Dina ( الحلقة الثانيه من شخصيات)

س:من هي دينا؟
هي بنت كانت معايا في نفس الدفعه مكنش في بيني و بينها اي كلام و لا علاقه و لا معرفه و لا اي حاجه الا موقف حصل مره كانت هي و صاحبتها استغلوا و جودي انا و زملائي في الصلاه اثناء فتره الراحه بين المحاضرات و المحاضره كانت زاحمه فشالوا البلوك نوتز بتاعتنا و قعدوا في المكان بتاعنا :)
س: طيب و افتكرتها ليه ؟
كنت بقلب في الفيس بوك و لقيتها عند واحد من دفعتي لقيتها اتجوزت من كام شهر و بقت زي القمر
س: هي كانت وحشه ؟
لا بس كمان مكنتش حلوه كده
س: طيب مش فاهمك ايه مشكلتك انت؟
فكرتني بأيام زمان و قد ايه انا عجزت 7 سنين عدوا من غير ما اشوفها فجأه حسيت انها بتمثل كل ما كنت احلم بيه كل حاجه حلوه
فكرتني ازاي كاروا السبع سنين دول 2 في البيت و 5 شغل من غير تحقيق اي احلام فكرتني بأيام الدراسه اللي كنت بتمن اخلصها بأي شكل
حسيت قد ايه انها كانت غاليه و انها كانت زهره العمر علي رأي توفيق الحكيم راحت مني بسرعه كده
5 + 7 = 12 سنه ضاعوا 5 من احلي ايام العمر و 7 ضاعوا بعيد عن الناس الحلوه عن الزملاء و الصحاب اللي اختفوا و اللي اتشغلوا و اللي مبقوش فاكرين حد
افتكرت لما كانت بتيجي بعربيتها السكودا الفيليشيا البضا و تركنها و معاها صاحبتها الطويله رانيا افتكرت شعرها الناعم اللي لسه زي ما هو افتركت احساسي للحظات اول ما اشوفها ان هي مستواها المادي مرتفع ( موضوع المستوي المادي ده هنتكلم فيها بتوسع عن المستوي المادي لجيلي و الجيل اللي بعدي)
و بعدين شوفت جوزها معاها في الصوره شاب عادي لا حلو و لا وحش و هي بقت شكل تاني بعد الجواز
س: شكلك بتحبها؟
لا و عمري فكرت فيها بس زي ما قولت هي فكرتني بأيام حلوه قضتها تشبه قصه الايام دي هي خرجت من الايام دي للمرحله الثانيه مرحله الزوجه و الام علشان متندمش علي الفات و متقولش كانت احلي ايام و غيرها كثير من صحابي ولاد و بنات عملوا كده
لكن انا لم شوفتها اتحسرت علي الايام دي و اتحسرت علي حالي
ايامها مكنتش بتحس بالفراغ و مش بتحس انك وحيدو مش بتحس بالزهق مكنتش بتحس انك بتكبر و عمرك بيجري
مكنتش بتفتكر بكأبه عمر ال 30 و حلاوه يام العشرين ايوه دخلت انا في الكأبه فاضل اقل من 45 يوم و اكون 30 سنه و اودع احلي ايام العمر
و الله عمري اتسرق و الله العظيم ال 12 سنه دول اتسرقوا من حياتي
اول ما شفتها حسيت بكأبه غير طبيعيه معرفش ليه
فكرتني بأيام كانت مره بس حلوه قعدت اتفرج علي ال wall بتاعها لحد ايوم اللي عملت فيها اللأكونت علي الفيس بوك
سنه 2007 تقريبا في الوقت اللي انا عملته فيه مش عارف ايه اللي خلاني اعمل كده مش عارف ايه اللي خلاني اكتئب كده لما اشوفها
مش عارف لو رجعت تاني ايام الكليه كنت هعمل ايه كنت هكلمها اكيد لا مكنتش بتمثل ليا اي حاجه و لا فكرت فيها لحظه بس دلوقت الموضوع مختلف
هي اصبحت بتمثل الحلم الضائع الحلم الحلو الجميل اللي متعرفش مقدار حلاوته الا لما ميحصلش الا لما توصل 30 سنه و ما ميتحققش تشوف اد ايه جميل اد ايه كان هيسعدك و كل ما يبعد تشوفه احلي و اجمل
كم افتقد ايام المحاضرات و ايام السهر كم افتقد شكل المدرج و شكل غرفه السكشن كم افتقد غلاسه المعيدين و الدكاتره كم افتقد ضحكات الصبايا و الصبيان ايوه كنا صبايا و صبيان دلوقت اصبحنا رجال و كثيرا منهم اصبح اباء و امهات
العمر جري و اللي عدا بعد الدراسه( 7 سنين) اكثر من اللي قضيته فيه(ا 5 سنين) و رغم ذلك مازالت احس بالحنين لهذه الايام اللي جوايا مش عارف اترجمه لكلام مشاعر متناقضه او احاسيس غريبه لكن في الاخر كلها احاسيس حزينه
نصيحه لكل واحد في الكليه استمتع بكل دقيقه بكل ثانيه فيها دي احلي ايام دي زهره عمرك هتبكي عليها بقيه عمرك من الاخر رغم انها نسبتها ممكن متزدش عن 10 % من السنين اللي هتعيشها لحد ما يجيلك الموت لكن دي احلي ايام و الله احلي ايام
احلي ايام العمر
و اهــــــــــــــــــــــــــــــــــــــــــــــه يا افه