عمري ما تخيلت اني اصحي في يوم الصبح اتمني ارجع اعيش اخر عشر سنين عشتهم زي النهارده
اتمني ان كل اللي شوفته السنين اللي فاتت يبقي مجرد كابوس و اصحي الاقي نفسي لسه في اول الثلاثينات و لا اخر العشرينات
احساس الواحد زي اللي اتسرق منه كنز عظيم و كنز كبير و هو مش في ايده حاجه شعور بفقد اغلي ما تملك و هو عمرك و وقتك
في الواقع انا اخر عشر سنين معملتش فيهم اي حاجه لنفسي اي حاجه اتعكز عليها او افرح بيها او احس ان و الله عمري ما راح هدر
حتي كل انجازاتي في شغلي مخلتنيش في وضع اعلي من ناس معملتش اي حاجه و ذلك لان الهرم الوظيفي ثابت و لان مفيش اماكن فاضيه غير اني كمان مليش في التعريض الانجازات دي اللي استفاد بيها الشركه و الروساء فقط رغم ان كان اغلبها تطوعي مني و مش مطالب بيها
في الاخر انا معملتش حاجه يا مولاي كما خلقتني قرشين في البنك متناسبين مع اي حد في سني و يكون عازب شقه عاديه جدا لسه جايبها من 4 سنين و خلاص علي كده
كل ما اقعد افتكر حاجه حلوه في السنين اللي فاتت ملاقيش ذكري حلوه ايام حلوه ملاقيش و الله
عزوبيه و وحده و اللي فكرني بالوحده اكتر العيد
فكرتني وحدتي في العيد ببوست كنت كتبته من 10 سنين اسمه وحيدا و يومها كنت حاولت اكلم صحابي علشان نخرج سوا و كان كله مشغول و مش فاضيلي و يومها كتبت البوست ده
دلوقت صحابي دول كلهم هاجروا بره مصر و عيالهم بقوا طولهم ما شاء الله و ان زي ما انا محققتش حاجه غير اني بقيت كهل عندي 40 سنه
فجأه بقيت زي مديري اللي قابلته في عملي الاخير لما اتعينت فيه في سنه 2008 و كان هو 40 سنه و انا ببص له باستغراب و مستكبر قوي الفرق بيني و بينه و بقول ده الراجل الكبير و كل ما حد يسألني عليه اقول لا ده كبير في السن ده 40 سنه
دلوقت بقيت زيه
10 سنين اتسرقوا من عمري و من حياتي و سنين طويله البلوج ده شاهد عليها متغيرش فيها حالي بالعكس بقي من سيئ اي اسوء
انا حتي معنديش علاقات اجتماعيه هامه يعني معنديش وسايط معنديش محاسيب معنديش ناس مهم
مش انا اللي تلاقيني اسمع مشكله حد تلاقيني اقولك استني اكلم لك فلان يخلص لك الموضوع ده ولا احتي اعرف ناس تعرف حد مهم
انا لو وقعت في مشكله مش هلاقي حد تقيل و واصل يوقف جنبي
عيلتي كلها ناس محترمه و كان منهم اساتذه جامعات و منهم اللي وصل اني بقي عميد الكليه اللي كان بيدرس فيها و رغم ذلك عمرنا ما كان عندنا واسطه و محسبويه
و لا عندنا لواءات و لا وكلاء نيابه ولا نواب مجلس شعب
ملناش ضهر ولا لينا معارف
يعني وصلت 40 سنه لا عيل ولا اسره و لا معارف و لا علاقات و لا حاجه كده احس اني عملتها و عملت انجاز فيها
انا من يوم ما تميت الاربعين من اكتر من اسبوع و انا حاسس اني انتهيت فعليا حاسس اني فقدت الفرصه في اني ابقي اي حاجه او يبقي ليا حاجه
زعلان علي شبابي اللي راح دون ان احقق اي شئ
و الله كنت حتي هبقي راضي باسره صغيره و طفل ولا طفلين و كنت هعتبر ده انجاز و نجاح و احمد ربنا و اشكره عليهم
بدل ما انا كده ولا حاجه ولا عندي حاجه ولا محقق حاجه
ثلثين عمر الواحد راح في الاونطه بتفرج علي الناس من بعيد و هي بتخطب و تناسب و تتجوز و تخلف و تدخل عيالها مدارس و اقعد بس في صف المتفرجين و السميعه اسمع اللي بيحكوه و بيجربوه و تجاربهم و مشاكلهم و ازاي تجاوزوها و انا اكبر من كل اللي بيتكلم و رغم ذلك هما كلهم سابقني بكتير
كتبت من 11 سنه رساله الي زوجتي و لحد دلوقت الرساله تايهه مش لاقيه حد تروح له كانها محطوطه في قزازه مرميه في بحر ملهوش شاطئ
احساس انك كبرت فجأه بقي مقيت جدا احساسي بالفشل و الحرمان و الضرب علي القفا
ما لما عمرك يتسرق منك و متحققش واحد علي الف من اللي نفسك فيه تبقي اضربت علي قفاك
لما تشقي و تشتغل و يطلع عين اللي جابك و غيرك يترقي و يتعمل له اعتبار و حساب و هو بطيخه بس عصفوره المدير و معرض يبقي اضربت علي قفاك
لما كل الناس تبقي عندها بيت و ولاد و حياه و انت بتروح تنام في اوضتك اللي بتنام فيها من يوم ما جيت الدنيا تبقي اضربت علي قفاك
يوم ما تبقي خايف من كل يوم جاي علشان الناس اللي حواليك هتسيبك و تمشي علشان عمرهم جه و معندكش حد بعدهم تكمل معاه حياتك تبقي اضربت علي قفاك
يوم ما بتبقي عايش مستني الاسبوع يخلص علشان تنام و مترحش الشغل او علشان تنزل تقعد علي القهوه مع اثنين زمايلك و تكرر الروتين ده اسبوع ورا اسبوع شهر ورا شهر سنه ورا سنه تبقي اتضربت علي قفاك
يوم ما تبقي ضحكت علي نفسك من و انت 30 سنه و عملت فيها انك كبرت و بعدين تكتشف دلوقت انك غلطت و بقي عندك 40 سنه و كنت لسه وقتها صغير و في عز شبابك و من حقك تعمل كل حاجه حرمت نفسك منها تبقي اتضربت علي قفاك
عيشت عيشه مش بتاعتك اتفرضت عليك بس كانت علي حسابك و علي حساب سنين عمرك
و في الاخر كلها كام سنه و تبقي مش قادر تمشي و لا تتحرك و تصيبك امراض الشيخوخه و انت ملحقتش تعيش
سبحان الله العمر ده بيجري بسرعه و السنين بتتسرب من ايدنا و مش بنحس بقيمتها الا متأخر
بتلاقي الكلام ده في القرأن مكتوب و واضح عن الناس اللي قالوا احنا معشناش الا ساعه و عن الناس اللي بتتمني ترجع فتعمل اعمال صالحه بعد عمرها ما فات و الاوان كمان فات
انا دلوقت مش شايف فاضل ليا غير اني احاول اصلح علاقتي بربنا اللي باظت كتير عن زمان
يمكن علي الاقل اخرج من الدنيا دي بحاجه تنفع في اخرتي ما مش هتبقي لا دنيا ولا اخره
ربنا يتوفانا جميعا و هو غافر لنا و راضي عنا
