قضبان الحياه

 

من كام يوم قعدت افكر في حياتي بشكل خاص و حياه الانسان بشكل عام لقيت ان الواحد غالبا بتنتهي ايامه الحلوه بانتهاء الدراسه 

في الفتره ده بتبقي انت عايش علشان نفسك و ناس تانيه اللي هي ابوك و امك عايشين علشانك تعبانين علشان انت ترتاح جعانين علشان انت تشبع حارمين نفسهم من حاجات علشان يجيبوا لك اللي نفسك فيه و انت كل اللي بتعمله انك تطلب و بس

اه في قلق الدراسه و قلق الامتحانات و النتيجه و الزهق من المدرسه بس في الاخر انت كل ما تتمناه و هما يقدروا عليه بيعملوه 

تيجي بقي تتخرج تلاقي نفسك بتجري علشان تتجوز و علشان تخلف و علشان تعمل نفس الدوره السابقه اللي اتعملت معاك

قطر كل الناس ماشيه عليه و سعيده بيه انك تعيش ثلث عمرك لنفسك و باقي عمرك او الثلثين لعيالك 

لما بتبقي عندك اسره بتجيب الحاجه اللي يحبوها سواء انت بتحبها و لا لأ بتروح ا لاماكن اللي تعجبهم بتاكل الاكل اللي هما بيحبوه و هكذا

كل الناس ماشيه علي نفس القضبان زي القطر الا لو حد عنده مرض نفسي و كان اناني و مش عامل لاولاده و بيته اي اعتبار

طيب حتي لو انت متجوزتش زي حالاتي فانت بيبقي كل هدفك انك تجري ورا القطر و تحاول تحصل له علشان تمشي نفس المشوار

مش هنكر ان وجود زوجه بيبسطك نفسيا و جنسيا و جسديا و حاجات تانيه كتير بس برضه كل ده مش بيبقي هو الهدف الاساسي بمجرد ما يبقي عندك عيال و مسؤل عنهم

اسوء ما في الموضوع لما الناس تتكلم معاك و تفتكرك بحكم سنك في محطه معينه و يلاقوك لسه واقف في محطه مصر او محطه رمسيس

قطرك مطلعش اصلا رغم انك واقف بقالك كتير لا اتقدمت لقدام و لا مشيت علي الجدول الزمني المفروض

ده غير كلام  الناس اللي بيوجع و الله اعلم قاصدين ولا لا

زي يا ابني انت كبرت يا ابني فاتك الفطر

و غير كمان شعورك انت لما تلاقي صحابك اولادهم في ثانيه اعدادي و انت اصلا ابنك ده في علم الغيب ده لو جه

من كام شهر في انسانه محترمه كتبت لي تعليق عن ان عدم  الجواز ده مش معناه انك ناقص لا ده في ناس حياتها وحشه في الجواز و ناس عيالها مطلعين عنيها و الي اخره

انا طبعا متفق معاها بس المشكله ان الوجه التاني للزواج هو العزوبيه و دي هي الولا حاجه

لا حياه و لا هدف ثور مربوط في ساقيه بيروح الشغل و بيرجع ينام و من غير اي هدف و لا انتظار لحاجه

كل الناس اللي بتمشي علي القضيب بتاع القطر حتي و هما اطفال ماشين علي اهداف

انا عايز انجح انا عايز اتخرج انا عايز اشتغل انا عايز اتجوز و اجهز نفسي انا عايز اجيب عيال انا عايز اربيهم انا عايز اشوف ولادهم

و بكده يقولك رسالتي انتهت و يموت بعدها

تيجي تقولي يعني انت عايش علشان توصل للموت

اقولك كلنا عايشين كده عايشين علشان نموت في الاخر مهما نعمل

بس الاهداف دي اللي بتصبرنا علي قرف الحياه 

لان واحد زيي مثلا بقالي فوق ال 5 سنين مش قارق معيا اموت و لا لأ

خلاص مبقاش ليا نفس في حاجه ولا عايز اعيش علشان حاجه 

لاني فقدت الامل في اني اتجوز و اعف نفسي و يبقي كمان عندي اسره احس معاه بالونس و الحياه

عايش مستني اني افقد ابي و امي لما يجي وقتهم و اعيش وحيد في الدنيا

يبقي ايه لازمه العيشه بقي

ربنا يهونها علينا و يخرجنا منها علي خير

و اةةةةةةةة يا افه

نظريه الواحد الصحيح 2

 

من كام يوم لقيت البوست ده

و الغريبه سبحان الله انه بيتكلم عن حاجه اتكلمت عنها من كام سنه عن عدم اقتناعي بنظريه الواحد الصحيح و ان اللي عند غيرك و ناقصك في قصاده حاجه عندك و ناقصاه هو كمان

تحس ان في فتره من الفترات في شيخ كان نايم و طلع بخطه عبقريه لاجابه سؤال البشريه بتاع هو انا ليه مش متجوز و لا انا ليه مش مخلف و لا انا ليه فقير

و بما انه معندهوش اجابه مقنعه او عنده اجابه ممكن تخلي الشخص اللي قدامه يبقي ناقم علي حياته و قدر ربنا اللي كتبهوله فيها

فطلع بالفكره اللولبيه بتاع ال 24 قيراط و الواحد الصحيح اللي اصلا لما تسمعها  كرد علي سؤالك اشمعني انا ناقصني كذا تحس انك متضايق اكتر 

ربنا يكرمك يا شيخ عمرو شاهين و يكتر من امثالك اللي مش بتستسهل و بتواجه الناس بالواقع و زي ما ربنا قال فمن شاء فليؤمن و من شاء فليكفر  واضحه و صريحه انا اللي خلقتكم و انا  مقدر مقدارتكم 

و اه يا افه

رجل في ال 40

بعد شهرين بالظبط هتم ال 40 سنه و هبدء امشي نحو الخمسين يعني هبقي في العقد الخامس من العمر و ده مخلي شعوري في منتهي الكأبه حاسس اني عجزت فجأه كده معرفش ازاي وصلت العمر ده معرفش ازاي السنين و الايام جريت كده و لقيت نفسي راجل عنده 40 سنه من اللي كنت زمان بقول عليهم ده راجل كبير عنده 40 سنه مش عارف الكأبه و الاحباط اللي جوايا جايين منين من اني بقيت في السن ده و عمري اتسرق مني و عجزت فجأه ولا من اني وصلت العمر ده و محققتش اي حاجه من اللي بتمناها ولا لاني وصلت العمر ده و حتي محققتش العادي اللي هو مركز وظيفي يتناسب مع عمري و بيت و اسره و اطفال و استقرار اسري و لا خليط من كل اللي فوق

 العجز ده شعور وحش قوي سواء عجز الي نقصد بيه كبر السن او العجز اللي نقصد بيه قله الحيله لما ببدء افتكر حياتي كانت ماشيه ازاي ال 40 سنه اللي فاتت بحس اد ايه هي ضاعت مني علي الفاضي بدايه من يوم ما دخلت المدرسه اللي كنت فيها طالب مجتهد و بيذاكر دروسه و يعتبر من الشطار اه مش الاول بس ممكن ابقي الرابع او الخامس بالكتير في الصيف كنت ببقي قاعد في بيتنا مش بخرج مع صحابي ولا بروح ليهم بيوتهم لخوف والدي عليا و كان يقولي اللي عايز يجيلك من صحابك يجيلك هنا اهلا بيه لكن انت تروح لهم و كنا نروح كل سنه نصيف في مطروح في الصيف و في الشتا ممكن نطلع رحله او اثنين نتفسح والدي مكنش بيقصر و بيعمل اللي يقدر عليه في انه يفسحنا 

الروتين الاسبوعي الوحيد كان اننا بنروح لجدتي ( والده ماما )كل يوم خميس بعد المدرسه و نروح من عندها بالليل اما والده بابا فكانت عايشه معانا طول عمرنا لحد ما توفها ربنا فضل الوضع ده مستمر و سنه تعدي ورا سنه و نكبر و ننجح لحد ما و انا في ثالثه ثانوي جدتي لابويا توفت و مبقتش موجوده معانا بعد ما كانت عايشه معانا 17 سنه

 بعدها دخلت الكليه و فضل نفس النظام برضه اني مش بخرج مع صحابي بس مش بسبب اني ممنوع عليا لا بسبب اني مش ساكن قريب من وسط البلد فنزولي كان صعب و استمر السفر الي المصيف و زاد عليه اننا بدل ما روحنا مطروح روحنا في صيف سنه اولي كليه شرم الشيخ و ثانيه و ثالثه الغردقه بجانب مطروح و حصل و انا في ثانيه كليه ان جدتي لامي توفت و هنا بقيت مليش جدود لاول مره في حياتي لان الاجداد الذكور توفوا قبل ولادتي بسنين طويله يعني ابويا و امي يعتبروا ايتام الاب

 في خلال ما كنت في الكليه لا عمري رحت رحله تبع الكليه و لا معسكر كشافه ولا اشتركت في انشطه طلابيه و لا رحت مصيف باجوش و لا رحله سيوه و لا حتي عملت زي بعض صحابي اللي طلعوا فيزا امريكا و سافروا اشتغلوا شهور الصيف هناك خلال كل مراحل التعليم كنت بفقد اصدقائي نتيجه انهم بيسيبوا المدرسه و في الثانوي كلنا رحنا مدارس مختلفه و في الجامعه جامعات مختلفه في الجمعه كنت مصاحب شويه ناس محترمين مكنش فيهم شخصيه غريبه غير عبده العبقري و ده اتكلمت عنه في بدايات المدونه هنا بس كنا كلنا مصروفنا محدود و مفيش فسح و لا خروجات كبيره و لا حتي سينما اه انا دخلت السينما كذا مره بس عن طريق والدي و مكنش ليها علاقه بمصروفي اللي يادوب كان بيكفيني مواصلات و فطار لكن الورق و الكتب كان حسابهم بره المصروف ده 

و خلصت الجامعه و بعدها قعدت سنتين في بيتنا مش لاقي شغل و مش لاقي حاجه اعملها و لا واسطه تشغلني و كانت نفسيتي زي الزفت في الوقت ده بدأت احفظ قرأن و اتعلم تجويد و لما وصلت للجزء السابع عملت امتحان في شركه كنت اتمني اشتغل فيها و للاسف رفضوني وقتها تقريبا قعدت شهر مش بروح درس التحفيظ كما لو اني بقول ما هو مفادنيش في حاجه و اللي مش بيحفظوا ولا بيتعلموا تجويد اتعينوا عادي بعدها رجعت تاني اكمل حفظ

 و ربنا كرمني باول شغلانه و اشتغلت في شهر مايو 2006 يعني تقريبا من 15 سنه و كان عمري وقتها 25 سنه بس زي ما ذكرت كنت في الصحرا و بعيد عن بيتنا و قضيت في الوظيفه دي قرابه السنه و بعدين رجعت اشتغلت في مدينتي الاصليه في شغلانه اي كلام و بعدين اشتغلت في الشركه اللي كانت رفضتني زمان في اوائل 2008 يعني كنت بقيت 27 سنه كان عليا ضغط كبير و معامله سيئه من رؤسائي اللي شافوا ان الشركه غلطت انها عينتني بعد رفضها ليا لاول مره و قضيت الايام دي مش بروح تقريبا سهر بالساعات الطويله شغل بالهبل كل ده علشان اثبت جدارتي و اني استحق و هما كانوا عارفين كده و كانوا بيستغلوها علشان يشغلوني اكتر و يعملوا قدامي انهم لسه مش مقتنعين بيا في خلال هذه الفتره 

و في سنه 2009 بدأت المدونه دي لما لقيت زمايلي بدؤا يتجوزوا و يبقي ليهم بيوت و يخطبوا و انا لسه معيش الا بتاع 18 الف جنيه ميكملوش حتي مقدم شقه و والدي ميقدرش يساعدني زي ما حصل مثلا مع عبده العبقري اللي والده جابله واسطه للشغل اول ما اتخرج و بعدين جابله شقه و بعدين جوزه كل ده و انا بعيد كل البعد عن اني اعمل ربع اللي عمله و كان هو ايامها يحب يستمتع انه يكلمني كل فتره يطلع علي عقده و يوريني اد ايه هو ناجح و عامل انجازات في الحياه و انا زي ما انا بتمر السنين و اوصل لسن ال 30 فجأه و انا مش حاسس و مربوط في ساقيه زي الحمار الاقي 5 سنين من عمري جروا و لا الهوا و لا عملت فيهم حاجه و بقيت علي اعتاب اني راجل متأخر في الجواز بمقاييس وقتها و معنديش شقه ولا قادر علي الجواز و كانت والدتي رافضه وقتها رفض بات ان حد يرشح ليا عروسه علي اساس هيتجوز منين و فين و ازاي ( و ده في رأيي كان غلط لان في ناس كتير كانت زيي و لما بدأت في خطوات الجواز ربنا كرمها ) 

نبقي كده عدينا 30 سنه من العمر لا حسينا و استمتعنا بيهم الا خروجه كل كام شهر علي كافيه مع الزملاء بعد ما الواحد اشتغل لان قبلها كان صعب انزل معاهم و هما بيروحوا كوستا و ستار باكس و غيره و انا مصروفي الشهري و انا عاطل مكنش يجيب نص مشروب في الاماكن دي فكنت طبعا مش بشوفهم و لا بقعد معاهم برضه في خلال الفتره دي بدأ اغلبهم يسافر بره علشان يعمل قرشين لعياله الصغيرين و لمراته اللي لسه متجوزها حديثا و برضه نتيجه ضغط الشغل توقفت عن خفظ القرأن و مراجعته في نص الجزء الرابع عشر و ان رايح علي الثلاثين كنت عمال اندب حظي اني وصلت ال 30 و لا بيت و لا جواز و لا شقه و ده هيبان من بوستاني في المدونه اللي انا كنت عاملها اصلا علي اساس انها فتره و تعدي و بعد كده المدونه دي هتبقي كده حاجه اضحك عليها لما الامور تتعدل

 و طبعا في خلال الفتره دي الواحد بيبقي مستني بدايه السنه علشان يبقي وشها حلو عليه شهر رمضان العيد اهو اي مناسبه زي ما ثقافتنا بتحسسنا ان السنه الجايه هتبقي مختلفه فتلاقي الشخص بيعيد عليك و يقولك عيد سعيد و السنه الجايه تبقي في بيتك مع العروسه و تعيش انت تتمني الايام تجري علشان السنه الجايه تيجي و تبقي مع العروسه

 المهم في اول 2011 يجي مديري يمشي من الشركه و يحطوني مكانه وسط ناس اكبر مني عمرا علي الاقل ب 7 سنوات مش كفائه مني لا علشان شركتنا مش بتعين ناس علي مناصب علشان ميطلبوش مرتبات كبيره لا احنا هناخد العيل و نرقيه و نطلع عينه شغل و هو هيشتغل زي الحمار علشان يثبت نفسه و قد كان قعدت بقي حوالي 4 سنين و نص اعافر علشان اثبت اني قد المنصب و كله يحسسك انك صغير و متستاهلش و انهم ادوك كرسي اوسع منك و انت مش قده و يدوني تقيمات قليله باعتبار اني عيل بشخه اسف في التعبير و انا اقضي حياتي جوه الشغل و اتعب و اشقي و اسهر علشان اثبت اد ايه اننا كويس و استاهل و مفيش فايده دايما معامه انك عيل و مش فاهم و احنا صابرين عليك في خلال الوقت ده كان الشركه جابت دفعات تانيه من الشباب اصغر مني ب 6 سنين و عينتهم و في كتير منهم اتجوز نتيجه مساعده اهله ليه و طبعا كنت مظغوط اكتر من الشباب الصغير علي اعتبار اني عليا المسؤليه و انا اللي بتحاسب و انا اللي في مكان اكبر من مكاني في نفس كنت بدأت اشوف عرايس و اللي معظمهم كان ضايع جدا و في كتير موافقش عليا تقريبا 50% و في اللي انا موافقتش عليه و كانت اول عروسه شوفتها تقريبا و انا عندي 30 سنه و نص 

المهم في سنه 2015 و انا في سن ال 34 جت الشركه عملت تغيير في الهيكل الاداري علشان الناس الكبيره كانت شايفه ان لازم اساميه الوظيفيه تتغير لمثيلتها في الشركات الاخري المماثله لنشاط شركتنا نتج عن ده انهم اخترعوا شجره جديده و كل الناس اللي انا كنت شغال معاها في نفس المنصب بس مش في نفس السن اترقت ما عادا انا علشان انا صغير و نتيجه لذلك كل الدفعه الجديده بتاعه الشباب الاصغر ب 6 سنين فاكثر اترقت و بقت في نفس الدرجه بتاعتي و قاموا بنزع كل صلاحيات هذه الدرجه و اعطائها للدرجه الاعلي يعني بقت زي ظابط المخله كده يعني بعد ما كنت الوحيد الصغير وسط المديرين بقيت الوحيد الكبير وسطهم و دون اي امل في الترقيه لاعلي لان الدنيا مقفوله و طبعا نتيجه نزع الصلاحيات بقيت كاني رجعت موظف تاني و بدأت بقي يتطلب مني اني اثبت اني كويس و اتنافس مع ناس اصغر مني ب 6 سنين علشان اخد تقييم ملائم و مبقاش زي بليد الفصل الخايب اللي عمال يسقط لحد ما عياله بقوا معاه في نفس المكان 

ومن 2015 لحد دلوقت و انا في الحال ده و برضه مفيش توفيق في مجال اني اعمل اسره و اولاد لدرجه اني فعليا معنديش اي ميزه لسني اللي انا فيه ده وظيفه يشغلها الاصغر مني ب 6 سنوات بنفس المرتب فكده مفيش انجاز و لا تميز و عزوبيه اتفرد بيها وسطهم و ده خيبه و فشل ونيجي بقي نبص علي الدنيا بره متلاقيش حاجه صحابي كلهم هاجروا قرايبي بيتوفوا واحد ورا الثاني

 الايام بتجري بسرعه و لا بيجي اليوم اللي هيخليني مبسوط و سعيد و مش بلاقي حد اخرج معاه و لا اتفسح معاه فبخرج لوحدي و مع نفسي كأبه ما بعدها كأبه و ايام شبه بعضها لدرجه اني مبقتش طايق لا الشغل و لا العيشه ولا اي حاجه العيشه في انتظار السنه الجايه الي احلي و لا اليوم الجاي اللي احلي زي ما كتبت قبل كده طلعت خدعه كبيره بتاكل اعمارنا علي الفاضي 

ساعات اسأل نفسي هو الغلط فين و فين النقطه اللي دخلت فيها حياتي في الدوامه اللي اكلت سنين عمري علي الفاضي و محستش بيها ولا استمتعت بيها 

حزني علي عدم الزواج بيجي من نقطه انه كنت  في موقفي  ده و انا داخل علي ال 40 زي دلوقت كنت هقول الحمد لله عندي بيت و ولاد طلعت بيهم من الدنيا عمري مرحش علي الفاضي بس لا يبقي في استمتاع بالسنين اللي راحت ولا جواز ولا انجازات ولا منصب يتناسب مع عمري و لا اي حاجه دي كتير قوي و ثقيل علي النفس

 انا حاسس اني عمري اتسرق مني لدرجه ان احدي الزملاء الي معايا لما بتكلم معاه عن ان الاستاذ فلان عمل كده معايا و انا زعلت مردتش عليه علشان اكبر بيقولي بص في المرايا انت معدتش صغير علشان يعاملك كده الواحد عمره راح علي الفاضي 

و زي ما شوفتوا مفيش اي احداث او ذكريات كده جميله الواحد يفتكرها لل 40 سنه اللي فاتوا بحيث انه يقول انا عشت ايام حلوه حياه كلها شغل و بيت و شقا و تعب مجرده من المتع و الفرح و السعاده مجرده من حضن الزوجه و لمسه الابن و الابنه مجرده من احساس النجاح و الشعور بالانجاز يبقي الواحد ليه حق يبقي مكتئب انه 40 سنه الا شهرين و لا لأ 

و اه يا افه

احلام صغيره و صدمات كبيره

 

في سن الطفوله و المراهقه دايما الواحد بيحلم احلام كبيره جدا بيبقي ليها علاقه بمستقبله زي نفسه يشتغل ايه نفسه يسكن فين نفسه يبقي عنده ايه هيجيب عربيه شكلها عامل ازاي نفسه يتجوز مين ( لو هو حاطط عينه علي حد ) و لو مش حاطط اللي عايز يتجوزها هيبقي شكلها ايه هيجيب ايه لنفسه لما يكبر في ايه مش عنده و هو صغير و اهله مش قادرين يجيبوه ليه و هو هيجيبه اول ما يتخرج

بنفضل نحلم و نحلم و نحلم و الاحلام تكبر جوانا و تتحول الي يقين و فجأه نلاقي نفسنا في اواخر سنين الكليه و الوقت بتاع تحقيق الاحلام قرب و تبدء تسمع قصص من نوعيه فلان اتخرج بقاله 5 سنين و جاب شقه و عربيه و اتجوز واحده حلوه  مش عارف مين اشتغل فين و بياخد مرتب قد كده  و هكذا

تبدء انت تفكر في نفسك اكيد انا هبقي زي فلان ما انا بصلي و بتقي ربنا و مش بعمل حاجه وحشه و بابا و ماما قالولي ان اللي بيسمع كلام ربنا و بيتقيه ربنا بيرزقه قوي و بيديه كل اللي يتمناه  ياه بالبساطه دي و ماله  يالا بينا نصلي يالا بينا نحفظ قرأن يالا بينا نتعلم تجويد ما كل ده  ارضاء لربنا زياده يبقي اكيد هنلاقي كرم من ربنا زياده و رزق اوسع من اللي معملش كده و من اللي  عامل الحاجات الاساسيه بس 

تيجي لحظه التخرج و تاخد شهادتك و تخلص ورق الجيش و التجنيد و تبدء تدور علي شغل و تقعد بالسنين علشان تلاقي اي شغله حتي لو بمرتب تعبان و بفلوس قليله بس نشتغل و نتعب زي ما بنسمع من الناس ان الواحد لازم يتعب اول سنتين او ثلاثه و يلم خبره و هوب هتفتح معاه بقي بالمرتب الكبير و الشغل الحلو و هيغرق في بحر الفلوس

الله مش يا جماعه كان في فلان اللي جاب شقه و عربيه و اتجوز في خلال خمس سنين واحده مزه  ادينا بقالنا اهو 3 سنين مش لاقيين شغل من اساسه تلاقي اه فلان موجود بس كان عنده وسطه او اتعين في الشركه دي بالصدفه و قدر ربنا  يعني يا جماعه فلان ده مش الحاله العامه لا يا حبيبي ده حاله خاصه

تلاقي شغل تعبان بمرتب تعبان و تفضل صابر عليه و ممكن ربنا يكرمك بشغل احسن في خلال سنتين او ثلاثه بعدها او لا هوب تلاقي نفسك 30 سنه الله انا لحقت ده انا لسه متخرج هوب وصلت الثلاثين

و تبدء تنزل عليك الاسئله بتاعه انت جبت ال 30 و متجوزتش انت جبت الثلاثين و معملتش  ده كل صحابك اتجوزوا ده كل صحابك بقي اباء

تبص حواليك فعلا تلاقي معظم صحابك بقوا اباء و عندهم بيوت و زوجات و عايشين حياه طبيعيه و انت زي ما انت

طيب يا جماعه انا هلحقكم بس متأخر شويه  تبدء بقي تقول انا هاخد شقه اي كلام او ايجار و هروح اخطب الحق نفسي مش لازم احقق احلامي الكبيره انا عغير احلامي و اخيلها شقه عاديه جيدا  علي قد اللي الفلوس اللي حوشتها لحد دلوقت و عروسه متوسطه و مش لازم عربيه و لا مرتب كبير 

تلاقي شقتك مش عاجبه العروسه و  تلاقي اصلا العروسه اللي مش عاجبها الشقه متعجبش حد

ليه يا جماعه ده بنتكم يعني تتبلع بالعافيه لا اصل انت كبير و المفروض تبقي جاهز عن كده

يا اما تقعد تجيبك عرايس كلها شكلها ضايع و معوجين و محسسينك انهم بتفضلوا عليك لو رضوا باحوالك

تقول خلاص انا هشوف غيرها يمكن الاقي الاحسن شويه  

مع الوقت تلاقي ان المستوي بتاع العروسه اللي بتجيلك عمال يقل و ان عدد العرايس اللي بيتعرض عليك عمال يقل لحد ما تقعد بالشهور عقبال ما يجيلك واحده و يا ريتها تبقي حاجه عدله

و طبعا كل فتره و التانيه تلاقي اللي تطلع تعليق علي شقتك او علي شكلك او علي سنك  انه مش مناسب 

تبص حواليك تلاقي صحابك عيالهم كبروا و دخلوا مدارس تلاقي زميلاتك في الجامعه عيالهم في ثانوي تبص علي التاريخ تلاقي نفسك عندك 40 سنه تلاقي انك جايب خاتم قرايه فتحه من ست سنين علي اساس انك هتستخدمه و متشال في علبته بيلم تراب تلاقي شعرك ابيض تلاقي شكلك بقي عجوز و سنك بقي عجوز

تلاقي اللي بيقولك يا عمو و يا حاج تلاقي اللي يقولك 40 سنه و متجوزتش ده اللي زيك عيالهم في الجامعه تلاقي اللي يهينك بمناسبه و يقولك عقبال اولادك مش هما في الجامعه

تلاقي نفسك لسه  لحد دلوقت متعرفش يعني ايه حضن ست و لا عملت اي حاجه مع ست في حياتك و لا حتي اللي عمل كان مش مخطط لكده و اخره خد بوسه ولا حضن في شرم و لا الغردقه من اجنبيه  تحت ضغط هرموناته و رغباته و رجع يعيط و يستغفر ربنا كتير علي اللي عمله

و يهاجم نفسه يقول بقي انا المتدين اللي كان بيسمع كلام ربنا و بيعمل اكتر من اللي بيعمله اي حد علشان يرضي ربنا دلوقت بقي اسوء من اي حد و عمل اللي ممكن متعملش من حد مش ملتزم

اه مغلطتش و ارتكبت الفاحشه بس عملت حاجه  حرام برضه

او تلاقي نفسك زي ما انت معملتش حاجه مع اي ست او معملتش اي حاجه غلط بس التزامك قل و ارتباطك بربنا قل اصل يا جماعه انا مش شايف فايده كل الحاجات الكتير الزياده اللي انا عملتها ده انا حتي الحاجات العاديه محصلتش معايا

تقعد تبص علي حياتك تلاقي انك كنت بتستني كل سنه السنه اللي بعدها يمكن تيجي بالخير وفي الاخر ميحصلش حاجه و سنه تجري ورا سنه لحد ما توصل 40 سنه

تبدء تحس بالشك ان في اي حاجه من احلامك هتتحقق تبدء تشك اصلا انك الحاجات البسيطه اللي هي زوجه و اولاد دي كمان بقت بعيده المنال

الاول كنت محروم منها لانك معكش تمنها دلوقت محروم منها لانك كبرت

يا تتجوز واحده وحشه و مش عجباك ولا فيها اي حاجه تخليك عايزها يا تقعد كده

لانك كبرت

تبص علي احلامك تلاقيها اتحولت من احلام صغيره لصدمات كبيره و كل شويه الاحلام دي بتصغر و تتقلص مع كبر عمرك

تلاقي نفسك عدي منك شبابك و عمرك دون ان تستفيد شئ كل اللي حصل مجرد انتظار و امل في بكره عمره ما اتحقق

مع دخولك عمر الاربعين فانت قضيت اكتر من ثلثين عمرك الافتراضي اللي هو تقريبا 60 سنه و قربت من نهايتك و هتتحاسب

هتتحاسب لو عملت حاجه غلط مع حد حتي لو بوس او حضن حتي لو قولت اصل هرموناتي ضغظت عليا اصلي تعبت من الحرمان يا رب

تسأل نفسك طيب يا رب انت غلطت في ايه ما انت زارع الرغبه فينا و بتقعد تاكل فينا و تتعبنا كل يوم و في نفس الوقت مش رازقني الجواز و قافل عليا باب الحلال و برضه يا رب انا مغلطتش اوي انا مسكت نفسي اني اعمل الكبيره يا تري يا رب هتسمحني 

ده بيبقي في ايد ربك

هتتحاسب عن بعدك عن ربنا و عن تقصيرك في حقه حتي لو قولت يا رب اصلي بقيت محبط و اليأس ملاني و مش حاسس ان عبادتي و النوافل الزياده دي ادتني اي حاجه في حياتي بالعكس ده انا اقل من اي حد يا دوب بيصلي و يصوم 

او تتحاسب علي انك قمت قالبها مسخره و عملت كل اللي نفسك فيك و نسيت كلام ربنا و رحت و زنيت و غلطت و قولت اصلي مش عارف الاقي الحلال

انا شوفت الثلاث نماذج

اللي غلط نص غلط 

اللي مغلطش خالص و بعد عن ربنا 

و اللي غلط و خربها و عمل كبيره من الكبائر 

و كلهم عند سن ال  40 او عدوها 

و كلهم كانوا ناس محترمه و بتعرف ربنا و عمرك ما كنت تتخيل ان الناس دي تعمل كده و صلاه و عباده و صوم

لما تتكلم مع كل واحد منهم يقولك ما انا مش عايش يا اخي 

ترجع و تسأل فين الغلط ليه الناس دي بقيت كده 

ترجع تسأل نفسك انا يا رب ليه عندي 40 سنه و معنديش بيت و اولاد و محققتش حاجه في حياتي و عمري ضاع و جري مني

تكتشف بقي المفأجاه الرهيبه

هو مين قال انك المفروض تتجوز هو مين قال انك المفرض تبقي سعيد او تبقي غني او عندك عربيه

انت مسمعتش الايه القرأنيه " و ما خلقت الجن و الأنس الا ليعبدون " انت مخلوق علشان تعبد ربنا 

و الدنيا ده مجرد فتره انت قاعد قيها كده تعبد ربنا و ترضيه 

و مش لازم تتوقع ان صلاتك الزياده و صومك و حفظك للقرأن ده علشان تبقي حياتك احسن في الدنيا و يجيلك اللي نفسك فيه

ده جزائه في الاخره و ثوابه في الاخره

انت اللي ربوك فهموك غلط

بعدك عن ربك و عصيانك ليه  و اغضابه جزء منه نتيجه انك فاهم غلط 

انك عاملت ربنا بنديه انا عملت اهو يا رب فين بقي الايام الحلوه محصلتش طيب يا رب انا هبعد

طيب يا رب انا ضعفت طيب يا رب انا مش عارف ايه

يا ابني افهم

دنتيك دنيه اختبار و دار شقاء مش نعيم و سعاده

شغلك اللي انت راعيت ربنا فيه و رغم ذلك مخدتش حقك و غيرك مشتغلتش و وصل بالتعريص  و الاونطه جزائه مش في الدنيا

في الاخره

وصل الشخص ده للمنصب العالي بالطرق الملتويه حسابه برضه في الاخره

الي كل واحد بيقرا البوست ده و لسه شاب

اوعي تقع في الخيه و تصدق ان جزاء اعمالك اللي بتعملها لربنا هتاخده فورا في الدنيا

رزق الدنيا شئ و ثواب الاخيره شئ تاني

خدوا بالكم و متضيعوش عمركم في الانتظار 

ربنا يخرجنا جميعا  من الدنيا دي علي خير و يغفر لنا و يجعلنا من اهل الجنه

بقيت منهم

 

في ايام الطفوله و المراهقه و الشباب كان الواحد بيشوف ناس في سني حاليا او اكبر قليلا بما اني كلها كام شهر و هبقي 40 سنه فهنقول الناس اللي في الفئه العمريه من 40 الي 50

كنت تبص للواحد فيهم تلاقيه غالبا طخين ( بقيت منهم ) و بكرش ( بقيت منهم ) و شعره خفيف او اصلع ( بقيت منهم ) و شكله كده عامل مش راكب علي بعضه لا هو عجوز اوي ولا هو شاب هو حاجه كده ينفع تطلق عليها انها من غير المصنفات او الكائنات الخرافيه تلاقي عنده شويه شعر ابيض ( بقيت منهم ) لا كتير و لا قليل

كنا بنبص للناس دي و استغرب ازاي  الناس دي بقت كده و ليه سابوا نفسهم كده و كنا لما نتكلم علي حد منهم نجي نقول عليه ده راجل كبير معدي ال 40 سنه و طبعا المؤدب كان بيبص و يضحك في سره او يستغرب شكل الناس دي قليل الادب و الربايه كان يسمعهم شويه كلام 

كنا نبص للناس دي نستغرب ايه ده دول بيهزروا ليه مش يراعوا سنهم دول بيضحكوا دول لابسين جينز و تيشرتات ما يلبسوا هدوم تناسب سنهم دول مش عيال علي كده

لما نلاقي واحد فيهم بيبص علي بنت و لا حاجه نستغرب ايه الراجل العايب الكبير ده اللي بيبص علي البنت ( هكتب مقاله تانيه عن الموضوع ده لوحده )

يعني من الاخر كنا بنحكم علي الناس دي انها المفروض تعيش عيشه الرهبنه و الوقار و العجز

للاسف انا بقيت في السن ده و حابب اتكلم عن احساسي بعد ما بقيت منهم

صدقوني لو قولت لكم ان من جوانا الواحد  مش حاسس ولا وصله الادراك اللي او الصوره اللي انتوا شايفنه بيها كشباب صغير اقل من 20 او اكبر من 20 شويه

الواحد بيستغرب لما يجي يلاقي شعره مدفونه في دقنه و يشدها و يقعد يدور علي لون اسود في صوابعه ميلاقيش و بعدين يلاقي كده حاجه بيضه شبه الشعره يكتشف انها الشعره اللي هو لسه شاددها من دقنه

يستغرب لما يبص في المرايه يلاقي وزنه باين علي وشه و شكله بقي مخنزر ( جايه من الخنزير ) زي ما بعض الناس بتقول رغم انه لا زود في اكله  و لا عمل حاجه

يستعرب لما يلاقي نفسه متصور في صوره مع ناس و يلاقي كرشه قدامه حتي لو كرش صغير و يلاقي نفسه طالع ضخم و عريض شبه الحيطه رغم انه مش طخين اوي و كل اللي زاد في وزنه 10 و لا 15 كيلو

يستغرب لما يججي يهزر و يضحك و يلاقي ناس بتبص له مستعجبه و يقعد يفكر له و ممكن ميجيش علي باله انه بقي 30 سنه فيمنفعش يهزر كده عيب علي سنه

يستغرب لما تبقي واحده حلوه معديه و يبص عليها و تبص له بقرف علي اساس ايه اللي بتعمله ده يا جدو ده انت عيب عليك تبص 

يستغرب لما يبقي في ناس في اواخر العشرينات او في نصها و بتقوله يا حاج و تناديه ب يا حاج و هو يدور حواليه هما بينادوا علي مين ( و  لما يكشتف انه هو المقصود يقول لنفسه حاج مين يا ابني ده انا لسه مدخلتش دنيا و لا اعرف شكل حضن الست و النوم معاها عامل ازاي ده لو اعزب زي حالاتي)

طيب هو انا كحاج كبرت امتي ده انا زي ما انا من يوم ما اتخرجت مفيش حاجه في حياتي جديده يا دوب جبت شقه و جهزت نفسي للزواج و بدور علي عروسه يبقي شكلها معقول مش ضايعه  معقوله بقيت 40 سنه امتي و ازاي ) ده اللي في ال 40 ده عياله طوله و داخلين علي ثانوي ( معظم زمايلي اللي اتجوزوا يف السن الطبيعي عيالهم بقوا اطول منهم فعليا و داخلين ثانوي)

يا جدعان ده انا يا دوب اتخرجت و طلع بوزي علشان الاقي شغلانه و بوزي علشان اعرف اجيب شقه امتي عجزت

تكتشف ساعاتها اصلا ان المده الزمنيه اللي حولتك من شاب لعجوز لا تتعدي 15 سنه

اللي متابع المدونه هيلاقيني كتبت فيها و انا 27 سنه و حاليا انا 40 سنه يعني 13 سنه عدوا

المدونه عاشت معايا التحول من الشباب الي الكهوله و استمرار العزوبيه و الحرمان من الحضن الحنين و البيت و الاسره

يا عم انت 40 سنه 13 سنه ايه بس اللي بتتكلم عليهم

هقولك اه ما احنا بنقعد طول عمرنا من الولاده عمالين ندرس بيضيع مننا 25 سنه من عمرنا فيهم و يتطلب مننا بعدها اننا نبدء ندور علي شغل و نشتغل و نجهز نفسنا و نتجوز

المفروض تتجوز قبل ال 30 ده اللي المجتمع بيقوله انا في ناس و انا 27 سنه كانت بتكلمني اني اازاي متجوزتش لحد دلوقت

امال لو قابلوني دلوقت هيقولوا ايه

بجد هي دي حياتنا

15 سنه بس  من عمرك هما اللي مسموح لك فيهم تعيش و تضحك و تلبس و بعد كده تتحول لعمو و حاج و الاستاذ

حتي الزمن بيعاندك و بيكبر شكلك و بيغير في جسمك و يخليك يبان عليك السن و يزيد وزنك و شعرك يبيض و يخف او تبقي اصلع

تحس ان كل حاجه ضدك

هي دي الدنيا و العيشه اللي اتخلقنا علشانها

لما تيجي تشوفها تعرف ليه هي اسمها دنيا لانها قصيره و صغيره و بتسرقك و مش بتسيب ليك فرصه تحس و تستمتع بيها

سنين كتير بتضيع مننا و احنا مستنين اليوم اللي الجاي

بنتربي علي كده ان يمكن السنه الجايه هتيجي بالخير او بالعروسه او بالشغلانه الاحسن

سنه ورا سنه بيجروا و احنا بنجري ورا سراب و في الاخر تلاقي العمر عدي و عجزت

بتستني اليوم يخلص و الشهر يخلص و السنه تخلص علي امل ان اللي هيجي بعضه هيبقي احسن و هيتحقق جزء من اللي بتتمناه

و تقول لنفسك ما فلان السنه دي خطب او اتجوز و هو السنه اللي فاتت كان عازب ما علان لقي شغله احسن السنه دي بدل اللي كان فيها

تدي نفسك الامل ان بكره هيجيب ليك حاجه احسن و متبقاش واخد بالك ان اللي جاب الاحسن مش مرور الزمن مش علشان جت سنه جديده و لا يوم جديد لا علشان ده كان ميعاد رزقه 

طيب ما معني كده ان الرزق بميعاد يبقي طبيعي انا بقي عايز الايام تجري علشان الميعاد يجي و اخد الرزق

اقولك ما انت كده بتضيع عمرك من غير ما تستمتع بيه و لما يجي الرزق هتلاقي نفسك ضيعت كل حاجه كنت ممكن تعملها مناسبه لعمرك و سنك علشان كنت مركز بس ان الايام تجري و تمر

بالله عليكم اوعوا تعيشوا علشان اليوم اللي الجاي عيشوا حياتكم في اليوم الحالي بالموجود بدل ما تندموا زيي

اني بقيت 40 سنه و بقيت منهم و بقيت مش عارف اعمل حاجات كتير معملتهاش في وقتها علشان بقيت كبير و عيب عليا

و اةةةةةةةةةةة ياااااااااااااااااااااااااااااااااااا ااااااااااااااااااااااااااافه

حزب اللي جت عليهم ( هي يعني جت عليا)

 

اولا نبدء بتعريف الحزب ده و مين هما اعضائه

ببساطه اعضاء الحزب ده هما اللي يجوا يسألوا اللي السؤال اللي الناس كلها بتسأله بتاع و هي يعني جت عليا بتبقي الاجابه ب اه جت عليك

طبعا انا مش الوحيد اللي كده و لا بدعي اني الوحيد بس انا واحد من الناس دي و امثلهم في حاجات كتير

كلنا بنسأل السؤال ده لما يبقي نفسنا نعمل حاجه او نجيب حاجه او لما نعمل حاجه و حد يسألنا انت عملت كذا فنرد بالرد ده ما كل الناس عملت هي يعني جت عليا

بس للاسف اجابه السؤال بالنسبه ليا و للناس اللي في الحزب ده هي اه جت عليك

تلاقي مثلا كل صحابك يتخرجوا و يلاقوا شغل بسرعه سواء بواسطه او من غير و تلاقيها جت لحد عندك و وقفت و تتاخر لك كام سنه لحد ما ربنا يرزقك بشغلانه

تلاقي صحابك بيخطبوا و بيتجوزوا و يخلفوا و ساعات كمان يطلقوا و يتجوزوا تاني و انت جت عليك و جت لحد عندك و محصلش ليك حاجه من دي

حتي البنات اللي كتير بيبقي نصيبها متتجوزش رغم ان اوحش منها شكلا و اخلاقا و طبعا اتجوزا بتلاقي منهم اللي جت عليهم و متجوزش و يجيلهم عريس غير مناسب علي الاطلاق و يبقي قدامها يا تقعد بكرامتها في بيت اهلها يا تتجوز جوازه هتتعبها و مش متناسبه معاها

حزب اللي جت عليهم دول تحس ان حظهم و رزقهم من الدنيا علي قده

حتي وسط الناس الي في نفس الشريحه اللي حظهم منها

يعني تلاقي مثلا شغال شغلانه و كل اللي معاه عارفين يمشوا حياتهم بمرتبهم و هو بتطلع له مصايب مخلايه مش لاقي ياكل و مرتبه مش مكفيه

اللي جت عليه مش لازم يبقي فقير او في شغلانه مرتبها تعبان او عايش علي الرصيف او في السطوح

هتلاقي اللي جت عليه ده في كل طبقه و كل مكان و كل وضع

واحد مع ناس بس مش شبه الناس دي

كلهم في خانه و هو في خانه رغم انه معاهم في نفس الصندوق

يجي مثلا تعجبه واحده شافها صدفه يلاقها مخطوبه او متجوزه

يجبوا له عرايس يطلعوا معظمهم مينفعهوش و مش مناسبين ليه او مش عاجبينه و لو عجبته واحده هو ميعجبهاش ما هي جت عليه

يبقي وسط زمايله دايما في اخر اللسته ما هي بتيجي عليه اخر واحد اشتغل او اخر واحد اتجوز اخر واحد خلف

و تلاقي كل حاجه من دول طلع عينه  علشان يعملها

ساعات بيبقي نفسي اسأل ربنا هو ايه الكويس في ان نصيب شخص انه يبقي ناقصه حاجه من اللي عند كل الناس

يعني لما يبقي الافقر منه و الاغني منه و اللي زيه متجوزين و يبقي هو قاعد محروم من الجواز من النواحي النفسيه و الجسديه و الحنان و الابناء هو كده ايه اللي حلو ليه 

طيب انا هحكي قصه غريبه كان عندي زميل كانت ظروفه اصعب مني و اتخرج دخل الجيش ظابط 3 سنين و انا قعدت في بيتنا سنتين و بعدين ربنا رزقني بشغل و هو خرج من الجيش بعد شغلي بسنه و قعد يدور علي شغل و مكنش شغله مناسب لدرجه انه قالي انا مش هفكر في الجواز قبل ال 35 انا مش لاقي حاجه علشان اتجوز بيها و لا اقدر افتح بيت الكلام ده بعد ما اشتغل طبعا

انا مرتبي كان احسن منه شويه و كنت متعاطف معاه و صعبان عليا لاني انا اللي افضل شويه مش عارف اعمل حاجه امال هو يعمل ايه

صاحبي ده بقي اتجوز قبل ما يتم ال 31 سنه و عنده 3 بنات زي القمر دول و انا اللي كنت احسن حالا  منه شويه ماديا زي ما انا عازب و بقيت كمان كهل علي مشارف ال 40 سنه

ياه 40 سنه انا عمري ما تخيلت اني هعجز كده من غير ما يبقي عندي بيت و لا اسره و لا اطفال

انا مقهور جدا يا جماعه علي حالي و علي اني من اللي جت عليهم

انا مش فاهم ليه ده حتي اللي بيعملوا ذنوب و كبائر برضه عندهم اسر و اطفال و ستات 

طيب الغلط فين

طيب انا من اللي جت عليهم ليه

طيب هو انا عمري اللي معشتهوش ده و راح هدر اعمل ايه فيه

من كام يوم كان واحد صاحبي من المدرسه منزل صوره ليه مع بنت مزه كده بس شكلها صغير معتدش العشرين

البنت دي طلعت بنته البنت طوله ما شاء الله و بقت انسه كبيره

واحده صاحبي قدي في العمر بنته بقت انسه و انا حضرتي زي ما انا راجل عانس يعني انا و بنت صاحبي في نفس الخانه مستنين العدل

انا مش بحقد علي حد و لا بتمني زوال النعمه من حد 

بس انا من حقي ابقي زي اي حد

من حقي ابقي من الناس اللي مجتش عليهم و متكونش اجابه سؤال هي جت عليا بنعم من حقي تبقي لا مجتش عليك انت ناقصك ايه عنهم

انا قربت يجيلي خبل ببص لنفسي بحزن علي شكلي

وزني زاد بشكل ملحوظ و شعري بدء يرجع لورا تناسبا مع عمري و جبتهي بقت عريضه غير انه سرح في الشيب طبعا

و نتيجه الوزن ده شكلي بقي اكبر شويه من عمري لدرجه اني في بعض الاحيان حد في الشارع يكلمني يقولي يا حاج 

ناهيك عن كلمه عمو اللي بسمعها من سنين

انا مكنش عندي اعتراض اني اكبر او اعجز بس اعيش الحياه الصح بتاعتي

اتجوز اجيب عيال يبقي لحياتي هدف الحق اربي العيال دي

دلوقتي انا لو اتجوزت بكره هبقي بسابق الزمن في تربيه العيال  قبل ما اطلع معاش و ملاقيش اصرف عليهم من المعاشات الهزيله اللي عندنا في مصر

هبقي عندي خمسين سنه و ابني محصلش 10 سنين راجل عجوز ابنه عيل بشخه و ولاد صحابي هيبقوا علي الاقل من 20 الي 25 سنه

يعني يا خلصوا تعليم يا قربوا خلاص

ياه علي الذل

ياه علي القهره اللي الواحد حاسسها علي نفسه

11 سنه او اكتر و انا بكتب هنا و حالي زي ما انا

و زي ما واحد زميلي ساب الشغل من 10 سنين و قابلني من فتره و بيسألني علي حالي عقب علي كلامي انه يعني لا جديد و انت زي ما سبتك من 10 سنين

فين العدل في ده

فين العدل انك تبقي حاسس طول الوقت انك انسان ناقص و مش كامل و الناس بتزود احساسك بسؤالهم البضين بتاع انت مش هتتجوز يا ابني

احساس بالفشل ابن كلب و احساس بانك مش زي باقي الناس و انك عجزت و اللي زيك بقي عندهم اللي مش عندك

عندك شقه اه بس مقفوله و العفن بينتشر فيها اللي عنده عشه و متجوز افضل منك انت يا ابو شقه و عازب و متقوليش عشته صعبه

اه عشته صعبه بس عايش و بيعافر و عنده هدف و عنده حاجه يعيش علشانها اللي هي بيته و اسرته و عياله

انا عندي هدف ايه بقي و عندي ايه اعيش علشانه

طيب كان المفروض ارمي نفسي في اي جوازه و خلاص 

طيب هو ده كان هيحل المشكله و لا كنت و انا برمي نفسي الجوازه هتبوظ

هل هو كان نصيب و لا اختيار

و لا هو مجرد ان هي يعني جت عليا فعلا

الميلف و العرمه و المغريه و احتياجات الراجل الجنسيه ( بوست 18 + )

 علي غير عادتي ده تاني بوست انزله غير مناسب لمن هم دون ال 18 سنه

قد يكون البوست محاوله للتنفيس

او للاستغراب من طريقه تفكيري

او محاوله لاخراج الافكار الغريبه دي علي ورق و ان يمكن حد يقولي انت فيك حاجه غلط او اللي انت فيه طبيعي

انا مش عارف الكلام هيطلع مرتب و لا لا و في صيغه ينفع تتقرأ بتتابع و ترتيب و لا لا بس انا هكتب البوست زي ما بيجي في دماغي دون تنسيق او اعاده صياغه

بقيت الاحظ من حوالي 3 او 4 سنين اني بلاقي اني بحس بانجذاب لستات غالبا ما بتكون متزوجه او مطلقه ( معرفش عنهم حاجه و لا بيني و بينهم علاقه بس ممكن اشوف صورهم صدفه علي الفيس او الاقيهم ماشيين في الشارع ) 

قعدت اشوف انا بنجذب ليهم ليه لقيت انهم يتصنفوا تحت 3 فئات

الفئه الاولي هي واحده عاديه و يمكن وحشه شويه بس تلاقيها مغريه لما تركز معاها تلاقي ان جسمها شكله مغري في لبس عادي

لما تركز اكتر تلاقي ان ده ليه عده اسبااب منهم انها ممن يبقي جسمها ترهل و باظ و هي بتلبس ضيق او اصغر من مقاسها علشان تقدر تخليه في قالب شكله مقبول فبالتالي مفاتنها و اعضائها بتبقي بارزه جدا و بحجم كبير مغري خصوما منطقه الارداف و العانه و الصدر تحسهم ضاربين كده في وشك و واضجين كده و مقاستهم كبيره و دي اللي نقدر نسميها العرمه اللي لو قلعتها الهدوم الاعضاء كلها هتدخل في بعض و تترهل

و الفئه الثانيه  اللي بتلبس ضيق و جسمها حلو فعلا لانها لما وزنها زاد بعد الجواز بقت كده في فئه الملبن اللي جسمها اتظبط و بقي طري و مقاساته مظبوطه بعد ما كنت رفيعه جدا قبل الجواز و دي برضه ممكن تبقي وحشه او عاديه بالكتير بس جسمها امكانيته في اللبس خصوصا لبس السهره بتاع فساتين الفرح بتبقي واضحه و دي اللي بنسميها المغريه 

و معظم الفئين اللي فوق دول محجبات و بيلبسوا طويل 

الفئه الثالثه بقي هي فقه الميلف MILF  اللي هي اختصار لجمله mother i would like to fuck دي بقي هي ست جامده مهما يمر الزمن جسم جامد و جمال و حلاوه  اغراء و حاجه كده سوبر و غالبا دي بيبقي لبسها مفتوح او ضيق و مفيش حجاب و مدلعه نفسها  مهتمه بنفسها جدا

في الواقع الثلاثه دول بيأثروا علي اي راجل في سني خصوصا اني عازب و الاحتياجات الجسديه دي عندي غايبه 

ممكن تأثيرهم يبقي اقل شويه علي اللي متجوز او اللي عازب و مقضيها  بس في رأيي ان كل من هو زي هيبقي متأثر بيهم

خصوصا انهم متزوجات فساعات دماغك تسرح و تقول ياه يا بخت جوزها بيمسك الحاجه الكبيره دي او بيعمل اي في الجزء المكلبظ ده و هكذا

و مع اللبس الضيق بتلاقي اعضائهم متفسره جدا و تلاقي البنطلون كانه راسم تفاصيل كل حاجه

و البلوزه او الجيبه مبينه جميع تعريجات الجسم و تفاصيله اللي هي اصلا بتأُثر فيك و بتزود احساس الرغبه عندك

المجموعه دي من السيدات هي اكثر فئه معرضه لمحاولات الشقط و التعارف و محاةلات عمل علاقه معاهم

بجانب اجسامهم المؤثره فهما فيهم ميزه انها مرتبطه ببيت و بزوج و ده يخلي اللي يصاحبها ياخد اللي هو عايزه لو هي سابته يعمل كده

و في نفس الوقت يقدر يخلع منها بسهوله دون الخوف من انها تسبب ليه اي قلق او وجع دماغ علشان متخسرش بيتها و حياتها

و غالبا اللي بتوقع من الستات دي في شباك راجل بتبقي عايزه تحافظ علي وجود الراجل ده معاها و في نفس الوقت يفضل جوزها موجود و بيتها موجود تاخد مزايا المتعه و الدلع من صديقها و تاخد مزايا الاسره و البيت من جوزها

اللي منا سمع او شاف حاجه من فيديوهات العناتيل في الفتره الاخيره هيلاقي ان معظم الستات اللي كان يعرفهم العنتايل من الفئه دي

جسم جامد او بيبان جامد في اللبس  و متزوجه و غالبا مش بتكون حلوه الا في ما ندر و مستعده تبسط الراجل اللي مصحباه باي حاجه و باي طريقه و اي فعل رغم انها مش بتعمل كده لجوزها

بغض النظر عن المقطع الاخير فالستات دي بتكون محركه للغرائز للرجاله في سني اكتر من البنات الصغيره او الانسات

اليل حتي لما بتلبس ضيق مش بتلاقي جسمها مأثر فيك زي الست الكبيره دي 

الغريب في الموضوع و اللي خلاني اتكلم فيه اني بنسبه 95% انت تقدر تلاقي شئ مغري و مثير في اي ست من دول حتي لو لابسه كويس كده و مغطيه نفسها بتعرف باي صوره تلاقي  يروز في الصدر حاجه تفسر الرجل او العضو التناسي حاجه توضح تعريجات الجسم

مش العارف المشكله قي لبسهم و لا في جسمهم و لا في دماغي اللي شكلها بقت وسخه و مليانه صراصير و هوس جنسي بيخلي الواحد بيشوف الواحده من دول بيبقي عايز يتأُثر بيها و يتمني انه يكون معاها زي ما جوزها بيبقي معاها

انا الافكار دي بتكرهني في نفسي جدا

و بتخليني قرفان من نفسي جدا و و مش طايقني و بقول اد ايه اني بقيت بعقليه قذره و وسخه

اتحولت من شخص بيحاول يتقي ربه في كل حاجه انه افكاره بقت كده و بيبص في اللي مش من حقه لا و كمان بيثار بسببه 

اتحولت من شخص كان بيتمني الحلال انه بقي في دماغه وساوس شيطانيه بتتمني انه تحصل اي فرصه و يلمس واحده من علشان عجبه شكل جسمها او اثر فيه

مش بقول اني عايز اعمل

و معتقدش حتي اني لو جت الفرصه اني انفردت بواحده من دول و هي مواقفه هي اعمل معاها علاقه كامله و اني يوم ما تبوظ مني هيبقي شويه حاجات بدائيه متوصلش للمعصيه الكبري

بس انا كرهت اصلا اني ممكن دماغي تيجي فيها الافكار دي

كرهت اني اشوف واحده من دول فتبدء دماغي تلف و تدور و يستغرق تفكيري المواضيع دي و بالشكل الي شرحته

نفسي ارجع نفس الشخص بتاع زمان اللي كانت افكاره نقيه

اللي كان اخره لما يشوف واحده حلوه او مغريه يبص بصه و الموضوع ينتهي 

يا رب اهديني و قومني  و ارجعني الي صراطك المستقيم

يا رب قويني علي نفسي الاماره بالسوء ولا تجعلني من الذين ذلت اقدامهم بعد ثبوتها

يا رب ارزقني تقواك و ارزقني الزوجه اللي تعفني و تملي عيني

ادعولي يا جماعه بالله عليكم

انا خايف من نفسي و من الشيطان و من ضعف الانسان و استيلاء الشهوات علي عقله و قلبه

ادعولي بجد