يوم السبت اللي فات رحت علشان اعمل شويه تحاليل و بغض النظر عن التحاليل اللي طلعت فيها حاجات كتير مش مظبوطه زي الكوليسترول و تحليل السكر اللي طلع اني عندي مقاومه انسولين
المهم في اليوم ده دخلت علشان الدكتوره تسحب مني العينه ببص لقيت دكتوره متوسطه الجمال عينها ملونه و تحس وجودها كده يفرحك و انا قاعد علي الكرسي و بقول يا سلام لو الواحد يتجوز واحده زي دي لقيتها بتقولي استاذ فلان مظبوط قولتلها اه قالتلي السن 42 سنه
قولتلها مظبوط بصوت مبحوح كده و انا ببلع ريقي زي كأن صدمه نزلت علي دماغي و في وقتها نزل في دماغي صوره ماجده و زكي رستم في فيلم اين عمري و تخيلت نظره البنت دي ليا ايه و هي بتقرا عمري ده اذا افترضنا مثلا اني شكلي مش باين عليه اني راجل كبير كهل في الاربعينات سألتلني بتاخد اي ادويه قولتلها لا
و بدأت تسحب العينه و هي بتسحب العينه تليفونها رن مردتش رن تاني مردتش و هكذا لحد ما خلصت سحب العينه و بعدين ردت
سمعت صوت راجل شاب جي من ا لتليفون و لقتها بتقوله معلش مردتش علشان كنت بسحب عينه من طريقه اتصاله المتكرره و طريقه ردها عليه شكله خطيبها و لاحبيبها ولا حتي ممكن جوزها الله اعلم
سبتها و قومت و روحت و انا في طريقي للبيت بيعلب في عقلي سؤال واحد هو انا عمري راح فين هو انا ازاي وصلت لكده اني ابقي راجل عجوز قاعد قدام بنت شابه و مكسوف من عمري لاني من جوايا بتمني انها تبقي زوجتي او تبقي زوجتي شبها يا تري البنت شايفاني ازاي بقعد اتحسر علي نفسي لاني من 6 و لا 7 سنين مثلا كنت في منتصف الثلاثينات و كنت مش ببقي مكسوف قوي من عمري و كنت حاسس ان بكره الفرج هيجي و هتجوز و يبقي عندي بيت
افتكرت من 8 سنين لما جابولي عروسه و كان في رفض من امها لاني كنت 33 سنه و هي 24 و شايفه ان الفرق كبير
انا عمري راح معرفش في ايه و فرصي راحت في الحياه و الدنيا ضاقت عليا و الهم و المرض مسكني
انا بقيت و لا حاجه و مبقاش عندي امل في حاجه
حتي النهارده خدت اجازه من الشغل و قعدت افكر انزل بقي و اتفسح و لقيت نفسي بفتكر لما كنت في القاهره و كنت قاعد لوحدي علي نهر النيل و زهقان و الفسحه كانت نكد عليا
كنت من كام سنه بنزل افطر مع نفسي و اغير جو بس دلوقت مبقتش قادر
بقت حاسس اني عايز اهرب من عيون الناس و بحس في عينهم انهم شايفني راجل كبير عجوز بحس انهم لما بيشوفني بحسوا اني فيا حاجه غلط و بيحسوا ني مش متجوز و معنديش عيال
بس اني عوره بحس ان عمري عوره بتكسف من حالي و من نفسي مبقدرش اسيب نفسي اشوف بنت حلوه ماشيه قدامي لحسن تدور وشها لما تشوفني باعتبار اني راجل كبير عايب
انا مش عارف اعمل ايه في حياتي و مش عارف هعيش لحد امتي و انا بعاني كده
ربنا يشفيك ويعافيك من كل الامراض
ردحذفربنا يخليك يا باشا متشكر جدا
ردحذفانا عندي ٣٩ وفي بنت عندها ٢٥ يعني اتقدملتها ترشيح من الأهل بس حاسس انها مش في دماغها يعني بتقول موافقه بس مش حاسس كدا باهتمام و حاجه يعني كذا قعده تلاقيها ساكته كدا هي مجبوره عليا مثلا ولا ايه مع انها موظفه في بنك يعني وشكلا كويسه يعني اكيد بيجلها عرسان اصغر خايف اعمل خطوبه تفضل كدا ساكته رايك ايه حتي فاكر كانت لما اقعد معاها تفتح التلفزيون جنبي ونقعد نتفرج يعني مش بحس انها عايزه تكلمني بس أهلها مرحبين بيا وطيبين محتار
ردحذفرأي كلمها بصراحه قولها اعتبريني زي اخوكي الكبير لو انت مش متقبله الموضوع و حد فراضي عليكي قوليلي وا نا هخلي الموضوع يخلص من نحيتي من غير ما انتي تبقي اللي رفضتي و تعرضي نفسك لمشاكل مع اهلك بس طبعا حاول تلطف الكلام و تقولها المفروض البنت متخليش حد يجبرها علي شخص و متخدش بنصيحه حد انها تتجوز حد هي مش مقتنعه بيه يعني لو هي مقتنعه و اهلها ايدوها ماشي لكن العكس لا يعني حاول تسحبها في الكلام و هتستنج
حذفبس ساعات بتبقي مبتسمه كدا معرفش هي مثلا متعقده ولا خايفه ولا ايه بس انا الفكره هي مش مشجعاني اقولها كلام حلو هل لو لو مثلا غازلتها ممكن تبدأ تبدأ تلين ولا ايه معنتش عارف
ردحذفيا عم اولا الكلام الحلو حرام قبل كتابه العقد ده نصيحه دينيه تاخد بيها او لا ده اختيارك طبعا ثانيا يمكن برضه مكسوفه و لسه الموقف جديد عليها
حذف