عندما لا تسير الحياه كما تريد رغم اتباعك لقواعدها و قوانينها صفحه المدونه علي الفيس بوك https://www.facebook.com/ahya2afa
الاثنين، 20 ديسمبر 2021
تخريف اخر السنه
الجمعة، 29 أكتوبر 2021
تعالوا نلوك عن الفيس بوك
الاثنين، 13 سبتمبر 2021
النصيب و الرزق
من ايام الطفوله و لحد دلوقت و في فيلم انا بحب اشوفه الفيلم ده انتاج سوري اسمه صح النوم و الصوره دي منه
مش عارف ايه فكرني بيه النهارده و افتكرت المشهد ده بالذات و لقيتني في بربط بينه و بين موضوع الارزاق و النصيب في عقلي
تحس ان الصوره دي بتعبر جدا عن واقع التوزيع بتاع النصيب و الرزق انك قاعد شايف كل واحد حواليك عمال ياخد و تيجي لحد عندك و ميبقاش في حاجه تتوزع عليك دي في اي حاجه علي فكره جواز او اولاد او وظيفه كويسه و ترقيه
انا مش بعترض علي قدر الله و لا يعني بعتبر الموضوع ده استغفر الله العظيم تجرء علي الذات الالهيه و لكن ده بالظبط شعور الواحد لما يلاقي نفسه عنده 40 سنه و محققش اي حاجه لا اسره و لا زوجه و لابيت و لا اولاد و حياه كامله
لما يلاقي نفسه محروم جنسيا و هي حاجه ربنا زرعها فينا و وصل انه كل شويه يلاقي في وشه مقالات علي النت بعنواين زي احصائيه تثبت ان الاطفال المصابه بالتوحد كانوا من اباء تخطوا ال 40 عام او مقاله بعنوان مشاكل القضيب بعد سن ال 40 او المشاكل الجنسيه و الضعف بعد سن ال 40 او صحتك بعد ال 40 او قلبك بعد ال 40 او مش عارف ايه
تحس انك مره واحده كده عجزت و انتهيت و وقتك خلص تبص طيب هو انا من يوم ما اتخرجت لحد دلوقت عدي كام سنه 16 او 17 سنه
طيب انا وصلت ال 30 بعد 4 او 5 سنين من ال 16 دول و كنت بجاهد فيهم و مش عارف اوصل لحاجه
و بعدين ال 10 سنين اللي فاتوا اتسرقوا في محاوله شراء شقه و البحث عن عروسه تبقي علي الاقل مقبوله الشكل مش حاجه تخليك حاسس انك عايز ترجع في وشها
تحس كده ان البني ادم ليه تاريخ صلاحيه زي الاكل و الشرب بعده ما ينفعش يعمل حاجه و يبدء يسمع حاجات من قبيل اسامي المقالات اللي انا شوفتها او ان الانسان قدامه وقت كده زي وقت الامتحان لو محققش انه يستقر و يعمل اسره و اولاد خلال الوقت ده بيجوا يسبحوا منه الورقه و يقولوا خلاص الوقت خلص و يبقي سقط
الوضع ده مدمرني نفسا جدا من ساعه ما وصلت 40 سنه من شهرين و مخليني شايف نفسي راجل عجوز ابص لنفسي الاقي عندي شعرات بيضا زادت عن زمان و وزني زايد بدون سبب محدد من الاخر شكلي بقي عرمه بسبب الاكتئاب
لما تعدي واحده قدامي و تعجبني او ابص عليها الاقي نفسي بقول تلاقيها بتقول في سرها لو لاحظت اني ببص ايه الراجل العجوز العايب ده مش يراعي سنه
لما احس كده برغبه جنسيه او احساس اني محتاج ست احس اني عيب عليا اني لسه في السن ده و بفكر زي المراهقين
رغم اني كشخص هو هو نفس الشخص من 20 سنه او اكثر معيشتش حياتي منمتش في حضن واحده ماشبعتش رغباتي الجنسيه
كل اللي حصل اني عجزت و سرقني القطر زي علبه العصير اللي متفتحتش لحد ما صلاحيتها انتهت
كل ما اشوف اللي حواليا و قريبين من سني ولادهم ما شاء الله بقوا طولهم و انا وحيد زي ما انا يصعب عليا نفسي
كل ما ابويا و امي بيكبروا بحس اني قريب جدا مش هلاقيهم و ابقي لوحدي
لسه قاري عن حاله راجل عنده 39 سنه و عنده ولد في ثانويه عامه
يعني واحد اصغر مني بسنه و عنده عيل بتاع 15 او 16 سنه و انا قاعد كده اتحسر علي نفسي
كل ما ابص لنفسي في شغلي و الاقي نفسي متقدمتش لقدام بقالي سنين و ان العيال الصغيره بقوا في نفس الدرجه الوظيفيه اللي انا فيها بسبب اني مفيش مجال للترقي قدامي يصعب عليا حالي
ابص كده الاقي نفسي و لا حاجه
عيل عنده 32 سنه عنده بيت و طفلين علي الاقل و نفس الدرجه الوظيفيه اللي انا فيها و نفس الامكانيات الماديه اللي انا فيها
و انا و لا حاجه فعليا و لا حاجه قاعد كده بكبر و بعجز و شعري بيبض دون اي هدف او متعه في الحياه
ببص حواليا بلاقي المنظر الي في الصوره دي الناس كلها بيجيلها رزقها و بتجيجي لحد عندي و توقف
رغم ان في ناس كتير فيهم ميستاهلوش و جلهم الرزق ده بالساهل زي العيل اللي ابوه جوزه و جابله كل حاجه
و بيصرف عليه و فاتحله بيه و هو داخل في الجوازه بعضوه التناسلي فقط لا غير
انا تعبان جدا و علي اخري و زهقان من الحياه و نفسي لو ربنا كاتب عليا اعيش كده انه ميطولش في عمري كتير
و اه ياااااااااا افه
السبت، 24 يوليو 2021
الكابوس
عمري ما تخيلت اني اصحي في يوم الصبح اتمني ارجع اعيش اخر عشر سنين عشتهم زي النهارده
اتمني ان كل اللي شوفته السنين اللي فاتت يبقي مجرد كابوس و اصحي الاقي نفسي لسه في اول الثلاثينات و لا اخر العشرينات
احساس الواحد زي اللي اتسرق منه كنز عظيم و كنز كبير و هو مش في ايده حاجه شعور بفقد اغلي ما تملك و هو عمرك و وقتك
في الواقع انا اخر عشر سنين معملتش فيهم اي حاجه لنفسي اي حاجه اتعكز عليها او افرح بيها او احس ان و الله عمري ما راح هدر
حتي كل انجازاتي في شغلي مخلتنيش في وضع اعلي من ناس معملتش اي حاجه و ذلك لان الهرم الوظيفي ثابت و لان مفيش اماكن فاضيه غير اني كمان مليش في التعريض الانجازات دي اللي استفاد بيها الشركه و الروساء فقط رغم ان كان اغلبها تطوعي مني و مش مطالب بيها
في الاخر انا معملتش حاجه يا مولاي كما خلقتني قرشين في البنك متناسبين مع اي حد في سني و يكون عازب شقه عاديه جدا لسه جايبها من 4 سنين و خلاص علي كده
كل ما اقعد افتكر حاجه حلوه في السنين اللي فاتت ملاقيش ذكري حلوه ايام حلوه ملاقيش و الله
عزوبيه و وحده و اللي فكرني بالوحده اكتر العيد
فكرتني وحدتي في العيد ببوست كنت كتبته من 10 سنين اسمه وحيدا و يومها كنت حاولت اكلم صحابي علشان نخرج سوا و كان كله مشغول و مش فاضيلي و يومها كتبت البوست ده
دلوقت صحابي دول كلهم هاجروا بره مصر و عيالهم بقوا طولهم ما شاء الله و ان زي ما انا محققتش حاجه غير اني بقيت كهل عندي 40 سنه
فجأه بقيت زي مديري اللي قابلته في عملي الاخير لما اتعينت فيه في سنه 2008 و كان هو 40 سنه و انا ببص له باستغراب و مستكبر قوي الفرق بيني و بينه و بقول ده الراجل الكبير و كل ما حد يسألني عليه اقول لا ده كبير في السن ده 40 سنه
دلوقت بقيت زيه
10 سنين اتسرقوا من عمري و من حياتي و سنين طويله البلوج ده شاهد عليها متغيرش فيها حالي بالعكس بقي من سيئ اي اسوء
انا حتي معنديش علاقات اجتماعيه هامه يعني معنديش وسايط معنديش محاسيب معنديش ناس مهم
مش انا اللي تلاقيني اسمع مشكله حد تلاقيني اقولك استني اكلم لك فلان يخلص لك الموضوع ده ولا احتي اعرف ناس تعرف حد مهم
انا لو وقعت في مشكله مش هلاقي حد تقيل و واصل يوقف جنبي
عيلتي كلها ناس محترمه و كان منهم اساتذه جامعات و منهم اللي وصل اني بقي عميد الكليه اللي كان بيدرس فيها و رغم ذلك عمرنا ما كان عندنا واسطه و محسبويه
و لا عندنا لواءات و لا وكلاء نيابه ولا نواب مجلس شعب
ملناش ضهر ولا لينا معارف
يعني وصلت 40 سنه لا عيل ولا اسره و لا معارف و لا علاقات و لا حاجه كده احس اني عملتها و عملت انجاز فيها
انا من يوم ما تميت الاربعين من اكتر من اسبوع و انا حاسس اني انتهيت فعليا حاسس اني فقدت الفرصه في اني ابقي اي حاجه او يبقي ليا حاجه
زعلان علي شبابي اللي راح دون ان احقق اي شئ
و الله كنت حتي هبقي راضي باسره صغيره و طفل ولا طفلين و كنت هعتبر ده انجاز و نجاح و احمد ربنا و اشكره عليهم
بدل ما انا كده ولا حاجه ولا عندي حاجه ولا محقق حاجه
ثلثين عمر الواحد راح في الاونطه بتفرج علي الناس من بعيد و هي بتخطب و تناسب و تتجوز و تخلف و تدخل عيالها مدارس و اقعد بس في صف المتفرجين و السميعه اسمع اللي بيحكوه و بيجربوه و تجاربهم و مشاكلهم و ازاي تجاوزوها و انا اكبر من كل اللي بيتكلم و رغم ذلك هما كلهم سابقني بكتير
كتبت من 11 سنه رساله الي زوجتي و لحد دلوقت الرساله تايهه مش لاقيه حد تروح له كانها محطوطه في قزازه مرميه في بحر ملهوش شاطئ
احساس انك كبرت فجأه بقي مقيت جدا احساسي بالفشل و الحرمان و الضرب علي القفا
ما لما عمرك يتسرق منك و متحققش واحد علي الف من اللي نفسك فيه تبقي اضربت علي قفاك
لما تشقي و تشتغل و يطلع عين اللي جابك و غيرك يترقي و يتعمل له اعتبار و حساب و هو بطيخه بس عصفوره المدير و معرض يبقي اضربت علي قفاك
لما كل الناس تبقي عندها بيت و ولاد و حياه و انت بتروح تنام في اوضتك اللي بتنام فيها من يوم ما جيت الدنيا تبقي اضربت علي قفاك
يوم ما تبقي خايف من كل يوم جاي علشان الناس اللي حواليك هتسيبك و تمشي علشان عمرهم جه و معندكش حد بعدهم تكمل معاه حياتك تبقي اضربت علي قفاك
يوم ما بتبقي عايش مستني الاسبوع يخلص علشان تنام و مترحش الشغل او علشان تنزل تقعد علي القهوه مع اثنين زمايلك و تكرر الروتين ده اسبوع ورا اسبوع شهر ورا شهر سنه ورا سنه تبقي اتضربت علي قفاك
يوم ما تبقي ضحكت علي نفسك من و انت 30 سنه و عملت فيها انك كبرت و بعدين تكتشف دلوقت انك غلطت و بقي عندك 40 سنه و كنت لسه وقتها صغير و في عز شبابك و من حقك تعمل كل حاجه حرمت نفسك منها تبقي اتضربت علي قفاك
عيشت عيشه مش بتاعتك اتفرضت عليك بس كانت علي حسابك و علي حساب سنين عمرك
و في الاخر كلها كام سنه و تبقي مش قادر تمشي و لا تتحرك و تصيبك امراض الشيخوخه و انت ملحقتش تعيش
سبحان الله العمر ده بيجري بسرعه و السنين بتتسرب من ايدنا و مش بنحس بقيمتها الا متأخر
بتلاقي الكلام ده في القرأن مكتوب و واضح عن الناس اللي قالوا احنا معشناش الا ساعه و عن الناس اللي بتتمني ترجع فتعمل اعمال صالحه بعد عمرها ما فات و الاوان كمان فات
انا دلوقت مش شايف فاضل ليا غير اني احاول اصلح علاقتي بربنا اللي باظت كتير عن زمان
يمكن علي الاقل اخرج من الدنيا دي بحاجه تنفع في اخرتي ما مش هتبقي لا دنيا ولا اخره
ربنا يتوفانا جميعا و هو غافر لنا و راضي عنا
الخميس، 22 يوليو 2021
عازب في سن ال 40 (The 40 Year-old Virgin)
اسوء ما في التقدم في العمر هو احساسك ان الوقت بيخلص منك زي اللي كان داخل امتحان و قرب وقت الامتحان علي النهايه
كل ما بتعدي دقيقه بيحس ان اللي يقدر يجاوبه او يعمله بيقل لحد ما بيتجي لحظه لازم تتسحب منه الورقه و ميبقاش مسموح له يعمل حاجه
نفس الموضوع بالنسبه للعمر بتبدء حياتك بعد التخرج شايف العمر قدامك و الوقت قدامك و اللي متعملش السنه دي يتعمل السنه الجايه
و تجري سنه ورا سنه يا اما تحقق اللي نفسك فيه و تعمل بيت و اسره يا اما تبقي زي حالتي ورقتك بيضا و مجاويتش حاجه
اللي بيزعل الواحد لما يكبر في العمر و خصوصا لو حد زي حالتي مكنش عايش بالمعني المفهوم هو انه مع كل سنه كبرها كان بيبقي في حاجات صعب يعملها باعتبار انه كبر عليها او باعتبار انه المفروض ده كان بيعمله و هو صغير زمان
بيبدء الموضوع من اللعب و الفسح و الجري و يوصل للجواز و الخلفه و انه يتعلم حاجه جديده او انه يبدء career جديد و يبدء ينمو فيه
اللي بيحصل كمان ان قيمه الوقت عندك بتبقي فظيعه يعني النهارده شوفت ايميل كنت باعته في شهر نوفمبر اللي فات انا فاكر الايميل ده كاني بعته امبارح لما شوفته و اكتشفت انه من 9 شهور كنت فاضل شويه و اعيط قد كده الايام جرت قده كده كنت اصغر ايامها و كنت لسه في الثلاثينات مش كان ممكن ايامها الحق و اتجوز قبل ما ابقي 40 و محدش يرضي بيا الا العرايس الكسر
كل ما بتكبر بيتقالك يا ابني انت كبرت يا بني مش عارف ايه لو بتعمل حاجه بتحبها او لسه مستني تعمل حاجه نفسك فيها و معرفتش تعملها و انت اصغر سنا
لما توصل الثلاثينات زي ما كنت انا لو بدأت المدونه بتحس فعلا انك عجزت و معملتش حاجه بس بيبقي لسه في امل اه كبرت بس مش قوي اه اتأخرت بس مش قوي لسه شباب يا جامعه هو الثلاثين عجوز اه مجبتش شقه بس لسه اقدر اجيب اه متجوزتش بس لسه مكبرتش اوي اني اتجوز لو انا 33 و لا 34 اقدر اخد بنت 26 و لا 27 سنه عادي جدا
في الاربيعينات الوضع بيزداد سوء و بيتقالك كل شويه يا ابني انت عندك 40 سنه اكبر يا ابني اكبر انت مش عارف ايه تحس انك بقيت عجوز و الناس بتكلمك و تكتشف انهم عندهم حق فعلا انت بقيت عجوز
اللي في سنك اتجوز و خلف و عياله في اعدادي او علي اقل تقدير في 5 ابتدائي و انت قاعد كده زي الصوره اللي حاطهها عذراء في سن ال 40
متعرفش معني حضن ست ايه متعرفش معني انك تنام مع واحده ايه مفتقد اللحظات الحميمميه اللي بتبقي بين الراجل و الست رغبتك و شهوتك بتموتك كل يوم ما بقالك 25 سنه بالغ و لحد دلوقت منمتش مع واحده ست
بتعدي قدامك اي واحده بتبص عليها و تتخيلها في حضنك حتي لو شابه في العشرينات ما انت لسه بعقليه الشاب الاعزب اللي لسه متخرج و مدخلش دنيا تتفاجأ وقتها و تفوق لنفسك انك عمو بالنسبه للبنت دي بكرشك و صلعتك و شعرك الابيض و منظرك
تحس بالعيبه و بالعار او تتحول لخنزير مش فارق معاه منظره و هو بيبص بشهوانيه لبنت بتقوله يا عمو
تكره نفسك زي ما انا كاره نفسي كل يوم علي فشلي و علي منظري و سني اللي محققتش فيه حاجه
بكره نظرتي لكل ست جسمها حلوه ماشيه مع واحد او لوحدها و انا بتخيلها بتتصرف ازاي في السرير و منظرها بيبقي اي و بتخيل نفسي معاه
مش بتعمد و لا ببجاحه بس غصب عني بلاقي نفسي بفكر كده
لبسها مبين صدرها و لا مفسر حجمه و لا مبين فخادها باللي بينهم و عامله عمايلها و هي نازله الشارع
و قدامها واحد زيي كائن الرغبه بتقتله و العمر بيجري بيه و هو محروم من انه يبقي عنده واحده زيها
انا بقيت اكره نفسي كل ما احس اني محتاج للجنس او بشعر بالرغبه الجنسيه
بقيت بكره نفسي علشان وصلت 40 سنه و بقيت عباره عن خنزيز مقرف زي ما كان الناس زمان بتقول علي اللي امثالي
بقيت حاسس اني ريحتي عرق و اني منظري شيه الحيوانات و اني عباره عن ثور و لا بهيمه عايشه في الدنيا ملهاش حد
الناس اللي في سني و عندها اسره و بيت مش بحسهم شبهي بحسهم طبيعين جدا
حتي ساعات كتير اشوف فيديو لطفله بتلاعب ابوها اقعد اعيط اني محروم اني يبقي عندي طفل يلعب معايا
بنوته و لا ولد احس بحنانه و اخده في حضني و احبه
تقعد تتخيل نفسك و انت في حضن واحده تقعد تتخيل هي هتعمل معاك ايه و هتعمل معاها ايه يا تري ملمس جسمها هيبقي ازاي يا تري لحظه نومك معاها عامله ازاي
تيجي لحظه بقي و تتخيل واحده شوفتها علي القيس و لا علي الشارع و جسمها كده مليان انوثه و تتخيل الست دي لو معاك هتعمل فيها ايه
تقعد تتخيل نفسك و انت بتفقد عذريتك معاها و بتستمتع بيها و بجسمها و بتحسسها بأنوثتها و بتحس برجولتك معاها
بعدها تقرف من نفسك و من شهوانيتك بعدها تكره نفسك انك كده بدل ما تبقي راجل كبير محترم علي قد سنك و علي قد انك بقيت كهل
علي قد شعر راسك اللي بدأ يبقي ابيض علي قد الشباب اللي حواليك في الشغل اللي بيبصوا لك علي انك الاستاذ فلان الموظف القديم
معتدش الشاب اللي مسموحلك بكل حاجه معدتش الشاب اللي طبيعي يكون لسه متجوزش و معندهوش اطفال
حتي الامراض مش هتسيبك في حالك
تفتح الانترنت تلاقي كلام زي الزفت عن الصحه ما بعد الاربعين و عن اد ايه مبقتش صغير و مش عارف ايه
تلاقي موقع ديني كاتبلك حديث فيما معناه انك لازم تعد العده للرحيل و ان اللي وصل ال 40 و لسه مبتداش يجهز نفسه للاخره يبقي راحت عليه الجنه
يا جماعه انا و الله ما عشت
انا و الله ال 40 سنه دول طاروا هوا
اضحك عليا فيهم ايام شبه بعضها شغل و نوم زي الثور اللي في سافيه
لا استمتعت و لا حبيت و لا اتجوزت ولا حتي علاقتي بربنا فضلت زي ما هي
اتسرقوا مني و مخدتش منهم حاجه ولا في شغلي بيقيت في منصب و لا في حياتي بقي عندي بيت و اسره
انا حاسس بذل و انكسار محدش حاسس بيه
حاسس بفشل و حاسس اني سلمت ورقه الامتحان بيضا و مليش مكان في الكليات و لا في التعليم العالي
حاسس اني ضايع
حاسس اني خنزير قذر عجوز مسواش حاجه
انا كاره شعور اني كبرت من غير ما احقق ابسط البسيط و هو بيت و اسره و اطفال بلاش حتي منصب و لا فلوس
احس اني بني ادم
احس اني انسان
احس بثمره عمري اللي راح
بدل ما انا حاسس اني التفاحه اللي كانت خضرا امبارح
و صحينا النهارده لقيناها معطبه فجأه
ادعولي ربنا يفكها عليا يا يخدني و يريحني علشان انا و الله تعبت من كل حاجه من الوحده و من الحرمان و من كل شئ
السبت، 10 يوليو 2021
قضبان الحياه
من كام يوم قعدت افكر في حياتي بشكل خاص و حياه الانسان بشكل عام لقيت ان الواحد غالبا بتنتهي ايامه الحلوه بانتهاء الدراسه
في الفتره ده بتبقي انت عايش علشان نفسك و ناس تانيه اللي هي ابوك و امك عايشين علشانك تعبانين علشان انت ترتاح جعانين علشان انت تشبع حارمين نفسهم من حاجات علشان يجيبوا لك اللي نفسك فيه و انت كل اللي بتعمله انك تطلب و بس
اه في قلق الدراسه و قلق الامتحانات و النتيجه و الزهق من المدرسه بس في الاخر انت كل ما تتمناه و هما يقدروا عليه بيعملوه
تيجي بقي تتخرج تلاقي نفسك بتجري علشان تتجوز و علشان تخلف و علشان تعمل نفس الدوره السابقه اللي اتعملت معاك
قطر كل الناس ماشيه عليه و سعيده بيه انك تعيش ثلث عمرك لنفسك و باقي عمرك او الثلثين لعيالك
لما بتبقي عندك اسره بتجيب الحاجه اللي يحبوها سواء انت بتحبها و لا لأ بتروح ا لاماكن اللي تعجبهم بتاكل الاكل اللي هما بيحبوه و هكذا
كل الناس ماشيه علي نفس القضبان زي القطر الا لو حد عنده مرض نفسي و كان اناني و مش عامل لاولاده و بيته اي اعتبار
طيب حتي لو انت متجوزتش زي حالاتي فانت بيبقي كل هدفك انك تجري ورا القطر و تحاول تحصل له علشان تمشي نفس المشوار
مش هنكر ان وجود زوجه بيبسطك نفسيا و جنسيا و جسديا و حاجات تانيه كتير بس برضه كل ده مش بيبقي هو الهدف الاساسي بمجرد ما يبقي عندك عيال و مسؤل عنهم
اسوء ما في الموضوع لما الناس تتكلم معاك و تفتكرك بحكم سنك في محطه معينه و يلاقوك لسه واقف في محطه مصر او محطه رمسيس
قطرك مطلعش اصلا رغم انك واقف بقالك كتير لا اتقدمت لقدام و لا مشيت علي الجدول الزمني المفروض
ده غير كلام الناس اللي بيوجع و الله اعلم قاصدين ولا لا
زي يا ابني انت كبرت يا ابني فاتك الفطر
و غير كمان شعورك انت لما تلاقي صحابك اولادهم في ثانيه اعدادي و انت اصلا ابنك ده في علم الغيب ده لو جه
من كام شهر في انسانه محترمه كتبت لي تعليق عن ان عدم الجواز ده مش معناه انك ناقص لا ده في ناس حياتها وحشه في الجواز و ناس عيالها مطلعين عنيها و الي اخره
انا طبعا متفق معاها بس المشكله ان الوجه التاني للزواج هو العزوبيه و دي هي الولا حاجه
لا حياه و لا هدف ثور مربوط في ساقيه بيروح الشغل و بيرجع ينام و من غير اي هدف و لا انتظار لحاجه
كل الناس اللي بتمشي علي القضيب بتاع القطر حتي و هما اطفال ماشين علي اهداف
انا عايز انجح انا عايز اتخرج انا عايز اشتغل انا عايز اتجوز و اجهز نفسي انا عايز اجيب عيال انا عايز اربيهم انا عايز اشوف ولادهم
و بكده يقولك رسالتي انتهت و يموت بعدها
تيجي تقولي يعني انت عايش علشان توصل للموت
اقولك كلنا عايشين كده عايشين علشان نموت في الاخر مهما نعمل
بس الاهداف دي اللي بتصبرنا علي قرف الحياه
لان واحد زيي مثلا بقالي فوق ال 5 سنين مش قارق معيا اموت و لا لأ
خلاص مبقاش ليا نفس في حاجه ولا عايز اعيش علشان حاجه
لاني فقدت الامل في اني اتجوز و اعف نفسي و يبقي كمان عندي اسره احس معاه بالونس و الحياه
عايش مستني اني افقد ابي و امي لما يجي وقتهم و اعيش وحيد في الدنيا
يبقي ايه لازمه العيشه بقي
ربنا يهونها علينا و يخرجنا منها علي خير
و اةةةةةةةة يا افه
السبت، 5 يونيو 2021
نظريه الواحد الصحيح 2
من كام يوم لقيت البوست ده
و الغريبه سبحان الله انه بيتكلم عن حاجه اتكلمت عنها من كام سنه عن عدم اقتناعي بنظريه الواحد الصحيح و ان اللي عند غيرك و ناقصك في قصاده حاجه عندك و ناقصاه هو كمان
تحس ان في فتره من الفترات في شيخ كان نايم و طلع بخطه عبقريه لاجابه سؤال البشريه بتاع هو انا ليه مش متجوز و لا انا ليه مش مخلف و لا انا ليه فقير
و بما انه معندهوش اجابه مقنعه او عنده اجابه ممكن تخلي الشخص اللي قدامه يبقي ناقم علي حياته و قدر ربنا اللي كتبهوله فيها
فطلع بالفكره اللولبيه بتاع ال 24 قيراط و الواحد الصحيح اللي اصلا لما تسمعها كرد علي سؤالك اشمعني انا ناقصني كذا تحس انك متضايق اكتر
ربنا يكرمك يا شيخ عمرو شاهين و يكتر من امثالك اللي مش بتستسهل و بتواجه الناس بالواقع و زي ما ربنا قال فمن شاء فليؤمن و من شاء فليكفر واضحه و صريحه انا اللي خلقتكم و انا مقدر مقدارتكم
و اه يا افه
السبت، 15 مايو 2021
رجل في ال 40
الأحد، 7 مارس 2021
احلام صغيره و صدمات كبيره
في سن الطفوله و المراهقه دايما الواحد بيحلم احلام كبيره جدا بيبقي ليها علاقه بمستقبله زي نفسه يشتغل ايه نفسه يسكن فين نفسه يبقي عنده ايه هيجيب عربيه شكلها عامل ازاي نفسه يتجوز مين ( لو هو حاطط عينه علي حد ) و لو مش حاطط اللي عايز يتجوزها هيبقي شكلها ايه هيجيب ايه لنفسه لما يكبر في ايه مش عنده و هو صغير و اهله مش قادرين يجيبوه ليه و هو هيجيبه اول ما يتخرج
بنفضل نحلم و نحلم و نحلم و الاحلام تكبر جوانا و تتحول الي يقين و فجأه نلاقي نفسنا في اواخر سنين الكليه و الوقت بتاع تحقيق الاحلام قرب و تبدء تسمع قصص من نوعيه فلان اتخرج بقاله 5 سنين و جاب شقه و عربيه و اتجوز واحده حلوه مش عارف مين اشتغل فين و بياخد مرتب قد كده و هكذا
تبدء انت تفكر في نفسك اكيد انا هبقي زي فلان ما انا بصلي و بتقي ربنا و مش بعمل حاجه وحشه و بابا و ماما قالولي ان اللي بيسمع كلام ربنا و بيتقيه ربنا بيرزقه قوي و بيديه كل اللي يتمناه ياه بالبساطه دي و ماله يالا بينا نصلي يالا بينا نحفظ قرأن يالا بينا نتعلم تجويد ما كل ده ارضاء لربنا زياده يبقي اكيد هنلاقي كرم من ربنا زياده و رزق اوسع من اللي معملش كده و من اللي عامل الحاجات الاساسيه بس
تيجي لحظه التخرج و تاخد شهادتك و تخلص ورق الجيش و التجنيد و تبدء تدور علي شغل و تقعد بالسنين علشان تلاقي اي شغله حتي لو بمرتب تعبان و بفلوس قليله بس نشتغل و نتعب زي ما بنسمع من الناس ان الواحد لازم يتعب اول سنتين او ثلاثه و يلم خبره و هوب هتفتح معاه بقي بالمرتب الكبير و الشغل الحلو و هيغرق في بحر الفلوس
الله مش يا جماعه كان في فلان اللي جاب شقه و عربيه و اتجوز في خلال خمس سنين واحده مزه ادينا بقالنا اهو 3 سنين مش لاقيين شغل من اساسه تلاقي اه فلان موجود بس كان عنده وسطه او اتعين في الشركه دي بالصدفه و قدر ربنا يعني يا جماعه فلان ده مش الحاله العامه لا يا حبيبي ده حاله خاصه
تلاقي شغل تعبان بمرتب تعبان و تفضل صابر عليه و ممكن ربنا يكرمك بشغل احسن في خلال سنتين او ثلاثه بعدها او لا هوب تلاقي نفسك 30 سنه الله انا لحقت ده انا لسه متخرج هوب وصلت الثلاثين
و تبدء تنزل عليك الاسئله بتاعه انت جبت ال 30 و متجوزتش انت جبت الثلاثين و معملتش ده كل صحابك اتجوزوا ده كل صحابك بقي اباء
تبص حواليك فعلا تلاقي معظم صحابك بقوا اباء و عندهم بيوت و زوجات و عايشين حياه طبيعيه و انت زي ما انت
طيب يا جماعه انا هلحقكم بس متأخر شويه تبدء بقي تقول انا هاخد شقه اي كلام او ايجار و هروح اخطب الحق نفسي مش لازم احقق احلامي الكبيره انا عغير احلامي و اخيلها شقه عاديه جيدا علي قد اللي الفلوس اللي حوشتها لحد دلوقت و عروسه متوسطه و مش لازم عربيه و لا مرتب كبير
تلاقي شقتك مش عاجبه العروسه و تلاقي اصلا العروسه اللي مش عاجبها الشقه متعجبش حد
ليه يا جماعه ده بنتكم يعني تتبلع بالعافيه لا اصل انت كبير و المفروض تبقي جاهز عن كده
يا اما تقعد تجيبك عرايس كلها شكلها ضايع و معوجين و محسسينك انهم بتفضلوا عليك لو رضوا باحوالك
تقول خلاص انا هشوف غيرها يمكن الاقي الاحسن شويه
مع الوقت تلاقي ان المستوي بتاع العروسه اللي بتجيلك عمال يقل و ان عدد العرايس اللي بيتعرض عليك عمال يقل لحد ما تقعد بالشهور عقبال ما يجيلك واحده و يا ريتها تبقي حاجه عدله
و طبعا كل فتره و التانيه تلاقي اللي تطلع تعليق علي شقتك او علي شكلك او علي سنك انه مش مناسب
تبص حواليك تلاقي صحابك عيالهم كبروا و دخلوا مدارس تلاقي زميلاتك في الجامعه عيالهم في ثانوي تبص علي التاريخ تلاقي نفسك عندك 40 سنه تلاقي انك جايب خاتم قرايه فتحه من ست سنين علي اساس انك هتستخدمه و متشال في علبته بيلم تراب تلاقي شعرك ابيض تلاقي شكلك بقي عجوز و سنك بقي عجوز
تلاقي اللي بيقولك يا عمو و يا حاج تلاقي اللي يقولك 40 سنه و متجوزتش ده اللي زيك عيالهم في الجامعه تلاقي اللي يهينك بمناسبه و يقولك عقبال اولادك مش هما في الجامعه
تلاقي نفسك لسه لحد دلوقت متعرفش يعني ايه حضن ست و لا عملت اي حاجه مع ست في حياتك و لا حتي اللي عمل كان مش مخطط لكده و اخره خد بوسه ولا حضن في شرم و لا الغردقه من اجنبيه تحت ضغط هرموناته و رغباته و رجع يعيط و يستغفر ربنا كتير علي اللي عمله
و يهاجم نفسه يقول بقي انا المتدين اللي كان بيسمع كلام ربنا و بيعمل اكتر من اللي بيعمله اي حد علشان يرضي ربنا دلوقت بقي اسوء من اي حد و عمل اللي ممكن متعملش من حد مش ملتزم
اه مغلطتش و ارتكبت الفاحشه بس عملت حاجه حرام برضه
او تلاقي نفسك زي ما انت معملتش حاجه مع اي ست او معملتش اي حاجه غلط بس التزامك قل و ارتباطك بربنا قل اصل يا جماعه انا مش شايف فايده كل الحاجات الكتير الزياده اللي انا عملتها ده انا حتي الحاجات العاديه محصلتش معايا
تقعد تبص علي حياتك تلاقي انك كنت بتستني كل سنه السنه اللي بعدها يمكن تيجي بالخير وفي الاخر ميحصلش حاجه و سنه تجري ورا سنه لحد ما توصل 40 سنه
تبدء تحس بالشك ان في اي حاجه من احلامك هتتحقق تبدء تشك اصلا انك الحاجات البسيطه اللي هي زوجه و اولاد دي كمان بقت بعيده المنال
الاول كنت محروم منها لانك معكش تمنها دلوقت محروم منها لانك كبرت
يا تتجوز واحده وحشه و مش عجباك ولا فيها اي حاجه تخليك عايزها يا تقعد كده
لانك كبرت
تبص علي احلامك تلاقيها اتحولت من احلام صغيره لصدمات كبيره و كل شويه الاحلام دي بتصغر و تتقلص مع كبر عمرك
تلاقي نفسك عدي منك شبابك و عمرك دون ان تستفيد شئ كل اللي حصل مجرد انتظار و امل في بكره عمره ما اتحقق
مع دخولك عمر الاربعين فانت قضيت اكتر من ثلثين عمرك الافتراضي اللي هو تقريبا 60 سنه و قربت من نهايتك و هتتحاسب
هتتحاسب لو عملت حاجه غلط مع حد حتي لو بوس او حضن حتي لو قولت اصل هرموناتي ضغظت عليا اصلي تعبت من الحرمان يا رب
تسأل نفسك طيب يا رب انت غلطت في ايه ما انت زارع الرغبه فينا و بتقعد تاكل فينا و تتعبنا كل يوم و في نفس الوقت مش رازقني الجواز و قافل عليا باب الحلال و برضه يا رب انا مغلطتش اوي انا مسكت نفسي اني اعمل الكبيره يا تري يا رب هتسمحني
ده بيبقي في ايد ربك
هتتحاسب عن بعدك عن ربنا و عن تقصيرك في حقه حتي لو قولت يا رب اصلي بقيت محبط و اليأس ملاني و مش حاسس ان عبادتي و النوافل الزياده دي ادتني اي حاجه في حياتي بالعكس ده انا اقل من اي حد يا دوب بيصلي و يصوم
او تتحاسب علي انك قمت قالبها مسخره و عملت كل اللي نفسك فيك و نسيت كلام ربنا و رحت و زنيت و غلطت و قولت اصلي مش عارف الاقي الحلال
انا شوفت الثلاث نماذج
اللي غلط نص غلط
اللي مغلطش خالص و بعد عن ربنا
و اللي غلط و خربها و عمل كبيره من الكبائر
و كلهم عند سن ال 40 او عدوها
و كلهم كانوا ناس محترمه و بتعرف ربنا و عمرك ما كنت تتخيل ان الناس دي تعمل كده و صلاه و عباده و صوم
لما تتكلم مع كل واحد منهم يقولك ما انا مش عايش يا اخي
ترجع و تسأل فين الغلط ليه الناس دي بقيت كده
ترجع تسأل نفسك انا يا رب ليه عندي 40 سنه و معنديش بيت و اولاد و محققتش حاجه في حياتي و عمري ضاع و جري مني
تكتشف بقي المفأجاه الرهيبه
هو مين قال انك المفروض تتجوز هو مين قال انك المفرض تبقي سعيد او تبقي غني او عندك عربيه
انت مسمعتش الايه القرأنيه " و ما خلقت الجن و الأنس الا ليعبدون " انت مخلوق علشان تعبد ربنا
و الدنيا ده مجرد فتره انت قاعد قيها كده تعبد ربنا و ترضيه
و مش لازم تتوقع ان صلاتك الزياده و صومك و حفظك للقرأن ده علشان تبقي حياتك احسن في الدنيا و يجيلك اللي نفسك فيه
ده جزائه في الاخره و ثوابه في الاخره
انت اللي ربوك فهموك غلط
بعدك عن ربك و عصيانك ليه و اغضابه جزء منه نتيجه انك فاهم غلط
انك عاملت ربنا بنديه انا عملت اهو يا رب فين بقي الايام الحلوه محصلتش طيب يا رب انا هبعد
طيب يا رب انا ضعفت طيب يا رب انا مش عارف ايه
يا ابني افهم
دنتيك دنيه اختبار و دار شقاء مش نعيم و سعاده
شغلك اللي انت راعيت ربنا فيه و رغم ذلك مخدتش حقك و غيرك مشتغلتش و وصل بالتعريص و الاونطه جزائه مش في الدنيا
في الاخره
وصل الشخص ده للمنصب العالي بالطرق الملتويه حسابه برضه في الاخره
الي كل واحد بيقرا البوست ده و لسه شاب
اوعي تقع في الخيه و تصدق ان جزاء اعمالك اللي بتعملها لربنا هتاخده فورا في الدنيا
رزق الدنيا شئ و ثواب الاخيره شئ تاني
خدوا بالكم و متضيعوش عمركم في الانتظار
ربنا يخرجنا جميعا من الدنيا دي علي خير و يغفر لنا و يجعلنا من اهل الجنه
الجمعة، 26 فبراير 2021
بقيت منهم
في ايام الطفوله و المراهقه و الشباب كان الواحد بيشوف ناس في سني حاليا او اكبر قليلا بما اني كلها كام شهر و هبقي 40 سنه فهنقول الناس اللي في الفئه العمريه من 40 الي 50
كنت تبص للواحد فيهم تلاقيه غالبا طخين ( بقيت منهم ) و بكرش ( بقيت منهم ) و شعره خفيف او اصلع ( بقيت منهم ) و شكله كده عامل مش راكب علي بعضه لا هو عجوز اوي ولا هو شاب هو حاجه كده ينفع تطلق عليها انها من غير المصنفات او الكائنات الخرافيه تلاقي عنده شويه شعر ابيض ( بقيت منهم ) لا كتير و لا قليل
كنا بنبص للناس دي و استغرب ازاي الناس دي بقت كده و ليه سابوا نفسهم كده و كنا لما نتكلم علي حد منهم نجي نقول عليه ده راجل كبير معدي ال 40 سنه و طبعا المؤدب كان بيبص و يضحك في سره او يستغرب شكل الناس دي قليل الادب و الربايه كان يسمعهم شويه كلام
كنا نبص للناس دي نستغرب ايه ده دول بيهزروا ليه مش يراعوا سنهم دول بيضحكوا دول لابسين جينز و تيشرتات ما يلبسوا هدوم تناسب سنهم دول مش عيال علي كده
لما نلاقي واحد فيهم بيبص علي بنت و لا حاجه نستغرب ايه الراجل العايب الكبير ده اللي بيبص علي البنت ( هكتب مقاله تانيه عن الموضوع ده لوحده )
يعني من الاخر كنا بنحكم علي الناس دي انها المفروض تعيش عيشه الرهبنه و الوقار و العجز
للاسف انا بقيت في السن ده و حابب اتكلم عن احساسي بعد ما بقيت منهم
صدقوني لو قولت لكم ان من جوانا الواحد مش حاسس ولا وصله الادراك اللي او الصوره اللي انتوا شايفنه بيها كشباب صغير اقل من 20 او اكبر من 20 شويه
الواحد بيستغرب لما يجي يلاقي شعره مدفونه في دقنه و يشدها و يقعد يدور علي لون اسود في صوابعه ميلاقيش و بعدين يلاقي كده حاجه بيضه شبه الشعره يكتشف انها الشعره اللي هو لسه شاددها من دقنه
يستغرب لما يبص في المرايه يلاقي وزنه باين علي وشه و شكله بقي مخنزر ( جايه من الخنزير ) زي ما بعض الناس بتقول رغم انه لا زود في اكله و لا عمل حاجه
يستعرب لما يلاقي نفسه متصور في صوره مع ناس و يلاقي كرشه قدامه حتي لو كرش صغير و يلاقي نفسه طالع ضخم و عريض شبه الحيطه رغم انه مش طخين اوي و كل اللي زاد في وزنه 10 و لا 15 كيلو
يستغرب لما يججي يهزر و يضحك و يلاقي ناس بتبص له مستعجبه و يقعد يفكر له و ممكن ميجيش علي باله انه بقي 30 سنه فيمنفعش يهزر كده عيب علي سنه
يستغرب لما تبقي واحده حلوه معديه و يبص عليها و تبص له بقرف علي اساس ايه اللي بتعمله ده يا جدو ده انت عيب عليك تبص
يستغرب لما يبقي في ناس في اواخر العشرينات او في نصها و بتقوله يا حاج و تناديه ب يا حاج و هو يدور حواليه هما بينادوا علي مين ( و لما يكشتف انه هو المقصود يقول لنفسه حاج مين يا ابني ده انا لسه مدخلتش دنيا و لا اعرف شكل حضن الست و النوم معاها عامل ازاي ده لو اعزب زي حالاتي)
طيب هو انا كحاج كبرت امتي ده انا زي ما انا من يوم ما اتخرجت مفيش حاجه في حياتي جديده يا دوب جبت شقه و جهزت نفسي للزواج و بدور علي عروسه يبقي شكلها معقول مش ضايعه معقوله بقيت 40 سنه امتي و ازاي ) ده اللي في ال 40 ده عياله طوله و داخلين علي ثانوي ( معظم زمايلي اللي اتجوزوا يف السن الطبيعي عيالهم بقوا اطول منهم فعليا و داخلين ثانوي)
يا جدعان ده انا يا دوب اتخرجت و طلع بوزي علشان الاقي شغلانه و بوزي علشان اعرف اجيب شقه امتي عجزت
تكتشف ساعاتها اصلا ان المده الزمنيه اللي حولتك من شاب لعجوز لا تتعدي 15 سنه
اللي متابع المدونه هيلاقيني كتبت فيها و انا 27 سنه و حاليا انا 40 سنه يعني 13 سنه عدوا
المدونه عاشت معايا التحول من الشباب الي الكهوله و استمرار العزوبيه و الحرمان من الحضن الحنين و البيت و الاسره
يا عم انت 40 سنه 13 سنه ايه بس اللي بتتكلم عليهم
هقولك اه ما احنا بنقعد طول عمرنا من الولاده عمالين ندرس بيضيع مننا 25 سنه من عمرنا فيهم و يتطلب مننا بعدها اننا نبدء ندور علي شغل و نشتغل و نجهز نفسنا و نتجوز
المفروض تتجوز قبل ال 30 ده اللي المجتمع بيقوله انا في ناس و انا 27 سنه كانت بتكلمني اني اازاي متجوزتش لحد دلوقت
امال لو قابلوني دلوقت هيقولوا ايه
بجد هي دي حياتنا
15 سنه بس من عمرك هما اللي مسموح لك فيهم تعيش و تضحك و تلبس و بعد كده تتحول لعمو و حاج و الاستاذ
حتي الزمن بيعاندك و بيكبر شكلك و بيغير في جسمك و يخليك يبان عليك السن و يزيد وزنك و شعرك يبيض و يخف او تبقي اصلع
تحس ان كل حاجه ضدك
هي دي الدنيا و العيشه اللي اتخلقنا علشانها
لما تيجي تشوفها تعرف ليه هي اسمها دنيا لانها قصيره و صغيره و بتسرقك و مش بتسيب ليك فرصه تحس و تستمتع بيها
سنين كتير بتضيع مننا و احنا مستنين اليوم اللي الجاي
بنتربي علي كده ان يمكن السنه الجايه هتيجي بالخير او بالعروسه او بالشغلانه الاحسن
سنه ورا سنه بيجروا و احنا بنجري ورا سراب و في الاخر تلاقي العمر عدي و عجزت
بتستني اليوم يخلص و الشهر يخلص و السنه تخلص علي امل ان اللي هيجي بعضه هيبقي احسن و هيتحقق جزء من اللي بتتمناه
و تقول لنفسك ما فلان السنه دي خطب او اتجوز و هو السنه اللي فاتت كان عازب ما علان لقي شغله احسن السنه دي بدل اللي كان فيها
تدي نفسك الامل ان بكره هيجيب ليك حاجه احسن و متبقاش واخد بالك ان اللي جاب الاحسن مش مرور الزمن مش علشان جت سنه جديده و لا يوم جديد لا علشان ده كان ميعاد رزقه
طيب ما معني كده ان الرزق بميعاد يبقي طبيعي انا بقي عايز الايام تجري علشان الميعاد يجي و اخد الرزق
اقولك ما انت كده بتضيع عمرك من غير ما تستمتع بيه و لما يجي الرزق هتلاقي نفسك ضيعت كل حاجه كنت ممكن تعملها مناسبه لعمرك و سنك علشان كنت مركز بس ان الايام تجري و تمر
بالله عليكم اوعوا تعيشوا علشان اليوم اللي الجاي عيشوا حياتكم في اليوم الحالي بالموجود بدل ما تندموا زيي
اني بقيت 40 سنه و بقيت منهم و بقيت مش عارف اعمل حاجات كتير معملتهاش في وقتها علشان بقيت كبير و عيب عليا
و اةةةةةةةةةةة ياااااااااااااااااااااااااااااااااااا ااااااااااااااااااااااااااافه