اي حد درس رياضه متقدمه شويه سواء في الكليه او الدراسات العليا اكيد مر بالمنحني ده
المنحني ده سبحان الله هو محور الكون جيب نفسك في اي من امور حياتك هتلاقي نفسك واقع في منطقه من مناطق المنحني ده
جواز او ولاد او تعليم او غيره
زي ما المنحني بيبن ان منتصف شكل الجرس ده هو متوسط الرقم زي متوسط عمر الزواج متوسط الدخل متوسط المرتب ... الخ
و من المتوسط ده بتيجي الثلاث اجزاء اليمين و الشمال جزء بالزائد او الموجب و جزء بالناقص او السالب
يعني لو متوسط سن الجواز مثلا 30 فهتلاقي ان ممكن يوصل الي 45 مثلا من الجنب اليمين و الي 15 من الجنب الشمال
طبعا الرقم ده هو اكبر حاجه و بيسموه الانحراف المعياري في السكه لاكبر حاجه اللي هي مظلله بالاحمر هتلاقي حته بالاصفر و دي مثلا الي ممكن تبقي لحد ال 45 و في ال بالاخضر اللي اخرها ال 35 و من الناحيه التانيه تبقي مثلا 25 و 20
الخلاصه ان معظم الناس بتوقع في المنطقه الخضرا فانت لو لقيت نفسك جواها بتبقي انت طبيعي عادي الناس معظمها كده مفيش استغراب
لو في الاصفر فانت بتبقي من الناس اللي بيتقال عليها متأخر شويه في الجواز مرتبه قليل شويه او اتأخرت ترقيته شويه و هكذا
الناس بقي اللي في الاحمر دول هما اكتر ناس غريبه المنطقه الحمرا و الاحمر بيعني الخطر هي اللي بتقول عليك انك بقيت يا لحقت بالعافيه يا مخدتش حاجه عن النقطه اللي المنحني فيها بيلمس نقطه الصفر
للاسف بقي انا اعتبر في منتصف النقطه الحمرا في كل حاجه حياتي كلها و كل تفاصيلها في الاحمر
من فتره عملوا جروب علي الفيس للمدرسه بتاعتي و دخل فيها ناس كتير رجاله و ستات الناس دي حسستني اد ايه كبرت
تبص علي كل واحد او واحده فيهم تلاقي عيله قده و اللي متجوز من 12 سنه و اللي متجوز من 15 و الي مش عارف بقي ايه و اللي مش عارف وصل ايه
تلاقي نفسك انت بقي في الجزء الاحمر لا جواز و لا سعاده ولا فرح بحياتك و مش مصدق نفسك انك كبرت
لان الحقيقه انت معتشتش السن ده هي كانت مجرد سنين بتعدي اثرت علي شكلك و خلت شعرك يبيض و وزنك يزيد و شكلك يبان عليه السن ده كل مكتسباتك من السنين دي لكن علي المستوي الشخصي انت زي ما انت معشتش حاجه مفرحتش في حاجه
اللي هيشوفك في يوم ممكن يلاقيك قاعد في كافيه من الغالي بتشرب حاجه ولا بتاكل حاجه ولا لابس بنطلون حلو ولا حتي راكب عربيه معقوله هيقولك ياه ده الدنيا ضحكه ليه و البليه لعبه معاه
ميعرفش ان كوبايه القهوه اللي بتشربها او الاكله اللي شافك بتاكله او حته الهدوم هي دي كل اللي انت طالع بيه من دنيتك
هو ده كل انجازاتك في الحياه هو ده الحاجه اللي انت بتشتغل و تشقي علشانها
لا انت مبسوط ولا مرتاح و لا فرحان بل بالعكس انت في حسره و حزن
حزن علي انك كبرت علي الفاضي وقتك بيخلص و انت زي ما انت و لما تيجي تتحط علي مسطره الناس اللي في سنك من المجتمع مش هتسوي الا كوبايه القهوه دي او حته الهدوم لان هو ده اللي ممكن يفرقك عن غيرك اللي مقدرش يجبهم علشان هو وراه التزامات و اسره
هتحس ان الناس سبقاك بسنين ضوئيه
و اسوء ما في المنحني ده انك تبقي في الجزء الاحمر في كل حاجه او في معظم ا لحاجات
معروف اننا كبشر في الدنيا عايشين حياه شبيهه ببعض دراسه و تعليم يليه التحاق بوظيفه يليه تجهيز لبيت زوجيه يليه زواج و اسره يليه معاش او انك تجوز عيالك او ايهما اقرب لو ربنا كان مطول في عمرك
يعني بلغه الناس بتاعه اداره المشروعات ال milestones او احجار الزاويه محدده و معروفه لو محققتش واحده فيهم فانت هتفشل في تحقيق الباقي و هتفضل واقف مكانك مش بتتقدم
مع اقترابي من ال 40 اللي هي بنتكلم انها هتبقي قاضل عليها سنه و حته بسيطه لقيت اني فظلت خابط في الحيطه من يوم ما اشتغلت
الا من خطوه بسيطه طلعتها قدام في الشغل من 10 سنين فاتوا و محصلش غيرها و كانت لظروف فجائيه و قدريه و دلوقت الخطوه دي الي اصغر مني خدوها و عدوها من زمان و ده من 6 سنين مثلا يعني بالبلدي كده مفيش تميز مفيش مكسب مفيش حياه
في احساس بالنقص و القهر و الفشل و في حاجات غريبه تانيه هبقي اتكلم عنها
تخيل لما تشوف زميلاتك اللي كانت بنات صغيره بقت امهات لعيال بقت في اعدادي و في ثانوي كمان و شكلهم بان عليه السن
و تلاقي صحابك بقوا في منهم ناس شعرها ابيض زيك و في لا و بقوا ما شاء الله عندهم عيال طولهم و انت قاعد في المنقطه الحمرا
تبدء تلوم نفسك ما اتجوز اي جوازه و السلام اهو اتجوز اول واحده تيجي في سكتي و الموضوع يمشي و هكذا للعلم بس انا لا بدور علي حب ولا علي علاقه عاطفيه قويه ادت الي الجواز انا بدور علي حد يكون شكله انا راضي عنه
طيب السؤال بقي لو انا رحت عملت زي الناس هبقي سعيد و لا هبقي حالي عامل ازاي
اصلا هو الواحد بعد ما وصل للسن ده متوقع ايه من الجواز و الارتباط و العيال متوقع نفس السعاده اللي كانت هتحصل و هو 25 او 30 او حتي 35 سنه
سيدنا ابراهيم لما بشروه بسيدنا اسماعيل قال ابشرتموني علي ان مسني الكبر فبم تبشرون دي ايه من القرأن
ده كلام نبي المفروض معندهوش قنوط ولا يأس و عنده رضا قوي بحياته و قدره اللي كتبه ليه ربنا و رغم ذلك قال كده
امال الاشخاص العاديه اللي زينا و اللي معرفتها بالدين تعتبر وسط تعمل ايه
طيب هو انا ليه مقدر ليا ابقي في المنطقه الحمرا نفس السؤال ده ممكن تسأله بنت برضه عن سبب ان شكلها مش حلو او متجوزتش او مجلهاش عرسان تنفعها
طيب كان المطلوب منها ايه برضه تتجوز و السلام علشان تبقي زي الناس
علي فكره ان الحاله دي عندي موجوده بتاعه في كتير من قريباتي لدرجه اننا بنحس اننا عيله ملعونه
طيب هو فعلا كل واحده شفتها و قولت لا او بلاش نقول هي اللي قالت لا لان ده حصل و حصل كتير كان نصيبي تبقي مش مراتي
و لا انا اللي ضيعتها مني و كنت ممكن اتجوزها و اتغاضي عن شكل او اسلوب او غيره
هل فعلا ما فات لم يكن مقدر لي و لا انا بأيدي اللي ضيعته
هل انا اللي دخلت نفسي في المنطقه الحمرا ولا نصيبي و قدري اللي دخلني
ساعات اقعد اتجسس علي بروفايلات البنات اللي كانت بتتعرض عليا كعرايس و الاقيهم اتجوزوا و بقي عندهم اولاد مش كلهم طبعا بس نقدر نقول نسبه من 30 الي 40% منهم اتجوزوا و في لسه زي ما هما
في اتجوزوا ناس اصغر مني سنا و احسن مني شكلا هل معني كده ان ربنا انقذهم مني يعني فبعدني عنهم
ولا انهم كانوا مكتوبين للناس دي
هل انا مسئول و لا ضحيه لقدري
هل المفروض كنتي ارضي باي حاجه تيجي ولا اقول لا لان مش ده اللي عايزه و افضل لحد العمر ده زي ما انا
هل اصلا اللي كانوا بيجوا دول كانوا صح و لا غلط
في جمله واحد صاحبي قالهالي قال كل واحد بيجبلك حد و الواحد ده متهموش مصلحتك غالبا الشخص اللي جايبه ليك مش هيعجبك
و في واحد تاني قالي لما حد من صحابك او حد بتكلمه علي عروسه و ميكنش قريبك و ليه علاقه قويه بيك بيديك علي قد ادراكه ليك
بمعني انك واحد مقرب علي ال 40 شكلك مش عارف ايه شعرك خفيف يبقي كفايه عليك دي و يبعتلك واحده علي في رأيه هترضي بيك علشان هي برضه ضايعه فضايع هياخد ضايعه
مع ان الواقع اثبت كتير ان في بنات حلوه جدا و محترمه و متدينه و بنات ناس و بتاخد رجاله شبه القرود و انت مفيش مقياس لانت شكلك عامل ازاي فلابد تاخد واحده عامله ازاي
فعليا الجمله الاخيره دي بتحيك تاريخي في الجواز المره الوحيده اللي جاتلي بنت كويسه و حلوه كانت جايبها ليا عمتي بس محصلش نصيب لعدم الاتفاق و دي كانت اول عروسه اشوفها في حياتي
اللي بعد كده اللي جه عن طريق الحاجه فلانه و الحاجه علانه و الحاجه ترتانه اشكال ضايعه و يتقالك في نص الكلام اصل انت هتسكن في المنطقه الفلانيه و الناس مش هترضي اصل انت سنك كش عارف ايه فالناس مش هرتضي و هكذا
الحاجه فلانه و الحاجه علانه بتدي نفسها حق انها تبعتلك او ترشحلك البنت اللي هي شايفه ان دي اللي ممكن ترضي بيك و ده طبعا بناء علي ادراكها ليك شايفك حلو شايفك قرد ده رأيها فيك و علي اساس رأيها بتبعلك بقي من الجراب بتاعها الحاجه الضايعه اللي تناسبك يا ضايع
و البنت بنت الناس يتجاب ليها عرسان مضروبه علشان كبرت شويه في السن برضه عن طريق الحاجه فلانه و الحاجه علانه تجبلها واحد هيعيشها في مستوي اقل بكتير او واحد مطلق بعياله و من مبدء ما بنتك بقت 30 سنه
الحاجه فلانه و الحاجه علانه دخلونا في المنطقه الحمرا و ساهموا بشكل كبير انك تبقي فيها
امي نفسها ساهمت اني ابقي في المنطقه الحمرا لما كنت اصغر شويه في العشرينات و لما كانت حد بيكلمها ليا علي عروسه تقوله و هو لسه جاب شقه يقولوا لها يخطب و ربنا هيرزقه تقولهم لا محدش هيرضي بيه من غير شقه و عقبال ما حضرتك تبقي بقي جاهز تماما و جايب شقه كويسه تبقي كسرت حاجز ال 30 بسنه ولا اثنين و تلاقي ان كل البنات الحلوه اتخطفت و متتعرضش عليك لانك ايام ما كان بيتعرض عليك و انت اصغر سنا في العشرينات كان الرد انك مش جاهز
و تكتشف يا مؤمن ان ناس كتير بتتجوز في ايجار جديد و ناس كتير بتوافق ان بناتها ترتبط بشاب كويس بس امكانيته مش عاليه علشان لسه في مقتبل حياته
انا مش بحمل والدتي المسؤليه برضه لانها شافت كتير من الناس التانيه اللي بتطلب طلبات عجيبه شقه جنب امها او مهر و شبكه برقم معين و غيره بس يمكن بحملها انها ممكن من غير ما تقصد تبقي ضيعت عليا فرصه اني اشوف حد كويس و انا اصغر
لاني لما يبقي عندي 25 ولا 26 سنه هبقي بدور في سن ال 20 و ال 21 و ال19 في البنات فهتلاقي المعروض في حاجات تنفع كتير
كل ما بتكبر وعمرك بيكبر بتلاقي القفص بيفضي و يفضل فيه البواقي
و برضه يا جماعه الكلام ده للبنات و الولاد يعني البنت برضه كل ما بتكبر بيدوها من البواقي و ارضي بقي لو عايزه يبقي ليكي بيت و عيل
الهم جوايا كبير و الكلام كتير و احساس اني ولا حاجه و ان حياتي في الولا حاجه قاتلني
خلقي بقي ضيق جدا و فعليا مبقتش اطيق احايل خد و اتناقش و عصبيه فوق الوصف
انا تعبت فعليا حتي من الدعاء تعبت سنين طويله بدعي ربنا انه يحسن احوالي و يرزقني بالزوجه و البيت و مفيش فايده
قاعد في المنطقه الحمرا و مستربع و عمال اتزق لاخرها للنقطه بتاعه الصفر
اللي عشت و مت و مخدتش حاجه لا متأخر و لا بدري
ربنا يحسن الاحوال و يخلف ظني و يرزقني و يرزق كل من هو في حالي باللي يتمناه
ليست هناك تعليقات:
إرسال تعليق