الحساب عند مين

تحذير قبل قرائه البوست: البوست ممكن ناس تعتبره كفر بالله او عدم رضا بقاء الله و قدره او اعتراض علي حكم الله انا بأكد قبل كل ده اني راضي بقضاء الله و لا املك الاعتراض عليه لاني واحد من خلقه و لا املك لنفسي شئ بس البوست محاوله للفضفضه لا اكثر

من اكتر الحاجات اللي بتشغل بالي هو كشف الحساب بمعني التأخير اللي حصل في حياتي و بوظها ده حسابه عند مين بالبلدي كده التاخير ده ضرني و تعبني و عجزني قبل ما اعجز فعلا يعني انا عجزت من يوم ما وصلت الثلاثين مش حاليا و انا علي مشارف الاربعين طيب كل الضرر ده مين هيحاسب عليه يعني الناس اللي مخدتش الضرر ده و عاشت حياتها عادي و مشيت حياتها شبه المساربتاع منحني التوزيع الطبيعي دول كده خدوا حقهم و حسابهم خالص

لكن اللي خد الحاجه متأخر اوي او مخدهاش اصلا ده فين تعويضه عن التأخير فين تسويه كشف الحساب بتاعه بحيث انه يطلع في الاخر ملهوش حاجه او معليهوش حاجه

طيب لو مثلا انت نتيجه تأخير حياتك دي عملت حاجه غلطت نتيجه انك ضعفت و انك الضغوظ بتزيد عليك نفسيا  حساب الغلطه دي عند مين اكيد عندك

طيب مش المفروض لو انت كنت راجل كويس و ملتزم و غلطت نتيجه ان الاختبار طول اوي و في الاخر ارادتك ضعفت اوالشيطان عرف يتغلب عليك يبقي في اعتبار للموضوع ده وقت الحساب و لا هتتحساب زي اللي مغلطش و هو اصلا معاه الحاجه من بدري و مدخلش الامتحان و يتقال عليك غلطت و هو مغلطش رغم ان هو ممتحنش

طيب اللي غلط و هو الحاجه معاه هيبقي زي الي غلط و الحاجه مش معاه (دي معروف اجابتها انه طبعا لا و انه عليه حساب ضعف اللي غلط و اللي حاجه مش معاه)

طيب النهارده لما تبدء حياتك في ال 40 بدل ال 25 السنين الي عدت دي حسابها عند مين ال 15 سنه دول مين هيحاسب عليهم اثرهم عليك و علي نفسيتك و علي تدميرها و علي انك بقيت شخص كئيب و قرفان من نفسك و اتغيرت و بقيت سيئ

طيب عيالك اللي هيكبروا يلاقوك راجل عجوز و مش عارف تجاريهم و هتيجي لحظه تطلع معاش و هما لسه بيتعلموا و مش عارف هتصرف عليهم ازاي حساب وضعهم عند مين

في وسط الافكار دي بقي تلاقي بقي واحد يرميلك بوست فكيك علي الفيس بوك يقولك عسي ان يكون رزقك المتاخر خير من ارزاقهم المتقدمه

عسي ان يكون زواجك المتأخر خير و افضل من زواجهم المبكر

و النوعيه دي من البوستات اللي شغاله بمبدء الصبر جميل و كل تأخيره و فيها خيره و هو حاجه ملهاش سند اساسي من الدين بمعني مفيش قول صريح انك علشان اتأخرت يا باشا فتاكل في الاخر بغاشه و اللي خد نصيبه بدري فده اكل فول

التاخير في الرزق ده بافتراض ان الرزق هيجي و مش هيتكتب عليك تبقي من اللي بيموتواعلي نفسهم من غير زوجه او اولاد بيجب معاه مشاكل متعبه و مؤلمه نفسيا

طيب ما لو كان الرزق بدري كنا غالبا هنتجنب كل الهم ده

هنعيش حياه طبيعيه شبه الناس بحلوها و مرها

التأخير في الرزق في الجواز و الترقيات و غيره بيدمر حياتك و يحسسك ان عمرك راح اونطه بينما غيرك ركب القطر التوربيني و شرخ

و اللي شايف اني غريب يفتكر سيدنا ابراهيم لما بشروه بسيدنا اسماعيل و قال بالنص في القرأن " ابشرتموني علي ان مسني الكبر فبم تبشرون" يعني نبي  عرف ربنا لوحده

و بعقله لما لقي قومه بتعبد اصنام و اترمي في النار و شاف انها محرقتهوش و طلع منها سليم يعني اكيد عارف قدره ربنا اكتر من اي حد فينا قال الجمله السابقه

يبقي بشر عادي يقول ايه  يفكر ازاي

انا ساعات بحس فعلا اني مش هتجوز  و لا هتقدم في حياتي خطوه لقدام

لدرجه اني مبقيش ليا نفس اشوف اي عروسه من كتر ما نفسي اتسدت و الوقت طال

اه معظم اللي جاي تعبان لما بشوف صوره بس لو في حد يجي منه بحس اني برضه مش عايز اكلمه و اشوفه يمكن علشان مش هو ده اللي انا عايزه يمكن علشان مش ده اللي عاجبني بجد يمكن علشان عملت كده كتير و روحت و في الاخر فضلت زي ما انا

انا تعبت فعليا و بدعي ربنا كل يوم ان حالي يتحسن اني حياتي يدخلها قدر من السعاده و الانبساط اني ابقي زي الناس

الغريب في الامر انك الجواز الي متاخر ده هيفضل لابسك طول عمرك و هتحس بالنقص طول عمرك

لما تقابل صحابك و عيالهم بقوا طولهم و انت شايل ابنك علي كتفك

لما تبقي بتلعب مع عيل عنده 10 سنين و انت 50 سنه خصوصا لو شكلك باين انك عجزت و تلاقي واحد يقولك ده حفيدك اكيد

لما عيالك يستغربوا ليه شعرك ابيض و صحابهم اهاليهم شكلهم شباب و صغيرين

لما ابن يصاحب طفل زيه و تتعرف علي اهله و تلاقي عيل شاب اصغر منك ب 15 و لا 20 سنه يبقوا ابو صاحب ابنك

كل الحاجات اللي اتعملت فيك او هتتعمل فيك فين حسابها كشف حسابها عند مين

مين هيعوضك عن كل الي راح ده اذا كان ينفع يتعوض و للاسف مفيش تعويض لانه قطر ماشي في اتجاه واحد مفيش اله زمن ترجعك تاني لورا علشان تعيش السنين اللي معشتهاش و لا في حاجه تثبت الزمن مكانه لحد ما يجي نصيبك

انا فعليا مش لاقي حل و تعبان و مبقتش مقتنع بجواز الصالونات اللي بقي حالتي جواز الخاطبات واحده بتوفق راسين في الحلال لا تعرفهم و لا تقدر تجمعهم

انا  تعبت فعلا و مع كل شعره بيضا بتزيد في جسمي بتعب اكتر و بحس اني بتدمر اكتر

المفروض اني قربت علي ال 39 بس انا بقيت 59

اعمل ايه و الحل فين ازاي اقدر اعالج نفسي نفسيا علشان اقدر ارجع زي ما كنت و ابدء اعصر علي نفسي لمونه و اشوف عرايس من الي مش عاجبني او اللي مش في دماغي

ولا المفروض مشوفهمش مادام مش عاجبني و لا ايه 

طيب ما انا معرفش عنهم حاجه 

طيب الدمار النفسي اللي انا فيه ده اخره ايه 

حد يقولي حد يفهمني حد ينصحني

حد يقولي يا ابني انت افكارك غلط انت بكره بتاعك احسن

يا رب ارحمني برحمتك و لو كاتب عليا افضل كده فقصر عمري و متخليهوش طويل لانه ملهوش اي لازمه ولا فايده

علامه التعجب

اولا كل عام و انتم بخير بمناسبه العيد الي كل لما بيجي زيه زي رمضان بقارن نفسي بالسنه اللي قبلها و بلاقي نفسي زي ما انا بعمل نفس الحاجات حياتي متغيرتش و لا اتحسنت و لا حصل فيها جديد و كل اللي بيحصل اني بكبر سنه و بقرب من العجز و شعري بيشيب و يبيض اكتر من الطبيعي بسبب الاكتئاب اللي انا فيه

زمان و الواحد صغير كان بيسمع من الناس و كمان هو كان بيسأل نفسه عن علامه التعجب

و صفات علامه التعجب دي غالبا بيبقي راجل او بنت كبر سنه و متجوزش و مرتبطش او في بعض الاحيان اتجوز وو مخلفش او اتجوز و طلق او او او بس في المعظم بيبقي شخص متجوزش و مرتبطش و تقدم في العمر لحد ما بقي في اخر ال 30 او في ال 49 و ال 50 و ما بعدهم 

علامه التعجب هي كل شخص منافي للقطيع منافي لكل الناس اللي حواليه و غير مشابه ليهم سواء بمزاجه او غصب عنه

كان السؤال ديما هو فلان متجوزش ليه او فلانه ليه مش متجوزه و تبدء بعد السؤال بقي سلسه من الاجابات الافتراضيه و التكهنيه اللي غالبا بتحدد اسباب وسخه لعدم ارتباط الولد او البنت و الناس المحترمه شويه بتقول شويه اسباب انضف شويه

فتلاقي الراجل يتقال عليه يمكن ملهوش في الستات يمكن عنده مرض يمكن شاذ يمكن ماشي غلط يمكن فلاتي و لما يبقوا انضف شويه في الافتراضات يفولك يمكن مكبر دماغه ومش بتاع مسؤليه و ارتباط و تربيه عيال او انه بيطلب طلبات خياليه في البنت اللي عايز يتجوزها

و تلاقي البنت يتقال عليها تلاقيها كانت مرافقه و سمعتها وحشه تلاقيها شمال تلاقيها معيوبه تلاقي في سر وراها محدش عارفه تلاقيها عيانه تلاقيها جسمها فيه حاجه تخلي اهلها خايفين تتجوز فتطلق و هكذا و لو فكروا بنضافه يقولوا تلاقي رافعه مناخرها لي العرسان او شايفه نفسها و طلباتها عاليه

سواء تفكير وسخ او نضيف في الاخر بيخلوا الشخص هو المسؤل الاوحد عن عدم زواجه و عنوسته هو السبب و خلاص ما الناس بتتجوز كل يوم و مبسوطه اهيه و الجواز موقفش رغم الظروف الاقتصاديه و غيره 

الشخص علامه الاستفهام ده في الاخر محدش بيعرف هو ليه اساسا متجوزش او مرتبطش رغم كل التكهنات السابقه بيفضل السبب مجهول

لما مر الزمن و جه عليا الدور ابقي علامه استفهام فؤجئت اني انا برضه مش عارف السبب انا ليه لحد دلوقت متجوزتش و مبقاش ليا بيت و اولاد زي بقيه الناس اه اشتغلت بعد سنتين بطاله و قعدت سنين طويله لحد ما كونت نفسي و قدرت اجيب شقه بس في الاخر كنت جاهز و انا 30 او 31 سنه اني اخطب  و اتجوز من الناحيه الماديه و رغم ذلك محصلش

اترفضت من ناس و جالي اشكال ضايعه و قبلت و هما رفضوا و جالي اشكال ضايعه و قبلت و عصرت علي نفسه لمونه و الموضوع في الاخر ممشيش في الاتفاقات

في الاخر موضوع الجواز بالنسبه لي متعسر حتي اللي كان بيجي كان بيجي بمشاكله و عدم تقبلي ليه و لما كنت باجي علي نفسي برضه الامور مكنتش بتمشي 

من الاخر مفيش اجابه لما تسأل نفسك ليه انا مش زي باقي الناس مش هتلاقي اجابه هتلاقي نفس علامه الاستفهام اللي الناس بترسمها عليك بس الفرق بينك و بينهم ان هما بيرسموها بدافع الفضول و الحشريه و انت بترسمها من المك و وجعك

ما انت كبني ادم عايز تمشي سليم و تمشي حلال يبقي لازم تتجوز غير كده مش مسموح و اقعد بقي يا عم كده عض في المخده لحد ما تتجوز

طيب ما تتجوز اي حاجه بدل ما بتعض في المخده ماشي و لما تبقي حاجه مش راضي عنها يبقي هبدل مشكله بمشكله

ده حتي اللي مش راضي عنه الامور معاه ممشيتش

السؤال الي واحد بيسأله لنفسه لو ده اختبار من ربنا طيب اخره امتي بالظبط الواحد عجز فعليا  فاضل ايه تاني في العمر علشان الاختبار يخلص و يجي وقت انك تعيش طبيعي

و لو اختبار و نتيجه انه طول عليك  ضعفت و عملت حاجه غلط هتتاحسب حساب عسير طيب الاخ اللي ربنا مختبرهوش نفس الاختبار ده  هيعدي كده برنس و 100 100 اصله مغلطش زيك

و خلينا متفقين ان الاختبار ده في حاجه من الحاجات الاساسيه للبني ادم و حاجه الانسان بيتحتاجها و زي ما كتبت قبل كده بيقولوا ان اللي مش بيلبي الحاجات دي بيصنف علي انه مش سوي نفسيا بسبب وجد نقص عنده في تلبيه احتياج من الاحتياجات الاساسيه و في بعد العلماء وصفوها انها تعتبر اعاقه 

انا مش عارف اقول ايه و لا اعمل ايه

انا كنت النهارده مع واحد صاحبي و قالي يا بني مش هتتجوز يا بني انت معندكش اعضاء و لا قطعتهم ولا ايه  ده انت لو موت من الكورونا هتدخل الجنه حدف علشان  كفايه ان انت منك......ش  كلمه ابيحه معناها معاشره جنسيه  

يا بني روح دلع نفسك بفلوسك انت مش هتتجوز خلاص ده بقي واضح جدا خلاص كده انت مش هتتجوز

بجد انا حالي النفسي تعبان جدا و ده اثر علي شكلي و علي وزني و علي كل حاجه فيا

علامه التعجب عماله تكبر لحد هتفرمني تحتها و يحصلي حاجه من القهر و الحزن

ربنا يرحمني برحمته

منحني الحياة الطبيعيه

اي حد درس رياضه متقدمه شويه سواء في الكليه او الدراسات العليا اكيد مر بالمنحني ده

المنحني ده سبحان الله هو محور الكون جيب نفسك في اي من امور حياتك هتلاقي نفسك واقع في منطقه من مناطق المنحني ده

جواز او ولاد او تعليم او غيره

زي ما المنحني بيبن ان منتصف شكل الجرس ده هو متوسط الرقم زي متوسط عمر الزواج متوسط الدخل متوسط المرتب ... الخ

و من المتوسط ده بتيجي الثلاث اجزاء اليمين و الشمال جزء بالزائد او الموجب و جزء بالناقص او السالب

يعني لو متوسط سن الجواز مثلا 30 فهتلاقي ان ممكن يوصل الي 45 مثلا  من الجنب اليمين و الي 15 من الجنب الشمال

طبعا الرقم ده هو اكبر حاجه و بيسموه الانحراف المعياري في السكه لاكبر حاجه اللي  هي مظلله بالاحمر هتلاقي  حته بالاصفر و دي مثلا الي ممكن تبقي لحد ال 45 و في ال بالاخضر اللي اخرها ال 35 و من الناحيه التانيه تبقي مثلا 25 و 20

الخلاصه ان معظم الناس بتوقع في المنطقه الخضرا فانت لو لقيت نفسك جواها بتبقي انت طبيعي عادي الناس معظمها كده مفيش استغراب

لو في الاصفر فانت بتبقي من الناس اللي بيتقال عليها متأخر شويه في الجواز مرتبه قليل شويه او اتأخرت ترقيته شويه و هكذا

الناس بقي اللي في الاحمر دول هما اكتر ناس غريبه المنطقه الحمرا و الاحمر بيعني الخطر هي اللي بتقول عليك انك بقيت يا لحقت بالعافيه يا مخدتش حاجه عن النقطه اللي المنحني فيها بيلمس نقطه الصفر

للاسف بقي انا اعتبر في منتصف النقطه الحمرا في كل حاجه حياتي كلها و كل تفاصيلها في الاحمر

من فتره عملوا جروب علي الفيس للمدرسه بتاعتي و دخل فيها ناس كتير رجاله و ستات الناس دي حسستني اد ايه كبرت

تبص علي كل واحد او واحده فيهم تلاقي عيله قده و اللي متجوز من 12 سنه و اللي متجوز من 15 و الي مش عارف بقي ايه و اللي مش عارف وصل ايه

تلاقي نفسك انت بقي في الجزء الاحمر لا جواز و لا سعاده ولا فرح بحياتك و مش مصدق نفسك انك كبرت

لان الحقيقه انت معتشتش السن ده  هي كانت مجرد سنين بتعدي اثرت علي شكلك و خلت شعرك يبيض و وزنك يزيد و شكلك يبان عليه السن ده كل مكتسباتك من السنين دي لكن علي المستوي الشخصي انت زي ما انت معشتش حاجه مفرحتش في حاجه

اللي هيشوفك في يوم ممكن يلاقيك قاعد في كافيه من الغالي بتشرب حاجه ولا بتاكل حاجه ولا لابس بنطلون حلو ولا حتي راكب عربيه معقوله هيقولك ياه ده الدنيا ضحكه ليه و البليه لعبه معاه

ميعرفش ان كوبايه القهوه اللي بتشربها او الاكله اللي شافك بتاكله او حته الهدوم هي دي كل اللي انت طالع بيه من دنيتك

هو ده كل انجازاتك في الحياه هو ده الحاجه اللي انت بتشتغل و تشقي علشانها

لا انت مبسوط ولا مرتاح و لا فرحان بل بالعكس انت في حسره و حزن

حزن علي انك كبرت علي الفاضي وقتك بيخلص و انت زي ما انت  و لما تيجي تتحط علي مسطره الناس اللي في سنك من المجتمع مش هتسوي الا كوبايه القهوه دي او حته الهدوم لان هو ده اللي ممكن يفرقك عن غيرك اللي مقدرش يجبهم علشان هو وراه التزامات و اسره 

هتحس ان الناس سبقاك بسنين ضوئيه

و اسوء ما في المنحني ده انك تبقي في الجزء الاحمر في كل حاجه او في معظم ا لحاجات

معروف اننا كبشر في الدنيا عايشين حياه شبيهه ببعض دراسه و تعليم يليه التحاق بوظيفه يليه تجهيز لبيت زوجيه يليه زواج و اسره يليه معاش او انك تجوز عيالك او ايهما اقرب لو ربنا كان مطول في عمرك

يعني بلغه الناس بتاعه اداره المشروعات ال milestones  او احجار الزاويه محدده و معروفه لو محققتش واحده فيهم فانت هتفشل في تحقيق الباقي و هتفضل واقف مكانك مش بتتقدم

مع اقترابي من ال 40 اللي هي بنتكلم انها هتبقي قاضل عليها سنه و حته بسيطه لقيت اني فظلت خابط في الحيطه من يوم ما اشتغلت

الا من خطوه بسيطه طلعتها قدام في الشغل من 10 سنين فاتوا و محصلش غيرها و كانت لظروف فجائيه و قدريه و دلوقت الخطوه دي الي اصغر مني خدوها و عدوها من زمان و ده من 6 سنين مثلا يعني بالبلدي كده مفيش تميز مفيش مكسب مفيش حياه

في احساس بالنقص و القهر و الفشل و في حاجات غريبه تانيه هبقي اتكلم عنها

تخيل لما تشوف زميلاتك اللي كانت بنات صغيره بقت امهات لعيال بقت في اعدادي  و في  ثانوي كمان و شكلهم بان عليه السن

و تلاقي صحابك بقوا في منهم ناس شعرها ابيض زيك و في لا و بقوا ما شاء الله عندهم عيال طولهم و انت قاعد في المنقطه الحمرا

تبدء تلوم نفسك ما اتجوز اي جوازه و السلام اهو اتجوز اول واحده تيجي في سكتي و الموضوع يمشي و هكذا للعلم بس انا لا بدور علي حب ولا علي علاقه عاطفيه قويه ادت الي الجواز انا بدور علي حد يكون شكله انا راضي عنه

طيب السؤال بقي لو انا رحت عملت زي الناس هبقي سعيد و لا هبقي حالي عامل ازاي 

اصلا هو الواحد بعد ما وصل للسن ده متوقع ايه من الجواز و الارتباط و العيال متوقع نفس السعاده اللي كانت هتحصل و هو 25 او 30 او حتي 35 سنه

سيدنا ابراهيم لما بشروه بسيدنا اسماعيل قال ابشرتموني علي ان مسني الكبر فبم تبشرون دي ايه من القرأن

ده كلام نبي المفروض معندهوش قنوط ولا يأس و عنده رضا قوي بحياته و قدره اللي كتبه ليه ربنا و رغم ذلك قال كده

امال الاشخاص العاديه اللي زينا و اللي معرفتها بالدين تعتبر وسط تعمل ايه

طيب هو انا ليه مقدر ليا ابقي في المنطقه الحمرا نفس السؤال ده ممكن تسأله بنت برضه عن سبب ان شكلها مش حلو او متجوزتش او مجلهاش عرسان تنفعها

طيب كان المطلوب منها ايه برضه تتجوز و السلام علشان تبقي زي الناس

علي فكره ان الحاله دي عندي موجوده بتاعه في كتير من قريباتي لدرجه اننا بنحس اننا عيله ملعونه

طيب هو فعلا كل واحده شفتها و قولت لا او بلاش نقول هي اللي قالت لا لان ده حصل و حصل كتير كان نصيبي تبقي مش مراتي

 و لا انا اللي ضيعتها مني و كنت ممكن اتجوزها و اتغاضي عن شكل او اسلوب او غيره

هل فعلا ما فات لم يكن مقدر لي و لا انا بأيدي اللي ضيعته

هل انا اللي دخلت نفسي في المنطقه الحمرا ولا نصيبي و قدري اللي دخلني

ساعات اقعد اتجسس علي بروفايلات البنات اللي كانت بتتعرض عليا كعرايس و الاقيهم اتجوزوا و بقي عندهم اولاد مش كلهم طبعا  بس نقدر نقول نسبه من 30 الي 40% منهم اتجوزوا و في لسه زي ما هما

في اتجوزوا ناس اصغر مني سنا و احسن مني شكلا هل معني كده ان ربنا انقذهم مني يعني فبعدني عنهم

ولا انهم كانوا مكتوبين للناس دي

هل انا مسئول و لا ضحيه لقدري

هل المفروض كنتي ارضي باي حاجه تيجي ولا اقول لا لان مش ده اللي عايزه و افضل لحد العمر ده زي ما انا

هل اصلا اللي كانوا بيجوا دول كانوا صح و لا غلط

في جمله واحد صاحبي قالهالي قال كل واحد بيجبلك حد و الواحد ده متهموش مصلحتك غالبا الشخص اللي جايبه ليك مش هيعجبك

و في واحد تاني قالي لما حد من صحابك او حد بتكلمه علي عروسه و ميكنش قريبك و ليه علاقه قويه بيك بيديك علي قد ادراكه ليك

بمعني انك واحد مقرب علي ال 40 شكلك مش عارف ايه شعرك خفيف يبقي كفايه عليك دي و يبعتلك واحده علي في رأيه هترضي بيك علشان هي برضه ضايعه فضايع هياخد ضايعه

مع ان الواقع اثبت كتير ان في بنات حلوه جدا و محترمه و متدينه و بنات ناس و بتاخد رجاله شبه القرود و انت مفيش مقياس لانت شكلك عامل ازاي فلابد تاخد واحده عامله ازاي

فعليا الجمله الاخيره دي بتحيك تاريخي في الجواز المره الوحيده اللي جاتلي بنت كويسه و حلوه كانت جايبها ليا عمتي بس محصلش نصيب لعدم الاتفاق و دي كانت اول عروسه اشوفها في حياتي

اللي بعد كده اللي جه عن طريق الحاجه فلانه و الحاجه علانه و الحاجه ترتانه اشكال ضايعه و يتقالك في نص الكلام اصل انت هتسكن في المنطقه الفلانيه و الناس مش هترضي اصل انت سنك كش عارف ايه فالناس مش هرتضي و هكذا 

الحاجه فلانه و الحاجه علانه بتدي نفسها حق انها تبعتلك او ترشحلك البنت اللي هي شايفه ان دي اللي ممكن ترضي بيك و ده طبعا بناء علي ادراكها ليك شايفك حلو شايفك قرد ده رأيها فيك و علي اساس رأيها بتبعلك بقي من الجراب بتاعها الحاجه الضايعه اللي تناسبك يا ضايع

و البنت بنت الناس يتجاب ليها عرسان مضروبه علشان كبرت شويه في السن برضه عن طريق الحاجه فلانه و الحاجه علانه تجبلها واحد هيعيشها في مستوي اقل بكتير او واحد مطلق بعياله و من مبدء ما بنتك بقت 30 سنه

الحاجه فلانه و الحاجه علانه دخلونا في المنطقه الحمرا و ساهموا بشكل كبير انك تبقي فيها

امي نفسها ساهمت اني ابقي في المنطقه الحمرا لما كنت اصغر شويه في العشرينات و لما كانت حد بيكلمها ليا علي عروسه تقوله و هو لسه جاب شقه يقولوا لها يخطب و ربنا هيرزقه تقولهم لا محدش هيرضي بيه من غير شقه و عقبال ما حضرتك تبقي بقي جاهز تماما و جايب شقه كويسه تبقي كسرت حاجز ال 30 بسنه ولا اثنين و تلاقي ان كل البنات الحلوه اتخطفت و متتعرضش عليك لانك ايام ما كان بيتعرض عليك و انت اصغر سنا في العشرينات كان الرد انك مش جاهز

و تكتشف يا مؤمن ان ناس كتير بتتجوز في ايجار جديد و ناس كتير بتوافق ان بناتها ترتبط بشاب كويس بس امكانيته مش عاليه علشان لسه في مقتبل حياته

انا مش بحمل والدتي المسؤليه برضه لانها شافت كتير من الناس التانيه اللي بتطلب طلبات عجيبه شقه جنب امها او مهر و شبكه برقم معين و غيره بس يمكن بحملها انها ممكن من غير ما تقصد تبقي ضيعت عليا فرصه اني اشوف حد كويس و انا اصغر

لاني لما يبقي عندي 25 ولا 26 سنه هبقي بدور في سن ال 20 و ال 21 و ال19 في البنات فهتلاقي المعروض في حاجات تنفع كتير

كل ما بتكبر وعمرك بيكبر بتلاقي القفص بيفضي و يفضل فيه البواقي

و برضه يا جماعه الكلام ده للبنات و الولاد يعني البنت برضه كل ما بتكبر بيدوها من البواقي و ارضي بقي لو عايزه يبقي ليكي بيت و عيل

الهم جوايا كبير و الكلام كتير و احساس اني ولا حاجه و ان حياتي في الولا حاجه قاتلني

خلقي بقي ضيق جدا و فعليا مبقتش اطيق احايل خد و اتناقش و عصبيه فوق الوصف

انا تعبت فعليا حتي من الدعاء تعبت سنين طويله بدعي ربنا انه يحسن احوالي و يرزقني بالزوجه و البيت و مفيش فايده

قاعد في المنطقه الحمرا و مستربع و عمال اتزق لاخرها للنقطه بتاعه الصفر

اللي عشت و مت و مخدتش حاجه لا متأخر و لا بدري

ربنا يحسن الاحوال و يخلف ظني و يرزقني و يرزق كل من هو في حالي باللي يتمناه