لخبطه و كعبله و حاجات كتير

بقالي اكتر من سنه مكتبتش يمكن لان الكتابه ملهاش لازمه واحد بيكتب في فراغ للهوا و محدش بيقرا اللي بيكتبه دلوقت انا بقيت علي مشارف ال 39 و زي ما انا

من اكتر من 10 سنين عملت البلوج ده و كنت ساعته في اواخر العشرينات متخرج بقالي بتاع 4 او 5 سنين و كنت ايامها كل اللي شايفه انه يا عيني قربت علي ال 30 و لسه مش عارف اتجوز و كده

دلوقت بقي انا فعليا بقيت علي وش ال 40 و انا زي ما انا و انا و لا حاجه 

و الله يا جماعه في خلال ال 10 سنين اللي فاتوا دي ما اتغير في حياتي غير ان ودعت عدد من اقربائي و احبائي بسبب وفاتهم و اقسي سنه فيهم كانت السنه الي فاتت اللي توفي فيها عدد 6 افراد من الاسره ما بين اخوات للام و اخوات الاب و 2 من اولاد عم الاب

انا الايام دي بجني ثمار الفشل و الوحده و الحزن فعليا شبابي انتهي و شعري  بدء يبقي ابيض حتي في شعر الذقن و الشنب و الجسم

بقيت افتكر المواقف لو حد فكرني بحاجه الاقيها من 7 سنين فاتوا 6 سنين فاتوا  لدرجه ان الذكريات بتاعه الفيس بوك بلقيها بتفكرني بحاجه انا فاكر انها كانت قريب الاقيها من 9 سنين  او 7 او 8 

فعليا عمري اتسرق الايام جرت و عدت و انا زي ما انا

لا بيت لا اسره لا حبيبه و لا متعه في الحياه 

انا بالظبط عامل زي اللي حطوه في تلاجه و طلعوه بعد 10 سنين اكتشف انه بقي 40 سنه 

محستش و لا عيشت و لا اسفدت فيهم و بصيت لقيت نفسي راجل كهل عندي 40 سنه 

اه كل الناس هيجي يوم و هيبقي عندها 40 سنه ده صحيح بس الحال اللي انت فيه وقتها يفرق كتير

لو عندك بيت و اسره و اولاد حتي لو كانوا صغيرين لان معظم الناس بتتجوز في العشرينات و اول الثلاثين فهتلاقي نفسك شبه الباقي

لكن لو زيي هتلاقي نفسك و لا حاجه هتلاقي نفسك بتقاوم السن ده بتكره تسمع انك بقيت في السن ده

لانك بتحس بفشلك و تأخرك

انا ساعات بقول لنفسي ما انا السبب ما كنت اتهببت اتجوزت اي حد و خلاص و هو كل الستات شبه بعض في الاعضاء التناسليه و الجسد و لو علي الوش متبصلهاش يا عم او اشغل نفسك عنها في اي حاجه

و كانت اي ست هتجبلك العيال و هتعملك الاسره دي و اهو علي الاقل كان بقي في اسره ميبقاش لا اسره و ترقي و ارتفاء في الشغل

ساعات بسأل نفسي علي كل اختيار اختارته هو انا غلطت لما قولت بلاش و لا لما قولت دي مش عجباني او دي مش مناسبه ليا مع اقتناعي التام وقتها اني مكنتش هبقي مبسوط مع البني ادم اللي لا عاجبني شكلا و مضمونا و لا في حاجه حتي مخليه في جاذبيه بيني و بينه بس اهو كنت هبقي زي بقيه الناس

من يومين شوفت واحد صاحبي متجوز واحده لولا الحجاب تحس ملامحها راجل و ده اتجوز من 3 سنين و هو في سن ال 35 يعني متأخر بس دلوقت عنده بيت و عنده طفل و عنده حياه اه برضه وضعه زيي و مزدش في الشغل و مترقاش و مبقاش حاجه رغم انه بيتعب و بيشقي و اشطر من ناس كتير بس علي الاقل خد نص العمي

خصوصا في وقت الوباء اللي احنا فيه ده الواحد حس بالوحده جدا بالنسبه لي انا كل صحابي المقربين سافروا بره مصر و مفضلش حد منهم هنا

و اللي موجود يعتبر اصدقاء الدرجه التانيه يعني مش مقربين و دول بقي متجوزين و مشغولين بحياتهم كنت بقعد ازن و الح عليهم علشان نخرج كل اسبوع و لا 10 ايام مره اهو الواحد يقضي شويه وقت و يغير جو و طبعا دلوقت الموضوع ده مبقاش نافع بسبب الكورونا

لما نتكلم بالتليفون و اسألهم بيعملوا ايه يقولوا بنلعب مع الاولاد او قاعدين مع الجماعه بنتكلم حتي هما وقتها حسوا بنعمه الجواز اللي كانوا عمالين يشتموا فيه

انك تلاقي بيت و اسره و حضن حتي لو مش راضي عنه بس في وقت زي ده بتعرف قيمته جدا

لما تلاقي حد معندهوش حاجه و انت عندك

من اكتر الحاجات اللي بتأثر فيا صور الاطفال اللي بتلعب مع ابوها او امها و الفيديوهات بتحسسني فعلا اني مش بني ادم و مش عايش و بحس بحزن قاتل جوايا علي حالا و ساعات كتير بعيط

انا الفتره الاخيره دي بقيت بعيط كتير جدا رغم اني في الطبيعي شخص صلب و دمعتي عزيزه بس صعبان عليا نفسي و حالي

صعبان عليا ان عمري راح و عجزت و لسه مبقتش عايش حياه طبيعيه لا زوجه و اطفال و لا بيت

انا مره و انا ببص علي شقتي قعدت ابص لها و اسأل نفسي يا تري هسكن فيها يا تري هيبقي فيها صوت و حياه و اسره و لا هتفضل مهجوره كده متشبطه و مستنيه الزمن

ببص لصحابي بلاقي ولادهم ما شاء الله الي بقي عنده 12 سنه و اللي بقي 8 و اللي بقي 10 و انا لسه مبدأتش اصلا

انا بصراحه مبقتش عارف اعمل ايه و مبقتش حاسس بحياتي  و حاسس اني مجرد كم مهمل

في ناس تقولك ما تصاحب و لا ترافق  اولا انا صعب عليا جدا اعمل الغلط ده و لو عملت عمري ما هوصل اني انام مع واحده  ممكن لو اتجرأت هبوسها همسكها  هحضنها لكن امارس معاها الجنس مستحيل 

حتي اللي بيتخيل انه لو ماشي غلط هيبقي بيعوض شويه احب اقوله ان الغلط برضه مش بيديك حاجه

و الست اللي بتمشي معاها بتديك اللي علي مزاجها و حتي لو نامت معاك بيبقي علشان هي عايزه كده و ليها رغبه و ناقصها حاجات من جوزها  و في الاخر برضه هيجي وقت و هتفوق انها بتعمل غلط و هتسيبك و تلاقي نفسك انك ضيعت برضه وقتك معاها

فالحل هو الصح لان الصح هو اللي ربنا راضي عنه و مقبول اجتماعيا و اخلاقيا و هو الاكثر استمراريه

المشكله الكبيره اني الايام دي بقيت فعلا بحس اني انا اللي عملت في نفسي كده و كنت المفروض اتجوز و خلاص و اجيب عيل زي بقيه الناس و العروسه عجباني و راضي بيها او لا مش هتفرق

و للعلم انا مكنتش بدور علي الحب بس انا كنت بدور علي حد ابقي حاسس انه عاجبني شاددني حاسس اني عايز اتجوزه مش اشوفه شكله او اتكلم معاه ابقي مش عايز ابصله او حاسس اني و انا باصص له مش مرتاح 

مكنتش متخيل اني هوصل العمر ده و انا زي ما انا مكنتش متخيل اني هبقي قرب ال 40 و لسه زي مفتحتش بيت مكنتش متخيل اني لو ربنا كاتبلي هبدء حياتي و انا راجل كهل عجوز و يبقي عيالي في ابتدائي و انا عندي 50 سنه

انا ساعات بقعد افكر طيب هو انا لما اطلع معاش هقدر اكمل صرف علي تعليم عيالي دي ازاي بالمعاشات التعبانه بتاعه مصر

و هفتح بيتي ازاي

انا تعبت و حاسس بقهر و حسره محدش متخيلها و علاقتي بربنا بقت اقل كتير من زمان

يا ريت يا جماعه اي حد يقرأ البوست ده يدعيلي ربنا يحسن احوالي و يهديلي نفسي و يقربني منه و يفرج كربي و يرزقني من عنده بالسكينه و الهدوء و يعفني بالحلال و يرزقني بالزوجه الصالحه