يبيض بغباء و الاقي ان حتي علامات الشيب عندي اكبر من علامات الشيب عند الناس للي في سني و معاها عيال

والدتي و اختي الي برضه نصيبها انها متجوزتش يتعرفوا علي ست المانيه و انا بما اني اعرف الماني خفيف جدا الاقي الست بتتخيل اني اختي هي مراتي و لما اقولها دي اختي تقولي امال مراتك فين اقولها معنديش تبصلي باستغراب كده اللي هو يا بني انت ازاي في السن ده و قاعد كده

حاسس طول الوقت و انا ماشي ان الناس بتشاور عليا و حاسه اني مش طبيعي و ناقصني حاجه

للاسف رجعت من المصيف ده اسوء مما سافرت

زاد علي كده اني لما كنت بشوف واحد مصري و لا واحد اجنبي بيحضن مراته و لا بيخطف بوسه و لا حتي مراته لابسه لبس مشلح بمناسبه اننا في مصيف 

اقعد افكر اني لحد دلوقت مشفتش ست قدامي بقميص نوم ملمستش ست محضنتش ست منمتش مع ست 

تيجي دماغي تلف و تقول طيب و هو ليه الموضوع مربوط بالجواز يعني افضل انا كده لحد ما عجزت و اكيد بقيت قدرتي اضعف من ايام ما كنت شباب محروم من اني استمتع و انبسط علشان خاطر انا مش لاقي عروسه مناسبه

و ممكن لو مش مكتوب ليا الجواز اموت كده من غير ما ابقي دوقت الحاجات دي و حسيتها و هي من اكتر المتع اللي ربنا خلقها للانسان

طيب ايه الحكمه في وجود الغريزه دي بما ان في ناس بيتكتب عليها انها تعيش عزاب سواء رجاله او ستات 

يعيشوا يتعزبوا و يتعبوا و يبقي اسف في الكلمه في بعض اللحظات هياجنين بسبب حاجه مثيره شافوها و مش عارفين يفرغوا طاقتهم

طيب بما ان الجنس حرام بره الجواز و مينفعش نعمله الا مع الزوجه مش كان من الافضل ان اللي يحس بالرغبه هو الشخص المتزوج بس

مش كفايه علي الاعزب او العازبه الالم النفسي و نظره الناس ليه و شعوره انه عجز و كبر و مش شبه الناس نزود عليه ان الرغبه توجعه و تتعبه و ميقدرش يشبعها و يفضل عايش محروم كده و جعان

طيب هو ليه الواحد شبابه بيخلص بسرعه كده

تعليم يوصله ل 25 سنه و عقبال ما يقول يا هادي ويلاقي شغلانه و يستقر هوب بقي 30 و من 35 يبدء شعره يبيض و علامات الكبر تبدء تظهر عليه يعني فين هي الفرصه المتاحه للواحد اللي يستفاد فيها من شبابه و عمره

بعدها ابدء افكر في انا كل يوم يعدي عليا بيبعدني عن املي في اني ابقي انسان طبيعي و يبقي عندي اسره و اولاد  بدل ما كان زمان و الواحد صغير كل يوم بيعدي بيقربه من هدفه و انه هيتخرج بقي و بكره يتجوز و يشتغل و يجيب عيال

و ابدء افكر في ان الواحد اكتر حاجه بتزعله ان الايام بتعدي دلوقت و ان سنه بيكبر هو خوفه من انه يعيش بقيه عمره في الوضع اللي هو فيه اللي هو مش راضي عنه و حاسس انه ناقص فيه حاجات كتير

كل شعره بيضا بتحسسك انك هتكمل حياتك زي ما انت 

انت 41 و في احتمال كبير انك تعيش للستينات من عمرك و هتعيش في نفس الوضع اللي انت كارهه ده و مش راضي عنه

لو الوضع ده متغيرش في انت هتعيش مغموم و قرفان و مش راضي باقي عمرك

هتقولي الرضا عباده هقولك مش سهل ترضي بانك محروم من حاجه اساسبه عند كل الناس

و تيجي لحد عندك و تبقي ملكش نصيب فيها

قيس علي كده انك كل يوم بيعدي بيخليك تحس انك بتقرب تفقد احبابك و اساسا انا من شهر لسه خالي متوفي و ده رعبني و حسسني قد ايه ان في يوم مش هلاقي اعز ناس عليا حتي جنبي

الواحد تعب من تفكيره في حياته من شعوره انه الموت افضل ليه مادام الحياه هتفضل علي الوضع ده

هعيش ليه و علشان استني ايه

هو ايه في العيشه يخلي الواحد مبسوط بيها و عايز يعيش سنين اطول و اكتر

مفيش للاسف

المشكله فين

اولا كل سنه  و انتوا طيبين بمناسبه العام الهجري الجديد

ثانيا انا حابب اتكلم عن الفتره  ما بين اخر بوست كتبته و النهارده حصلت شويه حاجات كده خلتني مش عارف انا في ايه بالظبط و لا انا عايش ليه ولا انا هعمل ايه في بقيه عمري

منها مثلا لقيت واحد عامل كرتون لواحد كان عنده 20 سنه و فرح انه وصل العمر ده و فجأه لقي نفسه في 2022 بقي عنده 30 سنه و حاول يفتح الباب و يرجع لورا علشان يعيش تاني ال 10 سنين اللي ضاعوا من عمره

افتكرت لما كنت صغير و مكملتش 28 سنه و قعدت اندب حظي هنا علي عمري اللي راح و اني عجزت و جبت 30 سنه و لا اتجوزت و لا علمت اسره و لا و لا ولحد ما وصلت 41 سنه و انا في نفس الحال و بقيت عجوز بجد و راجل تثار حوله الشكوك و التساؤلات انه ليه وصل 41 سنه و متجوزش

لقيت الشاب اللي عامل البوست ده غالبا ماشي في نفس السكه انه عجز و راحت عليه

للاسف الشاب ده مش عارف ان المجتمع بيضحك عليه و بيجبره انه يحس انه عجز او كبر و راحت عليه لحد ما عمره يروح منه بجد و يبقي كبير بجد و يضيع منه احلي سنين عمره في اعتقادات واهيه انه عجوز علشان بقي عنده فوق ال 30 و لسه متجوزش

و هو في الواقع لسه في عز شبابه

ساعات كتير ببص للسنين اللي فاتت بحسره و بحس اني كل حزني و زعلي علي حالي ده ضيعها مني و مغيرش حاجه في واقعي و مازلت زي ما انا في نفس العزوبيه و الحال اللي نا فيه بس بقيت عجوز و شعري بقي فيه كتير ابيض و وزني زاد و شكلي بقي مقرف حتي انا نفسي مبقتش طايقه

بقيت فعلا مثال للرجل الكبير و ساعات كتير بيتقالي يا حاج و يا عمو من ناس اعتقد انهم اصغر مني ب 12 او 13 سنه بالكتير

في الكام الاسبوع اللي فاتوا كنت بقابل اصدقائي من الجامعه اللي اتخرجوا معايا و كان دايما السؤال اللي علي لسانهم انت مش هتتجوز بقي انت يا بني كبرت و عجزت

عندهم حق باعتبار ان اكبر اولادهم سنهم من 14 الي 10 سنين يعني عيالهم داخلين اولي ثانوي ما شاء الله

و انا لسه عايش معرفش احساس ان الواحد ينام مع واحده شكله عامل ازاي

ساعات بحس اني نحست نفسي لما عملت البلوج ده و قعدت اشتكي و اعيط علي حالي و ان ده ادي اني فعلا فضلت زي ما انا و ان ربنا مرزقنيش بالحاجه الطبيعيه اللي الناس كلها عندها منها الاسره و الزوجه و الاولاد

بس ارجع و اقول انا نحس طول عمري ملهاش علاقه بيا

لما دخلت ثانوي دخلته في مدرسه طلع منها اكبر عمليه تسريب لامتحانات الثانويه العامه في التسعينات 

لما دخلت الكليه كانت اقاليم و اضطريت ارجع و اعيد سنه علشان ادخل القسم اللي كنت استحقه في جامعتي الاصليه بس كان لازم ادفع تمن اني محول من كليه لاخري

و بعديها بسنه بقي التحويل من اعدادي عادي قصاد مبلغ مادي بسيط و تقدر تدخل في بلدك الكليه اللي انت تنسيقك جه لها في مدينه تانيه

لما اتخرجت قعدت سنتين في بيتنا

لما اشتغلت  و اترقيت خدت جزاء ظلم و افترا بعد علشان كانوا عايزين كبش فدا

لما شوفت عرايس جالي قاع القفص و لما كنت بعصر علي نفسي لمونه علشان الجوازه تمشي و ارضي باللي مش عاجبني مكنش الموضوع برضه بيمشي

طيب هو انا مش من حقي بعد 27 سنه من البلوغ اني انام مع واحده

ان اشوف جسم واحده في قميص نوم عريان قدامي و يبقي ابيض كده و بينور  زي ما بنشوفهم بالمايوهات في الشواطئ ولا بنشوفهم في الشارع و هما لابسين لبس مشلح و عريان

طيب هو مش من حقي المس و احسس و ابوس  و اعمل كل اللي الرجاله بتعمله عادي مع الستات من قديم الازل

طيب هو بما اني مش لاقي الحلال افضل كده و لا اروح للحرام و اغضب ربنا و ادخل النار

طيب هو مش من حقي يبقي عندي طفل اربيه و افرح بيه و اكبره و انا فيا نفس بدل ما انا عجزت كده و معنديش اي حاجه

هو انا مش من حقي اني اعيش في شقتي و افرشها اللي صرفت عليها معظم اللي كسبته في حياتي و اجيب فيها كل وسائل الراحه بدل ما انا لسه نايم علي نفس السرير من يوم ما اتودلدت

طيب مش من حقي اسرتي تكبر و توسع و يبقي ليا اخوات لزوجتي و قرايب ليها و يبقي حواليا اهل و عزوه

هو مش من حقي اشوف اختي عروسه و متجوزه و لا هي مكتوب عليها برضه نفس اتكتب عليا

المشكله ان فعلا اليأس بقي مالي قلبي و بقيت فعلا حاسس اني هكمل بقيه عمري كده

لاني مش لاقي اي اختلاف ولا اي حل لحياتي

اول مره اكتب في بدايه السنه الهجربه الجديده

كنت دايما بكتب في اخر السنه الميلاديه او بدايتها و بيبقي عندي امل ان السنه الجديده تجيب الخير

او ببقي مكتئب انها عدت دون تغيير في حياتي بس اول امره اكتب في اخر سنه هجريه و بدايه سنه جديده

مش عارف هل ده معناه ان الامل يتجدد مرتين في السنه و لا الاحباط يتجدد و يزيد مرتين

مره في نهايه العام الهجري و مره في نهايه العام الميلادي

طيب هو انا عملت ايه غلط في حياتي علشان ابقي بالشكل ده

في ناس كتير عملوا مصايب و كانوا فجار و عملوا كل الفواحش و  مبقوش في نفس حالي

و انا محروم اني اعيش طبيعي

بالعكس عجزت بسرعه و عمري طار و انا مش حاسس بيه

و بقيت لا صغير مستني الامل و لا كبير و محقق اللي كنت بتمناه 

بقيت واحد شكله سنه و مقرف و مش راضي عن نفسه و حاسس انه شبه الخنزير بس من جواه لسه باحساس الشاب اللي كان عنده 27 سنه يوم ما  بدء يكتب في المدونه دي

فعلا السنين جرت و انا مش حاسس و كان ايام بتعدي

و الواحد كل سنه يتخيل ان السنه الجايه هتحقق احلامه و تجيب الخير نتيجه انه اتبرمج علي كده من دعاء اللي  حواليه ليه و تمنياتهم ليه ان السنه الجايه يفرحوا بيه او يبقي في بيته او مش عارف ايه و مفيش حاجه من دول بتتحقق

انا مكتئب اشد الاكتئاب و مش لاقي لنفسي حل ولا عارف اعمل ايه

و حاسس ان القطر فاتني و ان فرصتي في الحياه انتهت حتي لو اتجوتو جبت عيال هطلع معاش و اعيش بمعاش هزيل و هما لسه في المدارس مش عارف هربيهم ازاي و لا اعمل ايه علشان يتخرجوا

انا و الله بقيت بتمني الموت في كل لحظه بس كل خوفي من حساب ربنا غير كده انا شايف الموت ليا افضل الف مره

نهايه سنين شبابي و بدايه انفراط عقد IL Divo

 

يمكن البوست ده يبان ان ملهوش علاقه اوي باللي انا بكتب فيه علي  حياتي و علي وضعي اللي تاعبني و مش مريحني و للاسف ناقم عليه

لكن اللي هكتبه هنا بيمثل زهره عمري اللي بدأت مع المجموعه  دي

في سنه 2004 انا اتخرجت من الكليه  في الصيف بما اني دور يوليو مش دور نوفمبر في نفس الوقت د اتكونت مجموعه من 4 مطربين من دول مختلفه اسبانيا فرنسا سويسرا و امريكا المجموعه دي هي الي اتسمت باسم IL Divo

علاقتي بدأت مع المجموعه دي و انا عندي 23 سنه او قبل ما اتمهم بحاجه بسيطه كنت بدأت طبعا ادور علي شغل و اللي لو حد متابع المدونه هنا من زمان هيعرف اني قعدت سنتين في بيتنا بدور علي شغلانه لحد ما ربنا كرم و لقيت شغلانه

مع طول جلستي في البيت و بما ان مفيش دراسه ولا غيره كنت بقضي اوقات كتير قدام التلفزيون ( في الوقت ده كان ال DSL   لسه اختراع جديد و مش متاحل لكل الناس و كان دخول النت عن طريق الارقام الخاص و اللي بيحسبلك سعر دقيقه النت زي سعر دقيقه المكالمه و تيجي فاتوره التليفون كبيره و السرعه طبعا بطيئه جدا و كان  بابا كتر خيره سامح لي اقعد علي النت علي قدا امكانياته و اكيد بالشكل ده مكنتش تقدر  تقعد 24 ساعه زي حال دلوقت و الانترنت السريع ده مدخلش بيتنا الا لما انا اشتغلت و مش في اول شغلي كمان تقريبا في 2007 دخلته)

المهم اثناء قعدتي في البيت كان كل شويه تتذاع اغنيه مش بالانجليزي و كنت فاكرها ايطالي وقتها و تحسها كده علي نفس ايقاع و ريتم  Unbreak my heart  بتاعه Toni Braxton

كانت الاغنيه دي لمجموعه شباب كده مش معروفين الي هما IL Divo  و كانت بتأثر فيا جدا علشان الفيديو بتاعها بيبين رحله نجاح شويه شباب فقير من الحضيض لحد ما يوصل للنجاح طبعا غير ان صوتهم  و الموسيقي كانت رائعه

المهم الاغنيه دي استمرت معايا لحد ما اشتغلت و كنت مره نزلت علي نت كافيه و خدت الفلاشه بتاعتي اللي كنت خدتها هديه في سيمنار و كانت 64 ميجا بايت  لان مكنتش اقدر اطلب من والدي فلاشه ( احنا مكناش فقراء بس والدي كان شغل حر و الحال كان بدأ يتغير و هو اصلا لما اتخرجت كان عمره 64 سنه و كان يوم عن يوم الظروف بتبقي اصعب  و الفلاشات اصلا كانت غاليه)

المهم لما رحت النت كافيه و دفعت جنيه او اثنين مش فاكر بالظبط في الساعه كنت بنزل شويه كتب علشان اذاكر منها يمكن احسن وضعي في الانترفيوهات و الاقي شغل و من ضمن اللي نزلته نزلت الالبوم الكامل بتاع Il Divo

 
و كان عجبني صوتهم و ادائهم المهم عدوا السنتين و انا معايا الاغنيه دي و لقيت شغل و كان معايا الالبوم بس نسيت الفريق ده و مدورتش هو نزل حاجه جديده و لا لأ

لحد قرب ما بدأت اعمل المدونه في سنه 2009 هنا اكتشف ان في البومات نزلت ليهم و انا مش عارف عنها حاجه كانوا حوالي 3 البومات و نزلتهم و عجبوني و سمعتهم  و بعد كده تابعت كل البوماتهم واحد ورا واحد

من حوالي سنه و نص او اكتر و قبل ما ابقي 40 سنه بكام شهر لما اكتئابي زاد و نفسيتي بقت في الارض كنت نادر ما بسمع اغاني و بالتالي  مكنتش متابع اخبارهم  بس عرفت انهم نزلوا شريط جديد في شهر يوليو السنه الي فاتت لكن مقدرتش اسمعه لاني نفسيا و مازلت مش قادر اسمع او اشوف او استمتع بحاجه

امبارح صدفه دخلت علي صفحتهم و لقيتهم عاملين جوله عالميه علي شرف رحيل كارلوس مارين المطرب الاسباني اللي كان من الفرقه

كانت صدمتي كبيره مش علشان كارلوس و لا علشان الفرقه  لا علشان اللي قريته

كارلوس مات اواخر السنه الي فاتت  و هما كانوا عاملين فيديو نعي ليه و بيقولوا انه كان زميل و صديق  لمده 17 سنه و كانوا بيحبوه و هيفضلوا يفتكروه الخ  كارلوس كان اكبرهم و اتوفي و هو 53 سنه

اللي قريته كان انعكاسه علي نفسيتي سيئ جدا 

الشباب اللي كنت بسمعهم و شايف اغنيتهم  في فتره تخرجي معتدش شباب بالعكس دول بدؤا يموتوا و وصلوا سن الخمسينات

يعني 17 سنه كفيله انها تخرجك من الشباب للكهوله 

اللي هي لو قلنا عمرك الافتراضي 60 سنه فان ربعهم تقريبا هيخرج من شاب حديث التخرج مستقبله قدامه لراجل عجوز كهل في الاربعينات من عمرك قد كده سنين الشباب قصيره و قد كده نسبتها قليله من عمر الانسان

قد كده العمر جري بيا و عجزت و محققتش اي حاجه اتبسط منها في حياتي

قد كده انا قربت من الموت و قربت من اني ابقي راجل في الخمسينات الناس تقولي يا جدو

انا دلوقت بيتقالي كتير يا حاج

و كنت من قريب بشتري ادويه من الصيدليه و البنت اللي الصيدلانيه اللي وافقه فيها عماله تقولي يا عمو ما اني معتقدش اني فرق العمر بيني و بينها يزيد عن 12 او 13 سنه

قد كده بان عليا العجز و بقيت عمو 

مش المشكله اني بقيت عمو لكن المشكله اني عمو علي الورق

لا عندي زوجه و لا اسره و لا حياه  و حياتي هي هي من سنه 2004 متغيرش فيها غير اني اتخرجت سنه 2006

بالعكس حياتي دلوقتي مليانه كأبه و نفسيتي زي الزفت و حاسس بملل و قرف من الحياه غير طبيعي  و كل يوم بتمني ان ربي يخدوني لاني مبقتش مبسوط بالعيشه

برضه من اقل من شهر كنت بشتري بسكويت و حاجات ليا و لوالدتي  لقيت و اتلخبطت في الحساب كان الراجل اللي واقف جنبي  بيشتري و اللي اعتقد انه اصغر مني بيقولي العيال بيطيروا عقل الواحد ربنا يكون في عونك

الراجل تخيل اني بجيب بسكويت لعيالي لان الطبيعي للي في سني و في شكلي يبقي عنده عيال كبار ممكن في اعدادي

ان احد اصحابي دلوقتي ابنه عمره 15 سنه و ده اكبر اولاده و الفرق بينه و بين الباقيين سنتين فبتلاقي اخته الاصغر 13 و هكذا

بينما انا لسه مخطبتش

عندي واحد صديق عمره 48 سنه طلق مراته من سنه تقريبا بعد جواز حوالي 17 سنه او اكثر و لسه متجوز تاني من اقل من شهر 

يعني ناس اتجوزت و خلفت و كبرت عيالها و عيالها دخلوا الجمعه و اتطلقوا و اتجوزوا تاني و انا لسه زي ما انا

اعرف علي الاقل 6 اشخاص في سني ا تجوزوا و خلفوا و  طلقوا و اتجوزوا تاني بينما انا لسه عذراء لحد دلوقت

انا زعلان قوي اني عجزت و ان الحياه الواحد مبينفعش يوقف عمره فيها لحد ما يحقق اللي نفسه فيه و بعدين يخليه يبدء يخلي العداد يشتغل تاني

للاسف انا عمري بيجري بيا هباء و سنين شبابي القصيره خلصت و طارت مني و انا مش مبسوط ولا سعيد و حاسس انها مرت اساسا

احنا نص السنه دي طار اهو و الواحد مش عارف طار ليه و ازاي

و الباقي في العمر كمان هيطير و هنيجي للحظه الموت زي ما حصل مع كارلوس و نختفي من الارض و لا هنفرق مع احد اصلا زي ملايين قبلنا

كارلوس مات و جه بداله واحد تاني بدء يغني مع الفرقه و الحياه هتستمر بيهم و هيفتكروه كل فتره مثلا في عيد ميلاده و لا عيد تأسسيهم الفريق ولا يموت وفاته ليس الا

سبحان الله بقي سنين الشباب بس 15 سنه

هتقولي انت شاب من و انت عندك 16 سنه هقولك مش صحيح لان لحد التخرج فانت زي الاطفال لا ليك دخل و لا تقدر تعمل حاجه ولا تقدر تحقق اي من احلامك انت بتفضل قاعد 23 سنه تتعلم علشان تبدء حياتك

و هوب تلاقي نفسك بقيت 30 و عمال تنوح علي اللي السنين اللي راحت

و بعدين تلاقي نفسك زي حالاتي 40 و 41 و تقول اد ايه انا كنت ساذج ايام ما كنت 30 و زعلان

انا بدأت المدونه دي 28 سنه و دلوقت كلها اسبوعين و هبقي 41 سنه

انا من يوم ما تخرجت و انا مكسوف من نفسي 

مكسوف لما كنت عاطل و  لما اشتغلت بقيت مكسوف علشان  مكنش عندي شقه و مش قادر اتجوز و لما جبت الشقه و بعدين بقيت مكسوف من  اني اتأخرت في الجواز و دلوقت بقيت مكسوف من عمري و اني عازب و معنديش عيال و لما حد يسألني السؤال بتاع انت مش هتتجوز بقي قدام شاب صغير احس اني نفسي الارض تنشق و تبلعني

اه انا مليش يد في كل الامور دي بس في الاخر الواقع بيقول اني حاجه تكسف و حاجه شاذه مش طبيعيه

انا حتي صاحبي الوحيد الي كان اصغر مني بسنه و لسه متجوزش و كنت بعزي نفسي ان حاله زي حالي و اني مش لوحدي في العالم لسه متجوز من شهر و نص و قبل ما يتم ال 40 بكام شهر

و بجوازه بقيت لا بنخرج سوا و لا بنتكلم كتير لانه مبقاش فاضيلي و ده طبيعي  و ربنا يكرمه

ولا بقي يشيل من عليا نص التريقه بتاعه الناس علي موضوع اننا متجوزناش

بقي يتقالي اهو فلان اتجوز اهو و انت متجوزتش ليه

انا هفضل مكسوف طول عمري حتي لو ربنا كتبلي و اتجوزت هبقي مكسوف من ان عيالي صغيره و انا عجوز و اني هبقي مقرب لسن الجدود و عيالي لسه صغيرين

هو الي انا فيه عدل ولا هو اللي الناس اللي زي حالاتي فيه عدل

عملنا ايه في حياتنا علشان يبقي ده مصيرنا

في حراميه و زناه و عاهرات و نصابين و اوساخ و عندهم بيوت و عيال

معتقدش ان الواحد وصل لواحد علي الف من دول علشان ربنا يعاقبه بالشكل ده

ليه ربنا كتب عليا و علي اللي زي ان عمرنا يتسرق و منحسش بيه و منخدش حظنا من الدنيا ونبقي فاضل لينا الاخره اللي الله اعلم هيبقي مصيرنا فيها ايه

انا تعبت فعلا و جبت اخري من الحياه دي و من الدنيا دي

بئر الحرمان

 

مش عارف ابدء اتكلم عن الموضوع ده ازاي بس انا هتكلم بصراحه

و هتكلم عن الرجل الاعزب بس لاني مش عارف صراحه البنت العزباء بتفكر ازاي و لا بتحس ازاي

بما انك لو مسلم او مسيحي متدين يبقي مستحيل هتبقي شوفت جسم ست عريانه او لمست ست عريانه مادام لسه متجوزتش

و  لو انت متدين نص نص فاخرك هتبقي خت بوستين علي مسكتين علي حضنين بس معملتش علاقه جنسيه كامله

خلاف ذلك فالبوست ده مش ليك لان انت مش هيبقي الرومانسيه و العلاقه الجسديه جزء من بحثك عن الجواز لانك اساسا بتشبعها عن طريقه تانيه

و اشباعها ده بيتم بطريقتين

يا اما بالفلوس بتجيب واحده عاهره كل فتره تشبع معاها رغباتك و دي للاسف بتبقي رغبه قذره جدا و مش بتحس فيها باي مشاعر هي مجرد جنس بحث و اشباع حاجه بشكل شبه حيواني

يا اما مصاحب واحده متجوزه و عندها مشاكل مع جوزها او نقص غيب الرومانسيه و بتناموا سوا او مطلقه و محرومه و مش لاقيه حد يتجوزها فبتشبع رغبتها معاك زي ما انت بتشبع  رغبتك معاها

او بتضحك علي بنات الناس علي اساس انك هتتجوزهم و تاخد غرضك و تخلع 

لو كنت من اللي فوق دول فانت مش هتحس باي حاجه من اللي هتكلم عنها

احساس انك تروح تلاقي  واحد لبسه حاجات كده مبينه مفاتنها

احساس انك تلمسها و تحضنها و تبوسها

احساس ان عينك تستمتع برؤيه تفاصيل جسمها الجميل خصوصا لو هي حلوه و جسمها مغري

احساس انك تهزر معاها بتطاول و تمد ايدك و تمسك اجزء من جسمها و تحس بنعومه جلدها

احساس انك تبوسها و تحضنها

و اخيرا احساس الايلاج و القذف جواها و هي نايمه تحتك و بتدلع عليك

احساس انك بعد ما تخلص تاخدها في حضنك و و تقعد تتكلم معاها لحد ما تروحوا في النوم

احساس انك تمسك ايدها و تتمشي معاها في الشارع  و انت مقرب منها

احساس انك تتفرج علي فيلم و هي لازقه فيك او انت نايم علي رجلها او العكس

احساس انكتبدء  تبوسها و تثيرها علشان تقضوا ليله حلوه

احساس انك ترجع تلاقيها جايبه قميص نوم جديد مغي و بيظهر كل مفاتنها علشان هي عايزاك اليوم ده

كل الاحساسيس دي الاعزب محروم منها و كل رغباته مكبوته و مؤجله اي اجلي غير مسمي

حتي لو قولنا ان الجواز مش كده و بس

طيب ما الحاجات دي احنا بنحتاجها و مش بتيجي الا بالجواز الا لو كنت شخص مش فارق معاك غضب ربنا

و حتي لو مش فارق معاك غضب ربنا فاللي هتديك الحاجات دي هتديهالك لوقت مؤقت سواء بالفلوس او سواء لو انها واحده متجوزه هتفوق و هتعرف ان اللي بتعمله غلط و هتخاف علي عيالها و بيتها بمجرد ما تشبع من اللي بتعمله معاك

طيب دلوقتي لما الواحد من سن البلوغ اللي كان في حالتي 14 سنه لحد سن ال 41 و هو مكبوت جنسيا و محروم  يعني تقريبا 27 سنه

 و مش ظاهر في الافق خالص انه هيتجوز او انه هيبقي ليه زوجه و اسره هل من العدل انه يعيش و يموت كده

انا ببقي راكب مواصله عامه بلاقي واحد ماسك ايد مراته و عمال يطبب عليها و عمال يهمس ليها

و ساعات يحط ايده يلمس خدها و انا قاعد اتفرج

بغض النظر اللي هو بيعمله ده صح و لا غلط بس في الاخر الواحد بيحس انه ناقصه كتير جدا

لما الواحد بيحس ان الاجازه جايه و يلاقي تلميحات كتير علي الفيس بوك انها اجازه طويله فهيصوا يا ولاد و تقعد دماغه تسرح في يا تري الناس بتعمل ايه بالليل كده و العيال نايمه

لما بشوف واحده مزه ماشيه و لابسه حاجات مبينه مفاتن جسمها سواء لبس ضيق او لبس مكشوف و تلاقي الافندي جوزها ماشي جنبها و تتخيل يا تري بيعملوا ايه و بيحسوا بايه لما بيروحوا

و تقعد تفكر في اشمعني هو معاه الصاروخ ده يستمتع بيه و يلمسه و ينام معاه

اه عارف ان في ايه في القرأن بتقول " ولا تمدن عينيك الي ما متعنا به ازواجا منهم " و لكن الحرمان و الكبت يعمل اكتر من كده

كونك محروم من حق بشري طبيعي ليك بينما غيرك  متمتع بيه هو شئ قاتل و مؤلم

انا كمان لسه متكلمتش لما بتشوف الناس ماسكه ولادها معاها و بتلعب بيهم و معاهم و انت ماشي محروم من الشعور ده

انا كل ما اشوف طفل جميل او طفله ببقي حاسس ان قلبي بيوجعني اني معنديش زييه

اني معنديش طفل اربيه و اعلمه و اعمل له كل اللي اقدر عليه علشان يطلع كائن سوي و محترم و يعرف ربه و يفهم دينه كويس 

الاعزب ده محروم من حاجات كتير يا اخونا

و كل واحد بيقولك انا بحسدك علي العزوبيه هو انسان كداب لان اللي بيطلق في الناس دي بتلاقيه عمال يدور زي النحله لحد ما يتجوز تاني و مش بيمر سنه الا و يتجوز و ده دليل انه مش قادر يصبر بدون جواز

و كان قالها لي زميل في الشغل كان طلق و اتجوز تاني في المرحله ما بين الطلاق و الجواز التاني قالي انت مجربتش اللي جرب مش بيعرف يصبر

طيب يا تري في امل اني ابقي زي الناس دي

طيب يا تري في امل اني احس المشاعر دي و انا لسه فيا بقايا شباب قبل ما تختفي تماما

انا عارف ان ممكن البوست دي يبقي قلل مني قدام اي حد قراه بس ده واقع يا جماعه

الواحد محروم من المشاعر و محروم من العلاقه الجسديه و محروم من الرومانسيه و محروم من الونس و محروم من الاطفال و محروم من شريك الحياه

كل ده ملهوش بديل عند الاعزب ياللي شايفين ان الاعزب ده برنس في نفسه و عايش حياته

يا رب  فكها عليها و علي كل انسان محتاج زيي  او ارحمنا برحمتك و توفنا و انت راض عنا

The leftovers

 

لو في حد هنا في سني او قريب من سني هيفتكر اعلانات زمان في التلفزيون عن ما يسمي اسبوع البواقي و الفضل

و ده  باختصار كان كده شبه الاوكازيون و بينزل في سعر الحاجه باقل كتير جدا مما تستحتقه  لمجرد ان موديلها فات و عدا عليه كذا سنه رغم انها من خامه نضيفه و من ماركه محترمه

لو حد سافر بره مصر خصوصا اوروبا هيلاقي كده في كل محل ملابس ضخم و شيك  زي Peek & Cloppenburg  

مثلا  هتلاقي كده شويه ستنادات مرميه في اخر كل دور دي فيها البواقي و الفضل و غالبا هتلاقي براندات فخمه جدا باسعار رخيصه جدا بتقرب من سعر حاجه ملهاش ماركه ولا لون و لا خامه جيده 

دايما هتلاقي ناس كتير حوالين الستنادات دي شكل الناس مش بتاعه انها تدخل محل زي ده  بس هما بيدخلوا يركزوا علي الستنادات دي

بيدخلوا يجيبوا الحاجات اللي ميقدروش عليها او  لاتناسب مستواهم و كل اللي بيمكنهم انهم يشتروا الحاجه دي هو ان سعرها رخص نتيجه ان عدي وقتها و موديلها بقي قديم و اللي بيجيب بالسعر الغالي بيطلب موديل السنه هيدفع ليه كل الفلوس دي في موديل قديم

الوضع ده انا بحسه هو وضع كل شاب او بنت  فاته قطر الجواز بتلاقي بنت بنت اصول و شكلها كويس بس نتيجه قله  المعارف و العلاقات الاسريه فاتها قطر الجواز و بقي كل اللي بيجي لها ناس متنفعهاش اللي مطلق و عنده عيال و اللي عايز هي تصرف عليه و يا سلام لو عندها شقه يتجوزوا فيها و اللي اصلا محدش كان راضي بيه و اللي عنده 50 سنه و شايف انها لازم ترضي بيها علشان عمرها قرب علي ال 40

بالنسبه للرجاله برضه بمجرد ما توصل اواخر الثلاثين و تقرب علي الاربعين او تعديها زي حالاتي تلاقي كل اللي بيجيلك هو حاجه محدش يرضي بيها خالص يعني لو و انت اصغر كان بيجيلك حاجت شكلها مش حلو و ظروفها و مستواها الاجتماعي مش مناسب ليك فبمجرد بلوغك ال 40 هيجيلك حاجات ما انزل الله بيها من سلطان تخلي اللي كانوا مش عاجبينك زمان الاميره ديانا جنب اللي بتشوفه

ده لو حد جابلك عروسه او فكر فيك لان معظم الناس بتبقي شايفه انك عجزت و كبرت خلاص و مبقتش شاب و مفيش بنت هترضي بيك الا و كان كسر جدا

يعني في الاخر الناس بتتعامل معاك انك متعلق علي استاند البواقي اه انت حاجه حلوه و جميله و ابن ناس و متعلم و ما الي ذلك بس يا حبيبي انت موديلك فات و قدمت و بقي محدش عايزك الا الشخص اللي هيخدك بالرخيص و تبقي بالنسبه له فرصه حقيقه حتي لو عندك 100 سنه علشان هو مكنش يحلم ان حد زيك يرتبط بيه

ممكن كلامي يبان عنصري بس هو مش كده و الله لما تبقي انت اهلك ناس متعلمه و دكاتره في الجامعه و ناس محترمه و يجيلي ناس اهلها حرفيين و بلدي جدا 

لما يبقي شكلك متوسط الشكل و تجيلك بنت وحشه جدا لدرجه انك متقدرش تبص لوشها دقيقه علي بعض

هيبقي ده احساسك 

هتحس ان ده تقييم الناس ليك انك مجرد بواقي ياخدها اي حد حتي لو مش من مستواه و وضعه 

نفس الاحساس بحسه ناحيه الدنيا برضه انها عامله كانك رايح مكان في عزومه اوبن بوفيه لو وصلت بدري بتاخد احسن حاجه و بتقعد في احسن مكان تتابع الحفله

لو جيت متأخر مش بتلاقي الا البواقي ده لو لقيت و بتقعد في ابعد مكان لدرجه انك مش بتبقي شايف اي حاجه و مفيش قدامك غير انك ترضي بالوضع لان ده الموجود

ساعات بسأل نفسي ايه الحكمه اللي ربنا شافها في انه يحرم انسان من حاجه هو خلقه محتاج ليها و هو وجود شريك الحياه و وجود اسره و بيت و اشباع رغبات هو خلقها فينا اصلا

و ميبقاش قدامه يا اما ياخد حاجه مش راضي عنها او يفضل محروم و ناقصه حاجات كتير و يمضي العمر بيه و يموت لوحده

يا تري الناس اللي زيي اللي اتجوزوا و عيالهم دلوقت قرب ال 15 سنه بيبصوا لي بحسد مثلا

ممكن بس من جانب ان معنديش ازمه ماليه و ده نابع اني مش بصرف علي حد غير نفسي و حتي لما بجيب في بيتنا حاجات مش هتيجي جنب انك تربي اطفال و تدفع ليهم مدارس و تفسحهم الي اخره

طيب هل الوضع اللي الواحد فيه عدل

طيب انا عايز اتجوز و مش لاقي عروسه و مبقاش حد بيجيبي لي اي عرايس و لو حد جاب حاجه بتقي كسر الكسر  باعتبار اني راجل عجوز و عفا عليه الزمن و يتنيل علي خبته و يرضي باي حاجه

طيب اعمل ايه علشان الاقي حد مناسب ليا قبل ما الاربعينات هي كمان تخلص زي ما الثلاثينات خلصت و متحركتش خطوه لقدام

طيب لو انا هعيش كده ايه لازمه العيشه في الوضع ده و هستفاد ايه منها

نفسي حد يجاوبني و يقولي اعمل ايه 

!!!!!!!!!!!!

 

منحني الصعود و الهبوط

 

زي ما ذكرت قبل كده اني وصلت لمرحله اني كاره نفسي و كاره شكلي و كاره تفكيري

الموضوع ده زاد جدا اخر كام شهر خصوصا لما بقت حياتي مفيهاش اي حاجه حلوه و مبقاش فيها امل و مبقاش بكره حاجه انا بستناها 

بالعكس بقيت خايف منه لانه مع الوقت بيدمر الوضع الحالي اللي الواحد اصلا مش مبسوط منه و لا مرتاح و بيخليه اسوء و اسوء

فقد عزيز او اصابه بمرض او مشاكل في البيت اللي عايش فيه محتاج تحلها ترميمات و غيره بقيت شايل هم بكره و اللي بيجيبه بكره

افتكرت ايام ما كنت في اخر سنه قبل التخرج و انا كلي امل و متخيل ان حجم التعب و الجهد اللي عملته في الصيف بتاع الدراسه اللي زمايلي كانوا بيخرجوا و يتفسحوا فيه هيخليني راجل تتهافت عليه الشركات و ان التعب ده هلاقي له في الاخر فايده و احصد ما زرعته و طبعا مش ده اللي حصل

في الوقت ده كنت شاب محترم جدا متطلعش العيبه مني كنت بتمني اني اموت شهيد كنت بتمني اني افتح الاندلس تاني كنت بتمني اني ابقي حاجه مهمه و حاجه عظيمه

كنت متوقع اني هتجوز بنت جميله و كان في الوقت ده في مسلسلات تاريخيه سوريه هبت علينا منها الممثله الجميله نسرين طافش

لو شوفتوا براءه وجه نسرين وقتها كنتوا هتعرفوا قد ايه احلامي بريئه لو لو شوفتها دلوقت هتعرفوا اد ايه اتحولت الاحلام دي لحاجه تانيه خالص

تقريبا الفرق ده عباره عن 18 سنه الا شهور بسيطه في السنين دي تحولت من انسان سوي ملتزم ليه قضيه لانسان شهواني

كل نفسه و هدفه في الحياه انه عايز ست يتجوزها علشان ينام معاها و يشبع رغباته اللي محروم منها كل ما يشوف واحده مع جوزها  يحسده عليها و علي انه بينام مع المزه دي بالليل و يقول يا ريتني كنت انا

تحولت من شخص عفيف اللسان لشخص كل يوم لازم يطلع منه شويه الفاظ نابيه يتملي منهم صندوق

تحولت من شخص شكله كويس لشخص شبه برميل الزيت الكبير مبعجر و معتقدش في ست ترضي بيه ده غير انحسار الشعر عن راسي و ان شعري بقي في ابيض بشكل ملحوظ حتي شعر دقني برضه بقي فيه ابيض كتير

هل يا تري قعدتي في البيت سنتين بعد التخرج لحد ما لقيت شغلانه كانت المفروض تفهمني درس اني مش هحقق اللي نفسي فيه

اني مش هبقي انسان طبيعي يبقي عنده بيت و اولاد و زوجه و اسره

هل كان المفروض افهم وقتها اني لازم احلامي اللي كانت طالعه  دي وهم و خيال و اني هنزل و انا علي جدور رقبتي و هقرب من عمر ال 41 سنه و انا مش محقق اي حاجه

هل كنت المفروض اعرف اني هبقي في نظر نفسي اني كلب جربان او انسان بقت كل افكاره ملوثه بخيالات جنسيه

لدرجه ان واحد عندي في الفيس بوك كان بيبارك لمراته علي حاجه و حاطط صورتها قعدت اقول اهي دي الجوازه جسمها حلو و وشها حلوه مش زي اللي بنشوفهم ما الواحد ليه نفس ان يبقي الوش اللي يبوسه حلو مش الجسم بس

و اقول اشمعني هو و انا لا

هل كنت اتخيل ان ابقي عايز اموت لاني مش شايف لحياتي معني او هدف و لا فيها اي نوع من المتعه و لا الراحه

هل كنت اتخيل اني ابقي اضحوكه لما حد يجيله مزاج او لما يتزنق في كلامه معايا يقوله انت متتكلمش علشان انت متجوزتش و مشكوك فيك و في ميولك

هل كنت اتخيل اني لما اتناقش مع شويه زملاء في العملاء سواء اصغر و لا اكبر الاقي كلمه من نوع و ان  تعرف منين انت لا متجوز و لا عندك مسؤليات انت فرداني مع نفسك

هل كنت اتخيل اني ابقي من ال Left overs  البقايا بالبلدي اللي فضلوا كده و مبقوش شبه الناس

اللي حياتهم وقفت في مرحله معينه و معدتهاش و فضلوا عندها سنين طويله و لسه مكملين كده

طيب ايه الحل الامثل لحياتي

اقطع تعلقي الضعيف بالامل ان الظروف هتتحسن و ابدء اشوف هعمل ايه في حياتي الحاليه مع توقع ان الدنيا هتبقي اسوء في المستقبل و مش هلاقي اهلي جنبي في يوم من الايام و هموت و انا كده

هل هي لعنه صابتني انا و اختي الوحيده اننا نفضل كده لحد ما نموت معندناش حد و اللي هيموت فينا الاول هيدفن التاني و اللي هيكمل بعده مش هيلاقي حد يدفنه

هل احنا اسره محرم عليها الفرحه و السعاده و انها تبقي شبه الناس التانيه

طيب ايه الذنب او الجريره اللي عملناها علشان كل ده

و اللي هيقولي اصل اكيد ربنا ليه حكمه

هي يعني كل الناس اللي حياتها عاديه دي مفيهاش حكمه و لا الحكمه جت لحد عندنا و بقت ان حياتنا تبقي كده

انا حياتي متوقفه تماما

و الله متوقفه تماما انا مش عارف اعمل اي حاجه

و لا اخطط

يعني مش بدور علي شغل تاني لان مفيش ما يدعو اني احتاج مرتب اكبر

مش بدور علي هجره لاني معنديش حد اهاجر علشانه اولاد مثلا و لاني هسيب اهلي و اختي لمين و هروح هناك اعيش لوحدي و يبقي وضع اسوء من اللي انا فيه

انا كل ما يجي شهر رمضان عليا تجيلي مشاعر كتير ما بين احباط ان حالي متغيرش ما بين شعور بالذنب من الشخص اللي بقيت عليه ما بين اني بقصر في العبادات و انا عارف اني مقصر بس معنديش طاقه ولا نفس للاجتهاد في العباده

و للاسف كل سنه بكبر عن السنه اللي قبلها و يفضل الوضع كده لحد ما هوصل في يوم ابقي فعلا مش قادر اجتهد في العباده 

انا بصلي تراويح اه و بقرأ قرأن اه بس مش راضي عن اللي بعمله جنب اللي بشوف ان كل الناس بتعمله

و فعليا مش بيبقي عندي طوله بال و لا صبر و لا صحه

و الله خلقي ضاق جدا و جهدي و طاقتي مستنفذين جدا

انا حاسس بالضياع حاسس اني بتمني اني مكنتش اتولدت من اساسه

انا تعبت و الله تعبت

حقيقه حياتي في فيديو

 

الفيديو ده رغم انه صاحبه بيعمل الفيديوهات علي اساس انها كوميديه بس الواقع انه بيحكي الحقيقيه اللي انا حاسس بيها و اللي فيه كتير فعلا من اللي حاصل في حياتي الفيديو ده لخص في دقايق حالي في 40 سنه و نص 

و اه يا افه