في يناير ببقي بقول لسنه السنه معدتش انا قدامي 6 شهور علي شهر يوليو اللي فيه عيد ميلادي و دي فرصه كويسه اني اكون ارتبطت و ممكن كمان اتجوزت و كده ابقي موصلتش سن كذا و انا لسه عازب
طبعا بيعدي ال 6 شهور هوا و بلاقي نفسي قربت من شهر يوليو و ابدء اكتئب و احس ان خلاص سنه جديده طارت من عمري و بقت اكبر سنه و اعجز سنه و كل الناس شايفه اني كبرت زياده علي اني اعمل اسره و بيت
و في خلال الكام شهر دول طبعا بلاقي ناس حواليا حياتها اتغيرت و اتحركت لقدام و انا زي ما انا محلك سر
يجي شهر 7 و تيجي الكأبه و بعدين ا حاول اقنع نفسي ان دي بدايه سنه جديده و ممكن يحصل فيها المعجزه يعدي شهر و اثنين و ثلاثه و ابدء اقرب من ديسمبر و ابدء اقنع نفسي ان لسه فاضل 6 شهور
طبعا من يوليو لحد ديسمبر الكأبه بتزيد بشكل غير طبيعي
يتخلل السنه طبعا كام موسم بيزودوا الكأبه عليا منهم رمضان اللي علي اوله كل سنه بسمع كلمه ان شاء الله رمضان الجاي تكون في بيتك و كذلك الاعياد و لما تيجي الايام دي افتكر اني السنه اللي فاتت اتقالي كده
غير طبعا لما بتكلم حد تعيد عليه و يقعد يبيض عليك و يخنقك بأسألته و كلامه انت متجوزتش لحد دلوقت معقول طب هتتجوز امتي طب مستني ايه طب مش عارف ايه
و تيجي السنه اللي بعدها شبه السنه اللي فاتت تمر بنفس الشكل
الفكره بقي اني لما وصلت عمر ال 42 صابتني كأبه مصابتنيش قبل كده
انا فاكر اني و انا داخل علي عمر ال 39 بدأت احاول اقنع نفسي اني عجزت يمكن و انا 38 و نص و ا ني خلاص ايامي في الشباب معدوده
بس حالتي مكنتش سيئه زي حالي دلوقت
اه كان بيصعب عليا نفسي اه كنت بعيط
بس مكنتش بالحاله اللي انا فيها دلوقت
انا قاعد من امبارح براجع انا عملت ايه ال 20 سنه اللي فاتت الاقي قعدت سنتين في البيت مش لاقي شغل و 3 سنين بعدهم لحد ما لقيت شغلانه مناسبه استقر فيها و اشتغل و هوب بقيت 30 سنه و قاعد احوش كل قرش علشان ابقي ينفع اتجوز و افتح بيت و قعدت ادور علي عرايس من عمر ال 30 و لحد دلوقت و دون فايده
بفتح ابص علي زميلاتي في الدراسه القي شكلهم كبر و بقوا مدامات و اقول يا تري الناس شيفاني زي ما انا شايفهم كده كبير و عجوز و اقرب اللناس البركه اكتر من القرب الي الشباب
بلاقي اولادهم طولهم و من منهم ولادهم دخلوا الجامعه و انا زي ما انا
السنه بتعدي بنفس الشكل و نفس الخط
حتي و انا في المصيف السنه دي لقيت نفسي بروح نفس المكان بقالي 3 سنين لدرجه اني فاكر كل ثانيه في المرتين اللي فاتوا و بدل ما اتبسط الاكتئاب زاد و نفسي تعبت
في بوست تاني هتكلم شويه
عن ملاحظاتي و تعليقاتي علي بعض من مصائر الزميلات و الزملاء دول و اسألكم و
اسأل نفسي احسن هو انك تجرب حاجه و تفشل فيها ولا متجربهاش من اساسه
عايز اعلق علي جمله انت قلتها اللي هي
ردحذف"و كل الناس شايفه اني كبرت زياده علي اني اعمل اسره و بيت"
ف طظ في الناس، أو عايز اقولها بشكل ابيح أكثر بس مش عايز أشيل ذنوب
كلامك سليم و انا مقتنع بيه و شايف ان جزء كبير من كلام الناس مش بيبقي هدفه مصلحتك قد ما هو بيحسسك بشكل غير مباشر انك اقل منه في حاجه و هو احسن منك و بيغذي و يشبع شعوره بالتميز عليك حتي لوفي موضوع مرتبط بالقضاء و القدر زي الزواج و الاولاد لان بمجرد لما تقوله طيب ما تشوفلي عروسه تلاقي وشه قلب الوان و ميبقاش عارف يرد ازاي و تلاقي لسانه اللي مكنش بيسكت سكت مره واحده بعد ما كان عمال يقولك معقوله كل البنات الدنيا دي مش عجبينك معقوله انت مش عارف ايه فانا فعلا كلام الناس مش بيهمني بس كده كده بيخلي نفسيه الواحد تبقي اسوء خصوصا انك كل ما تكبر في حاجات كتير بتتغير فيك و في طباعك و حياتك بتخلي الموضوع مش بيبقي سهل انك تلاقي حد و تتجوز و ترتبط
حذفتحليل كويس و حلو الرد بتاعك علي الناس دي ، هبقي استخدمه بعد كده
حذفبالنسبة لسؤالك ،
ردحذفللاسف انا بقلل جدا من تجاربي لأي حاجه خوفا من اني افشل في الحاجه اللي بجربها، و للاسف بيبقي نفسي اجرب حاجات كتير بس بحس اني متكتف بأفكاري و خوفي من الفشل
انا اتمني انك تبطل تخاف من الفشل علي فكره انا مش كده بس انا مقتنع ان التجربه اللي تستاهل هي اللي الواحد لازم يدخل فيها و يغامر و يشوف هينجح و لا يفشل يعني مش اجبلك واحده متعرفش عنها حاجه ولا عن اهلها و لا ضامن هيطلعوا عاملين ازاي و اقولك غامر الا لو في حاله واحده انها عجباك مبدئيا شكلا و مضمونا كده تغامر و الموضوع مستاهل لكن لو ضفنا اللي فوق و كانت هي مش عجباك او ضاغط علي نفسك علشان تتجوزها يبقي تغامر ليه طب علي الاقل لو عجباك و طلعت طباعها و طباع اهلها وحشه هتقول و الله اديني اخترت حاجه بمزاجي لكن لما تبقي عاصر علي نفسك لمونه هيبقي رد فعلك ايه عامه انا معرفش سنك كام بس الحق اللي فاضل من عمرك وجرب لو مشكلتك الوحيده هي الخوف من الفشل و اختار حاجه عجباك و اتوكل علي الله
حذفقول يارب
ردحذف