بوست النهارده مش عني ولا عن اختي ولا عن اللي شبهنا بوست النهارده عن كل اب و ام لحد شبهي او شبه اختي او شبه ناس كتير غيرنا
اب و ام ربوا عيالهم و كانوا مستنيين انهم في يوم يجوزوهم و يفرحوا بيهم و بعيالهم و يموتوا و عيالهم و احفادهم حواليهم و هما مطمينين ان عيالهم بقي عندهم اسره و حياه من بعدهم
الاب و الام بيخلفوا العيل و من اللحظه دي بينسوا نفسهم و بينسوا احتياجتهم و بيبقي كل حاجه في حياتهم موجهه للطفل اللي جابوه فلوسهم تركيزهم مجهودهم و غيره
ياكلوه و يشربوه و يحموه و يغيروا له لما يعملها علي نفسه يكبروه و يربوه و يدخلوه احسن مدارس يقدروا عليها و يجبولوا احسن لبس يقدروا عليه
يجوا علي نفسهم علشان يعلموا له كل اللي يتمناه
يعزوه و يدلعوه و يعملوا كل اللي يقدروا عليه علشان يعيش زي ما هو بيحلم
و هو بيكبر بتكبر احلامهم معاه و انهم نفسهم يشوفوه في مكانه كبيره وحياه سعيده بلا الم و لا حزن ولا وحده و نفسهم اي الم او حزن يجيلهم هما بدل ما يجيلوه
يكبر الولد او البنت و تبدء خيبات الامال و تحطمهما ميلاقيش اولا متلاقيش شغل كويس او ميشتغلش خالص و يبدء الاب و الام دخلهم يقل نتيجه طلعوهم علي المعاش و ميدقدروش يسعادوه و لا يعيشوه اللي كان عايشه زمان خصوصا لو بنت و مش بتشتغل
تجري السنه ورا السنه و كل الشباب و البنات اللي حواليهم بتتجوز و بتجيب عيال الا ابنهم او بنتهم يقعدوا يدعوا كل يوم و يتمنوا ان ابنهم و بنتهم يتجوز و يتخيلوا من جواهم انه مكتوب له الجواز بس لسه النصيب او الوقت مجاش
يجري العمر بيهم و تصبهم امراض الشيخوخه و يحسوا ان الاجل قرب و تلاقي في عينهم الحسره علي عيالهم الحسره علي الامال اللي كبرت كل سنه مع الابن او الابنه و في الاخر اتكسرت علي صخره القدر و النصيب و المكتوب
يمرضوا و يدخلوا مستشفيات و يلاقوا عيالهم بتداين و ساعات بتشحت علشان تعالجهم و يحسوا انهم بدل ما كانوا سبب سعاده لعيالهم بقي حمل عليهم و انهم بيتسسبوا ليه في مشاكل هتفضل حتي بعد ما هما يقابلوا وجه كريم
يبصوا لعيالهم و يحسوا انهم هيسيبهوهم لوحدهم من غير ما تبقي ليه حياه ولا حد ياخد باله منهم ولا حد يحبهم
و في الاخر يصحي الولد او البنت في يوم ميلاقيش ابوه او امه و يتقاله ده مات و تعدي سنين قليله و اللي فضل عايش منهم سواء الاب و الام يموت هو كمان و ميبقاش ليك حد
يموت الاب و الام و هما متحسرين علي عيالهم و علي مصيرهم انهم هيعيشوا في وحده لوفاتهم و مش هيلاقوا لا صدر حنين و لا حد يرموا عليهم همهم ولا حد يحسوا في وجوده انهم مش لوحدهم و ان في حد بيحبهم بجد
تلاقي ايامهم الاخيره في مرضهم و تلاقيهم بيفكروا هنسيب الولد لمين و لا البنت لمين و هو كبر و عدي الاربعين و لا كبرت و عدت الاربعين و لا هتتجوز و لا هتبقي ليها حد
تبص علي بوست واحد متصور مع ابوه من شهرين او من اسبوعين و بعدها بشويه تلاقيه بيقول ابويا عيان و بعدها ادعو له بالشفاء و بعدها نعي للاب او للام
و تبقي لوحدك يمشوا و هو متحسرين عليك و يسيبوك انت كمان في حسره من غيباهم و من اختفاء اخر ناس شايف انهم هاممهم همك و حاسين بوجعك
الاب و الام نعمه عظيمه و بيتحسروا علي مصيرنا اكتر مننا و بيحسوا بخيبه املهم في انهم يشوفوا عيالهم ربنا مديهم كل اللي عند الناس التانيه
من يومين توفت ام البنت اللي كتبت عنها في البوست السابق و سابتها وحيده لا اب ولا ام و حد في الدنيا و يا ريت كده و بس عندها مشاكل الدنيا و الاخره و مفيش حد يقدر يحلها الا الله
ام البنت كانت متحسره علي بنتها جدا انا عارف الشعور ده لاني بشوفه في عين امي و هي متحسره عليا و علي اختي
بشوفه لما تلاقيني بقولها اني تعبان من حاجه او خلقي ضاق او غيره و الاقيها تقولي انت لسه في عزك و انت لسه صغير و بعد شوفيه تحس في عينها ان صعبان عليها ان عيالها كبروا و بقوا كاسريين الاربعين و لسه حالهم متغيرش من 20 سنه
لما تشوف ان اخر حاجه حصلت لعيالها و اخر انجاز هو تخرجهم من اكتر من 20 سنه و بعد كده انهم لقوا شغل و الدنيا وقفت علي كده
يصعب عليك لما يجتمع المرض مع الحسره عليك في امك او ابوك يصعب عليك لما يبقوا عارفين ان هيسيبك لوحدك في مواجهه مشاكل لا تنهتي بعد وافتهم
ديون كتير و انك مش هتلاقي سكن لان صاحب البيت هياخد منك الشقه و انك مش هتعرف تاكل لان انت مش بتشتغل و القرشين اللي كانوا معاك صرفتهم علي علاجهم قبل الوفاه و ياريتهم عاشوا و بقيوا ليك لا ماتوا و سابوك و هما في حسره و حزن عليك
حسره الاهل علينا اضعاف حسرتنا علي نفسنا خصوصا و هما في اخر عمرهم و في ايامهم الاخيره احساسهم انهم هيسيبوا عيالهم في الدنيا وحيدين بيقتلهم اكتر ما بيقتلنا
ربنا يرحم كل اب و كل ام
انا خايف جدا من اليوم اللي ملاقيش فيها ابويا و امي مش علشان هيسيبولي مشاكل لان الحمد لله الجانب ده ربنا راحمني منه بشتغل وبيتنا اللي ساكنين فيه ملك مش ايجار لكن انا خايف لاني مش هلاقيهم و هعيش انا و اختي كده في حسره وحيدين زي الكلاب
ادعو للبنت اللي امها اتوفت ربنا يوسع رزقها و يفتح عليها و يرزقها اللي يساعدها في مشاكلها و يرحم امها و يغفر لها و يجعلها من اهل الجنه
و بمناسبه اني كنت قايل اني قريبا جدا هتوقف عن الكتابه لاني بغض النظر عن اني بقيت بحس انها مش بتريحني و عن اني بقيت بكتب كلام متكرر بقاله سنين بقي عندي احساس ان لازم انهي الكلام و الكتابه و ان الوقت حان لده
مش عارف هكتب كام بوست كمان بس المؤكد اني هتوقف فعلا في خلال شهرين او ثلاثه علي الاكثر
اللي متوقعه اني هكتب ملخص يمكن يفيد حد و ا كتب بوست ختامي اتكلم فيه عن اللي متوقعه في بقيه عمري من فقدان لابويا و لامي و و الوحده اللي هعيشها انا و اختي و المرض اللي هيصيبنا مع العمر و مش هنلاقي حد جنبنا و وصولا لان حد فينا هيدفن التاني و اللي هيعيش بعده مش هيلاقي حد يدفنه
في الاخر هو امر الله حتي لو معجبناش و اعترضنا بس فعلا هموم الدنيا كتير و عكس ما الواحد في شبابه كان فاكرها و فاكر ان المستقبل الوردي مستنيه
بتستناه مصايب و كوارث و احزان
زي البنت اللي اجتمع عليها فقدان الام مع مرضها مع الديون مع احتماليه كبيره لفقد مكان سكنها مع انها مكنتش بتشتغل مع انها خلصت ميراثها من ابوها علي علاج امها و باعت عفش بيتهم و اجهزتهم علشان العلاج و يا ريت امها عاشت ليها مع عدم الزواج مع الغربه في بلد ملهاش فيها حد
فعلا اللي يشوف مصايب الناس تهون عليه مصيبته
يا عم فكك من ابوك و امك هما علي الاقل عاشوا حياتهم و بعدين كان الافضل من شعورهم بالحسره ده اللي لا هيودي ولا يجيب انهم يدخروا فلوس يساعدوك بيها في الشقة و الجواز زي ما ابهات كتير ساعدوا ولادهم
ردحذفلو حضرتك مسلم هرد عليك برد واحد " وَوَصَّيْنَا الْإِنسَانَ بِوَالِدَيْهِ إِحْسَانًا ۖ حَمَلَتْهُ أُمُّهُ كُرْهًا وَوَضَعَتْهُ كُرْهًا ۖ وَحَمْلُهُ وَفِصَالُهُ ثَلَاثُونَ شَهْرًا ۚ حَتَّىٰ إِذَا بَلَغَ أَشُدَّهُ وَبَلَغَ أَرْبَعِينَ سَنَةً قَالَ رَبِّ أَوْزِعْنِي أَنْ أَشْكُرَ نِعْمَتَكَ الَّتِي أَنْعَمْتَ عَلَيَّ وَعَلَىٰ وَالِدَيَّ وَأَنْ أَعْمَلَ صَالِحًا تَرْضَاهُ وَأَصْلِحْ لِي فِي ذُرِّيَّتِي ۖ إِنِّي تُبْتُ إِلَيْكَ وَإِنِّي مِنَ الْمُسْلِمِينَ"
ردحذفهو انا قولتلك روح اقتلهم!! انا كل اللي قصدته ركز علي نفسك و اعمل اللي في مصلحتك يعني انا مثلا كنت هتجوز من ٦ سنين بس البنت كانت من محافظة تانيه و كانوا اهلها موافقين انها تعيش بره محافظتها بس امي رفضت و انا مشيت وراها من باب طاعة و بر الوالدين لحد ما اتسوحت و اهو داخل علي الاربعين و ملقتش واحده تانية مناسبة زيها انا اتعلمت ان الانسان يعمل اللي في مصلحته حتي لو كان ضد رضا الوالدين لانهم مش هينفعوك في الاخر لما تكبر و تعيش بطولك و حياتك تبقي تعيسه
ردحذفطيب انت افترضت ليه ان الموضوع كان قدر بس السبب الظاهري هو ان والدتك رفضت ده اولا ثانيا انا اهلي مكنوش سبب اني متجوزتش لحد دلوقت
حذفامال مين السبب
ردحذفللاسف السبب ان نصيبك و قدرك كده يا باشا المفروض مادام قربت علي الاربعين تبقي اكيد فهمت و اكتشفت ان مفيش حاجه في ايدك اصلا و انت التوهمات و التخيلات بتاعه انت تصنع مستقبلك و انت تحدد من تكون و انت تملك زمام حياتك كله اونطه و ان القدر و الظروف و النصيب هي اللي بتخيلك في حته بعيده عن الحته اللي انت عايزها للاسف الشديد في ناس كتير مش هتقنتع بالكلام ده خصوصا اللي حياته ماشيه حلاوه و قريبه جدا من احلامه و خططه لانه متخيل انه هو اللي اتحكم فيها و خططها و بذكائه و تخططيه و عبقريته و مهارته وصل للي هو فيه
ردحذفبص مع احترامي ليك لكن انا مش بتفق معاك الانسان فعلا بيصنع قدره سواء بوعي منه او بدون يعني انا مثلا ليا واحد صاحبي لما جه يتجوز اهله عارضوا الجواز برضه بس هو اصر و فرض رأيه و حاليا متجوز و عنده عيلين و ده نفس اللي حصل معايا بس الفرق بيني و بينه ان انا استسلمت لكن هو اصر و كان عارف هو عايز ايه و صمم عليه و بكده هو امتلك زمام امره بايده صدقني يا صديقي احنا علشان ثقافتنا الدينيه بتأمرنا بطاعة الوالدين فبقينا نطيعهم طاعه عمياء بس هما في النهاية بشر و مش بالضرورة تكون ارائهم صحيحة و ممكن تكون اوامرهم لمصالح شخصية انا مش بقولك ان هما السبب بنسبة ١٠٠٪ لكن هما جزء من اللي حصل بافكارهم المغلوطة اللي زرعوها فينا بأنك لازم تكون جاهز تماما قبل ما تتقدم لواحده و لازم اللي تتجوزها تبقي من نفس مدينتك و الاشتراطات اللي حطوها و عقدت الموضوع تاني سبب لتأخرنا في رائي من خلال قرائتي لبعض بوستات المدونة هو انك ديما بتعتمد علي الناس يجيبوا لك عرايس و انا كنت زيك برضه طاب بس ليه انت متجبش لنفسك انت راجل مهندس قد الدنيا و بتشتغل وظيفة محترمة يعني مش ناقصك حاجه ايه اللي يمنع انك تشوف واحده عجباك في نادي او شغل او اي مكان تروح تقدم نفسك لها و تقولها انا عايز اتقدملك او تبعت لها مرسال بس علي الاقل تبقي انت اللي مختارها متهيألي ده احسن ما تفضل تحت رحمة الحاجه فلانه و علانه اللي بيجيبوا لك اشكال ما يعلم بيها الا ربنا ده حتي المثل بيقول ميحكش جلدك الا ضفرك و صدقني البنت اللي هتروحلها بنفسك انت هتكبر في نظرها و هتشوفك شخص واثق من نفسه و عارف هو عايز ايه متزعلش مني لو كلامي كان حاد او انتقادي بس يكمن انا شايف شئ من زاوية مختلفة انت مش شايفه و يهمني تشوفه
ردحذفاول انت حر في نظرتك لكل حاجه في حياتك هي في ايدك تمام و لا في حاجات قدريه خارجه عنك بس مين قالك ان يعني حصل اني شوفت عجبني في نادي و لا غيره ايه ضمنك ان الصدفه دي حصلت اصلا افرض يا اخي محصلتش و مين قالك ان في شغلي في انسات اصلا او حد يصلح للارتباط انا مش بهاجمك بس هو افتراض و تعميم منك جدا انك هتروح النادي فهتلاقي بنت تعجبك فتروح تكلمها انزل حضرتك كده نادي كل يوم جمعه او في اجازاتك و شوف هل مضمون تلاقي واحده تعجبك غير متزوجه و انسه و رد عليا عامه بس لازم تصدق ان البنت اللي كانت عجباك مكنتش ليك لو انت مسلم لان لو كان مكتوب لحضرتك اولاد منها كان لازم تتجوزها علشان الاولاد دي تيجي الدنيا و متنساش ان دينيا و في الاسلام و مش اجتهادات ان ربنا خلق ادم و عرض عليه كل ذريته باسمائهم اللي هتيجي من بعده لاخر فرد في الاخر يعني مكنش في عيل المفروض ربنا كاتب يتخلق مش هيجي او العكس او هتبقي امه واحده تانيه غير اللي ربنا كاتب انها امه او ابوه اب تاني و الا مش هيبقي نفس الشخض ركز و تمعن افي الكلام و متقعدش تقنع نفسك ان البنت دي كانت ليك و ان ابوك و امك هما اللي قدروا يغلبوا قدر الله و ارادته انها ليك و يحرموك منها
ردحذفليه في بنات متجوزتش و كل الشباب محتاج جواز
ردحذفهل بسبب لهم اهتمام لشاب تركهم و عايشين علي زكراه
أو بسبب أنه شكلهم منفر جدا و حتي دي كل فوله لها كيال
أو بسبب درسوا و اشتغلوا ومسكوا فلوس و طموحهم زاد في العريس و السن كبر و مجاش المطلوب
ليه مشكله العنوسه دي مكانتش ظاهره بالاجيال السابقه
وخصوصا البنات مطلوبين و مش لازم يحوشوا فلوس للجواز
و الله مش عارف الاجابه كل اجابه ممكن تتخيلها ليه حاجه تخليها مش الاجابه الصحيحه في فقراء جدا متزوجين يبقي الموضوع مش فلوس وفي جهله و متجوزين و في متعملين اعلي الشهادات و متجوزين و في اللي عايش علي ذكرا حد و برضه متزوج و في اللي شكله منفر و برضه متزوج مفيش اجابه صدقني غير اني قدر ربنا كتبه علي ناس تعيش و تموت و وحيده و تتحرم من متع الزواج الجسديه و الحسيه او البديل تلجأ للحرام لان الزواج مش مكتوب ليها او يعيشوا محرومين لانهم مش عايزين الحرام
حذف