بقالي كام يوم في حاله كأبه غير طبيعيه و تقريبا مفيش يوم بيعدي الا لما بدخل علشان انام و معرفش انام قبل 3 الفجر و ببقي قاعد في السرير بعيط
بعيط علي 20 سنه راحوا بفتكر شاب صغير كان مركز في الدراسه و بعيد عن البنات و كان اخره يبص من بعيد و بيبقي بيلوم نفسه لو بص علي بنت و لقاها حلوه و كان شايف ان الصح انه يخلي البص و الكلام ده لما يتجوز
بفتكر اد ايه الدنيا كانت قدامي واسعه و احلامي واسعه
ببص في المرايا دلوقت و اشوف انا قد ايه بقيت راجل عجوز كهل محدش يرضي بيه
افتكر لما قررت في الكليه بتاعتي اني اغير قسم مكان قسم علشان انا دخلت القسم الاول غصب عني علشان كنت محول من الاقاليم و ان القرار ده كلفني سنه و فاكر زمايلي و هو بيقولولي ازاي تضيع سنه من عمرك الناس بتمشي لقدام و لا ترجع لورا
و افتكر اني اقرر اضحي بالسنه علشان ابقي مبسوط بقيه العمر
افتكر البنات الحلوه اللي كانوا معايا و كنت شايف اشكلهم من بعيد احاول افتكر اسمايهم ادور عليهم علي الفيس الاقي بناتهم و اولادهم اطول منهم ما شاء الله
ما البنات دي غالبا اتجوت قول ما اتخرجوا علي طول علشان دول كانوا مزز الدفعه فعيالهم حاليا مش اقل من 18 سنه
افتكر ان الناس دلوقت بتبص لينا ان وقتنا فات و ميعاد و ميعاد العرض السينمائي بتاع فيلم حياتنا اللي كنا حاجزين فيه تذكره الحياه خلص و لازم نسيب صاله العرض السينمائي للناس اللي حاجزه بعدنا
لما بشوف زمايلي و زميلاتي بشوف انهم اد ايه متناسبين مع سنهم و ظروفهم و عائلتهم في حاله مناسبه لفئتهم العمريه
انا كان ممكن لو كنت اتجوزت بدري كان يبقي عندي عيل عندي 18 سنه او علي اقلها 12 سنه
يبقي عندي بيت و اسره و اولاد و حياه
مكنتش هبقي قاعد بعيط علي عمري اللي راح و ال 20 سنه اللي خلوني بقيت راجل عجوز و عمري جري
مكنتش هبقي متضايق من نظره العيال اللي في العشرينات ليا الشباب اللي شايفني راجل كبير و اللي يقولي يا حج و اللي يقولي يا خالي
انا ساعات ببص ليهم و بدل ما اتضايق من نظرتهم ليا بشمت فيهم و افتكر ان هما كمان بعد 15 سنه هيبقوا يا حاج و يا خالي
و ممكن حالهم يبقي اسوء مني ببقي نفسي اشوفهم ساعتها و اشوف الحسره في عينهم لما حد يبص ليهم نفس النظره اللي بيبصوها ليها و لا حد يقول ليهم يا حاج ولا انت راجل كبير و لا يقوم ليهم علشان يقعدوا علي الكرسي مكانه
انا تعبت من حالتي محتاج ونيس و حبيبه و محتاج ست اشبع معاها احتياجاتي
محتاج طفل و اسره و احساس اني مش ناقص
احساسي ان عمري طار و انا زي ما انت و لسه في خانه الصفر مخليني نفسي اموت النهارده قبل بكره
حياتي ملهاش معني و كل حاجه حواليا بتفكرني بفشلي و احلامي اللي اتخبرت و صبحت سراب
كل يوم بيعدي بيقربني اكتر من سن ال 50 و بيقولي انت بقيت في الوقت بدل الضايع
الدنيا مش دنيتك خلاص و فرصتك خلصت و انك تبقي حاجه او تحس ا نك عملت اللي نفسك فيه لنفسك و لحياتك بقي خلاص درب من الخيال
شعوري بالكسوف من نفسي بيزيد و احساسي اني مش عارف ابقي عايش السن اللي انا فيه بيسبب ليها شعور بالذنب كبير
احساسي اني معيشتش و اني من جوه لسه صغيره لكن شعري دقني الابيض و الشعر الابيض الكتير اللي في راسي بيقولي يا ابني انت من اهل الكهف و لا ايه انت خلاص راحت عليك
انا حتي نصيبي في الشعر الابيض اكتر من اللي في سني هما عندهم شعرات بسيطه و انا شعري بيبقي ابيض اكتر من كل يوم عن اللي قبله و بيدي اشاره اني عجزت
حتي وشي تحسه بعيد عن عوامل السن باين عليه الحزن و الالم لاني ميت من جوه
انا فعلا مش عارف اعمل ايه و سيناريو حياتي اللي متكرر بقاله سنين و مش بيتغير موت روحي و طفاني من جوه
اللهم يا رحمن يا رحيم بحق رحمته و بحق كرمه يفك كربك و يرزقك عروسة تفرح قلبك و تسعد ايامك و ترد لروحك و قلبك شبابهم و تعوضك عن اللي فات و يرزقك منها الذرية الصالحة
ردحذفاللهم آمين
ربنا يخليك و لك مثله يا باشا
حذفانا حاسس انك بتحكي قصتنا
ردحذفمتخرج من كلية هندسية و قعدت كتير فشخ علي ما لقيت شغل.
وعيلتنا انطوائية جدا و منعرفش حد ولا لينا معارف ولا اي حاجه.
كده ناقصلي ايه و اعمل بصرة؟
و الله انا مش عارف انت عندك كام سنه علشان نقدر نقول هي بصره ولا لأ ولا لسه متجوزتش ولا ايه الحياه معاك بس هو اللي كنت حابب اوضحه اني مكنش في حاجه في حياتي سهله و جت عند الجواز و اتكعبلت لا انا فعلا مفيش حاجه سالكه في حياتي و مش عارف ده غضب من ربنا ولا ايه بالظبط
حذف