وداعا 2010 و لا مرحبا 2011

كلها كام يوم و سنة 2010 هتنتهي و تيجي 2011 و بنهاية 2010 و بدايه 2011 هتحصل حاجات كتير و هتروح حاجات و حاله النفسية هتسوء اكثر.
فمثلا في 2011 او بعد نصها ما يعدي بشويه هيكون عمري 30 سنه يعني خلاص العشرينات راحت اللي هي زهره العمر و عز الشباب يعني نص عمري راح يعني بدءت مرحله الاضمحلال في كل حاجه يعني مخي هيبدء يكون اداءه اقل و جسمي كمان يعني اي عيل من اللي شغالين معايا دلوقت هيكون احسن مني و هيفكر احسن مني و هتكون المقارنه في صالحه دايما في ناس هتقول طيب ازاي يتقارنوا بيك اصلا ده انتالمفروض تكون مديرهم و لا الكبير بتاعهم ( سنيور يعني ) تقولك ان انا شغال في شكره مفيهاش المبدء ده فأنت يا مهندس يا مدير مفيش حاجه في النص
يعني ممكن يكون مهندس عنده 35 و زميله عنده 23 و بيعملوا نفس الوظايف و ليهم نفس الصلاحيات و الكبير اللي 35 ملهوش كلمه علي الصغير اللي 23
متخيلين اني هبدء اكون وحش و هما هيكونوا احسن ول كن دي سنه الحياه
في الاماكن التانيه انت بتتقارن بيهم لأنك المفروض بتبقي في مركز تاني او في فئه اخري سنيور او مدير قسم او حتي نائب مدير قسم فساعتها كل واحد بيلعب في جزء بعيد عن التاني لكندبوقت بكلنا بنلعب في نفس الجزء
يبقي 30 ده سن بدايه النهاية للعقل و الجسم هو صحيح نهايه بتاخد وقت شويه من 15 الي 20 سنه و لكن المشكله فيها انك كل يوم بتكون اسوء من اللي قبله
من وصلي سن ال 30 اكتشف اني معلتش اي حاجه اني ولا حاجه في 2010 و 2009 اللي كان فاضل ن صحابل مش متجوز خطبوا و اتجوزوا و فضلت انا لوحدي مليش حد ليا صحاب اسميا لأن كل واحد مشغول ببيته و مراته لما نتقابل كل مده طويله الاقي نفسي زي يوم ما اتخرجنا اخر اللسته
اخر اللسته في اني الاقي وظيفه , اخر اللسته في مرتبي في الوظيفه , اخر اللسته في مستوي الشركه الي انا شغال فيها , اخر اللسته في المسمي الوظيفي بتاعي ( مهندس) و اخر اللسته في تكوين اسره و وجود زوجه و اولاد
في سن الثلاثين تبقي اتأخرت في الجوازلما تيجي تتجوز تبقي انسان لازم تكون عاقل و هادي مينفعش تهزر انت بقيت كبير مينفعش تجري ورا مراتك زي العيال اللي في العشرينات مينفعش تهزر معاها زي ما الشباب بيهزروا انت راجل كبير
في الثلاثينات مينفعش تقول انا هأجل موضوع العيال شويه علشان نعيش انا و مراتي نتمتع شويه هتقولي و مين بيأجل هقولك
في واحد من الزملاء اللي عندهم 25 سنه اتجوز السنه دي تقولي ازاي هقولك ابوه ظبطه المهم كنت بقوله يا عم عقبال ما ربنا يرزقك بولد قالي فال الله و لافالك لسه شويه اناعايز اتمتع بحياتي و مراتي ( يعني من الاخر هو استعجل في الجواز مش علشان عايز عياله يبقي عندهم 20 سنه و هو 45 ل هو استعجل علشان يقضي رغباته الجنسيه اولا و العاطفيه ثانيا ) و حتي لو اجل موضوع العيال 5 سنين هيخلف و هو عنده 30 يعني مش كبيرلكن انا دلوقت بلعب في الوقت بدل الضايع
30 سنه و مفيش حاجه لا شقه و لا عروسه و لا شغلانه كويسه و لا مكانه و منصب و مرتب مناسب لسني و خبرتي ولا حاجه و الله و لاحاجه الناس حواليا بتتغير و انا واقف مكاني في كل حاجه و العداد بيعد و عمري بيجري
مبقتش اقدر اقول لما حد يكلمني في الجواز لسه بدري او انا لسه صغير خلاص وقت الكلام ده انتهي دلوقت انا في الوقت اللي المفروض يكون معيا اولاد في مدرسه
و الله كتير من صحابي و زمايلي اللي في سني عيالهم دخلوا مدارس و انا اصلا مش عارف اعمل حاجه
يبقي حياتي الأسريه ضايعه اما بالنسبه لجياتي المهنيه فهي برضه ضايعه يعني مفيش حاجه عدله في حياتي
ساعات كتير بسأل نفسي هو ليه ربنا عمل فيا كده ما اللي حواليا محصلش ليهم كده ليه انا
طيب لو ده اختبار و بلاء مش كفايه كده بقي هعيش كام سنه مبتلي و مختبر انا مش قادر استحمل خلاص
نفسيتي مدمره و حياتي ملهاش اي معني و لا اي لازمه
مفيش متعه في الحياه اليوم هو هو كل يوم و الناس مش رحماني من الاسئله نفسي اقول لأي حد يقولي هو انت مش ناوي تتجوز اقوله انت مالك انا حر بس مينفعش دايما لازم يكون الرد دبلوماسي
2010 كان من اسوء السنين الي عدت عليا امراض غريبه اصابتني وحاله نفسيه سيئه جدا و كمان ادمان شات علي الفيس بوك و
الام اس ان
ايوه بكلم بنات عرب و اجنبيات لأني مش لاقي حاجه اعملها ايوه لأني معنديش حد في حياتي ايوه لأني اكتشفت ان مش من الطبيعي الواحد يعيش من غير حد من الجنس الاخر في حياته علي الاقل من الناحيه العاطفيه لو اهملنا الجانب الجنسي ( اللي هو مهم طبعا و مؤثر في الحاله النفسه كمان)
2011 هيكون اسوء نفسا هبقي 30 هبقي كبير هبقي واحد شاذ عن اللي في سني لأنهم متجوزين و عندهم زوجات و اولاد و كمان في شغلهم بقي ليهم منصب و مركز مش زيهم زي العيل ابو شخه اللي لسه متخرج سواء مديا او معنويا او من نايحه الصلاحيات
فرق مرتبي عن العيال مش كتير و العيال بتتجوز و بتخطب و انا زي ما انا ليه علشان ابويا مش قادر يساعدني و لا يقف جنبي طيب ده عدل ان الدنيا تمشي كده و لا هي الدنيا بقت كده
ابوك معاه فلوس و عنده معارفيبقي تتعلم كويس و تشتغل في مكان كويس و تتجوز بدري و تعيش مستريح
ابوك معهوش فلوس و معندهوش معارف يبقي تقعد في بيتكم سنتين علشان تلاقي شغلانه و عمرك يضيع و انت مش عارف تتجوز و لا تعمل حاجه و العيال اللي بالنسبه لك تجيب عيال و انت زي ما انت
كلنا شمعنا عن موضوع الواحد الصحيح بتاع الشيوخ بتوع التلفزيونات اللي يقولك كلنا لينا واحد صحيح في الدنيا بس متقسم بأختلاف يعني في بني ادم الواحد بتاعه معظمه مال و سلطه و جاه و لكنه وحيد و حزين ز تعيس و مريض و في بني ادم تاني فقير و غلبان و لكنه سعيد و ابناءه حلوين و صحته فل و و عياله زي الفل
نفسي اقول كلمه ابيحه
لأني اللي شايفه في ناس عندها 5 مش واحد و في ناس عندها 0.5 زي حالاتي معندهاش اي حاجه مشفتش مثلا ان عبده العبقري حزين ز حياته بايظه و لا بيته متفكك و لا طلع عقيم و لا اتعب في الحصول علي وظيفه و لا اتطلق من مراته
مشفتش العيل اللي عنده 25 و اللي اتعين معيا من اقل من سنتين تعبان و شقيان علشان يتجوز و لا طلع بتاعه مش بيقف و معرفش يكيف مراته و حصلتله مشاكل
اللي شفته ان في ناس واخده معظم المتع اللي في الدنيا و في ناس مش واخده حاجه او واخده علي قفاها و بيصدقوا نضريه الواحد الصحيح اللي مش عارف جت منين االلي ملخصها انك لما بتاخد كل الحاجات اللي نفسك فيها بتنقص منك حاجات
انا مش شايف ان الناس دي ناقصها حاجات موجوده عندي بالعكس و الله كل حاجه عندي عندهم و هما يتفقوا عليا باللي عندهم و مش عندي
في نظريات تانيه بتقولك اللي تعب و هو صغير هيرتاح و هو كبير و اللي اتسريح و هو صغير هيتعب و هو كبير برضه مش صح
مش قاعده و كل واحد و ظروفه
طيب يبقي تفسير اللي انا في ايه و مطلوب مني ايه بالظبط علشان يتغير حالي و يبقي احسن من اللي انا فيه
مطلوب مني ايه علشان ابقي بني ادم و علشان اعيش زي بقيه الناس و لا انا محكوم عليا الاقي الحاجه و انا عجوز و يبقي عمري 60 سنه و ابني عنده 18 زي ما حصل معيا انا و ابويا
مش عارف انا تعبت و زهقت سنتين عدت علي البلوج ده و محصلش اي حاجه جديده في حياتي و لا بقيت احسن بالعكس بقيت اسوء بقيت مش طايق نفسي بقيت بحقد علي اي حد اصغر مني و عايش حياته زي المسار الطبيعي اللي المفروض يعيشه اتخرج و اشتغل علطول و خطب و اتجوز و هو 25 سنه و فرح بعياله و عايش كويس و انا زي ما انا في اللي نفس الهباب اللي انا فيه
مش هقدر اقول في الأخر غير ياااااا رب عدلها يا رب لو كنت اذنبت و انت بتعاقبني علي ذنبي فأنا تبت و ندمت يا رب ان كنت بتختبرني و تمتحني فأرحمني و كفايه عليا كده لأني خلاص مش قادر و انت ادري بحالي مني و مش محتاج كلامي يارب حسن احوالي و ارزقني من لدنك و اغفري و سامحني و اتني في الدنيا حسنه و في الاخره حسنه و قني عذاب النار
امين
و اةةةةةةةة يا افه

ُEye Candy

يعني ايه Eye Candy

Noun

eye candy (uncountable)

1. (US, slang, idiomatic) A very attractive person or persons, or the salient visible physical attributes of same.
2. (US, slang, idiomatic) Any object or sight with considerable visual appeal.
3. و ترجمه الكلمتين دول يعني انها حاجه تجذب الانتباه خصوصا نظيرا يعني تحس باسعاده مم مجرد النظر إليها
4. طبب في ناس بتحس بالسعاه من النظر إلي مفاتن المرأه بس مش ده اللي اقصده ده بيكون عرضه الوصول إلي نوع من الامتاع الجنسي يعني بيشوف الست كجسم مغري مش فارق معاه هي وجهها شكله عامل ازاي
5. لكن اللي اقصده هو جمال و جاذبيه الوجه الذي يجعلك تحس بالبهجه لرؤيته مل لوحه جميله من ابداع الخالق و ساعتها مش بتركز في حاجه تانيه
6. امثله
7. من السيدات اللي تعتبر من اجمل الوجوه ايمان عياد مذيعه الجزيزه و نسرين طافش و سلاف فواخرجي ( البعد لا يراها جميله اذواق) و غيرهم
8. السؤال اللي موجود هنا تعمل أيه لما حياتك ميكنش فيها واحده كده تسرح و انت باصص ليها تسرح في جمال عينها يعني في شغلي كلنا رجال مفيش حاجه تبهج الناس مش قصدي حاجه وحشه و الله بس اعتبر اني بتكلم عن زهره جميله بتملئ المكان بهجه مش عارف و مش عارف اكتب ايه تاني

و اةةةةةةةةةةةة يا افه

1. 
   
2. 
   

عندما اقترن الغلبان بالأميره قمر الزمان ( الحلقه الأولي من شخصيات )

هذه الحلقات تتحدث عن مجموعه من الشخصيات كنت متميزا عنها في فتره من الفترات سواء تمير علمي او اجتماعي و لكنها سريعا ما تخطتني لتعبير للجهه الاخري و لتتميز عني كثبرا و لتتعبرني غير مناسب لأن اكون صديقا لها في الوضع و الحياه الجديده التي وصلوا لها فيا من كنتم اصدقائي ادام الله تقدمكم و رزقكم السعاده في حياتكم و رفع من مراتبكم في الدنيا و الاخره

عرفته عن طريق احد الاصدقاء في اثناء الدراسه بالكليه كان شابا طويلا يرتدي نظاره وجهه لا يخلو من الوسامه كان من مدينه المنصوره و والده يعمل بأحدي المحال الحكوميه اللي تم خصخصتها قريبا كمدير فرع ثم انتقلوا إلي مدينه اخري ثم اخيرا إلي مدينتنا عندما التحق هذا الشاب بالكليه تعرفنا علي بعض و نمت بيننا ضداقه ليست بالقويه و ليست بالضعبقه و استمرت هذه الصداقه حتي قرب الانتهاء من سنوات الدراسه حيث طلب من في السنه النهائيه مساعدته في مشروع التخرج و قد فعلت و اثناء هذه الفتره نمت العلاقه بيننا كثيرا بسبب تردده المتكرر علي منزلنا لأنهاء مشروع تخرجه و تخرجنا و انقطعت اخبارها حتي سمعت انه يعمل في احدي الشركات الجنبيه بمصر و صدفه وجدته علي الفيس بوك و قمت بإضافته فرفض الأضافه فقمت مره اخري بالإضافه مع ارسال رساله تذكره بمن انا ( قولت يمكن مش فاكرني او شكلي اتغير او نساني) و لكن من ساعتها و انا waiting for confirmation نتيجه وجود اصدقاء مشتركه استطلعت انا اطلع علي صفحاته فوجدته قد ارتقي بمستواها الاجتماعي ليتعرف عن اشخاص خريجين الجامعه الاميركيه و اخرين من هذا المستوي بالاضافه إلي تحول إسلوبه في الكلام و الكتابه إلي اسلوب راقي ( جميل حلو ان الانسان يرتقي ) حتي فؤجئت من فتره قليله انه قد خطب فتاه من اهل الطبقات العليا و خريجه الجامعه الالمانيه فتاه تذكره بسندريلا و ( عرفت من صوره البروفيل بتاعه لما زملائنا علقوا عليها ) و من النااس المعلقين وجدت اصدقاء عرفهم في مارينا يطالبونه بأن يذهب لهم هناك ليستمتعوا بقضاء الوقت معا ( ناس نظيفه و مستحميه مش زي عامه الشعب ) عندها ايقنت اني غير مناسب لهذه الفتره من حياته و اني من الاخر (حاجه تكسف) و عرفت اني هفضل waiting for confirmation حتي الموت

كيف استطاع هذا الشاب ان يتصل بهولاء الناس موقف يفكرك بالعلاقه بين فارس و تيتو في فيلو احمد السقا الشهير طيب و لو انا ربنا اعطاني انسي الناس اللي كنت اعرفهم ايام لما كنت شخص عادي سؤال مش عارف ايجابته و لكنه مش الشخص الوحيد الذي اتصل بناس من الطبقه العليا و لكنه الشخص الوحيد الذي رفض ان يضمني إلي قائمه اصدقائه علي العموم ربنا يسهله و يوفقه وإلي اللقاء مع شخصيات اخري

و اةةةةةةةةةةةةةةةةةةة يا افه

سيدتي الجميله

رأيتها حين كنت منتظرا و هي ايضا كانت منتظره رأيتها جالسه تنظر إلي الامام نظره اميره نعم انها اميره مظهرها يدل علي انها من وسط راقي ترندي بلوزه و بنطلون علي احدث خطوط الموضه دون التفريط في الاحتشام تضع قليل من احمر الشفاه الذي زاد وجهها جمالا و ملائكيه لم يكن تزينها زائد عن الحد بل كان بسيطا رقيقا كما هي نظرت نحوي نظره ليست بالطويله او القصيره كانت نظرتها لا تحمل اي تعبير فلم تكن نظره اعجاب او نظره لا مبالاه او نظره امتعاض ولكنها نظره إلي شئ غير موجود إلي فراغ إلي هواء استدرات و اعتدلت في جلستها في قارب الانتظار إلي الانتهاء احمر اصفر فأخضر انتهي الانتظار في اشاره الملوك و انتلقت الاميره بسيارتها الفارهه VW PASSAT لتتركني في هيامي داخل سيارتنا العتيقه موديل السبعينات

و الله ده حصل و ساعتها سألت نفسي مليون سؤال ليه مش من حقي اني حتي احلم ارتبط بواحده زي دي و الاجابه بسيطه انا فين و هي فين فهنا اجابه السؤال هي الفلوس مش الادب و لا الاخلاق و المركز الاجتماعي بل الفلوس انت بالنسبه ليها معدم او علي قدك لازم تتجوز واحده علي ادك ده بأعتبار تقارب السن

ليه مش من حقي اتجوز واحده بنت ناس متربيه علي الغالي متعلمه في مدارس اجنبيه الرقه جزء لا يتجزء منها و ليس مجرد قناع تلبسه او دور تقوم بتمثيله لتحوز اعجاب الاخرين ليه مش من حقي اتجوز واحده انثي بجد مش انثي بيولوجيه زي اللي مليين البلد الاجابه مفيش معاك فلوس او اللي معاك و اللي بتاخده كمرتب يعتبر ثمن الشيكولاته اللي بتاكلها في الشهر

الصراحه شيء محبط و علي فكره انا هنا بتكلم عن واحده ماشيه محترمه مش ماشيه من غير هدوم او مبتزله او رخيصه زي ناس تاني من الناس الواطيه اللي بقي معاها فلوس ففكرت انهم علشان بقي ناس من الطبقه العليا لازم يتعروا انا بتكلم عن واحده لابسه بأحتشام و هي في عز الحر فتاه تحس انها تربت كأميره

طيب ليه مش من حقك تفكر فيها اكيد علشان مش معاك فلوس و لو ان احد معارفي حاليا ( صديقي سابقا ) نجح في التواصل مع هذه الطبقه الراقيه ( هتكلم عن الموضوع ده في بوست لوحده ) طيب ليه مش معاك فلوس علشان ربنا عايز كده طيب ليه ربنا عايز كده معرفش

و خلص الكلام و هنيئا لك يا من ستكون هذه الاميره من نصيبك

أخر الاخبار

الموضوع النهارده هو اخر الاخبار مش اخر الاخبار السياسيه لأني من الاخر مش فارق معايا السياسه و لا مين هيحكم و لا مين هيبقي وزير كل ده في الاخر مش هيعمل اي نوع من الافاده ليا فبلاش اشغل بالي بكلام طق حنك علي رأي الشوام
المهم المقصود بأخر الاخبار هو اخر اخبار اللي الناس اللي حواليا او اللي كانوا حواليا
كان في مجموعه من الزملاء لسه مخطبوش او اتجوزوا و بصراحه كنت اجد بينهم السلوي و الراحه و لما يكلموني في خروجه اكون اول واحد في المكان الناس دي كلها خطبت ما عادا انا حضرت خطوباتهم واحد واحد و الله كنت فرحان لهم علي عكس عبده العبقري لأنهم ناس محترمه و يستاهلوا كل خير الغريبه انهم كلهم خطبوا في فترات زمانيه متقاربه يعني اسابيع بين كل شخص و التاني و كل يوم كنت بلاقي عدد اللي واقفين علي شاطئ العزاب بيقل لحد ما لقيت نفسي لوحدي و بقيت لوحدي لأنهم تقريبا مفيش اي علاقه بيني و بينهم من يومها و كل ما اكلمهم علشان نتقابل الاقي اجابه امتي بس او ربنا يسهل او و الله مش فاضيين
انا اعتقد ان ده نوع من الظاهره المعروفه عالميا و العاده المشهوره بقطع العلاقه بالأصدقاء العزاب و خصوصا العزاب العواجيز اللي زي حالاتي اللي هما بيثيروا اسئله غريبه عند البشر ( ليه لحد دلوقت متجوزش و لا خطبش اكيد فيها انه) المهم الموضوع ده هناقشه في بوست تاني لكن البوست الحالي هو بتاع اخر الاخبار بالمناسبه فاضل اقل من 3 شهور علي ال 129 ( تقريبا مفيش عربيه موديلها بالاسم ده).
من اخر الاخبار زمان اني بقيت احس اني حاقد و حاسد للناس مش عارف ساعات اقعد افكر و اقول علي نفسي كده بس ارجع و اقول اني عمري ما تمنيت زوال النعمه من حد و لكن انا تمنيت اني اشوف نفسي زيهم بني ادم طبيعي في مناخ طبيعي بني ادم عايش علشان حاجه مش قاعد كده مش لاقي حاجه يعملها كائن طفيلي ( بجد ساعات بحس اني زي الكائنات الطفيليه ) حياتي بقت شغل و نوم و بيت لا انشطه لا اهداف و لا اي حاجه حياه كئيبه فيها النهارده زي بكره زي امبارح لا جديد و لا مفيد كل الجديد هو عدد من الايام بيتضاف لعمري من غير اي فايده وقت ضايع ملهوش تصنيف يالا معلش طولت عليكم و اشوفكم قريب
و اةةةةةةةةةةةةةة يا افه

نهايه حكايه عبده العبقري

مساء الخير ايه النظام اتمني تكونوا جميعا بخير النهارده قررت اني اخلص علي موضوع عبده العبقري تماما يعني مش هنذكره تاني إلا لو في حاجه ملحه إلي ذلك قررت اني اخلص شويه الحكايات اللي باقيه عنه زائد اني اخبركم ان الاخ عبده اتبع سنه من قبله بقطع علاقاته بإصدقائه العزاب ( اللي هو انا ) و الغريبه انه اتأخر حوالي سنه في اتخاذ القرار ده رغم ان الناس بتخده في بعض الاحيان قبل الفرح و لكن صديقنا عبده قرر انه يستغني عن حرق دمي مش عارف ليه و القرار ده بقاله حوالي 6 شهور من غير لا حس و لا خبر هتقولوا يمكن مات هقولكم لا موجود بس الراجل اكتشف انه خلاص مش لاقي حاجه جديده تحسسه بالانتصار او بالافضليه عني كل حاجه عملها و جري و اتمنظر بيها و قال كلمتين يحرقوا الدم بس الموضوع خلاص دخل في الثبات ( شغل و بعدين خطويه و بعدين جواز و خلفه و شراء سياره ) ايوه و الحج اللي طلعه ببلاش بمساعده الشركه اللي شغال فيها يعني من الاخر خلص كل حاجه فاضل يقولي تعالي فرح ابني و دي لسه بدري عليها شويه

المهم انا بصراحه مش زعلان اني استريحه من عبده لكن كان نفسي انها تيجي مني مش منه يعني كنت حرقت دمه مره و قولتله متكلمنيش تاني لكن للأسف حتي ده محصلش و هو اللي خد القرار و قطع العلاقه علي العموم ربنا معاه و يهديه و يكرمه في حياته بعيد عني

و اةةةةةةةةةةةةةةةةةةةة يا أفه

حياة العزوبية.. تعيشها إزاي؟

ده من موقع عشرينات دوت كوم ( يالهوي فاضل كام شهر و مكنش عشرينات و مش عاملين موقع للثلاثينات)

متنسوش تدعولي علي النصائح المفيده دي

http://www.20at.com/20at/lifestyle/14222-2009-12-02-14-08-42.html

Back To Track

و عدنا اليكم بعد فتره انقطاع طويله عندي كلام كتير عايز اقوله عندي شتيمه كتير عايز اطلعها عندي اكتئاب يكفي قاره افريقيا و تصدر منه للخارج ان شاء الله هتبقي في رسائل جديده كتير خلال الفتره القادمه احتفالا بقرب مرور عام علي استمرار الضرب علي القفا و عدم تحقيق اي شء و طبعا قرب بلوغ ال 29 عاما و الاقتراب من ال 30 اللي هي تقريبا نص عمر الواحد و ده بكل فخر دون تخقيق اي شئ علي العموم هنبدء الرسائل بموضوع عجبني جدا و حبيت انقله و اسجله للتاريخ بتعليقات الناس عليه ( طبعا اللي عجبني منها بس) و هو حياه العزوبيه تعيشها ازاي

و اةةةةةةةةةةةةةةةةةةة يا افه

الي زوجتي

كنت قد قررت منذ مده ان اكتب خطاب إلي زوجتي و حبيبتي و كان السبب هو تأخر عثوري عليها و تأخر تحقق أملي بمعرفتها بالاضافه طبعا للظروف الماديه اللي 99% حتمنعني من الارتباط بها حتي لو وجدتها و التقيت بها

و هذه هي سطور الرساله

إليك يا حبيبتي اكتب هذه الرساله لأبدئها بمقطع من اغنيه ليارا يقول " ما يهمك ابدا مهما الزمان يطول راح يجي بكره و الباقي لكي علي طول"

نعم طال زمان البعد بيننا و حال الزمن دون انتهاء فراقنا حتي انه لم يسنح لنا معرفة احدنا الاخر و رؤيه بعضنا و لو رؤيه عابره

و لكني يا حبيبتي قد بذلت كل ما املك و اعيتني الحيل لكي اصل اليك وقفت امامي الظروف الماديه لتمنعني من التفكير في البحث عنك لمده طويله و عندما قولت "تبا لتلك الظروف اني سأبحث عن حبيبتي و ليحكم الله بما يريد بعد لقائنا" بحث عنك كثيرا و لم اجدك و قد بخل علي الهامي و قريحتي بصوره تخيليه لك او حتي مجموعه صفات من صفاتك و سماتك الواضحه

نعم انا لا اعرف عنك شيئا لا اعرف من انت و لا علي اي هيئه انت و لا ابنه من و لكني و الله احبك

احبك من قبل ان اراك احبك منذ طفولتي و مراهقتي و بدايات شبابي و انتظر يوم القاكي لأخبرك كيف احببتك من قبل ان تتلاقي اعينا و كيف حفظت قلبي و اغلقته و لما اسمح لأحد بدخوله قبلك و اكدت علي ذلك بصناعه مفتاح لقلبي يستخدم لمره واحده و اعطيتك نسخته في ربيع احلامي بكي لكي تستخدميه لتدخلي إلي قلبي ثم لا تجدي مخرجا منه بعد ذلك

قد تكوني تحلمين بأخر او تتمنين شخص اخر و لكن قدرنا قد سطر من قبل ميلادنا بي لا تضل و لا تغوي بيد الله خالق كل شئ هو خلقنا لنكون معا فأعلمي اني ما حلمت بغيرك و ما احببت غيرك و ما تمنيت غيرك

اما اذا كنت تحلمين بي فيبدو ان الله قدر لنا ان ينفتح قلبنا في ان واحد ليلتئم هذان القلبان في قلب واحد

اعذريني اني تأخرت عليك و لكن ليس بيدي و الذي امري بيده لست و لكن اعلمي اني ابذل قصاري جهدي لنتلتقي بعد اشتياق و لننهي سنين الفرق و قد قال صقر قريش واصفا بعده عن اهله و محبوبه

قد قضي الله بالفراق علينا و عسي بأجتماعنا سوف يقضي

اعلمي اني ما نسيتك ابدا و اني سأستمر عنك في كل مكان و كل شبر و في صياصي الجبال و السهول و الوديان لأخبرك فقط كم انتظرتك و كم احببتك

لا تأيسي من الانتظار و ان كنتي تهيمين بأخر فسيأتي وقت للأختيار بيني و بينه و حينها ستعلمين انك ما كنتي الا لي و ما كان هيامك بغيري الا خطأ في التفسير

و اخيرا عيشي هانئه و استمتعي بحياتك حتي يأتي بوم القاك نعم اني لا اعرف متي سيأتي هذا اليوم و لكنه سيأتي بأذن الله

و سلاما يا حبيبتي