لم
ا شوفت الصوره دي حسيت انها بتصورني
شاب من بره و عجوز و من جوه
طيب هو انا عجزت بمزاجي لا طبعا حياتي هي اللي مشتني في الطريق ده سنتين مش لاقي شغل و لما الاقي يكون بمرتب ضعيف و لما اغيره بشركه بمرتب اعلي افضل سنين علشان اقدر افكر اني اتجوز
و لما احب اتجوز ملاقيش حد يرضي بيه
و لما ابص حواليا الاقي كل صحابي بقي عندهم عيال و اسر و محدش منهم فاضيلي
فأحس اني وحيد
اقول عندي ابويا و امي ابويا يمرض مرض كان هيروح فيه و افتكر ساعتها انهم مش هيفضلوا معايا طول العمر
كل ده طبيعي يخيلني حاسس اني عجوز
العجز بيخيلك عجوز لأن اللي في ايدك بتعمله بس برضه مفيش حاجه بتتغير
الواحد بيحزن علي العمر اللي بيجري من غير ما يحقق اي حاجه
من كام يوم قابلت واحد صاحبي صدفه بيودي ابنه المدرسه تخيل انت ان اللي من سنك عيالهم دخلوا المدرسه و انت لسه اصلا مخدتش اي خطوه في اتجاه الارتباط و الزواج
تخيل لو اتجوت بكره و خلفت علي طول هيبقي الفرق بيني و بين ابني 34 سنه
يعني ممكن اطلع معاش و هو لسه متخرجش و لو ليه اخوات ممكن يبقوا لسه في المدرسه
تخيل انك تبقي قاعد في البيت لوحدك لأن صحابك اختفوا من حواليك و مفيش مجال تعمل صحاب جديده
تخيل ان يجي العيد عليك متلاقيش حد تخرج معاه و لا تتفسح معاه
هتبقي عجوز ولا لأ
قدام الناس بترسم ابتسامه و ضحكه علشان محدش يحس باللي جواك و علشان متبنش ضعيف و حزين
لكن اللي جواك بيقتلك احلي سنين العمر جرت علي الفاضي لا عدت شاب صغير و لا بقيت في الاطار اللي الناس اللي في سنك بقوا فيه دور الاب و الزوج
طيب الحل ايه
انك تفضل راسم الابتسامه لحد ما تعجز و تبقي شبه الراجل ده و برضه تفضل مبتسم
انت تسمع تريقه الناس عليك و انك كبرت و معملتش حاجه في حياتك و تبص ليهم بأٍستهزاء و لا مبالاه رغم ان كلامهم بيقطعك من جوه
انك تخرج تمشي مع حالك تدخل سينما مع حالك تقعد في كافيه مع حالك
الحل انك تصاحب نفسك و تنسي الناس
بس للأٍسف الناس مش هتنساك و تسيبك في حالك
و اةةةةةةةةةةةةة يـــــــــــــــا أفـــــــه
اهلا بيكم النهارده حبيت اتكلم علي موقف افتكرته فجأه هو سخيف بس حبيت احكيه و اتكلم عن شعوري بسببه
الموضوع باختصار او مش باختصار مش هتفرق يعني اني مره جابولي عروسه من الاشكال النص لبه
العروسه كانت دكتوره صيدليه المهم رحت شوفتها لقيت البنت شكلها وحش و مناخيرها عامله زي المنقار كده و كلامها تحس انه عبيط بس حسيت انها طيبه
قررت بيني و بين نفسي اني ا رفض لما ارجع و بعدين صليت استخاره و كده و خدت3 ايام علي ارد فيهم
طبعا الحاجه شايفه ان 3 ايام دول كتير جدا مش عارف ليه رغم ان في بنات بتقعد اسبوع و اسبوعين تفكر بعد المقابله الاولي يتقابلوا تاني و لا لأ
طبعا كان التفكير نقفل الموضوع و لا نتقابل كمان مره و نتعرف اكثر
الحاجه بقت عقدت تزن و ناس طيبه و ناس محترمه و البنت شكلها بيضا و مش دايره و خام و مش عارف ايه
قمت قولتليها و ماله نقابلها تاني مع انها مكنتش عجباني بس مكنتش كمان رافضها تماما
المهم الحاجه جرت و كلمت ام العروسه لققت ام العروسه ايه بتقولها البنت لسه بتفكر و انا سايبها براحتها
اشمعني يعني من حقها تفكر و تاخد وقتها و احنا لازم نرد علي طول
الست وعدت انها هترد بعد يومين كمان يعني مجمل 5 ايام اتصلت و قالت كل شئ نصيب
بصراحه انا اتنزفذت لأني عصرت علي نفسي لمونه و قولت ماشي و هي قالت لا يعني انا اصلا مكنتش عايزها و رضيت بالعافيه اشوفها تاني و تقول هي لا A7A
المهم مش دي القضيه الحاجه بقي عملتها مناحه و يا خساره انا زعلانه عليهم كانوا ناس طيبين و انا هفضل اكلم الست علشان عجباني و هصاحبها قولتلها براحتك
مفيش اسبوع و البنت اتقرت فتحتها
هنا بقي انا ولعت و اتغظت جدا
لأنه من الواضح ان البنت شافتني و شافت غيري في نفس الوقت و قارنت بينا و اختارته
مش ا لقضيه انها اختارته بس القضيه انها شافتنا في نفس الوقت
ده انا كنت رافض المبدأ ده اصلا و كنت بقول اشوف عروسه عروسه و بعد ما اخلص واحده اشوف غيرها
و لما مره حبيت اشوف 2 عرايس سوا مخلصتش من كلام الناس و ازاي تلعب بمشاعر البنات و مش عارف ايه و برضه منفذتهاش و شوفت واحده واحده
القصد ان الوليه اللي امي فاكرها طيبه طلعت قراري و كنت معلقاني لحد ما تشوف الواد التاني و تختار الاحسن
بتختار الاحلي من فوستانين و لا كلوتين بنت المره
الموضوع ده كان غايظني و كنت عايز افش غلي
و اةةةةةةةة يــــــــــــــــــا افه
سلام عليكم لو حد بيقرأ مع اني متاكد تماما ان مفيش حد بيقرأ اللي بكتبه بس بالرغم من ذكك هكتب يمكن في يوم من الايام حد يقرأ الكلام ده و يلاقيه مفيد او يلاقيه مريح ليه انه مش لوحده اللي حاسس بالاحاسيس دي
تقريبا من 5 سنين حسين بالضياع كنت قربت علي عمر ال 28 سنه ( ايام الشباب بتخلص) و قربت من الثلاثين و ساعتها كان دافعي للكتابته و الكأبه هو اني خلصت اول 5 سنين من عمري بعد التخرج و معملتش فيهم اي حاجه و دول المفروض الناس علي اخرهم بتبقي اتجوزت او خطبت او علي وش جواز و بقت جاهزه للجواز علي اسوء الظروف زائد ان البعض منهم كمان بيبقي بدء يبقي مهم في شغله و بدء يترقي و يبقي ليه وزن و قيمه عند رؤسائه ايامها انا مكنتش حاجه من دي و حسيت ان العمر راح و ال 5 سنين راحوا اونطه بالنسبه لي بينما بالنسبه لي بينما بالنسبه لصحابي زي عبد ه العبقري اتجوزوا و بقي عندهم اسر و بدؤا مرحله جديده في حياتهم و ده يرجع في الاساس الي مساعده الاهل في شراء الشقه و المهر و الذي منه او اي العمل مبكرا في شركه من اللي مرتباتها كبيره فبالتالي الشاب قدر يجهز نفسه
المهم ساعتها تمنيت اني في ال 5 سنين اللي بعدهم ان اللي المفروض كنت احققه في اول خمس سنين احققه في ال 5 اللي بعديهم
و ده للأسف برضه محصلش و فضل حالي زي ما هو و اديني داخل علي ال 33 سنه و علي ال 5 كلاكيت ثالث مره بعد التخرج
في ال 10 سنين اللي فاتوا ناس اتجوزوا و خلفوا و ناس عيالهم دخلوا المدارس و ناس بقوا مهمين و ليهم قيمه في الحياه و انا زي ما انا اللي فرق اني عجزت بمعني الكلمه بقيت مش لاقي حد في حالي و هو في نفس السن يا اما في الاكبر اللي هو امتنع عن الجواز و فضل كده او الاصغر اللي هو لسه شاب و بيدور و الواحد لا عارف ينضم لدول و لا لدول
و طبعا مع الوقت تحولت من عريس ممكن يكون ليه ميزه لعريس ملهوش اي ميزه كبير في السن و امكانياته مش عاليه يعني مش مليونير و لا بيلعب بالفلوس و لا له منصب كبير يعوض سنه
يعني من الاخر لو رحت اتجوز واحده عندها 25 سنه و اتقدم ليها واحد برضه في نفس السن هو كمان 25 سنه هو لازم هيغلبني اكيد لاني مش مميز في حاجه تستاهل انها تضحي و تتجوزي
علي المستوي الانساني اللي حصل اني ايقنت اني ابويا و امي مش هيعيشوا ليا كتير السنه اللي فاتت ابويا كان هيموت و ربنا ستر و المرض كان هيخليني اعيش من غيره
يومها عرفت انه حتي الحياه اللي عندي اللي انا عايشها مبقتش مضمونه انها تفضل زي ما هي و اني هصحي في يوم من الايام لا الاقي ابويا و لا امي و ابقي وحيد و مقطوع من شجره في الدنيا
في اخر 3 سنين من ال 5 سنين دول شفت حوالي 10 عرايس و محصلش نصيب و ده اكد لي اني برضه من الناس اللي حياتهم لازم تمشي بصعوبه و يبقي اخر اللسته في كل حاجه في الدنيا
شعوري النهارده الصراحه احسن بكتير من ايام ما بدات المدونه رغم اني ظروفي بقت اسوء بس يمكن علشان الواحد اتعود علي القرف او الواحد خلاص عرف ان مفيش فايده فبالتالي الصراع اللي جواه بقي شئ اليف و مستأنس و الواحد عايش معاه
برضه في ال 5 سنين اللي فاتوا فضلوا صحابي يقلوا شويه شويه لحد ما ممبقاش عندي صحاب خالص
بقي صحابي هما زمايلي في الشغل و دول برضه مشوا في سكه الجواز و بقوا بيقلوا واحد ورا التاني و مبقاش فيهم حد فاضيلي
برضه في خلال الخمس سنين دي محدش عبر المدونه دي و اللي بيدخولها مش بيتكلموا و لا بيعلقوا و بيطنشوا و بيتجاهلوا كلامي و ده احباط اضاف لأحباطي تلال من الحزن
بيكون شعور جميل انك تلاقي حد يواسيك و يسمعك و يرد عليك لكن الواحد طلع بيكلم نفسه
عموما انا ناوي اكتب حته حلوه حلوه كده اسمها ال 30 بقوا 33 بعد ما عدي 3 سنين هلخص فيها شويه حاجات حصلت في ال 3 سنين الاخيره
و اةةةةةةةةةةةةةةةةةةةة يــــــــــــــــــــــــا أفــــــــــــــــــــــه
للرفض تأثير عجيب علي النفس لبشريه فالرفض يجعل النفس تشعر بنوع من المذله او الانكسار و يجعلنا نشعر في بعض الاحيان بالدونيه و نتسأل عن ما هو الخطأ فينا الذي جعلنا من المرفوضين
و لكن لنبدء فلابد ان نعرف ما هو الرفض
الرفض هو ان يقال لك لا او تمنع من الاستمرار في اداء نشاط معين تريد ان تفعله
مثلا يمكن ان يرفض طلبك للالتحاق بمدرسه معينه بنادي معين او وظيفه معينه او ترفض عن تقدمك لعروسه ما
نقلب بقي كلام عامي
اسوء شعور للأنسان هو شعوره انه مرفوض
يعني لما تكون مقدم في وظيفه معينه و بعد الانترفيو محدش يكلمك او يطنشوك او لو شركه محترمه تبعتلك rejection letter ساعتها بتحس بقمه الدونيه ليه سابوني ليه اختاروا غيري ايه عيبي ايه مشكلتي اشمعني الناس التانيه اختاروهم و انا لا
و لكن هذا الشعور لا يقارن ابدا بشعور الرفض في العلاقات البشريه يعني لما تتقدم لواحده عايز تتجوزها و ترفضك
بتبقي قمه القرف
لو في حد بيقرا الكلام ده و بيقرا المدونه هيعرف اني من زمان مش عارف اتجوز نتيجه الظروف الماديه بس تقريبا من سنه و نص اقدر اتجوز يعني اقدر اوفر الاساسيات المطلوبه للزواج في وضع متوسط لا هو عالي اوي و لا واطي اوي
المهم بدأت ابحث عن عروسه علي طريقه زواج الصالونات و ده انا هكتب عليه لوحده بقرفه و زهقه و زبالته
المهم في المجمل شفت حوالي 8 عرايس اترفضت من 6 و 2 كانوا لسه عايزين يتعرفوا عليا اكثر قبل ما يخدوا قرارهم و الاثنين دول مكنوش عجبني دول اللي انا شفتهم في رفضوني قبل ما يشوفوني بمجرد انهم عرفوا اني مش هجيب ليهم القصر المطلوب و لا الفيلا الكبيره رغم انهم من طبقه اجتماعيه متوسطه و عاديه بس عايزين واحد يجيب ليهم قصور و فيلات
يعني انا مرفوض بنسبه 75 %
الموضوع في الاول مكنش بيضايقني و لا كان بيشغلني لكن لما العمليه زادت حسيت بالحزن اقعد افكر هو السبب ان عندي 32 سنه و نص و لا السبب في شكلي
و لا السبب ان الي بقدمه للبنت من امكانيات بيوازي اللي بيقدمه شباب اصغر من ب 7 سنين عن طريق مساعده اهاليهم فبالتالي البنت بترفض تقولك ما اخد اصغر بنفس المواصفات مادام الاكبر معندهوش ميزه عنهم
طب هو ذنبي ان دي ظروفي و انا ابويا مقدرش يساعدني فأضطريت اعتمد علي نفسي هو الاعتماد علي الذات بقي عيب و دلوعه بابا بقي هو الحلو
بالنسبه لشكلي فانا بني ادم عادي لا وحش و لا حلو و ممكن يكون فيا بعد الوسامه كمان
بالنسبه لتعليمي فأنا راجل مهندس و بالنسبه لأخلاقياتي فانا راجل ملتزم دينيا و مش بتاع بنات و مش بصاحب بنات و بدور علي الحلال
طب يبقي ايه الغلط فيا
ممكن واحد يقولك اصل ده نصيب جميل انا متفق انه نصيب بس انت مش شايف ان نسبه 75% رفض دي مش كتير ده لو اعتبرنا ان 25 % دول وافقوا عليا و ده محصلش زي ما وضحت قبل كده
كلها 5 شهور هو هيبقي عندي 33 وابقي بشوف زمايلي اللي عيالهم قربوا يدخلوا 2 و 3 ابتدائي و انا لسه بدور علي عروسه ترضي بيا
شايف الاحساس انك تدور علي حد يرضي بيك
من انك تدور علي حد يبقي عجبك و تختاره شايف الفرق بين انك تختار و انك تتمني ان حد يختارك بغض النظر عن احساسك ايه ناحيته
اني بقي قربت من الاحساس ده انا دلوقت حاسس اني لازم ادور علي حتي لو قرد بس يكون راضي بيا و مش مهم احساسي نحيته ايه عاجبني و لا مرتاح ليه و لا المهم هو عايز ايه
الوقت جري من الواحد و مش عارف ايه مشكلته و اللي يضحك ان من ضمن الناس اللي رفضتني بنات معفنه اه و الله اسف اني بشتمهم بس بنات شكلها يادوب يعتبر مقبول و يمكن اقل من المقبول يعني من الاخر العرسان مش بتجري وراهم و لا هما ملكات جمال الميزه اليتيمه اللي فيهم و اللي مفيش تأكيد عليها غير كلام الشخص اللي مرشحهم ليا انهم ذوات دين و محترمات و مش بيعملوا علاقات و بنات مستقيمات
و ده كلنا عارفين انه ممكن يطلع مش صح
تخيل انك بترفض من ناس زي دول طب لو كنت بقي دورت علي حد يملي عيني و يعجبني كان عمل فيا ايه كان تف علي وشي في يوم المقابله و سابني و مشي
و الله انا مستغرب و بسأل نفسي هو ايه الغلط الي فيا و بسأل نفسي اخرتها ايه
كان دايما يقولوا انا لراجل مش بيتأُر بالرفض لكن البنت لما تترفض بتنكسر
انا بقي ضد الكلام ده الرفض المستمر بيأُثر في الراجل و بيخليه حاسس انه ولا حاجه
بيخليه حاسس ان الدنيا دي كلها مفيهاش دي يرضي بيه و يحب ان يرتبط بيه و يبقي نصه التاني متخيل انا في بلد فيها 85 مليون يبقي ده وضعك
و تخيل بقي اذا كان البنات الي شكلها مقبول بالعافيه و لازم تعصر علي نفسك لمونه علشان تقبله مش راضيين بيك يبقي اللي هترضي بيك هيبقي شكلها عامل ازاي
علي احسن الظروف هتبقي عائشه الكيلاني ولا فوزيه اللي كانت بتضرب بالروسيه في الافلام يعني من الاخر واحده بنعتبرها ست علشان عندها اعضاء الانثي الجنسيه فقط لا غير اه و الله
الرفض طول عمره بيلاحقني بعد اعدادي اترفض اني التحق بمدرسه المتفوقين في ثانوي في مدينتي علشان انا من بره الاداره التعليميه و لاو عايز التحق يبقي لازم ابقي جايب 25 درجه زياده عن المجموع اللي بتخده المدرسه من ابناء نفس الادراه التعليميه التابع ليها مدرسه المتفوقين
لما اتخرجت قعدت سنتين اترفض من شركات و مكاتب و حيت ناس بتركب دش مرضتش تشغلني لحد ما ربنا اكرم و لقيت شغل
و دلوقت برضه بترفض كعريس حتي قبل ما اكون انا خدت قرار بترفض من اول نظره
الرفض بيتحول لحاجز صخري بتتكسر علي احلامي و بتضيع علي نتوءاته سنين عمري و بالتالي الاقي نفسي في اخر اللسته في كل حاجه
اشتغل متأخر و اتجوز متأخر و اخلف متأخر ده إن اتجوزت و خلفت
هبقي راجل عجوز و عيالي لسه عندها 12 و 13 سنه
انا هكتفي بالكلام كده و ان شاء الله هكتب عن الجواز النيله المسمي بزواج الصالونات
و اه يــــــــــــــــــــــــــا افــــــــــــــه
ال 132 عربيه مشهوره جدا في وطنا بتمثل اخر موديل من موديلات فيات اللي نزلت بأرقام زي 127 , 128 و كده و برضه بتمثل ليا اخر محاوله لملاحقه الحلم بتاع الناس الطبيعين اللي يلحقوا يبدؤا حياه طبيعيه في العشرينات او اول الثلاثينات علي اخر تقدير
بعد ايام معدوده هيبقي عندي 32 سنه بالتمام و الكمال و هو عمر غريب عجيب رهيب ليه
لأنه عمر ملهوش ملامح سنه زي اي سنه المفروض تبقي ايام بتقضيها لبلوغ هدف يعني بتشتغل فيها لتبلغ الهدف
انما بالنسبه ليا مفيش هدف و لا مني للحياه غير رقم اتضاف لعمري اللي بقيت بتكسف منه
علشان كل واحد يشوفك يقولك هتتجوز امتي مش يالا بقي ايه يا بني انت مش عايز تتجوز ليه
لو في حد متابع المدونه هيفتكر اني من 4 سنين لما بدئتها كتبت عن ال 128 و ان ازاي المفروض الواحد مطلوب منه انه يحقق كل احلامه في خلال اول 5 سنين من التخرج و اللي ضاع منهم سنتين في البيت ب النسبه ليا
دلوقت الخمس سنين الثانيه اوشكت علي الانتهاء و انا محلك سر بنفس الكلام و نفس الوضع و نفس الظروف الوحشه اللي بتسوء يوم عن يوم
بعد ال 132 هكون اتخرجت تقريبا من 10 سنين و هكون المفروض قطعت تقريبا نص عمري اللي المفروض اكون فيها بقيت حاجه
يعني اللي مش بيتجوز بيعيش حياه بوهيميه او بيدي وقته للشغل او بيشتغل في مكان بيكون وصل فيه للقمه لأنه مديه كل وقته و اهتمامه ما مفيش اسره بقي و ده طبعا مش انا
انا لسه في القاع و شغال في مكان مينفعش اطلع فيه و اعلي
و المتجوز بيكون عمل اسره و اطفال عايش ليهم و علشانهم و سعيد بيهم رغم منغصات الحياه برضه طبعا مش انا
انا لسه زي ما انا
ده حته المدونه اللي عملتها محدش بيعبرها رغم اني عملتها في الاول و انا متخيل اني بعد سنتين بالكتير هكون بقيت في حال افضل و هكتب و اتريق هنا علي اللي كتبته زمان و لكن هيهات
يبدو ان الدنيا مقسمنا ناس بتتأخر في كل حاجه و ناس بتعمل كل حاجه بدري شغل جواز اطفال مناصب....... الخ
ساعات بحس ان نظريه الواحد الصحيح دي في الاخره مش في الدنيا ( ان كل واحد اكيد نقصه حاجه )
عموما انا عايز اتكلم في شويه سياسه اتكلم عن شعور بدئت افكر فيه هو هل انا حقا اريد الزواج و الاستقرار ولا انا عايز اتجوز علشان مفيش حاجه تانيه اعملها
برضه عايز اتكلم عن الغربه و Il Divo هتقولي ايه علاقه الغلابه بيهم هقولك هتعرف لما احكيلك
برضه عايز اتكلم عن بعض الناس اللي صادفتهم في حياتي و سافروا بره مصر و بقوا دكاتره و ازاي هما بيتصرفوا
برضه عايز اتكلم عن تجارب جواز صالونات فاشله و ترجع لظروفي الماديه اللي خلتها فاشله بس اطمنوا لا خطبت و لا اتجوزت كلها محاولات بأت بالفشل من اول مقابله
عموما انا بتمني لكل انسان حظ احسن مني و انه ميوصلش ال 132 الا و هو محقق ما يتناسب مع هذا العمر
و اخيرا اةةةةةةةةةةةةةةةةةةةةة يا افه
اولا كل عام و انتم بخير عام اخر مر بقرفه و زهقه و كأبته و لا جديده السنه زي السنه و اليوم زي اليوم و الشهر زي الشهر
ربنا مش بيتوب علي الواحد ابدا الامل في بكره انعدم للأسف
موضوع النهارده كنت عايز اتكلم عليه من زمان ايه هو هو طبعا البيض بوك او الفيس بوك زي ما بنسميه
اللي هو عباره عن مكان مساعد علي الاكتئاب يعني تدخل تلاقي فلان كل شويه يكتب كومنت و تلاقي مليون واحد يردوا عليه و انت و لا حد يعبرك فلان كل شويه مسافر في حته شكل و ضفحته ملاينه صوره في الاماكن اللي بيروحه و هو بيبتسم في بلاهه و سعاده
فلان عمال يترقي كل شويه و فلان في منتهي السعاده مع مراته و عمالين يحبوا في بعض علي الفيس بوك
و فلان عياله دخله المدرسه و فلان ربنا رزقه بعيله الرابع
تفتح الفيس بوك او البيض بوك تلاقي كل ده قدامك و تحس انه بيتباض عليك تحس انه بيفكرك بفشلك و عجزك انك تكون زي الناس دي او تححق حتي جزء صغير من اللي عملوه
لا حد بيعبرك و بيعمل تعليق علي اللي بتكتبه معندش صور الا جنب البحر في اسكندريه و لا جنب القناطر الخيريه علشان تحطها
معندكش لا ترقيات و لا زوجه و لا اولاد تتفشخر بيهم
بمجرد انك تفتحه 5 دقايق بالظبط يجيب اكتئاب يكفي سنه
انا فين من الناس دي
و يجيي عمر الثلاثين و يعدي بسنه او سنه و نص زي حالاتي ساعتها يتحول الفيس بوك الي بعبع
بقيت منتهي الصلاحيه يا مان انت حاجه لم يتم استهلاكها في وقتها الصح
يعني لا عملت اسره و لا عارف تعمل
و لا ليك نجاحات
و صحابك كلهم اختفوا و سابوك ما انت مختلف
و بقيت متأخر عن السن الطبيعي للزواج و الابوه و النجاح
انت من اللي حظهم قليل في الدنيا و دي كلمه تطلق علي من لم يكن له في متاع الدنيا نصيب
انت لا شئ
ده اللي بيفكرني بيه الفيس بوك لما افتحه
زائد لما حد يفتكرني و يعبرني
بيكون تعبير من نوع التريقه
بقي ده اللي كنا بنقول هيوصل
بقي ده الي كنا متوقعين ليه مستقبل باهر
ده بقي اخر اللسته
ده محدش بيحاول يفكر يسأل هو بقي فين دلوقت
لأنه تحت اوي
خارجه مجال المنافسه و المقارنه
تلاقي واحد كل كام شهر يقولك متتجوز بقي
و لا متشوفلك شغلانه تانيه
ده الناس شبعت غنايم و انت يا خايب نايم
المهم الجود نيوز بقي
ان ابيض بوك ده اكبر فطشه في العالم
يعني من الاخر كل واحد من الناس دي عنده اللي قرفه و مطلع عينه و حياته مش ورديه زي ما هو بيمثلها علي الفيس بوك
من الاخر محدش بيشارك الاوقات المقرفه في حياته
بيشارك الاوقات الحلوه بس
و الوحش بيشيله و يخبيه
علشان كده تلاقي الناس اللي في فيس بوك دايما سعداء
لأن اوقات التعاسه مش بيكتبوا عنها
و اللي بيعمل تعليق علي حاجات بيعملها من منطلق قدم السبت علشان ترد انت عليه لما كمان هو يكتب حاجه
من الاخر الفيس بوك كدبه كبيره
لكن اللي يغيظك
ان رغم كل ده في ناس ليها اوقات سعيده و اوقات وحشه
اشمعنا انا كل اوقاتي وحشه
و اةةةةةةةةةةةةةةةة يا افه
انا لما اكبر هسكن في قصر كبير و يبقي عندي جنينه كبيره غير اني هبقي ارجل اعمال ناجح جدا و الفلوس هتبقي معايا كتير و يبقي عندي كده 3 او 4 عربيات مرسيدس علي فيراري و بي ام دبليو و طبعا البنات الحلويين كلها هتجري وريا و اختار احلي واحده في البلد علشان تبقي مراتي و الناس كلها تحسدني علي اللي انا فيه ما انا وسيم جدا و شعري ولا شعر ليوناردو دي كابريو
و كمان هزور كل بلاد العالم انا و مراتي و نتفسح و نشتري كل اللي عايزينه و عيالي هيتعلموا في بريطانيا بدل التعليم الزباله اللي هنا
اللي فات ده كان احلام طفل معظم الاطفال بيحلموا كده و متوقعين ان ده اللي هيحصل
مع الوقت يبدء الحلو يقل شويه شويه مع الوقت يبدء الشعر يقل شويه شويه لحد ما يروح و ميبقاش في وسامه تجري وراه البنات علشانها مع الوقت مفيش فلوس كتير بتيجي و لا عربيات و قصور و اكبر سفريه ممكن يسافرها هي انه يروح يصيف في العين السخنه و ساعتها يعمل اعلان في كل حته و يتباهي بالسفريه دي
احلامنا عبيطه جدا دايما بنحلم باللي عند ناس بيمثلوا نسبه 1 علي 1000 من باقي المجتمع و بالتالي بتصيبنا الكأبه بسرعه فلا احنا عارفين نحقق احلامنا و لا احنا عارفين نحقق جزء منها
بيصدمنا الواقع اللي مش بيدينا فرصه ان نلاقي شغل او وظيفه و نقعد في البيت مستنين في طابور البطاله الطويل
و لما بنشتغل بنلاقي ان علشان نجيب حجره و صاله عايزين 10 سنين من الادخار و بعدها تيجي العروسه اللي هي لا اموره و لا احلي بنت و لا بنت الباشا و متعجبهاش الحجره و الصاله و تقولك من حقي اسكن في حي راقس و اسكن في شفه واسعه رغم انها ممكن تكون ساكنه في وضع اسوء من اللي انت موفره
لما الوقت بيعدي و شكلك بيتيغير و شعرك بيروح ( مش كل الناس بيحصلها كده طبعا ) غالبا بتاخد واحده مش حلوه اوي و ممكن متكنش حلوه خالص ما انت لا مال و لا جمال و لا سكن عدل فغالبا بتختار واحده عايز الستر و السلام و انت في اعتبارها ضل راجل و لا ظل حيطه مش انت حلمها و لا انت املها انت مجرد علاج مضاد للعنوسه بالنسبه ليها
غالبا بتختاروا بعض غصب لا هي عجباك و لا انت عاجبها انت اختارتها علشان هترضي بظروفك اللي متخليش بنت من اللي انت بتحلهم بيهم تختارك و هي بتختارك علشان مفيش عرسان كتير و من الاخر انت احسن حاجه ممكن تجيلها
ما البنت الحلوه بيجيلها عرسان كتير و خصوصا لو الحلاوه دي جنبها دين و اخلاق و يا سلام لو بنت ناس مستريحه اتفرج علي كميه العرسان اللي هتجيلها
ما طبيعي ( مال و جمال و دين و اخلاق) تيجي انت بقي تتقدم و انت معندكش حاجه مميزه مش وسيم و ممكن تكون اقرع ( مع الاعتذار للصلع اللي انا شايف ده مش عيب عندهم بس و الله في ناس بتترفض علشان صلع) و السكن اللي عايز تسكنها فيه يعتبر عشه فراخ جنب اللي هي عايزه تقبل بيك ليه بقي و ممكن يتقدم ليها شاب لسه متخرج مش معدي ال 30 زيك بس الشاب ده ابوه جابله كل حاجه العربيه و الشقه الفخمه و دفعله المهر و العفش الشيك و كله تمام مقعدش سنين زيك يحوش علشان يجيب حجره و صاله و معداش عمره علي الفاضي يبقي لما تقارب بينك و بينه
شاب في اوائل العشرينات لواحد في الثلاثينات
شقه فخمه في ارقي مكان لحجره و صاله في مكان علي قد الحال
العربيه بتاعته قصاد الميكروباص اللي بتركبه
وسامته اللي هتكون موجوده حتي لو ملامحه مش جميله لكن بسبب سنه الصغير لشكلك اللي بان عاليه الكبر و السن و غيره
هي دي المعادله الغريبه اللي موجوده و عمر الوقت ما هيحلها هو بمساعده والده وفر عمره و سنين حياته و اختار البنت اللي انت بتتمني واحده زيها اما انت بعمرك يا دوب تختار اي واحده و السلام ترضي بظروفك
مأساه مش كده
هي دي الدنيا يا شباب احلام كبيره في سن صغيره و بمجرد ما تكبر تكتشف انك مش من المفروض تحلم كده
كان المفروض لما تحلم تشوف ابوك ظروفه ايه غني و لا فقير و هيساعدك بكام و مستعد يعملك ايه
انسي خالص انك تعمل حاجه لنفسك الا لو مخطط انك تتجوز علي ال 50 ساعتها في احتمالات قويه انك تقدر تنافس الشاب اللي وصفتهولك بس تبقي وريني مين البنت اللي هترضي ترتبط بيك
و اةةةةةةةةة يا افه
