132

ال 132 عربيه مشهوره جدا في وطنا  بتمثل اخر موديل من موديلات فيات اللي نزلت بأرقام زي 127 , 128 و كده  و برضه بتمثل ليا اخر محاوله لملاحقه الحلم بتاع الناس الطبيعين اللي يلحقوا يبدؤا حياه طبيعيه في العشرينات او اول الثلاثينات علي اخر تقدير
بعد ايام معدوده هيبقي عندي 32 سنه بالتمام و الكمال و هو عمر غريب عجيب رهيب ليه
لأنه عمر ملهوش ملامح سنه زي اي سنه المفروض تبقي ايام بتقضيها لبلوغ هدف يعني بتشتغل فيها لتبلغ الهدف 
انما بالنسبه ليا مفيش هدف و لا مني للحياه غير رقم اتضاف لعمري اللي بقيت بتكسف منه
علشان كل واحد يشوفك يقولك هتتجوز امتي مش يالا بقي ايه يا بني انت مش عايز تتجوز ليه 
لو في حد متابع المدونه هيفتكر اني من  4 سنين لما بدئتها كتبت عن ال 128 و ان ازاي المفروض الواحد مطلوب منه انه يحقق كل احلامه في خلال اول 5 سنين من التخرج و اللي ضاع منهم سنتين في البيت ب النسبه ليا 
دلوقت الخمس سنين الثانيه اوشكت علي الانتهاء و انا محلك سر بنفس الكلام و نفس الوضع و نفس الظروف الوحشه اللي بتسوء يوم عن يوم
بعد ال 132 هكون اتخرجت تقريبا من 10 سنين و  هكون المفروض قطعت تقريبا نص عمري اللي المفروض اكون فيها بقيت حاجه
يعني اللي مش بيتجوز بيعيش حياه بوهيميه او بيدي وقته للشغل او بيشتغل في مكان بيكون وصل فيه للقمه لأنه مديه كل وقته و اهتمامه ما مفيش اسره بقي و ده طبعا مش انا 
انا لسه في القاع و شغال في مكان مينفعش اطلع فيه و اعلي
و المتجوز بيكون عمل اسره و اطفال عايش ليهم و علشانهم و سعيد بيهم رغم منغصات الحياه برضه طبعا مش انا
انا لسه زي ما انا
ده حته المدونه  اللي عملتها محدش بيعبرها رغم اني عملتها في الاول و  انا متخيل اني بعد سنتين بالكتير هكون بقيت في حال افضل و هكتب و اتريق هنا علي اللي كتبته زمان و لكن هيهات
يبدو ان الدنيا مقسمنا ناس بتتأخر في كل حاجه و ناس بتعمل كل حاجه بدري شغل جواز اطفال مناصب....... الخ
ساعات بحس ان نظريه الواحد الصحيح دي في الاخره مش في الدنيا ( ان كل واحد اكيد نقصه حاجه )
عموما انا عايز اتكلم في شويه سياسه اتكلم عن شعور بدئت افكر فيه هو هل انا حقا اريد الزواج و الاستقرار ولا انا عايز اتجوز علشان مفيش حاجه تانيه اعملها
برضه عايز اتكلم عن الغربه و  Il Divo  هتقولي ايه علاقه الغلابه بيهم هقولك هتعرف لما احكيلك 
برضه عايز اتكلم عن بعض الناس اللي صادفتهم في حياتي و سافروا بره مصر و بقوا دكاتره و ازاي هما بيتصرفوا 
برضه عايز اتكلم عن تجارب جواز صالونات فاشله و ترجع لظروفي الماديه اللي خلتها فاشله بس اطمنوا لا خطبت و لا اتجوزت كلها محاولات بأت بالفشل من اول مقابله
عموما انا بتمني لكل انسان حظ احسن مني و انه ميوصلش ال 132 الا و هو محقق ما يتناسب مع هذا العمر
و اخيرا  اةةةةةةةةةةةةةةةةةةةةة يا افه

البيض بوك

اولا كل عام و انتم بخير عام اخر مر بقرفه و زهقه و كأبته و لا جديده السنه زي السنه و اليوم زي اليوم و الشهر زي الشهر
ربنا مش بيتوب علي الواحد ابدا الامل في بكره انعدم للأسف
موضوع النهارده كنت عايز اتكلم عليه من زمان ايه هو هو طبعا البيض بوك او الفيس بوك زي ما بنسميه
اللي هو عباره عن مكان مساعد علي الاكتئاب يعني تدخل تلاقي فلان كل شويه يكتب كومنت و تلاقي مليون واحد يردوا عليه و انت و لا حد يعبرك فلان كل شويه مسافر في حته شكل و ضفحته ملاينه صوره في الاماكن اللي بيروحه و هو بيبتسم في بلاهه و سعاده
فلان عمال يترقي كل شويه و فلان في منتهي السعاده مع مراته و عمالين يحبوا في بعض علي الفيس بوك
و فلان عياله دخله المدرسه و فلان ربنا رزقه بعيله الرابع
تفتح الفيس بوك او البيض بوك تلاقي كل ده قدامك و تحس انه بيتباض عليك تحس انه بيفكرك بفشلك و عجزك انك تكون زي الناس دي او تححق حتي جزء صغير من اللي عملوه
لا حد بيعبرك و بيعمل تعليق علي اللي بتكتبه معندش صور الا جنب البحر في اسكندريه و لا جنب القناطر الخيريه علشان تحطها
معندكش لا ترقيات و لا زوجه و لا اولاد تتفشخر بيهم 
بمجرد انك تفتحه 5 دقايق بالظبط يجيب اكتئاب يكفي سنه
انا فين من الناس دي 
و يجيي عمر الثلاثين و يعدي بسنه او سنه و نص زي حالاتي ساعتها يتحول الفيس بوك الي بعبع
بقيت منتهي الصلاحيه يا مان انت حاجه لم يتم استهلاكها في وقتها الصح
يعني لا عملت اسره و لا عارف تعمل
و لا ليك نجاحات
و صحابك كلهم اختفوا و سابوك ما انت مختلف 
و بقيت متأخر عن السن الطبيعي للزواج و الابوه و النجاح
انت من اللي حظهم قليل في الدنيا و دي كلمه تطلق علي من لم يكن له في متاع الدنيا نصيب
انت لا شئ
ده اللي بيفكرني بيه الفيس بوك لما افتحه
زائد لما حد يفتكرني و يعبرني
بيكون تعبير من نوع التريقه
بقي ده اللي كنا بنقول هيوصل
بقي ده الي كنا متوقعين ليه مستقبل باهر
ده بقي اخر اللسته
ده محدش بيحاول يفكر يسأل هو بقي فين دلوقت
لأنه تحت اوي
خارجه مجال المنافسه و المقارنه
تلاقي واحد كل كام شهر يقولك متتجوز بقي 
و لا متشوفلك شغلانه تانيه
ده الناس شبعت غنايم و انت يا خايب نايم
المهم  الجود نيوز بقي
ان ابيض بوك ده اكبر فطشه في العالم 
يعني من الاخر كل واحد من الناس دي عنده اللي قرفه و مطلع عينه و حياته مش ورديه زي ما هو بيمثلها علي الفيس بوك
من الاخر محدش بيشارك الاوقات المقرفه في حياته
بيشارك الاوقات الحلوه بس
و الوحش بيشيله و يخبيه
علشان كده تلاقي الناس اللي في فيس بوك دايما سعداء
لأن اوقات التعاسه مش بيكتبوا عنها
و اللي بيعمل تعليق علي حاجات بيعملها من منطلق قدم السبت علشان ترد انت عليه لما كمان هو يكتب حاجه
من الاخر الفيس بوك كدبه كبيره
لكن اللي يغيظك
ان رغم كل ده في ناس ليها اوقات سعيده و اوقات وحشه
اشمعنا انا كل اوقاتي وحشه
و اةةةةةةةةةةةةةةةة يا افه

احلام صغيره

انا لما اكبر هسكن في قصر كبير و يبقي عندي جنينه كبيره غير اني هبقي ارجل اعمال ناجح جدا و الفلوس هتبقي معايا كتير و يبقي عندي كده 3 او 4 عربيات مرسيدس علي فيراري و بي ام دبليو و طبعا البنات الحلويين كلها هتجري وريا و اختار احلي واحده في البلد علشان تبقي مراتي و الناس كلها تحسدني علي اللي انا فيه ما انا وسيم جدا و شعري ولا شعر ليوناردو دي كابريو
و كمان هزور كل بلاد العالم انا و مراتي و نتفسح و نشتري كل اللي عايزينه و عيالي هيتعلموا في بريطانيا بدل التعليم الزباله اللي هنا
اللي فات ده كان احلام طفل معظم الاطفال بيحلموا كده و متوقعين ان ده اللي هيحصل
مع الوقت يبدء الحلو يقل شويه شويه مع الوقت يبدء الشعر يقل شويه شويه لحد ما يروح و ميبقاش في وسامه تجري وراه البنات علشانها مع الوقت مفيش فلوس كتير بتيجي و لا عربيات و قصور و اكبر سفريه ممكن يسافرها هي انه يروح يصيف في العين السخنه و ساعتها يعمل اعلان في كل حته و يتباهي بالسفريه دي
احلامنا عبيطه جدا دايما بنحلم باللي عند ناس بيمثلوا نسبه 1 علي 1000 من باقي المجتمع و بالتالي بتصيبنا الكأبه بسرعه فلا احنا عارفين نحقق احلامنا و لا احنا عارفين نحقق جزء منها
بيصدمنا الواقع اللي مش بيدينا فرصه ان نلاقي شغل او وظيفه و نقعد في البيت مستنين في طابور البطاله الطويل
و لما بنشتغل بنلاقي ان علشان نجيب حجره و صاله عايزين 10 سنين من الادخار و بعدها تيجي العروسه اللي هي لا اموره و لا احلي بنت و لا بنت الباشا و متعجبهاش الحجره و الصاله و تقولك من حقي اسكن في حي راقس و اسكن في شفه واسعه رغم انها ممكن تكون ساكنه في وضع اسوء من اللي انت موفره
لما الوقت بيعدي و شكلك بيتيغير و شعرك بيروح ( مش كل الناس بيحصلها كده طبعا ) غالبا بتاخد واحده مش حلوه اوي و ممكن متكنش حلوه خالص ما انت لا مال و لا جمال و لا سكن عدل فغالبا بتختار واحده عايز الستر و السلام و انت في اعتبارها ضل راجل و لا ظل حيطه مش انت حلمها و لا انت املها انت مجرد علاج مضاد للعنوسه بالنسبه ليها
غالبا بتختاروا بعض غصب لا هي عجباك و لا انت عاجبها انت اختارتها علشان هترضي بظروفك اللي متخليش بنت من اللي انت بتحلهم بيهم تختارك و هي بتختارك علشان مفيش عرسان كتير و من الاخر انت احسن حاجه ممكن تجيلها
ما البنت الحلوه بيجيلها عرسان كتير و خصوصا لو الحلاوه دي جنبها دين و اخلاق و يا سلام لو بنت ناس مستريحه اتفرج علي كميه العرسان اللي هتجيلها
ما طبيعي ( مال و جمال و دين و اخلاق) تيجي انت بقي تتقدم و انت معندكش حاجه مميزه مش وسيم و ممكن تكون اقرع ( مع الاعتذار للصلع اللي انا شايف ده مش عيب عندهم بس و الله في ناس بتترفض علشان صلع) و السكن اللي عايز تسكنها فيه يعتبر عشه فراخ جنب اللي هي عايزه تقبل بيك ليه بقي و ممكن يتقدم ليها شاب لسه متخرج مش معدي ال 30 زيك بس الشاب ده ابوه جابله كل حاجه العربيه و الشقه الفخمه و دفعله المهر و العفش الشيك و كله تمام مقعدش سنين زيك يحوش علشان يجيب حجره و صاله و معداش عمره علي الفاضي يبقي لما تقارب بينك و بينه
شاب في اوائل العشرينات لواحد في الثلاثينات
شقه فخمه في ارقي مكان لحجره و صاله في مكان علي قد الحال
العربيه بتاعته قصاد الميكروباص اللي بتركبه
وسامته اللي هتكون موجوده حتي لو ملامحه مش جميله لكن بسبب سنه الصغير لشكلك اللي بان عاليه الكبر و السن و غيره
هي دي المعادله الغريبه اللي موجوده و عمر الوقت ما هيحلها هو بمساعده والده وفر عمره و سنين حياته و اختار البنت اللي انت بتتمني واحده زيها اما انت بعمرك يا دوب تختار اي واحده و السلام ترضي بظروفك
مأساه مش كده
هي دي الدنيا يا شباب احلام كبيره في سن صغيره و بمجرد ما تكبر تكتشف انك مش من المفروض تحلم كده
كان المفروض لما تحلم تشوف ابوك ظروفه ايه غني و لا فقير و هيساعدك بكام و مستعد يعملك ايه
انسي خالص انك تعمل حاجه لنفسك الا لو مخطط انك تتجوز علي ال 50 ساعتها في احتمالات قويه انك تقدر تنافس الشاب اللي وصفتهولك بس تبقي وريني مين البنت اللي هترضي ترتبط بيك

و اةةةةةةةةة يا افه

IL DIVO Reflections (2) : Falling Slowly

 Another Great Reflections From IL DIVO

 Te Prometo

Falling Slowly

IL DIVO Reflections Dove l'amore

Dove L'amore

adagio to strings

I love Il Divo when i listen to their songs i feel that i live in a different place maybe in europe where i would like to live and work they are great they use the good oldies to make a new master pieces here we i write about one of this great songs Dove L'amore which is a reproduction for samuel barber adagio to strings

131

بعد غيبه حوالي 3 شهور عدنا بأخر الأخبار و هي لا جديد :)
الجديد ان بعد 3 شهور و نصف سوف اكمل عامي ال 31 و احب بهذه المناسبه اني اقول اني اللي يضحك عليك و يقولك الناس بتكتشف نفسها بعد ال 30 و انا الحياه احلي بعد ال 30 و الكلام ده كله احب اقول ان كل ده اونطه و هجص
بعد ال 30 هتحس بالضياع خصوصا لو لسه مكونتش اسره كل الناس بتنظر لك نظرات مريبه " ايه حكايته الواد ده متجوزش ليه طيب مش مرتبط ليه لحسن يكون ........ استغفر الله العظيم ده مش باين عليه خالص" ده بالنسبه لنظره الناس من الناحيه الاسريه و لنظرتهم من النواحي الاخره فهي انك كبرت علي كل حاجه كبرت انك تلعب تتفسح تهزر يعني المفروض تدفن نفسك و تلاقي تعليق يحرق دمك من نوع ايه اللي انت بتعمله ده ده انت اللي قدك عيالهم في المدرسه دلوقت
و تبدء تلاقي الناس بتعاملك علي انك كبرت اوي مبقتش شاب مبقاش من حقك اي حاجه
ده بالنسبه لكلام الناس اما بالنسبه لكلام لأحساسك الشخصي فهو احساس زي الزفت و الاحساس ده بنقسم الي عده انواع
اولا:- اذا كنت اعزب
فأحساسك ساعتها انك ضايع ملكش هدف و انك اتأخرت في الجواز احساسك انك مش هتتقبل بسهوله من اي عروسه احساك ان زمايلك و صحابك سبقوك بمراحل و انك علي احسن الظروف هتطلع معاش و ابنك بيخلص دراسته ده لو اتجوزت و انك عمرك ما هتلعب معاه و لا تفهمه
ثانيا:- اذا كنت متزوج
لو خلفت هتحس انك ضيعت ايام المرح و الشباب و اتجوزت بدري و تقول يا بخت فلان و علان اللي لسه متجوزش عاشوا حياتهم صح " ايوه ما انت متعرفش الحقيقه و اللي هما حاسينه" هتحس انك عجزت و شلت الهم و بقي وراك مسؤليات و بابا و ماما لكن في الاخر انت قدام المجتمع شخص مثالي ماشي علي الخطه التمام اتجوزت قبل ال 30 و خلفت و ده يدل علي انك راجل محترم مش فلاتي يعني في ميزه ممكن تحسبها بينك و بين نفسك اني راجل ماشي علي الخطه
ثالثا:- اذا كنت في وظيفه مش عجباك
هتحس ان القطر فاتك و ان بقي صعب التغيير من هيخدني و انا عندي 30 سنه و تحس ان الناس سبقتك خصوصا لو صحابك شغالين في اماكن محترمه و بيخدوا مرتبات محترمه مثلا واحد شغال في شركه بتسفره كتير بره و بتيدله عربيه و مرتب كبير و انت شغال في شركه نص نص و مرتبك علي قدك مش عارف تعمل فيه حاجه هتحس انك نص عمرك ضاع و انت مش عايز النص التاني يضيع
ده الشكل العام لكن بالنسبه لأحساسي فهو اني فيا حاجه غلط اه و الله اصل الناس حواليا عيال صغيره 24 سنه بتتجوز و حياتها بتتحسن و انا زي ما انا لا تقدم في الحاله العائليه و لا العمليه و لا الوظيفيه بل بقي في تأخر في الحاله الوظيفيه ده
انا حاسس انا بقي امر معترف بيه انا الأب بيجوز ابنه و هو صغير و يجبله شقته و كل حاجه كل اللي معايا في الشغل كده حالهم كده و كله يقولك ابويا اتفق مع الناس و قالهم انا متكفل بكل حاجه و الولد مش فارقه معاه هو ايه هيزعله موضوع العصاميه و اجيب بدراعي و الكلام ده كله راح و مبقاش موجود
احساسي بالضياع بيمتد لأبعد من ذلك انا كرهت بكره اللي شبه النهارده لأني مش حابب حياتي و عارف انها ماشيه علي نفس الشكل كل يوم زي اللي قبله
بقي بكره ملهوش لازهه و مفيهوش امل
ايه يعني اللي متوقعه اتجوز في خلال سنتين او ثلاثه الاقي وظيفه احسن برضه انا متأخر و مش كسبان الحاجه لاما متجيش في وقتها ميبيقاش ليها طعم و لا ليها فرحه صدقوني بتحس انها تحصيل حاصل
في بعض الاحيان بيبقي جزء من فرحتك بترقيه او بعروسه او بشغلانه انها تيجي في وقتها او قبل وقتها علشان تحس بنفسك وسط تعجب الناس و انبهارهم بحدوثها لكن لما تيجي متأخره هتلاقي كله يقولك امم عادي ما متوقعه دي المفروض كان حصل من زمان
جوايا كلام كتير عايز اقوله و كذا مره حاولت اجي اكتب بس كنت بهرب
اللي خلاني اكتب هو اني قررت ان المكان ده يبقي زي مدونه تاريخيه لحياتي علشان لو نسيت في يوم من الايام اي اللي حصل او ازاي كان شعوري في فتره من فترات حياتي ارجع و اشوف
انا حاسس اني بقيت 50 او 60 سنه خلاص و لم اتأقلم مع بلوغي سن الثلاثين
السنه عدت بسرعه و الايام عماله تجري و حياتي من سيئ لأسوء
نفسي اسيب مصر نفسي اعيش في بلد تاني كفايه ضياع عمر في البلد دي
نفسي اعيش في اوروبا زي walad shab بتاع egyptoz رغم انه في حاجات كتير بيني و بينه مشتركه لدرجه اني ساعات بحس انه انا و اعتقد ان فرق السن بينه و بينه سنتين مثلا هو كمان عدا ال 30 هو كمان مكتئب بس هو راح عاش في بلد نظيف وسط ناس نظيفه
ان شاء الله بقيه عمره اللي جاي هيكون احسن في مكان يشعر فيه اني بني ادم
في مكان محدش بيتريق عليه علشان مش متجوز و لا معندهوش عيال و لا مش شغال في شركه محترمه و لا معندهوش عربيه
في مكان يقدر يعمل فيه اصحاب في اي عمر و اي وقت مش يبقي في عزله زي اللي انا فيها انا مش لاقي حد مش لاقي صحاب
اللي معايا في الشغل يا اما اصغر مني بكثير يا اما اكبر مني بكتير و صحابي كلهم يا مسافرين يا مش عايزين يخرجوا من غير زوجاتهم و بالتالي مينفعش يخرجوا معايا لأني اعزب
كفايه اقرف اللي بيقرا اكتر من كده
و اه يـــــــــــــــــــــــا افـــــــــــــــــــه

كلاكيت ثالث مره ( Deja Vu )

و كالعاده من اكثر من 5 سنين بالنسبة لحياتي و 3 سنين بالنسبه للبلوج تيجي نهاية السنة القديمه و يدايه السنه الجديده و يبقي الحال علي ما هو عليه لا تطور و لا تقدم و لا تخطيط و لا قدرة علي التخطيط لأسباب خارجه عن ارادتي و لكن تبقي المراره و الحسرة لنبدء بها العام الجديد مع توقع ان ينتهي مثل الاعوام اللي قبله
و لكن للأمانه في 2011 الوضع اصبح اسوء و المصائب اصبحت اكثر و الأمل اصبح منعدم
سنة انتهت بفشل كبير في العمل يعني بقيت فاشل في الحياة الاجتماعيه و العملية الله اكبر و برضه سبب الفشل ده مش انا سببة ظروف و ناس تانيه و قررت الناس دي تحميله لي لينسب لي ابد الدهر
الغريبه اني لما عملت البلوج مكنتش متوقع كده كنت متوقع انه الدنيا هتتغير و ساعتها هخلي البلوج دعوه للتفاؤل و تجديد الأمل
لكن يبدو ان البلوج كان حاسس انه فقري و مش هيتغير حاجه بالعكس اللي هيحصل اني هرجع لورا مش هثبت مكاني علي الأقل
كل عام و انتم بخير ده لو في حد بيقرا الكلام ده
يا رب ما حد فيكم يبقي قفا و لا يحصله اللي حصلي و لا يوصل لحالة الاكتئاب و الألم اللي عندي
و اةةةةةةةةةةةةةةةة يـــــــــــــــــــــــــــــــــا افــــــــــــــه