زهره العمر

 

زهره العمر هو كتاب للكاتب الراحل توفيق الحكيم كان عباره عن خطابات و مذكرات لفتره في شبابه عاشها في باريس

لو تأملنا الوصف للعمر بانه زهره فاكيد كل زهره مصيرها النهائي هو الذبول ثم الموت

وده حال عمري دلوقت

انا دلوقت في مرحله  لما اسمع ان حد في  سن  ال 50 لاول وهله اقول ده كبير و بعدين اكتشف ان كبير ده مبقتش ينفع انا بالذات اقولها  لان فارق السن بيني و بين الراجل ابو 50 ده هو 7 سنين

بقعد افكر في زهره عمري اللي راحت و حياتي اللي انهارت بفكر في كل قناعه كانت في حياتي و فكره او قرار اخدته هل لو كنت عملت عكسه  كنت برضه هعيش في تعاسه و قرف و زهق و رغبه في الموت بالشكل ده

بفكر في قناعتي ان المفروض ان الواحد ميتجوزش الا لما يبقي يمتلك شقه و يبقي جاهز لان الناس مش بترضي بعريس لا يملك شقه  و الاقي شباب اتجوزوا في شقق ايجار و هما لسه صغيرين و الاقي عيال لسه في الجامعه و اهلها مجوزينها رغم انهم لا يملكون دخل شهري و اهلهم اللي بيصرفوا عليهم و اسأل نفسي هما خسروا ايه لما خالفوا القناعه و الافكار اللي منتشره في المجتمع ما اتجوزوا عادي و بقي عندهم بيوت و عيال عادي 

عندي واحد صاحبي اخوه مش بيشتغل و لا عمره اشتغل و كان مبلط في الكليه سنين طويله و في الاخرامه جوزته و هو قرب ال 40 في شقه هي بتدفع ايجارها من معاشه و معاش ابوه المتوفي و هي كمان اللي بتديله مصروف البيت و حاليا عنده اطفال 

اه بسمع عن مشاكل في حياته بس في الاخر اهو اتجوز و عنده بيت و اسره و انا معنديش اي حاجه

كنت و انا صغير بشوف خطيبات او زوجات صحابي او الناس دفعتي لما كان بيحطوا صورهم علي الفيس كنوع من الفضول و كمصدر لاحلام اليقظه اني بكره هبقي في مكان و اعمل زيهم خصوصا لو البنت شكلها حلو في عيني و اغلب اللي اتجوزوا بنات حلوه كانوا شباب اهاليهم الي جوزوهم و جابولهم كل حاجه اول ما اتخرجوا 

ساعات دلوقت تمر قدامي صوره لزوجه حد منهم لما تتحط علي الفيس مع جوزها تلاقيها اه شكلها كبر بس مازالت جميله

بتلاقي وشها و وشه بقي متغضن او في طريقه للذبول لما تقارن وشك و انت شاب صغير بوشك و انت في الاربيعينات بتحس انك عباره عن ورده دبلت و كرمشت حتي لو مفيش في وشك تجاعيد بتحس بما يطلق عليه وسط بعض الناس بالخنشره يقولك فلان بقي مخنشر او خنشور وش منفوخ و راس تحسها كبيره عن الطبيعي و شعر منحسر لورا او صلعه حسب حالك و جسم عريض متعرفش جه منين

هنا تعرف ان زهره عمرك راحت و دبلت

انا كلها شهر و كام يوم و اتم ال 43 و اقرب اكتر من ال 50 بس المره دي غير كل مره اه و الله غير كل مره انا عايش في اكتئاب نفسي و رعب فظيع 

رعب اني اصحي ملاقيش ا بويا و امي و بصحي كل يوم قلقان الا ملقيش حد فيهم بيرد عليا الصبح لما اناديه

رعب ا ني مش هلاقي حد يوقف جنبي لو العمر انتهي لحد فيهم و شعور اني هحتاس و مش هعرف اعمل ايه

رعب من بكره

حزن علي اختي اللي كمان جابت ال 40 و متجوزتش و هي اصلا بنت محترمه و بنت اصول و شكلها متوسط و اوحش منها كتير و اتجوزوا

احساس كده اننا اسره اتكتب عليها الحزن و قله الفرح

بقعد افكر في كل حد شوفته و كان معروض عليا زمان كعروسه و اقول يا ريتني قبلت اي حاجه اهو كان زمان عيالي طولي

حتي صاحبي اللي اصغر مني بسنه خطب من سنتين و نص و اتجوز من سنه و نص و خلف من سنه ركب القطر و اتحرك من محطه مزبله الحياه و الجري في المحل  و سبقني و عدي و بدء يعمل محطات مهمه في حياته

الواحد بقي عايش ميت و بقي عجوز رغم انه معاش حياته

ساعات بسأل نفسي و بيصعب عليا كل اللي زي حالي سواء رجاله او بنات هو اي ذنبهم ان ميعيشوش حياه طبيعيه

ميبقاش عندهم شريك حياه يشبع احتياجتهم العاطفيه و النفسيه و الجنسيه 

يبقي شريك في الحياه يخرجوا و يتفسحوا و يتبسطوا سوا  يبقي عندهم عيال يفرحوا بيهم و يربوهم اه تربيتهم متعبه بس في الاخر بتلاقي ان العيال دول هما هدف حياتك و اهم انجازاتك فيها

الاسره بتخلي عندك طموح و خطط و اهداف لكن لما تبقي زي حالاتي حتي لو بقي معاك قرشين متعرفش تعمل بيهم ايه

تبيع شقتك و تجيب شقه اكبر حاجه بسيطه بالقسط و انت اصلا مسكنتش الاولي و لا تشتري شقه رخيصه في مكان بعيد تنفع ابنك اللي لسه مجاش في المستقبل

كان في بوست عمله مدرس في ثانوي صديق عندي عمال ينصح الشباب و يقولهم بلاش كذا و كذا و شوفوا فلان عمره ضاع و مستقبله باظ كان نفسي ارد عليه و اقوله و انا كمان مستقبلي باظ رغم اني معملتش كل اللي انت بتحذر منه و النتيجه كانت واحده عمر ضاع اونطه

ساعات اسأل نفسي لو كنت انحرفت و نمت مع نسوان و بسطت نفسي كانت نتيجه حياتي هتختلف و لا كنت برضه هفضل زي ما انا مش متجوز

لو مكنتش ذاكرت و مكنتش اتعلمت كنت هخسر ايه

لو مضيعتش سنين من عمري بثبت نفسي في شغلي و اتعلم حاجات جديده و ده اكل من عمري ال 20 سنه اللي فاتت اوقات كتير و الاقي نفسي مستفدتش حاجه من الكلام ده

ساعات كتير كان ابويا و امي يخرجوا و مرضاش اخرج معاهم الكلام ده من 10 سنين مثلا او 8 علشان الخروجه في جو مش جوي و مع ناس مش هنسجم معاهم دلوقت بندم علي كل لحظه من دول و سبب الندم بسيط اني برجع ال 20 سنه اللي فاتت ملقيش ليا اي ذكريات حلوه او لحظات جميله او اوقات اتبسطت فيها

طيب الناس اللي زيي سواء رجاله ولا ستات المفروض يعملوا ايه و يكملوا حياتهم ازاي في مجتمع بيحاول ينساهم او يتجاهلهم او يتهمهم بانهم اللي عملوا كده في نفسهم بمتطلباتهم العاليه في شريك حياتهم او في تكبير دماغهم من فكره الجواز مع ان ده مش صحيح

المفروض نعيش ليه و لأيه

طيب ربنا عوضنا بايه في المقابل اننا اتحرمنا من حاجات كتير و عمرنا راح و انتهي 

انا عارف ان في ناس جوازتهم كانت زفت و في ناس اتطلقوا و في ناس بقوا ارامل رجاله او ستات  بس في الاخر الناس دي دخلت التجربه و خرجت منها 

انا عارف ان بوستاتي بقت اكبر من الطبيعي و عارف اني بقيت بكتب كتير بس مش قادر مكتبش و مخرجش الالم اللي جوايا

مش قادر الاقي نفسي عايز بموت و مقولش اه حتي

و كده كده انا قريب هكتب بوست اخير في المدونه لان المدونه كمان عجزت و وردتها دبلت و حان وقت انها يتقفل عليها

اه لو كنت اتجوزت اي واحده معجبتنيش و لا كانت مناسبه ليا مش كان زماني احسن

و اه يا افه

حقيقه العازب الاربعيني

 

انا تقريبا بقيت كتبت بوستات من اول السنه لحد دلوقت اكتر من اللي كتبته في سنين كامله قبل كده يمكن علشان في نيه اني ابطل الكتابه السنه دي او يمكن علشان حالتي النفسيه وصلت لسوء موصلتلهوش قبل كده

النهارده هكتب عن العازب الاربعيني الاول و بعدين هكمل شويه افكار في دماغي عايز اخرجها

طيب الناس بتشوف العازب ازاي خصوصا اللي فاته القطر زيي و باقي في الاربيعينات العمر المخيف اللي بتلاقي كل اللي حواليك عمال يحضر حفلات تخرج ابنائه من الاعداديه و الثانويه العامه و غيره و مستنين كمان اربع ولا خمس سنين علشان يحتفلوا بتخرج عيالهم من الجامعه بينما انت لسه قاعد بتتخيل لما هيتقل عليك مع ست اوضه واحده هتعمل في جسمها ايه 

العازب  الاربعيني بالنسبه للناس شخص معاه فلوس كتير مئات الالوف و يمكن كام مليون حسب مرتبه و حسب ما الناس عماله تحسب له باعتبار انهم شايفين انهم لو مش متجوزين فهما عايشين ببلاش في بيت اهلهم و بياكلوا و يشربوا ببلاش اخره يصرف علي شويه لبس و خروجات و دي تتعتبر مصروفات نثريه جنب مرتبه بينما هما الغلابه بيصرفوا علي 4 او 5 افراد اكل و شرب و لبس و مدارس و خروجات و دكاتره و غيره و غيره و غيره فالراجل العازب الاربعيني ده ثري عربي و دايما يسألوا هو بيودي فلوسه فين سواء يسألوه هو او يسألوا بعضهم من وراه 

محدش عارف ان ممكن العازب الاربيعيني  ده يبقي هو اللي شايل معظم مصاريف اهله اللي عايش معاهم في ظل الظروف المهببه بتاعه مصر و المعاشات المعفنه و الغلاء الفاحش  اه ممكن مش بيبقي بيصرف زي المتجوز علي البيت و لكن في الاخر هو برضه مش بيشيل مرتبه و يحوشه و قاعد نطع علي اهله في الغالب هتلاقيه بيصرف من 30 الي 40 % من دخله علشان يغطي الفرق بين احتياجات اهله و المعاش التعبان الي  بيخدوه ما بين علاج و مصاريف دكاتره و دخول مستشفيات كل فتره غير اكل و شرب 

اه هيحوش اكتر من المتجوز بس المتجوز برضه بيحوش انا بشوف زمايلي المتجوزين عاملين يدفعوا مقدمات شقق اكبر و بيعزلوا و بيجيبوا حاجات انا معتقدش اني هعرف اجبها لدرجه اني مره قعدت حسبت اللي عند زميل منهم طلع مقارب جدا للي عندي رغم انه متجوز من سنين طويله و اصغر مني في السن ب 6 سنين

العازب الاربعيني  بالنسبه للمتجوزين هو شخص دايما يوصفوه بانه فاضي و رايق و موراهوش حاجه و هما كلهم يا عيني مشغولين 24 ساعه مش بيناموا ليس لسبب الا لانهم متجوزين و عندهم عيال و لان يا عيني زوجاتهم معذابهم و منكده عليهم و مش سايباهم يناموا طول الوقت  و يقولوا له يا بختك انك عازب و فلوسك ليك و فاضي و موراكش حاجه و دماغك رايقه و لو حد من دول طلق تلاقيه عمال يبرم علي عروسه اكتر من العازب  اللي متجوزش طيب يا اخي ما دام الجواز وحش اوي كده بترجع له برجلك ليه

العازب الاربعيني  بالنسبه ليهم المفروض يروح يضيع كل مليم بيخده علي لبس غالي جدا ولا خروجات غاليه جدا ولا  موبايل غالي جدا لان ملهوش مسؤليات في عقلهم و دماغهم رغم انه حتي لو ملهوش مسؤليات ماديه فهو لو اتجوز عياله هيبقي في مراحل التعليم و هو يطلع معاش و ميلاقيش يصرف عليهم

العازب الاربعيني هو فاكهه القعده ما بين انت ملكش في الستات او انت متجوزتش ليه او انت بتودي فلوسك فين او انت بتعمل ايه لما بتروح مش علشان اهتمام علي ضد ما هي تسليه و فرصه نضرب الي قدامنا في حاجه بتوجعه و مش بيعرف يرد عليها

طيب حقيقه العازب الاربعيني ايه بقي

العازب الاربعيني شخص محروم عاطفيا و جنسيا  خصوصا لو مش عايز يغضب ربنا نفسه في وليف نفسه ينام مع ست و يستمتع بيها نفسه في حد يسليه و يخرج معاه و يبقي جنبه  نفسه يتستمع بست يتفرج علي كل حته فيها يمسك كل حته فيها و ينام معاه و يشبع رغباته و شهواته الشرعيه

العازب الاربعيني شخص الايام بتمر عليه طويله جدا و قصيره جدا بتبقي طويله علشان مش لاقي حد جنبه و قصيره علشان بيرفع راسه كل شويه يلاقي 4 او 5 شهور عدوا من السنه و هو لسه في حاله و عمره بيجري و بيتسرق منه و مش عارف يعمل ايه و مفيش في ايده حاجه

العازب  الاربعيني شخص بيكتشف ان في العالم في مليارات الستات و رغم ذلك هو لوحده و مش لاقي ست ينام معاها 

العازب الاربعيني هو شخص مش بيحب حد يعرف عمره خصوصا لما يعدي ال 40 لانه بيحس ان ده بيحط حاجز بينه و بين الناس اللي قدامه الاصغر منه سنا خصوصا بنت او ست و بيخلي احتماليه انه يتحول لشخص تعجب بيه تقرب من ا لصفر لانه راجل كبير و مش مناسب لسنها

العازب الاربعيني بيبقي عامل زي فيلم HER  اللي هو في عنده احتياج جنسي و عاطفي و بيبقي هيتجنن لما الاحتياج ده  يزيد عليه و ميلاقش وسيله لاشباعه و لذلك بتلاقي ناس منهم اللي الوازع الديني عندها ضعيف  بتصاحب ستات و اللي بتكون غالبا متجوزه و تتراوح العلاقه دي ما بين مجرد شات للدخول في علاقات جنسيه كامله لتعويض النقص الموجود عنده و الحرمان ده و رغم ذلك تلاقيه مش مبسوط بالعلاقه دي لانها مش دائمه و لانها مبنيه علي منفعه من الطرفين بيعوض بيها كل طرف حاجات ناقصه عنده بس الست غالبا مش عايزه تغير حياتها و لو لقت خطر علي بيتها هتعمل له بلوك من حياتها و هتسيبه و هو هيفضل رغم وجود الست وحيد و عارف انها مش دايمه و هي شويه اوقات بسيطه من حياته اللي بتكون فيها معاه لا جواز و الفه و ونس هي مجرد شويه اوقات بيسرقها لا تسمن و لا تغني من جوع

العازب الاربعيني  بيبدء يقلق من الموت و من الحياه بيقلق من الحياه لان حياته هشه جدا و لما ابوه و امه وقتهم يجي مش هيلاقي حد و هيبقي عازب و وحيد تمام رغم انه بيعيش في وحده بوجود ابوه و امه لان الست بتدي حاجات ميعوضهاش الاب و الام زي ما الاب و الام بيدوا حاجات مبيعوضهاش اي حد تاني  و بيقلق من انه لو اتجوز فحياته هتبقي صعبه في اواخر عمره لان عياله هيبقوا لسه محتاجين رعايه و مصاريف كتير

العازب الاربعيني بيقلق من الموت لانه حاسس ان مفيش حد هيدفنه و لو تعب او مرض مرض شديد محدش هيبقي جنبه  و لا حد هيوديه لدكتور و  لا يعالجه

العازب الاربعيني  بيبقي فرحان لما يسمع ان حد اتجوز في عمره او اكبر منه بسنه او اثنين علشان بيديله امل زائف انه ممكن يحصل له زي الشخص ده و بيفرح كمان لما يلاقي حد في سنه و لسه متجوزش و بيزعل لما يلاقي حد من دول ارتبط و اتجوز مش حقد عليهم لكن علشان هو بقي لوحده اللي في الحاله دي و بقي مش عارف يعزي نفسه ان في ناس شبهه كتير رغم انهم قليلين مقارنه بمجموع البشر

العازب الاربعيني بتأثر فيه اي حته جسم باينه من ست او حتي اي حاجه متفصله نتيجه هدوم ضيقه شويه و بيقعد غصب عنه يتتبعها و يبص عليها و بيبقي غض البصر عنه صعب جدا بسبب ان الحرمان عنده طول جدا 

العازب الاربعيني بيقعد يفكر في سنين عمره اللي راحت و يحزن عليها قوي علشان حاسس انه لو رجع تاني هيبقي لسه الفرص كتير و الوقت موجود للاسف العازب الاربعيني فقد اهم سلعه في حياه البني ادم اللي هو الوقت اللي بيديك ان لسه العمر قدامك و الفرص كتير

العازب الاربعيني هو شخص علي هامش المجتمع شخص محدش بيبقي عايز يشوفه او يفتكره لانه عامل زي النغمه النشاز مينفعش يندمج مع مجتمع المتزوجين و لا يخرج معاهم و لا يبقي صديق عائله الا لو كان صديق للعائله من زمان جدا

العازب الاربعيني هو شخص عمره اتسرق و حياته اتدمرت و مستقبله بقي اسود و ملهوش حول و لا قوه

العازب الاربعيني هو شخص ميت بالحيا