34

تميت 34 سنه  و للأسف زي ما انا
سنه بتجري و لا سنه
و الحظ و لا كأنه هنا
اكتئاب شديد
محاولات ارتباط فاشله
يعني معايا و لا مش معايا مش عارف اتجوز
زمان كان في سبب لعدم جواز مكنش عندي امكانيات
و برضه لما بقي عندي امكانيات مش عارف اتجوز
عيالي هجبهم امتي
هربيهم امتي و انا نفسي بقرب علي ال 40
40 سنه يا ناس
هيبقي عندي 40 سنه
كهل يعني
و مفيش عيله و مفيش اسره و مفيش جواز
تقريبا انا بلغت قرب عيد ميلادي ال 14 
يعني البلوغ تم من 20 سنه
20 سنه مستني الحلال
و هرموناتي يتضغط عليا علشان عارفه اني خلاص داخل في مرحله الكهوله اللي هي من الاخر عدم وجود رغبه جنسيه نتيجه التقدم في العمر و ضعف الاداء الجنسي نتيجه العمر
علي رأي شريف رمزي لما قال لخالد ابو النجا في فيلم عجميستا لما كان بيعاكس بنت في البحر و قاله اتحكم في رغباتك
قاله رغباتي عفنت من قله الاستخدام
انا مش انسان شهواني بس انا بني ادم و راجل
و محدش يقنعني ان شاب في سني ملتزم و ملهوش في الغلط هيبقي مبسوط من غير ما يبقي متجوز علشان يحفظ نفسه و فرجه
علشان يستقر جسديا و عاطفيا
انا عجزت ياي جدعان
صحابي عيالهم في 5 ابتدائي
و انا لسه بدور علي عروسه
و انا لسه معنديش اسره
حتي درجتي الوظيفيه بقي دلوقت فيها شباب اقل مني ب 6 و 7 سنين
يعني كل حاجه متأخره جواز متأخر ب ال 6 و 7 سنين
ترفيه متأخره بالست و السبع سنين
طب في ايه عدل
طب ما الواحد يموت احسن
عايش ليه و علشان ايه
علشان اقعد اشوف الناس و اتحسر علي حالي
علشان اتحرم من حقي اللي ربنا شرعه لكل الناس رغم قدرتي عليه
علشان يتقال لي انت كبرت و العرايس بقت بترفضك علشان سنك
علشان احس اني لو جالي طفل مش هيبقي ليا خلق اربيه و اعتني بيه علشان بدأت اعجز
فعلا صدقت اغنيه واما بتاعه قطر الحياه بيفوت من غير صفير و لا صوت
من اكتر من 6 سنين بدأت المدونه
كنت في اخر العشرينات دلوقت انا في منتصف الثلاثينات
 و مفيش جديد
6 سنين يعدوا و مفيش جديد
و لا حتي امل 
طيب ليه
طب هو الواحد مقصر في ايه 
انا مخنوق
اةةةةةةةةة يــــــــــــــــــا افــــــــــــه

عن البصبصه و البحلقه و اشياء اخري

انا لما بدأت المدونه من فتره طويله و اتكلمت عن الجواز كنت دايما بناقش الاحتياج النفسي و المعنوي للزوجه و الحب و الموده و الرحمه و الرومانسيه و الاهتمام و كده بس عمري ما ناقشت الاحنياج الجسدي و الرغبات الجنسيه و لا كانها مش موجوده
و لا كائن كل حاجه حوالينا بتفكرك فيها و بتحسسك انك محتاجها

تلاقي الناس تقولك اتحكم في غرايزك مادام انت مش متجوز و تلاقيهم هما مقطعين الدنيا مع زوجاتهم و لما تبعد عنه اسبوع يبقي هيتجنن
تلاقي الناس تقولك بلاش تبصبص و انت حواليك كل حاجه تخليك تبصبص بنات ماشيه يهدوم عريانه او ماسكه
ستات متجوزين حاطين صورهم علي الفيس بهدوم ماسكه و معروف ان جسم الست المتجوزه بيكون انثوي اكتر من البنت
تلاقي نفسك محاط بصدور و رجلين و ايدين و شفايف و بنطلونات ضيقه ماسكه من قدام و من ورا و مورياك تفاصيل تجننك
و بعدين يقولك متفكرش
ضغط هرموناتك عليك من و انت 15 سنه لحد دلوقت  و احساسك المستمر بالرغبه و الاحتلام اللي يزورك كل اسبوع ولا 10 ايام
و يقولك متفكرش
التلفزيون و مصايبه يقولك متفكرش
يقولك صوم و صلي و كان ده هيخليك متحسيش بالرغبه
تلاقي قدامك 3 حلول مفيش غيرهم ما دام مش عارف تتجوز
يا اما تصبر و تكتم جواك لحد ما تفرقع زي حالي
يا اما تمشي في الحرام و ده بيعتمد علي مدي تدينك و مدي تواجد فلوس معاك للحرام
او تتجه للفيس بوك
افتح الفيس بوك مثلا و انت تشوف العجب
ستات محجبات حاطين صورهم بمايوه شرعي  او بهدوم المفروض انها مغطياهم لكن بسهوله تقدر تفسر صدرها و جسمها من الهدوم و الاسم محجبه
حاول تكلمها و هي متجوزه ممكن تلافي اللي تستجيب و ممكن توصل معاك لكلام جنسي بحث و توريك نفسها بقميص النوم كمان
مع انها متجوزه ليه محتاجه لحد يتكلم معاها في الجنس و تفرجه علي نفسها علشان تحس انها انثي
انا اقولك ليه
زوج بيدور علي متعته و بس في العلاقه الجنسيه او بعد ما اتجوز مبقاش مراعي مراته و يقعد معاها و يكلمها
يسيب ليها وقت فراغ و يقلل من علاقته الجسديه معاها 
مع الوقت تدخل هي علي الفيس ولا الشات يلاقيها شاب و تبدء الحكايه ما بينهم و شويه و يلاقي مراته فرجت جسمها كله لحد غريب
و الحد ده ممكن يبقي شاف منها اللي جوزها مشفهوش
الشاب اللي عمل كده مش شرط يبقي ملعب و بتاع نسوان ممكن يبقي شاب يائس و فاقد الامل في انه يتجوز و يعف نفسه بالحلال
بيلاقي واحده بتديله جزء من اللي الجنه الموعوده و الفاكهه المحرمه قصاد شويه كلام حلو بيقوله ليها تفتكر هيقاوم اد ايه
و هي ست متجوزه واحده هاملها او ممكن مش بيكفي رغباتها و متكتفه بعيال و مجتمع و رغبتها جوها مكتومه بتلاقي واحد بيحسسها بانوثتها و بان لسه مرغوب فيها فبتمشي وراه
غلطانين اه عصاه اه بس في نفس الوقت مظلومين
اعرف صحابي كتير و فيه منهم متجوزين عايشين علي الفيس و ياما شافوا ستات كتير و بنات كتير كانوا مستعدين لعرض اجسامهم
و في منهم كان عايز علاقه جنسيه كامله
ليه بيعمل كده و هو متجوز علشان مراته مش مخلياه سعيد علشان متجوز واحده مش بيحس نحيتها انها انثي و انه راغب فيها
لنه اضطر يتجوزها نتيجه ان ده اللي اتعرض عليه او ان ده احسن الموجود و انه من يوم ما شوفها عمره ما حس انه عايزها او راغب فيها 
يعني لا المتجوز مرتاح و لا الاعزب مرتاح و لا الست المتجوزه مرتاحه و لا الانسه مرتاحه
اللي شايفه اننا في مجتمع متناقض
عمال يتشدق بالفضيله و الرجاله و الستات فيه هيموتوا علي العلاقات الجسديه و مش بيعرفوا يزهدوا فيها
تلاقي شيخ متجوز بنت عندها 20 سنه و هو 70
تلاقي مين متجوز لحد دلوقت 17 واحده
و يجوا يلموا علي الشباب انه بيبص
مش يبص احسن ما يغلط
احسن ما يعمل علاقه علي الفيس بوك
او علاقه علي الشات
او علاقه جنسيه كامله بره
انا عارف ان كله حرام
بس هو الحلال فين علشان يبعدنا عن الحرام
و اه يـــــــــــــا افه

قطر الحياه

الناس بتوصف الحياه بالقطر و اللي بيتأخر في اي حاجه يبقي القطر قرب يفوته و اللي اتأخر فعلا يبقي القطر فاته  و اللي عمل الحاجه يبقي ركب القطر يا بدري في اوله يا في نصه يا اتشعبط في اخره
انا باقي شايف العكس
شايف ان الواحد بيركب القطر من يوم ما يتولد و اللي بيحصل بيكون عباره عن تأخير في الوصول للمحطات ما هو حياتنا مش قطر توربيني لا دي قطر محافظات و مراكز  و قطر قشاش كمان
تتأخر في الوصول لمحطه او متوصلش خالص نتيجه ان عامل التحويله نسي يظبط التحويله في الاتجاه الصح فتلاقي نفسك في حته تانيه
بفتكر النهارده و انا علي بعد شهور من اكمال ال 34 سنه و علي بعد شهور من اكمال 11 سنه تخرج احلامي و توقعاتي لحياتي
بتذكر النهارده يوم ما بدءت المدونه دي و انا بقرب علي ال 28 سنه و قد ايه ايامها مكنتش متوقع ان الحال هيفضل زي ما هو
بعد 6 سنين
السنه دي كان في شاب شغال معانا جاله اول طفل ليه الشاب ده متجوز من حوالي 4 سنين بس هو اللي قرر انه يهدي سرعه القطر و يأخر انه يبقي اب شويه علشان يستمتع هو و مراته بحياتهم قبل المسئوليه والعيال ( عمره دلوقت يا دوب 29 سنه )
قضي ال 4 سنين دول في الجنان و الهزار و الجري ورا مراته في الجناين و انهما يخرجوا خروجات مجنونه  و يعملوا حاجات مجنونه
و لما حس انه دخل علي حسن لازم يبدء يبقي رزين قرر يجيب طفله بس بعد ما خلي القطر هدي و مشي بالراحه علشان يتجنن
السنه دي برضه واحد زميلنا عزمني علي حفله نجاح ابنه في 5 ابتدائي زميلنا ده اكبر مني بسنه في العمر و بيحتفل ان ابنه علي وشك يبقي طالب في اعدادي الشاب ده قرر يخلي القطر يمشي بسرعه علشان يعدي المحطات بسرعه 
اما بالنسبه للقطر بتاعي فهو قطر مش قادر اتحكم فيه لا قادر اسرعه و لا اقدر اهديه لأن الدنيا حواليه و ال track  بتاعه هما اللي بيتحكموا فيه
اتخرجت وقعت شجره قدام القطر خلته واقف مكانه و بيستهلك وقود علي الفاضي  ( و وقود قطر الحياه هو عمرنا و سنينه ) لحد ما بعد سنتين الشجره انزاحت و يادوب مشيت شويه لقيت قدامي كوبري سكه حديد بس الكوبري في جزء منه متهدم و من ساعتها متحركتش خطوه لقدام و القطر عمال ياكل وقود و مفيش حد قادر يوقفه 
من اسوء المشاعر في الدنيا شعور ال helpless انك قاعد كده و حياتك ماشيه و انت ملكش اي تحكم فيها
النصيحه اللي لازم نطلع بيها من الموضوع و اللي بنصح بيها الشبان الاصغر اللي لسه في العشرينات متضيعش عمرك في الانتظار
و اعتبار ان اكيد بكره احلي مش لازم يحصل كده
تعامل مع الواقع علي انه هو ده اللي موجود و سيبك من الامال و الاحلام لأن انتظار تحقيق الاحلام دي لفتره طويله هيجبلك اكتائب
عيش اليوم بيومه و متستناش بكره انه يجيلك بدنيا جديده
متتخيلش انك لو متدين و مش بتاع بنات و عمرك ما مشيت و لا لمست بنت ان ده هيديك رزق الجواز بتاعك بسهوله ولا بسرعه و لا لو انت كنت عطيط و بتاع بنات ده هيخليك يعني مش عارف تتجوز غالبا بيحصل العكس
لو انت عايز تبقي محترم و متدين و مش بتاع بنات فأعمل كده علشان ربنا مش علشان عايز ان جوازك يبقي سهل نتيجه انك عافف نفسك و ملكش في الحرام
اصعب مشكله هتواجهك لما تتكشف ان بعدك عن الغلط مفرقش في حياتك و ان زمايلك اللي كانوا بيعطوا و خاربنها اتجوزوا قبلك و تابوا و سعداء في حياتهم هتقول ابدء بقي اعط ما هو الحلال مش نافع 
هتتكشف ساعتها انك كبرت علي العط و مش هتعرف تعط خالص كل البنات الشابات هتلاقيهم اصغر منك بأكثر من 10 سنين  و مش هيبقي مقبول انك تخرج مع واحده شابه في كليه و انت راجل كبير المفروض تبقي عندك اولاد 
ساعتها هتكتئب زياده لان الحلال مش نا فع و لا الحرام نافع
و هترجع تقعد جوه القطر بتاعك مستني انهم يصلحوا الكوبري اللي قطع مشوارك و خلي قطر حياتك واقف من مكانه من سنين
و اه يــــــــــــــــــــــا افــــه

القول الصريح في نظريه الواحد الصحيح

حد سمع عن نظريه الواحد الصحيح
اعتقد كلنا سمعنا عنها بصوره اوي باخري
النظريه باختصار بتعتمد علي مبدء تقسيم الارزاق
يعني الاهل و الاقارب و الاصحاب بيسوقوا النظريه دي لينا لما يبقي حالنا مش كويس او ظروفنا صعبه
النظريه بتعتمد علي تفسير بيقولوا انه ديني ان مفيش حد بياخد كل حاجه و انك يعني لو معاك فلوس كتير فده معناه ان نصيبك من الصحه و السعاده و الهناء و راحه البال قليل و لو معاك فلوس قليل فنصيبك من الحاجات الاسابقه كتير اوي
و ان لو معاك فلوس كتير فانت يا عيني مش هتنام الليل من خوفك عليهم يتسرقوا و لا يضيعوا لكن لو فقير فأنت يا سلام هتنام و ترتاح و تاكل رز مع الملايكه لأنك مفيش حاجه تخاف عليها
لو معاك فلوس كتير فانت الشيطان مخليك ناسي ربنا و علي طول في الكباريهات و بتعط مع النسوان و بتعمل كل حاجه غلط و بتشرب خمرا و هتدخل النار
لو ممعكش في انت مش بتسيب السجاده و راجل بتاع ربنا و هتدخل الجنه
لو انت تعبان و شقيان علشان تكون نفسك و تعمل اسره و عمرك كبر و انت كده فأنت هتعيش مبسوط و عيالك هيبقوا حلويين و باريين بيك لو انت مرتاح و عملت كل اللي نفسك فيه من غير تعب  و لقيت واسطه للشغل و فلوس من اهلك علشان تعمل بيت و اسره فدول هيضيعوا 
دي النظريه بأختصار اللي بتتوعد كل واحد ربنا موسع عليه بالمرض و الصياعه و النار و كل واحد غلبان و مطحون و فقير بالجنه و الحياه الرغده و العوض
من الاخر لو بصيت حواليك و فكرت شويه هتلاقيها نظريه فاشله و كلها كدب و خداع
في ناس غنيه و عارفه ربنا كويس و بتستخدم الفلوس في الخير و في تعليم عيالهم كويس و عمرهم ما يغضبوا ربنا
علي العكس بقي تماما ممكن تلاقي واحد ظروفه صعبه بعد عن ربنا بسبب الظروف دي و مش في طريق المحرمات لأن الحلال صعب عليه يعني يسرق علشان يجيب اللي نفسه فيه يزني علشان يلبي حاجاته الجسديه
معظم الافلام المنتشره علي النت للشباب اللي مع بنات شغالين في الدعاره هتلاقي بيوت الشباب ي فقيره جدا و  و يا دوب فيها اساسيات
يعني الفقر معلمهمش العفه ولا طاعه ربنا و لا الفلوس علمت الغني الفجر و الفسق
غرض النظريه يا جماعه انها تهون علي الغلبان لأنه مش عارف ليه ربنا قتر عليه رزقه و ووسع علي غيره
مش عارف ليه صاحبه حياته افضل و اسهل و كل حاجه عايزها بتتحقق بسهوله و هو طالع عينه و مش عارف يحقق اي حاجه
مش عارف ليه قاعد في بيتهم لحد ما بقي عنده 28 سنه زي واحد اعرفه و في ناس من زمايله اشتغلوا و اتجوزوا و بقي عندهم عيال
و ممكن منهم يبقي واحد ميعرفش ربنا و ممكن منهم ناس تعرف ربنا
من الاخر كده حسبه الرزق احنا منعرفهاش و منفهماش
دي ربنا اللي بيقسمها و بيعملها يبقي مينفعش احنا نطلع و نقول حاجات ممكن اثبات انها غلط بسهوله و في الاخر تبقي طعن في صدق الدين بتاعنا
الرزق يا جماعه سر من الاسرار الالهيه و بيعتمد علي مشئيه و رغبه ربنا في انه يرزق عبد من عدمه 
يعني ممكن تلاقي عبد متفاني في العبادات و رغم ذلك حياته كرب و واحد ميعرفش ان في حاجه اسمها صلاه و تلاقيه عايش تمام و فلوسه في زياده
و ممكن تلاقي واحد يعرف ربنا و غني و واحد ميعرفش ربنا و فقير
بس الملاحظ ان الفقرا كتير منهم فقرهم و احتياجهم بيبعدهم عن ربنا و بيخليهم يعملوا محرمات كتير لأنهم مش عارفين يعملوها في الحلال
عامه الموضوع كبير و اتمني لو حد قرا الموضوع ده يرد عليا و يناقشني
و اه يــــــا افـــــه

10 سنين يعني (عقد كامل)

السؤال اشمعني 10 سنين الجواب هو لأن عدي تقريبا اكثر من 10 سنين بشويه من وقت تخرجي لدلوقت زي الوقت ده من 10 سنين كنت خدت الاعفاء من الجيش و قاعد بدور علي شغل و عندي امل كبير انه هشتغل بسرعه ( كنت قفا طبعا و محصلش )
طيب ايه اللي فكرك بالكلام ده ما ايه الجديد ما المدونه حكت الموضوع ده 100 مره
اللي فكرني هو حضوري لفرح احد اصدقائي من الدفعه و رؤيتي لبعض زملائي و زميلاتي في الفرح ده (زميلاتي دول شوفتهم لأنهم اتجوزوا من دفعتنا فكانوا جايين مع ازواجهم) لحد كده و الدنيا عادي و بيس بس اللي مش عادي و بيس هو انهم فعلا حسسوني اني عجزت
تبص للزميلات متقدرش تقنع نفسك انهم هما هما بتوع زمان عجزوا فعلا و بقوا من ربات البيوت و ما يتطلبه ذلك من زياده في الوزن و مش عارف ايه تحس ان قدامك حد شبه والدتك مش بنت عندها 32 سنه و تلاقيها جره عيالها كده و واضح علي وشها التعب و الشقا
و تبص للزملاء تحس انهم بقي شبه كلمه بابا اللي الواحد كان في فتره من الفترات شايف انه صعب يتقاله يا بابا علشان شكله صغير
شويه شعر ابيض و تجعايد بسيطه في الوجه و وتحس في وجوهم بالارهاق و التعب
من الاخر عجزوا مش هما دول الشباب اللي كان بيهزر و يضحك و مبتسم و متقائل بالحياه بقوا ناس مطحونين و طالع عينهم و شقاييين
لحد كده و جميل و هلاقي اللي يقولي احمد ربنا علي حالك و افرح بقي بدل ما انت مكتئب انك مش متجوز زي ما عمال تكتب
ارد و اقول اني بصيت في المرايه لقيت نفسي شبه زمايلي في الدفعه و قعدت اطلع صوري معاهم و لقيت نفس التغيير حصل ليا زي ما حصل ليهم لكن بنسبه اقل
الشخصيه بقت مختلفه و زادت عليها مسحه كأبه الشكل بقي في شويه عجز و الي ذلك
لكن الفرق بيني و بينهم انهم مشوا في المسار الطبيعي يعني هما عايشين ما يوازي سنهم بيربوا عيال في في عمر 5 او 6 سنين و يعتبروا اباء و امهات صغار اما انا فشكلي اتغير بس لكن حياتي زي ما هي
الموضوع مش اني عامل مناحه علي الجواز و العيال الموضوع اني في ال 10 سنين دول معملتش المفروض اعمله فالمفروض ابقي زيهم كده بعد 10 سنين كمان يعني لما ابقي في نص الاربعينات اللي ساعتها لا في صحه و لا في نفس و لا في روح انك يبقي عندك عيل عمال يوقع ليك حاجات علي الارض و تقوله عيب و كخ و كده
و مفيش قدره انك تجري و تلعب معاه و تلاعبه علشان بقيت راجل عجوز و دماغك غير دماغه
من الصدف برضه ان حضرت احد الزميلات اللي كانت من مزز الدفعه بس محدش فكر فيها علشان اسلوب اللبس و كده ايام الدراسه و لسه برضه لابسه المفتوخ و العريان و طبعا عامله عمايل في نفسها علشان تبين انها لسه شباب و ان عدم جوازها حافظ علي جمالها و رشاقتها  انوثتها و حاطه بقي عطور و مكياج علشان تداري فعل السنين لكن لو بصيت ليها عن قرب تلاقيها مكسوره و حاسه انها ناقصه حاجه و هي شايفه زميلاتها عمالين يسلموا عليها و يفرجوها علي عيالهم
الاغرب و الاعجب ان القاعده كان دمها تقيل و ان الناس اللي واحد كان بيستمتع بكل ثانيه من قعدته معاهم مبقاش قادر يقعد معاهم دقيقتين ازاي معرفش اعز اصدقاء و اصحاب الشباب و الكليه اللي مكنتش عارف تبعد عنهم مبقتش قاعد مبسوط معاهم ده بالعكس بتبقي قاعد منفوخ و مفيش اي كلام مشترك او اهتمام مشترك بالعكس حاسس انك قاعد وسط ناس خنقه و نفخ و عايز اليوم يخلص
ده عرفني قد ايه ال 10 سنين دول غيرونا من ناس حالمه و ظريفه لناس واقعيه و كئيبه
عرفوني ليه كانوا يقولوا لنا ايام الدراسه احلي ايام في العمر و لما تكبر هتزعل للأسف ده حصل فعلا
و اللي  يزعل اكثر انك متغيرتش زيهم يعني هما كلهم اتغيروا بنفس الشكل و بقوا قعدتهم مع بعض مش نفخ لكن انت اللي متغيرتش
عموما انا بدعوا كل واحد بيقرا الكلام ده انه يستمتع بحياته و هو صغير و ميفوتش فرصه انه يعيشها صح و لو قدر في يوم يرتبط بحد و هو في سن اصغر يبقي خير و بركه لأن الوحده وحشه خصوصا لما تبدء تكبر و تفقد والد  و والدتك و قرايبك 
و اه يا افــــــــــــــــــه

الاكتئاب و ايامه الهباب

 لاحظت في الفتره الاخيره ان في ناس كتير بتقولك الاكتئاب ده ضعف و و شخصيه رخوه و طريه لكن المفروض انك متتأثرش بحاجه و تفضل مسنح و متنح و مبتسم اصل عادي و لو لاقوك مكتئب تبقي مريض يا عيني و مش قد الدنيا
قولت مبدهاش بقي ندور ورا الموضوع لقيت ان الاكتئاب هو اشهر امراض العصر و زايد في الفتره ا لاخيره عند ناس كتير لعده اسباب منها الانترنت اللي بتخليك دايما شايف غيرك الي في نفس سنك بيعمل ايه و ا نت مش قادر تعمل زيه فبالتالي بتكتئب زائد ان الدنيا بقت اصعب و تحقيق الاحلام فيها بقي فيه صعوبد شديده
المهم وقعت علي مقاله بتقولك بعض اسباب الاكتئاب و بتقترح بعض الطرق لعلاجه
بس اللي شدني فيها انها بتذكر ان الحياه اللي مفيهاش جديد و اللي مفيهاش تطوير و لا تغيير تجيب اكتئاب
عامه احبيت احط المقاله للي يحب يقراها
http://lifehacker.com/where-to-start-when-it-feels-like-nothing-is-going-righ-1640250197?utm_campaign=socialflow_lifehacker_facebook&utm_source=lifehacker_facebook&utm_medium=socialflow
و اه يا افه

ناس و ناس

من كام اسبوع لقيت كده بتاع 500 واحد مره واحده دخلوا المدونه و كلهم من موقع واحد دخلت اشوف الحوار في الموقع ده اللي اسمه Nilemotors  اتفاجأ بقي بكميه شتيمه عليا غريبه و اللي يقولك فاشل و اللي يقولك مش عارف ايه
الحقيقه اتغظت
و بعد فتره من التردد قررت ادخل و اكتب ليهم رد بسيط
و كانت النتيجه كوميديه جدا
تقريبا 50% من الناس اللي ردوا علي البوست كانتوا متعاطفين او كنا لطفاء علي الاقل
لكن في ناس تانيه تقولك ا نت جاي تجيب زباين لمدونتك المهجوره و انت جاي تصدعنا و انت قارفنا ليه  مصدعنا و عامل دوشه علي الجواز و كلام من هذا القبيل
طيب يا عم اللي قرفان مني دخلت ليه و قريت و تعبت نفسك و عرفت ليه اني عايز اتجوز و مكتئب و قرفان و زهقان مكنت ريحت دماغك و خدتها من اخره
و مادام انا معجبتكش رديت عليا ليه رديت علشان تقولي يا سخيف و يا اللي مزهقنا يا ابو مدونه مهجوره
ده اللي ربنا قدرك عليه
جتك خيبه
الرسول قالك فلتقل خيرا او لتصمت ده اولا ثانيا واحد انت حسيت ان ظروفه مهبهه او كان في حياته قرف كتير بدل ما تهون عليه تقعد تشتم فيه
استقدت ايه من كده غير انك انسان مش طبيعي و مش سوي لأن في حاجه اسمها الرحمه  و التراحم انت متسمعش عنها
من الطبيعي ان اي انسان مهموم بيبقي محتاج كلامه مواساه مش تريقه و تقطيم
ام ال 50% التانيين اللي منهم اللطفاء و المتعاطفين و المشاركين فطبيعي تلاقي كلامهم حلو
علشان حاسين بيك
و اللي مش حاسس و لطيف بيقول كلام مهذب و ذوق و ميجرحكش
بس دي مصر و المنتديات تشبه حال البلد
كل واحد فاكر نفسه عدل و تمام  و هو جواه غلطات كتير بس بينكرها و بيهاجم اللي بيفكره بيها
ربنا يتوب علينا و عليهم
و اةةةةةةةةةةةة  يا افه